?Yu Yu Wan Long Olgeta Ya?

‘I GUD blong kam olsem wan laeon blong wan dei bitim we yu kam wan sipsip blong wan handred yia.’ Benito Mussolini, we hem i bin stap olsem wan strong lida blong Itali i talem ol tok ya.

Olsem Mussolini plante man oli no wantem stap long grup we i olsem sipsip. Be, King Deved​—wan man Isrel we i raetem Sam bifo, i talem se: “[Jeova, NW] i stap lukaot long mi olsem we mi mi sipsip blong hem, . . . Hem i stap lidim mi mi go long kwaet ples we wora i stap ron smol long hem.” (Ol Sam 23:​1, 2) Yes, Jeova God i Bigfala Man blong Lukaot long sipsip, we i lukaotgud long ol man blong hem, olsem oli ol sipsip we oli no save mekem trabol nating.

Ol Sam 95:7 i tokbaot ol man blong God olsem oli sipsip, we yumi ridim se: “[Jeova, NW] i God blong yumi, yumi ol man blong hem we hem i stap lukaot long yumi, yumi ol [man long yad blong hem mo yumi olsem ol sipsip long han blong hem, NW].” Maet samfala oli ting se tok ya blong Ol Sam i mas tokbaot “ol sipsip long yad blong hem” mo “ol man long han blong hem.” Be long ples ya i tokbaot samting we i defren, mo ol man blong Jeova nomo oli tekem nem ya se ol sipsip blong hem. Oli glad long ol frut long yad blong God mo hem i lidim olgeta wetem han blong hem.

Pikinini blong Jeova, Jisas Kraes, i Gudfala Man blong Lukaot long sipsip. Plante taem hem i tokbaot ol man olsem oli sipsip. From samting ya, Jisas i tokbaot ‘ol sipsip we oli no plante’ mo ol “narafala sipsip” blong hem. (Luk 12:32; Jon 10:​14-16) Taem hem i stap tokbaot ol disaepol blong hem we oli gat tingting daon olsem sipsip, Jisas i talem se: “Ol sipsip blong mi oli save harem voes blong mi. Mi mi savegud olgeta, mo olgeta oli save biaen long mi. Mo mi mi givim laef ya long olgeta we i no save finis. Olgeta ya oli no save ded samtaem, mo i no gat man i save pulumaot olgeta long han blong mi.” (Jon 10:​27, 28) Long han blong rula ya we i gat kaengud fasin, oli save kasem gudfala frut from paoa blong hem, gudfala fasin blong hem, hem i lidim olgeta, mo i protektem olgeta.​—Revelesen 1:​16, 20; 2:1.

I no gat wan man we i save pulumaot ol man blong Jisas we oli olsem ol sipsip we hem i protektem olgeta long han blong hem. Tede, hem i stap seraotem olgeta man, ol “nani” we hem i no laekem olgeta no ol “sipsip” we oli save glad long laef we i no save finis aninit long rul blong Kingdom blong God long heven. (Matyu 25:​31-46) ?Yu yu stap olsem wan long olgeta sipsip ya we oli save kasem blesing?

[Foto Credit Line Blong Pija Long Pej 32]

Garo Nalbandian