Stampa Blong Wan Gudfala Famle Laef

WAN kandidet we i stanap las yia blong kam presiden blong Amerika i talem se, “Fasin joen long famle long ples blong yumi i stap foldaon.”

Yes, bigfala namba blong ol famle we oli stap foldaon i mekem man i fraet. Magasin ya Fortune i talem se, “Sipos ol jenis olsem oli kamaot long saed blong ekonomi mo faktri long sem taem bambae i mekem yumi sapraes bigwan.” Plante taem trabol ya i save gat paoa tu long ol famle we oli stap folem ol rul blong Baebol.

Long sam yia we i pas, wan Kristin man we i kaen i talem long fren blong hem we i wan papa blong sikis pikinini we oli no kasem tatin yia yet, se: “Yu save ting se bambae fo long ol pikinini blong yu oli no save stap long trutok.” Be, papa ya i no bilif se samting ya i save hapen long wan long ol pikinini blong hem tu. Hem i eksplenem from wanem.

Hem i talem se, “Ol pikinini blong mitufala oli no rili blong mitufala. Jeova God i givim long mi mo woman blong mi, wan ‘presen’ we hem i givim. Mo hem i talem se sipos yumi trenem olgeta long stret rod blong olgeta, ‘bambae oli no save lego rod ya samtaem.’ Taswe oltaem mitufala i bin traem blong keagud long olgeta olsem we oli blong Jeova nomo.”​—Ol Sam 127:3; Proveb 22:6.

Papa ya i soemaot wan stampa samting we i save mekem gudfala famle laef​—ol papa mama oli mas keagud long ol pikinini blong olgeta olsem we oli stap keagud long olting blong God. Yu gat responsabiliti blong keagud long ol pikinini we God i putum long han blong yu, nating se ol pikinini ya oli no save folem gud evri gudfala rod we yu talem long olgeta.

Wan Bigfala Responsabiliti

Yu mas mekem wok ya wetem dip respek mo strong tingting, i no blong mekem olbaot nomo no we yu no intres tumas long olgeta. Wok strong long wok ya wetem tingting ya se bambae yu ansabak long God from presen we hem i givim long yu. I no nid blong traem ol defren fasin blong lukaot long ol pikinini. Papa mama tufala i nidim nomo ol rod blong God blong tijim pikinini olsem oli stap long Tok blong hem, Baebol, mo oli mas folemgud ol rod ya.

Hemia nao samting we Jeova God i talem: “Mo bambae yu mas tijim [ol tok blong mi long ol] pikinini blong yu, mo yu mas tokbaot olgeta taem yu stap sidaon long haos blong yu, mo taem yu yu wokbaot long rod, mo taem yu go slip, mo taem yu yu girap. Mo yu mas fasem olgeta olsem wan saen long han blong yu, mo oli mas stap olsem wan mak bitwin long tufala ae blong yu; mo yu mas raetem long pos blong doa blong haos blong yu mo long get blong yu.” Baebol i talem tu se: “Yufala papa, . . . yufala i mas lukaotgud long [ol pikinini blong yufala]. Yufala i mas stretem olgeta, olsem Masta blong yumi i stap stretem yumi, i stap tijim yumi.”​—Dutronome 6:​7-9; Efesas 6:4.

Taswe fasin blong keagud long ol pikinini i mas gohed evridei; yes, i minim se yu mas spenem taem blong yu wetem olgeta mo antap moa, lav mo strong tingting blong yu. Ol papa mama we oli stap givim ol impoten samting ya we ol pikinini blong olgeta oli nidim, oli stap mekem ol samting we God i talem se oli mas mekem blong haremgud long wan gudfala famle laef.

?Yu ting se samting ya i tumas long yu blong mekem? Fasin blong plante papa mama i soemaot se oli ting olsem, oli harem olsem. Be, ol presen we God i givim​—ol pikinini blong yu​—oli rili nidim sam spesel fri taem blong spenem moa wetem olgeta.

Rod Blong Lukaot Long Olgeta

Wetem waes fasin, tingbaot eksampel blong olgeta we oli bin haremgud long gudfala fasin blong lukaot long pikinini. “Amazing Families,” store we i stap long skin blong wan magasin, i makemgud fo samting we oli impoten long fasin blong lukaotgud long ol pikinini: “[1] Toktok we i wekemap tingting long taem blong kakae, [2] ridim ol gudfala buk, [3] tingbaot eksampel blong ol gudfala man, [4] tingbaot se famle i gat rul blong folem.”​—U.S.News & World Report, Desemba 12, 1988.

Long saed blong “toktok long taem blong kakae,” tingbaot se God i talem long ol papa mama blong tijim ol pikinini blong olgeta taem oli stap sidaon long haos. ?Oltaem famle blong yu i stap sidaon blong kakae, mekem se i gat jans oltaem blong joen mo talem ol tok we oli pulum tingting no intres? Ol taem olsem oli impoten mo ol pikinini oli no save fogetem, oli harem se oli stap gud mo oli sef. Wan boe we i gat sikis yia i talem se hem i laekem ol taem blong kakae “from yu no save wari from narafala,” from we evriwan oli stap tugeta.

?Yu stap yusum wanem fasin blong toktok long taem blong kakae? ?Plante taem yu stap tokbaot ol samting we oli stap insaed long “ol gudfala buk,” olsem Baebol mo ol buk we oli stanap long Baebol, we oli stap tokbaot ol wok blong God we yumi stap mekem no ol store we oli tokbaot ol samting we God i mekem? Antap long fasin ya blong toktok long taem blong kakae, tru long wan program blong stadi oltaem, ol papa mama oli mas mekem se ol pikinini blong olgeta oli laekem God mo ol stret loa blong hem.

Papa ya we i gat sikis pikinini we yumi tokbaot fastaem i eksplenem se, “I no gat problem long fasin ya blong joen wanples oltaem long taem blong kakae. Samting ya i kam hem wan nomo, mo hem i blong mekem mifala i joen wanples. Be i had wok blong gat wan program blong mekem Baebol stadi oltaem.” From we hem i taed tumas afta we hem i bin wok had long fuldei, samtaem hem i slip long taem blong stadi. Be, neva hem i stop blong mekem Baebol stadi oltaem wetem ol pikinini blong hem, mo oltaem hem i toktok wetem wanwan long olgeta mo hem i tekem taem blong lesingud long olgeta.

Wetem fasin ya blong toktok long taem blong kakae mo fasin blong ridim ol gudfala buk, ?yu yu luk se ol pikinini blong yu oli “tingbaot eksampel blong ol gudfala man”? Yes, mekem rod blong ol pikinini blong yu oli joen oltaem wetem olgeta we oli folem eksampel blong man we i hae moa long olgeta man, Jisas Kraes, fasin ya i impoten sipos oli wantem kam ol bigman we oli gat gudfala fasin.

Laswan, ?olsem wanem long fasin ya blong “tingbaot se famle i gat rul blong folem”? Ol pikinini blong yu oli mas save se i gat ol rul blong famle we oli mas tingbaot blong folem​—se ol defren fasin, fasin blong toktok, fasin blong putum klos, ol fasin, mo ol narafala samting bakegen, oli no stret mo oli spolem rul blong famle. Oli mas save se fasin blong spolem rul blong famle i wan bigfala problem​—we i save mekem yu harem nogud tumas, olsem i hapen long Jekob bifo, we krangke fasin blong tufala boe blong hem ‘i mekem wan bigfala trabol long hem long kantri ya.’​—Jenesis 34:30.

Papa ya blong sikis pikinini we i tingbaot ol pikinini blong hem olsem olting blong God i leftemap “rul blong famle.” Oltaem hem i pulum tingting blong ol pikinini blong hem long ol rul blong putum klos, mekem hea, mo stap seraot long ol fasin blong ol man long wol, blong save olsem wanem ol samting ya oli laenap wetem tingting mo rod blong Man we i Mekem olgeta samting, Jeova God. Frut we i kamaot from papa ya i spenem plante taem, lav, mo kea long olgeta​—hem i bin trenem olgeta blong folem rod ya we oli mas wokbaot long hem—​nao olgeta sikis pikinini ya oli soemaot se oli lesin taem ‘oli no lego ol rod ya.’​—Proveb 22:6.

Raonabaot long wol, i gat plante taosen famle we oli joengud olsem. !Fasin ya i givim ona long Man we i Wokem olgeta, mo oli kam ol famle we oli no tingbaot olgeta nomo, oli ol papa mama we oli gat lav! Taem ol yia oli stap pas, ol papa mama olsem oli gat moa fasin tangkyu from ol pikinini blong olgeta we oli stap karem frut from had wok blong olgeta. Plis lukluk long nekis store we i tokbaot wan woman we papa mama blong hem we tufala i obeigud long God oli lukaot long hem, mo makemgud nambawan lesen we yumi save lanem long store ya.