Nesen We i Holemstrong Long God
“Openem ol get . . . blong nesen ya we i gat stret fasin, we i stap gohed blong mekem gudfala wok i save kam insaed.”—AESEA 26:2.
1. ?From wanem maet tok blong Aesea long saed blong “nesen ya we i gat stret fasin” i mekem yumi sapraes?
TEDE, i gat ol defren kaen nesen. Samfala oli gat demokratik gavman, sam narafala oli stap aninit long sam strongfala lida. Sam oli rij, sam oli pua. Wan samting we i joenem olgeta, se: Evriwan oli haf blong wol ya we Setan i god blong hem. (2 Korin 4:4) Taem yumi tingbaot samting ya, maet samfala oli sapraes long tok blong Aesea, taem i talem se: “Openem ol get, yufala olgeta man, blong nesen ya we i gat stret fasin, we i stap gohed blong mekem gudfala wok i save kam insaed.” (Aesea 26:2) ?Wan nesen we i gat stret fasin? Yes, i gat wan nesen we i gat stret fasin, from we profet tok i tokbaot wan nesen olsem. ?Olsem wanem wan man i save makemaot weswan nesen nao i gat stret fasin?
2. ?Wanem ya “nesen we i gat stret fasin”? ?Olsem wanem yumi save samting ya?
2 Taem oli tanem Aesea 26:2 long New World Translation, oli talem se nesen ya i “stap gohed blong mekem gudfala wok.” King James Version (majin) i tanem vas ya se, “nesen ya we i gat stret fasin, we i stap holem ol trutok.” Tufala rod blong tanem vas ya i stret nomo. Olsem nao, i isi blong luksave nesen ya we i gat stret fasin, from we hem i nesen ya nomo long wol ya, we i stap obei long Kraes we i King. Taswe nesen ya i no haf blong wol blong Setan. (Jon 17:16) From samting ya, ol man oli savegud ol memba blong hem from fasin blong olgeta blong ‘gohed blong mekem fasin we i stretgud long medel blong ol nesen.’ Oli folem wan fasin blong laef we i leftemap nem blong God. (1 Pita 2:12) Mo tu, nomata weples oli stap long hem long wol ya, oli haf blong ‘kongregesen blong God ya we i laef we i no save ded. Kongregesen ya, hem i stap holem trutok i stap gud, mo i stap blokem ol enemi blong hem.’ (1 Timote 3:15) From we hem i sapotem trutok, hem i sakemaot ol hae save blong ol hiten man we ol skul blong Krisendom oli stap tijim, mo oli sapotem ‘melek ya we i klingud, we i blong tok ya’—Tok blong God, Baebol. (1 Pita 2:2) Mo tu, oli wok strong blong talemaot gud nyus blong Kingdom “long olgeta man long wol.” (Kolosi 1:23) I klia nomo se “Isrel blong God,” kongregesen blong ol tabu Kristin we oli stap yet long wol ya, olgeta nao oli mekemap nesen ya.—Galesia 6:16.
Nesen Ya i Bon
3. Tokbaot olsem wanem nesen ya we i gat stret fasin i bon.
3 ?Wetaem “nesen ya we i gat stret fasin” i bon? Stat blong hem i joen wetem wan narafala fasin blong bonem pikinini we profet Aesea i tokbaot. Long Aesea 66:7, 8, yumi ridim se: “Bifo we hem [Saeon] i stat blong harem nogud, hem i bonem wan pikinini. Bifo we hem i harem nogud blong bonem pikinini, hem i bonem wan pikinini boe. . . . Saeon i harem nogud mo tu hem i bonem ol pikinini boe blong hem.” Samting we i narakaen olgeta se, Saeon, ogenaesesen blong God long heven, i mas bonem “wan pikinini boe” bifo we hem i harem nogud. Hem i mas bonem pikinini boe ya, bifo we hem i “bonem ol pikinini boe blong hem.” Long 1914, Kingdom blong Mesaea i bon long heven. (Revelesen 12:5) Afta long taem ya, taem plante moa nesen oli joen long faswan bigfala faet blong wol, ol tabu Kristin oli harem nogud tumas mo ol man oli ronem mo mekem nogud long olgeta. Biaen, long yia 1919, nesen ya long saed blong speret, “pikinini boe,” i bon long wol ya. Olsem nao, Saeon i ‘bonem ol pikinini boe blong hem,’ ol memba blong nyufala “nesen we i gat stret fasin,” we tabu speret i makemaot olgeta, mo oli folem plan blong gohed moa long wok blong prij bitim bifo.—Matyu 24:3, 7, 8, 14; 1 Pita 2:9.
4. ?From wanem nesen ya we i gat stret fasin i mas traehad blong holemstrong long God?
4 Stat long taem we nesen ya i bon, hem i stap fesem ol bigfala traem from fasin blong hem blong holemstrong long God. ?From wanem? Taem Kingdom blong heven i bon, oli sakem Setan mo ol enjel blong hem, oli aot long heven, oli kamdaon long wol. Wan bigfala voes i talem se: “Naoia God blong yumi i sevem yumi. Naoia hem i soemaot we hem i gat paoa, mo we hem i king. Naoia Mesaea blong hem i soemaot we hem i gat paoa long evri samting. From we man ya we i agensem ol brata blong yumi, we long dei mo long naet hem i stap talemaot ol poen blong hem long fes blong God, naoia God i sakem hem i goaot long heven finis. Mo ol brata blong yumi oli faetem hem, oli winim hem finis, long paoa blong blad blong Smol Sipsip ya, mo long paoa blong trutok we oli stap wetnes long hem se i tru. Olgeta oli winim hem from we oli no tingbaot laef blong olgeta tumas, oli rere nomo blong ded.” From we oli sakemaot Setan long heven, hem i kros tumas mo “i go faetem ol narafala pikinini blong [laen blong woman ya, we oli stap yet long wol]. Hemia olgeta ya we oli stap obei long ol loa blong God, mo we oli stap holem trutok we Jisas i wetnes long hem se i tru.” Taem ol tabu Kristin oli fesem ol trabol soa we Setan i mekem, oli no muf, oli stanap strong. Kam kasem tede, ol memba blong nesen blong God we i gat stret fasin mo we oli stap wok strong, oli soem bilif long blad blong Jisas we i olsem ransom. Mo taem oli stap holemstrong long God, ‘nating se oli mas ded from,’ oli gohed blong givim wan ansa long Jeova, blong hem i talem long bigfala man blong jikim man.—Revelesen 12:1, 5, 9-12, 17; Proveb 27:11.
5. ?Wanem nambawan tingting blong ol Wetnes tede we i halpem olgeta blong holemstrong long God?
5 Long 1919, taem wok blong talemaot Kingdom blong God i stat, ol Baebol Studen, hemia nem blong ol Wetnes blong Jeova long taem ya, namba blong olgeta i smol nomo, be bilif blong olgeta i strong. Oli kam ol memba we oli mekemap faondesen blong ‘wan strong taon, we ol ston wol mo ol gudfala ston blong flasem wol blong hem bambae oli sef.’ Oli putum tras blong olgeta long “Ja Jeova [we] i wan Bigfala Ston blong olwe.” (Aesea 26:1, 3, 4) Olsem Moses bifo, oli talem se: “Mi bambae mi talemaot nem blong Jeova. !Yufala i presem God blong yumi from hem i hae we i hae! Hem i Bigfala Ston ya, ol wok blong hem oli stretgud olgeta, from we olgeta fasin blong hem oli stret. God ya i holem olgeta promes blong hem, i no save mekem i no stret. Hem i stret we i stret.”—Dutronome 32:3, 4.
6. ?Long wanem rod Jeova i blesem ol man blong hem long ol lasdei ya?
6 Stat long taem ya, ol get blong go insaed long Kingdom blong God i open long eni man, we fastaem, blong hivimap ol 144,000 tabu man we oli stap yet long wol, mo naoia, bigfala hif blong “ol narafala sipsip” oli stap joen blong talemaot ol plan blong Kingdom blong Jeova. (Jon 10:16) Taswe, oli save talem wetem glad se: “Yu bin mekem nesen ya i kam bigfala moa; O Jeova, yu bin mekem nesen ya i kam bigfala moa; yu bin leftemap yu wan. Yu bin seftem ol mak blong kantri i go longwe moa.” (Aesea 26:15) !Taem yumi lukraon long wol tede, we i olsem garen, yumi faenem se ol tok ya oli tru nomo! Wetem paoa blong tabu speret, wok blong talemaot Kingdom blong Kraes we i stap kam “i finisim olgeta ples long wol.” (Ol Wok 1:8) Yumi save makem bigfala wok ya long Ripot Blong 1994 Sevis Yia Blong Ol Wetnes Blong Jeova Raonabaot Long Wol, we i stap long pej 12 kasem 15.
Wan Nyufala Namba Blong Ol Pablisa
7, 8. (a) ?Wanem pruf i soem se ol man blong God oli ‘mekem ol rop blong haos tapolen blong olgeta oli kam longfala moa’? (b) ?Taem yu lukluk long Ripot Blong 1994 Sevis Yia, yu luk wanem kantri ‘i seftem mak blong hem i go longwe moa’?
7 Tingbaot sam long ol nambawan samting long ripot ya. !Namba blong ol pablisa blong Kingdom long ful wol i kasem 4,914,094! Yumi haremgud tumas blong luk se wok i stap gohed blong hivimap “bigfala hif blong man, we . . . oli kamaot long olgeta kala mo long olgeta laen, mo long olgeta kantri, mo long olgeta lanwis. Olgeta oli werem waet klos. . . . !Nao oli stap stanap long fes blong God ya we i stap sidaon long bigfala jea blong hem, mo long fes blong Smol Sipsip ya”! Yes, olgeta ya tu, oli pruvum se oli stap holemstrong long God. “Oli wasem klos blong olgeta finis blong mekem oli waet long blad blong Smol Sipsip,” yes, oli kam stret man from we oli soemaot bilif long ransom sakrifaes blong Jisas.—Revelesen 7:9, 14.
8 Stat long 1919, wan voes i singaot i go long ogenaesesen blong Jeova se: “Mekem ples blong haos tapolen blong yu i kam bigfala moa. Mo mekem ol haos tapolen blong yu oli longfala moa. Yu no mas mestem. Mekem ol rop blong haos tapolen blong yu oli kam longfala moa, mo mekem ol pin blong haos tapolen blong yu oli kam strong.” (Aesea 54:2) Samting we i kamaot se, wok blong prij i stap gohedgud long Yukon tu, wan ples kolosap long Alaska we i kolkol tumas. Long ples ya, wan grup blong ol paenia we oli strong, oli stap fesem koltaem we long sam wik we oli folfolem olgeta, tempraja i godaon kasem 50 no 60 digri aninit long siro. Long ol yia we oli jes pas, kwiktaem nomo, bigfala hif blong man we namba blong olgeta i stap go antap, oli stap kam long nesen ya blong Jeova we i holemstrong long Hem. Ol get oli open bigwan moa, blong tekem ol man long ol kantri blong Esia we oli no joen long Krisendom, long ol ples we oli stap aninit long rul blong Komunis, long plante kantri long Afrika, mo long ol ples we Katolik i gat paoa long olgeta, olsem Itali, Spen, Potugal, mo Saot Amerika. Ol Refuji oli mekem se i gat nyufala teritori we i open. Eksampel, long Engglan, ol Wetnes oli stap lukaot long nid blong 13 grup blong man blong ol narafala kantri we oli gat ol defren lanwis.
“Stap Mekem Samting Ya”
9. (a) ?Namba blong ol man we oli kam long Memoriol long 1994 i soem wanem? (b) ?Wanem sam long ol kantri we i gat bigfala namba blong ol man oli kam long Memoriol?
9 Wan narafala samting ya we i nambawan long ripot blong yia, hemia namba blong ol man we oli kam long Memoriol. Smoltaem bifo we Jisas i ded, hem i stanemap Memoriol blong tingbaot ded blong hem, mo i talem long ol man blong hem se: “Yufala i mas stap mekem samting ya blong tingbaot mi bakegen.” (1 Korin 11:24) Long 1994, yumi glad tumas blong luk se 12,288,917 man—plante moa bitim tutaem long namba blong ol pablisa we oli stap wok strong—olgeta we oli kakae bred mo oli dring waen mo olgeta ya we oli blong lukluk nomo, oli joen tugeta blong obei long oda ya. Long sam kantri, namba blong ol man we oli kam long Memoriol i bigwan moa long namba blong ol pablisa. Ol 4,049 pablisa long Estonia, Latvia, mo Lituania, oli glad tumas blong luk 12,876 man oli kam long Memoriol, moa long tri taem bitim namba blong ol pablisa. Mo long Benin, ol 16,786 man we oli kam long Memoriol, i kolosap faef taem moa bitim namba blong ol pablisa. !Long wan kongregesen we i gat kolosap 45 pablisa, i gat 831 man oli kam!
10. (a) ?Bigfala namba blong ol man we oli kam long Memoriol i givim wanem bigfala responsabiliti long yumi? (b) Tokbaot samting we i save hapen taem wan we i kam long Memoriol i kasem moa help.
10 Ol Wetnes blong Jeova oli glad tumas se plante moa man we oli intres, oli stap kam joen wetem olgeta long impoten taem ya. Naoia, oli wantem halpem ol man ya blong gohed blong gru long saed blong save mo lav blong olgeta long trutok. Maet samfala oli save mekem olsem Alla long Rasia. Alla i stap stadi wetem wan sista we i wan spesel paenia, be hem i no gohedgud, taswe sista ya i stopem stadi. Nating se i olsem, Alla i akseptem taem oli askem hem blong kam long Memoriol. Miting ya, we i gat bigfala mining, i gat bigfala paoa long hem. Taem hem i kambak long haos blong hem, hem i sakemaot olgeta aedol blong hem mo i prea long Jeova blong givhan long hem. Tu dei biaen, paenia sista ya i visitim Alla blong save tingting blong hem long saed blong Memoriol. Tufala i mekem wan gudfala storeyan we i karem frut. Sista ya i statem stadi blong Alla bakegen. Smoltaem biaen, hem i joen long wok blong prij. Ekspiryens ya i soem se i impoten tumas blong visitim kwiktaem olgeta we oli kam long Memoriol. Maet plante bambae oli mekem olsem Alla.
“I Nogud Yumi Lego Ol Miting”
11-13. (a) ?Wanem i haf blong gudfala fasin blong nesen ya we i gat stret fasin? (b) ?From wanem ol trufala Kristin mas go long ol miting?
11 Long program blong ol Wetnes blong Jeova, Memoriol i moa impoten bitim ol narafala miting, be i no wan miting ya nomo we i gat. Evri wik, ol Wetnes oli joen wanples blong obei long ol tok blong aposol Pol se: “I gud yumi stap tingbaot yumi, blong yumi givgivhan long yumi blong mekem yumi strong blong laekem ol man, mo blong mekem ol gudfala fasin. I nogud yumi lego ol miting blong [kongregesen], olsem we sam long yumi oli mekem finis. Oltaem yumi mas stap toktok long yumi blong mekem tingting blong yumi i kam strong moa, from we yufala i luk we dei ya we Masta blong yumi bambae i jajem olgeta man, hem i kam kolosap finis.” (Hibrus 10:24, 25) Oli stap joen wetem nesen blong Jeova we i gat stret fasin, we oli luksave hem from gudfala fasin blong hem. Gudfala fasin i joen wetem strong tingting blong go long olgeta miting.
12 I klia se long Filipin, oli kasem savegud long samting ya. Namba blong olgeta we oli kam long miting evri sande blong ful kantri ya, i 125 % long namba blong ol pablisa. Long Ajentina, ol Wetnes mo ol man we oli intres, olgeta tu oli kasem savegud long samting ya. Oli stap samwe long 20 kilomita longwe long Haos Kingdom. Nating se i olsem, seket elda i givim ripot se, neva wan long olgeta i mestem ol miting, nomo sipos hem i sik. Oli mas mekem trep blong fo haoa long kat we hos i pulum no long baksaed blong hos, mo long koltaem, oli mas mekem trep blong gobak long haos blong olgeta long naet we i tudak we i tudak.
13 From we en blong ol fasin blong wol ya i stap kam kolosap moa, laef i stap kam moa strong, ol problem oli hivap, mo fasin blong go oltaem long ol miting i save kam had moa. Be blong fesem ol samting ya, naoia bitim bifo, yumi nidim moa ol kakae long saed blong speret mo gudfala fasin joen we yumi save faenem long ol miting ya nomo.
‘Oltaem Yumi Mas Strong Blong Talemaot’
14. ?From wanem ol Wetnes blong Jeova oli gat tingting ya se Kristin minista wok blong olgeta i impoten tumas, mo wanem ol risal we oli soemaot samting ya?
14 Las yia, Katolik Jyos long Itali i tokbaot wok blong ol Wetnes blong Jeova olsem “wan fasin blong fosem man blong jenisim bilif blong hem.” Be, neva ol Wetnes oli gat fasin olsem. Wok blong olgeta i wan fasin blong soem bigfala lav long ol man we oli stap kolosap long olgeta. Oli soem pruf tu se oli obei long tok blong Pol se: “Yu yu mas talemaot tok blong hem. Nating we ol man oli wantem harem tok ya no oli no wantem harem, be oltaem yu yu mas strong blong talemaot.” (2 Timote 4:2) Tingting ya se wok ya i impoten tumas i pusum ol Wetnes blong Jeova blong wok strong long Kristin minista wok blong olgeta. Yumi luk samting ya long wan total blong 1,096,065,354 haoa we oli spenem long 1994, blong prij long ol man we oli stap kolosap long olgeta, mekem ol visit bakegen, mo blong mekem 4,701,357 Baebol stadi evri wik. Plante oli naf blong joen long wok blong paenia, we i soem se tingting ya blong mekem wok blong paenia i strong mo i stap gru. Namba blong ol paenia raonabaot long wol we i kasem 636,202, i pruvum samting ya.
15, 16. (a) ?Olsem wanem ol yangfala mo ol olfala oli soem tingting blong paenia? (b) Taem yu lukluk long ol wanwan kantri long Ripot Blong 1994 Sevis Yia, ?weples yu luk bigfala namba blong ol paenia?
15 Long namba ya, i gat plante we oli yangfala. Long Yunaeted Stet naoia, sam yangfala oli stap wok olsem fultaem paenia long hae skul. Ol fren blong olgeta long klasrum nao, oli ol faswan man we oli prij long olgeta. Oli faenem se wok ya i wan nambawan rod blong protektem olgeta wanwan long fasin blong yusum drag, rabis fasin blong seks mo fasin blong faet, ol fasin we oli kam antap bigwan long plante skul long kantri ya. Plante narafala yangfala oli putum wok blong paenia olsem mak we oli wantem kasem taem oli livim skul. Irina, long Yukren, i mekem wok blong haftaem paenia long ol yia we hem i stap long hae skul, blong rerem hem wan blong mekem wok blong paenia afta we hem i kamaot long skul. Taem we hem i kamaot long skul, famle blong hem i givhan long hem long saed blong wok blong winim mane, blong hem i save mekem wok blong fultaem paenia long nem blong olgeta. Long saed blong mane, ol samting oli no isi long Yukren. Be Irina i talem se: “Mi save se mi mi stap mekem wan wok we i minim laef long mi, be i no long mi nomo, long olgeta ya tu we mi prij long olgeta.” Yumi rili haremgud tumas blong luk se tede, plante yangfala oli gat tingting olsem Irina. ?I gat wan narafala rod we i moa gud, we ol yangfala ya oli save folem blong ‘tingbaot Bigfala Man we i wokem olgeta, taem oli yang yet’? No gat.—Eklesiastis 12:1.
16 Bigfala namba blong paenia oli gat plante yia. Wan olfala sista i givim ripot se, long namba tu bigfala faet blong wol, oli kilim i ded papa mo brata blong hem, taem tufala i stap long faet. Oli sutum mama mo sista blong hem long wan ples long taon we ol nogud man oli stap long hem. Afta, boe blong hem i ded. Naoia, we hem i stap kam moa olfala mo i stap safa from helt blong hem i kam nogud, Jeova i givim long hem, long Kristin kongregesen, wan famle we i bigfala moa bitim hemia we hem i lusum. Mo hem i faenem glad, taem i stap wok olsem wan fultaem paenia blong halpem ol narafala man.
17, 18. ?Olsem wanem wanwan long yumi, nating se yumi wan paenia no no gat, i save soem tingting blong paenia?
17 Tru ya, i no evriwan we i save kam wan paenia. Jeova i glad blong tekem fulwan ol ten hif we yumi givim, beswan we yumi save givim long saed blong speret, nomata wanem samting we yumi naf blong givim. (Malakae 3:10, futnot) Yes, yumi evriwan, yumi save gat tingting olsem ol paenia ya we oli wok strong mo yumi save mekem wok we ol samting long laef blong yumi oli letem yumi blong mekem, blong talemaot gud nyus.
18 Eksampel, long Ostrelya, oli mekem plan se Epril 16 i wan spesel dei blong prij long rod. Ol pablisa mo ol paenia tu oli sapotemgud plan ya, olsem nyufala namba blong ol pablisa long manis Epril we i kasem 58,780 i soem. Mo tu, oli seremaot 90,000 moa magasin bitim namba blong magasin we oli seremaot long sem manis long las yia. Long spesel dei ya, wan sista i seremaot sam magasin long wan man, mo taem sista ya i stap tekem nem mo adres blong man ya blong visitim kwiktaem ol man we oli intres, sista ya i faenemaot se man ya i wan famle blong hem! Man ya i wan kasen blong sista ya we tufala i no luk tufala blong 30 yia. !Olsemia nao, sista ya i save mekem sam visit we hem i glad tumas long olgeta!
Holemstrong Long God Go Kasem En
19. ?From wanem i impoten tumas se nesen blong Jeova we i gat stret fasin i mas holemstrong long God, gogo kasem en?
19 From we en blong wol blong Setan i kolosap, i impoten tumas se olgeta we oli stap long nesen blong God we i gat stret fasin, evriwan oli mas holemstrong long God. I no longtaem, tabu nesen blong Jeova bambae i harem bigfala voes we i talem tok ya se: “Ol man blong mi, yufala i go long ol rum blong yufala we i stap insaed olgeta long haos, mo yufala i satemgud ol doa biaen long yufala. Yufala i go haed lelebet, gogo ol tok panis oli pas finis.” Wol ya we i mekem tumas blad i ron bambae i mas fesem jajmen blong God. “!From we, yu luk! Jeova i aot long ples blong hem, i stap kam blong panisim ol man blong kantri ya we oli mekem sin agens long hem, mo i tru, kantri ya bambae i mekem se man we i mekem blad i ron, i kam long klia ples mo bambae hem i no moa kavremap ol man we hem i kilim i ded.” (Aesea 26:20, 21) I gud wanwan long yumi i stanap strong olsem wan Kristin we i holemstrong long God, we i joen wetem nesen blong Jeova we i gat stret fasin. Ale bambae yumi glad blong kasem laef we i no save finis aninit long rul blong Kingdom blong Kraes.
?Yu Yu Save Tingbaot?
◻ ?Wetaem “nesen ya we i gat stret fasin” i bon?
◻ ?From wanem ol man blong God oli nidim fasin blong stanap strong longtaem long ol lasdei ya?
◻ ?Bigfala namba blong ol pablisa mo ol haoa we oli spenem olsem yumi luk long Ripot Blong 1994 Sevis Yia i soem wanem?
◻ ?From wanem fasin blong go long ol miting i impoten tumas taem en blong wol ya i stap kam moa kolosap?
◻ ?From wanem olgeta we oli stap joen wetem nesen blong God we i gat stret fasin oli mas gohed blong holemstrong long God?
[Tok blong pija long pej 18]
Ol man we oli holemstrong long God, we oli stap long nesen blong Jeova we i gat stret fasin, bambae oli kasem laef we i no save finis we i stretgud olgeta