?Baebol i Talem Wanem Long Saed Blong Daniel?

Ansa we Baebol i givim

Daniel i wan man jiu mo i wan spesel profet, we i laef long ol yia 600 mo 500 B.K.T. Mo God i mekem se hem i save talemaot mining blong ol drim, luk vison blong ol samting we bambae oli hapen long fiuja, mo i pulum hem blong raetem buk ya long Baebol we i tekem nem blong hem.—Daniel 1:17; 2:19.

?Daniel hem i hu?

Daniel i gruap long kingdom blong Juda long taon blong Jerusalem, ples we tempol blong ol man Jiu i stap long hem. Long yia 617 B.K.T., Nebukadnesa we i king blong Babilon i holemtaet Jerusalem mo i tekem “ol impoten man blong taon” oli go kalabus long Babilon, mo oli tekem Daniel tu. (2 King 24:15; Daniel 1:1) Long taem ya, maet Daniel i no kasem twanti yia yet.

Ol gad blong king blong Babilon oli holemtaet Daniel mo sam narafala yangfala.

Oli tekem Daniel mo sam narafala yangfala (hemia Sadrak, Mesak, mo Abednego) i go long pales long Babilon blong oli kasem ol spesel trening blong wok long gavman. Daniel mo trifala fren blong hem oli gohed blong holemstrong long God blong olgeta Jehova, nating se ol haeman oli fosem olgeta blong mekem samting we i agensem bilif blong olgeta. (Daniel 1:3-8) Afta long tri yia, King Nebukadnesa i stap presem Daniel mo ol fren blong hem, from waes blong olgeta mo gudhan we oli gat. Hem i skelem olgeta wetem ol narafala mo hem i makem se “fofala ya oli gud ten taem moa i bitim ol pris we oli stap mekem majik, mo ol man blong majik long olgeta ples we hem i rul long hem.” From samting ya, hem i putumap Daniel mo ol fren blong hem blong oli wok long haos blong king.—Daniel 1:18-20.

Plante yia biaen, taem Daniel i gat samwe 90 yia, oli singaot hem i go long pales. Mo King Belsasa we i rul long Babilon long taem ya, i askem Daniel blong talemaot mining blong ol raeting we i stap long wol. Jehova i halpem Daniel blong i save mining blong ol raeting ya, nao hem i talemaot se gavman blong Media mo Pesia bambae i winim Babilon. Mo long sem naet ya nomo oli holemtaet Babilon.—Daniel 5:1, 13-31.

Daniel i stap talemaot miting blong raeting we i stap long wol.

Nao taem Media mo Pesia i rulum Babilon, oli putumap Daniel i kam wan haeman long gavman, mo King Darias i wantem promotem hem. (Daniel 6:1-3) Be i gat sam haeman we oli jalus long Daniel, nao oli wantem sakem hem long hol blong laeon blong hem i ded, be Jehova i sevem Daniel. (Daniel 6:4-23) Taem Daniel i olfala we klosap i ded, wan enjel i kamtru long hem mo tu taem hem i leftemap tingting blong hem i se “yu yu wan man we yu sas tumas.”—Daniel 10:11, 19.

Blong luk stori ya, yu save wajem Baebol Drama ya we i gat tu haf blong hem, taetol blong hem se Daniel—Hem i Bilif Strong Oltaem.

?Histri i talem wanem long saed blong buk blong Daniel?

Samting we Daniel i talem: Nebukadnesa i wokem wan bigfala pija, mo i givim oda ya se olgeta man blong hem oli mas wosipim, mo hem i sakem olgeta we oli no obei i go long strong faea we i laet i stap.—Daniel 3:1-6.

Samting we histri i talem: Encyclopædia Britannica i talem se Nebukadnesa i wokem ol bigfala bilding long Babilon “i no blong ona long hem nomo, be blong ona long ol god blong hem tu. Hem i stap talem se ‘hem nao i mekem se ol man oli stap wosipim ol hae god.’”

Long saed blong fasin ya blong bonem man long faea, ol olfala ripot blong Babilon oli tokbaot samting ya, mo oli tokbaot sam kes we ol haeman oli givim raet blong bonem narafala long faea. Wan ripot we oli raetem long taem ya we Nebukadnesa i rul, i tokbaot panis we sam haeman oli kasem from we oli no respektem ol god blong Babilon. Ripot ya i se: “Distroem olgeta, bonem olgeta, rusum olgeta, . . . sakem olgeta i go long oven . . . mekem smok i go antap, mekem faea i smok mo i laet strong blong kilim olgeta oli ded.”a

Samting we Daniel i talem: King Nebukadnesa i tokflas from ol wok we hem i mekem.—Daniel 4:29, 30.

Wan brikis we oli faenem long Babilon, we nem blong Nebukadnesa i stap long hem

Samting we histri i talem: “Ol samting we Nebukadnesa i raetem long saed blong hem wan i soemaot se hem i gat tingting se hem i bigfala king we i stretgud mo i gat bigfala paoa.”b Eksampol, long wan long ol bilding we hem i wokem, hem i mekem oli raetem se: “Mi yusum kolta mo brikis blong wokem ol bigfala wol ya we i olsem wan bigfala hil, hem i no save muv . . . Mi mekem se wol blong Esagila mo Babilon i strong moa, blong ol man oli tingbaot rul blong mi blong olwe.”c Long Babilon, ol man oli faenem plante brikis we nem blong Nebukadnesa i stap long olgeta.

Samting we Daniel i talem: King Belsasa i askem Daniel blong “rul olsem namba 3 man long kingdom” blong Babilon.—Daniel 5:1, 13-16.

Wan ston blong yia 550 B.K.T. i tokbaot King Nabonidas mo boe blong hem Belsasa

Samting we histri i talem: Ol samting we Daniel japta 5 i tokbaot, oli hapen long taem ya we man ya Nabonidas i king. Be long taem ya we hem i rul, hem i no stap oltaem long Babilon, hem i stap long Arebia. ?Hu i rul long Babilon taem hem i stap longwe? Wan man blong histri, Raymond Philip Dougherty i raetem long buk blong hem Nabonidus and Belshazzar se: “Long wan ripot we oli raetem bifo, oli tokbaot se Nabonidas i givim wok blong king long fasbon blong hem Belsasa blong i mekem. Nao Belsasa i mekem ol wok olsem king taem papa blong hem i no stap.” From we Nabonidas mo Belsasa oli holem finis faswan mo seken posisen long kingdom, Belsasa i save talem long Daniel blong i tekem namba 3 posisen.

a Journal of Biblical Literature, Volium 128, Namba 2, pej 279, 284.

b Babylon—City of Wonders, we Irving Finkel mo Michael Seymour i wokem, pej 17.

c Archæology and the Bible, we George Barton i wokem, pej 479.