Jus Blong Divos

“Sipos hasban blong yu i ded, ol man oli kasem save long filing blong yu, nating se maet yu no bin wan gudfala waef oltaem. Be taem hasban blong yu i lego yu—sam man oli ting se yu no traehad inaf. !Plis, plis, GIVHAN LONG MI!”—Wan woman blong ridim Wekap! long Saot Afrika.

TRABOL we i kamaot from fasin blong no stap tru insaed long mared, mo divos tu, tufala i save mekem man i harem nogud bitim mak. Plante waef oli save joengud bakegen wetem hasban blong olgeta, mo long rod ya, oli sevem mared blong olgeta. Be sam narafala oli gat gudfala risen blong divos long hasban blong olgeta we i slip wetem narafala woman, from we God i agri long wan divos olsem. (Matiu 5:32; 19:9) Wan eksampel, wan waef we i gat stret fasin mo ol pikinini blong hem, maet oli stap long denja from we hasban i mekem bigfala trabol long olgeta long bodi, long spirit, no long filing blong olgeta. Maet tu, hem i fraet we hasban blong hem i givim wan rabis sik long saed blong seks long hem. No maet, nating se hem i fogivim hasban blong hem we i slip wetem narafala woman, be hem i no ting se hem i save trastem hem bakegen mo karembak hem olsem hasban blong hem.

Wan waef we i harem nogud tumas i talem se: “Disisen ya i moa strong blong mekem, bitim ol narafala disisen long laef blong mi.” I tru, disisen olsem i strong blong mekem—i no jes from hem i harem nogud from ol giaman, be tu from we divos bambae i jenisim laef blong hem fulwan. Taswe disisen ya blong divos long hasban blong hem we i no stap tru, no nogat, hem i prapa jus blong hem. Yumi evriwan i mas gat respek long raet we Baebol i givim long ol waef we oli no gat fol, blong mekem jus ya.

Be, sore tumas, plante man oli kwik blong divos, be oli no tingtinggud fastaem. (Skelem wetem Luk 14:28.) ?Wanem ol samting blong tingbaot long saed blong divos?

Sipos Oli Gat Pikinini

Wan buk (“Ol Man Mo Woman Oli Kasem Bigfala Trabol,” Engglis) i talem se: “Plante taem ol papa mama we oli bisi tumas wetem ol problem blong olgeta, oli no tingbaot nid blong ol pikinini blong olgeta.” Taswe, sipos yu wantem divos, yu mas tingbaot ol filing blong ol pikinini mo ol nid blong olgeta long saed blong spirit. Ol man blong stadi long divos oli talem se, sipos papa mama oli traem stap fren, nating se oli divos, ol pikinini bambae oli no safa bigwan. Nating se oli fesem hadtaem, kwaet fasin i save givhan blong ‘oli no man blong faet, oli mekem i gud long olgeta man, we tingting blong olgeta i longfala.’—2 Timoti 2:24, 25.a

Sipos wan i jus blong divos, yumi no mas foget se hasban mo waef, tufala i save divos, be ol pikinini, no gat. Ol pikinini ya oli nidim tufala Papa mo Mama. Samtaem nomo i no olsem. Eksampel, sipos papa i bin slip wetem prapa gel blong hem, i nogud gel ya i go stap wetem papa. Be sipos no, sipos papa mama oli no agri long saed blong skul nomo, no sam narafala tingting olsem, oli no mas yusum samting ya blong blokem pikinini. Pikinini i mas haremgud wetem tufala, papa mo mama.

Wan narafala samting blong tingbaot: ol filing blong ol smol pikinini oli no strong, mo oli gat nid blong papa mama i leftemap tingting blong olgeta mo i lavem olgeta. Wan buk i talem se: “Papa mama i mas gohed blong lavem olgeta oltaem. Nao bambae i moa isi long olgeta blong laef afta divos blong tufala.” Antap long samting ya, sipos papa mama i givhan long olgeta long saed blong spirit evri dei, bambae oli save stanap strong.—Dutronome 6:6, 7; Matiu 4:4.

Ol Bisnes Long Saed Blong Mane Mo Kot

Divos i mas mekem se tufala i lusum haf blong mane mo graon, sam samting we oli laekem long laef blong olgeta, mo maet haos blong olgeta we oli laekem tumas. Maet ol kaon blong man i kam antap, be pei blong hem i godaon, taswe i waes we hem i skelem mo yusumgud mane blong hem long ol samting we oli impoten moa. Hem i no mas folem tingting ya blong spenem moa mane jes blong haremgud, from we biaen bambae hem i gat bigfala kaon blong pem.

Sipos wan i jus blong divos, hem i nidim blong tokbaot ol mane we i stap long bang long nem blong tufala tugeta. Blong no yusum mane ya long rod we i no stret, maet oli nidim blong askem bang blong mekem se, taem wan i wantem karemaot mane, tufala tugeta i mas saen, go kasem we tufala wanwan i gat prapa bangbuk blong tufala.

I gud tu blong raetemdaon long wan buk ol mane we oli winim mo we oli spenem, blong oli rere long taem we bambae oli tokbaot mane we hasban i mas givim from waef blong hem mo ol pikinini. Long plante kantri tu, loa i askem se ol man oli mas talemaot long ol man blong takis we tufala i divos finis.

Antap long samting ya, plante man oli faenem i moa gud taem oli go luk wan loea—wan we i gat ekspiryens long saed blong divos. Long sam kantri, oli gat ol man we wok blong olgeta i blong halpem ol hasban mo waef blong wokgud tugeta, blong oli save agri long wan fasin we tufala oli glad long hem, mo biaen i isi blong kot i mekem se kontrak ya i stanap. Plante papa mo mama oli laekem moa blong yusum wan loea we fasin blong hem i no blong kilim strong narafala. Ol papa mama olsem, oli no tingbaot blong win, blong faet mo blong mekem narafala ya i harem nogud. No gat. Sipos oli faet, maet oli save kasem sam samting long saed blong bodi, be biaen tingting blong olgeta i konkon mo oli save lusum bigfala mane tu.

Ol Fren Oli Jenis

Wan man i talem se: “Plante man oli sem taem oli stap wetem ol fren blong olgeta we oli divos. Fasin ya i strong tumas.” Wan waef i gat raet blong divos long hasban blong hem we i mekem nogud. Fasin ya i stret long loa blong kantri, long stret fasin, mo long Baebol tu. Be maet sam man oli talem se mared ya i brok from woman ya. Ale taem oli talem halo long hem, oli kolkol, no maet oli stap longwe long hem. Moa nogud, maet sam we bifo oli gud fren blong hem, naoia oli agens long hem.

Plante man oli no luksave se wan man we hem i jes divos, i nidim sapot. Maet oli ting se i naf blong sanem wan smol leta no wan kad. Be, olsem wan buk (Divorce and Separation) i talem se, oltaem i gat sam fren we oli “save soem stret filing, mo bambae oli kam blong luk sipos yu wantem go samples tugeta, no sipos yu nidim olgeta blong mekem wan samting, no jes blong toktok.” I tru, long taem olsem, wan man i nidim wan tru fren, we olsem Baebol i talem, “i winim ol brata.”—Ol Proveb 18:24.

Wok Blong Kamgud Bakegen

Sikistin yia afta long divos blong hem, wan Mama i talem se: “Kasem naoia i gat taem we mi harem nogud from mi harem se mi stap mi wan—nating se ol man oli stap raonabaot long mi.” ?Olsem wanem hem i winim filing ya? Hem i tingtingbak, i se: “Mi mekem sam samting blong blokem filing ya, mi stap bisi long wok blong lukaotem pikinini boe blong mi, mo blong lukaotem haos. Mi stat tu blong go long ol miting blong ol Witnes blong Jeova, blong serem bilif blong mi wetem ol man raonabaot long mi, mo blong givhan long ol narafala. Ol samting ya oli givhan bigwan long mi.”

Maet long sam spesel dei blong yia, yu harem nogud from we yu stap tingtingbak: olsem dei we yu bin faenemaot se man blong yu i slip wetem narafala woman, dei we hem i lego yu, no dei we yu pas long kot. Mo tu, i no isi blong tingtingbak long ol glad taem we yutufala i bin serem—olsem ol taem blong go spel mo dei blong mared—mo tingting olsem i save spolem filing blong yu. Pat i talem, “Blong fesem ol dei ya, mi plan blong spenem taem wetem famle blong mi, no wetem sam gudfala fren we oli kasem save long filing blong mi. Mifala i mekem sam samting tugeta, we oli blokem mi, blong mi no tingbaot ol samting blong bifo. Gudfala taem ya we mi spenem wetem ol fren ya, biaen mi save tingtingbak long hem tu. Be wan samting we hem i givhan long mi, bitim olgeta narafala samting, hem i fasin fren blong mi wetem Jeova—save ya we hem i kasem save long filing blong mi.”

No Letem Tingting i Foldaon

Woman we hasban blong hem i mekem i krangke long hem, we blong folem ol rul blong Baebol hem i jus blong yusum raet we God i givim long hem blong divos, hem i no mas harem se hem i gat poen. Hem i no mas fraet tu se Jeova bambae i lego hem. Rabis rod ya blong hasban we i no stap tru—we i mekem waef ‘hem i harem nogud, nao hem i krae from’—i wan samting we Jeova i no laekem nating. (Malakae 2:13-16) Mo Jeova hem i God “we hem i kaen tumas mo hem i gat sore long yumi,” taswe hem i kasem save long filing blong yu taem wan we yu laekem hem tumas i lego yu. (Luk 1:78; Jeremaea 3:1; 31:31, 32) Yu save bilif strong se “Hae God i laekem ol fasin we i stret, mo i no save lego ol stret man ya we tingting blong olgeta i stap strong long hem.”—Ol Sam 37:28.

I tru, i moa gud sipos yumi save blokem fasin blong no stap tru insaed long mared mo ol trabol we i kamaot from. Spesel Rod Blong Mekem Famle i Hapi,b wan buk we i givim ol advaes we i wok insaed long famle, i givhan long plante man long ful wol blong mekem mared blong olgeta i hapi mo blong blokem fasin blong no stap tru insaed long mared. I gat sam japta we oli tokbaot olsem wanem blong wokem wan hapi mared, blong trenem pikinini, mo blong winim ol problem insaed long mared. Ol Witnes blong Jeova long eria blong yu, mo olgeta we oli wokem magasin ya Wekap!, bambae oli glad blong givim moa save long yu long saed ya sipos yu askem.

[Futnot]

[Bokis blong pija long pej 10]

I NO STRET OL PIKININI OLI FESEM DIVOS

Long 1988, taem Diana Princess of Wales i laef yet, hem i talem se long Engglan nomo, evri dei klosap 420 pikinini oli mas fesem divos blong papa mama blong olgeta. Wan bighaf blong ol pikinini ya, oli no gat faef yia yet. Be, sore tumas, 40 pesen blong ol pikinini ya oli no moa luk wan blong tufala papa mama bakegen afta long divos.

Wan man blong raet long saed blong helt i talem se plante man oli no savegud ol filing blong ol pikinini. Hem i se: “I gat smol namba nomo blong ol pikinini we papa mama blong olgeta oli divos, we oli glad se famle i seraot. Bighaf blong ol pikinini ya i moa glad sipos papa mama i stap tugeta, nating se i gat sam problem insaed long famle.” Mo nating se long taem we waef i lan se hasban i slip wetem narafala, tufala i rao bigwan, oli no mas hareap blong ting se sipos tufala i finisim mared, bambae i moa gud long ol pikinini. Sipos oli mekem sam jenis long tingting mo fasin blong olgeta, maet oli save gohed blong stap tugeta blong mekem se ful famle i haremgud.

Wan woman we nem blong hem Pamela Winfield, i talem se: “Ol hasban we oli slip olbaot, oli mas tingbaot bigfala soa we bambae oli luk long fes blong pikinini blong olgeta, taem famle i seraot from rabis fasin blong olgeta.”

[Bokis blong pija long pej 11]

?GOD I NO LAEKEM OLKAEN DIVOS?

Pat i talem se: “Samting we mi wari bigwan long hem, hemia tingting ya se Jeova i ‘no laekem nating fasin ya we man i mekem divos long woman blong hem.’ Oltaem mi tingbaot kwestin ya, ‘?Mi mi mekem samting we Jeova i glad long hem?’”

Yumi save luk long ol vas raonabaot long Malakae 2:16 blong faenem ansa long kwestin ya. Long taem blong Malakae i gat plante man Isrel we oli divos long waef blong olgeta, maet blong mared wetem ol hiten woman we oli moa yang. God i tok strong agensem rabis, giaman fasin ya. (Malakae 2:13-16) Samting we God i no laekem nating, hem i we man i lego waef blong hem from wan risen we i no impoten nating, jes blong karem narafala woman. Wan man we i giaman mo i slip wetem narafala woman, mo biaen i divos long waef blong hem no pusum waef blong divos long hem, hem i mekem wan sin we i rabis we God i no laekem nating.

Be, ol vas ya oli no agensem olgeta divos. Yumi save samting ya from ol tok blong Jisas: “Sipos wan man i mekem divos long woman blong hem, we woman ya i no bin slip wetem narafala man, nao man ya i go mared long narafala woman, man ya i mekem sin.” (Matiu 19:9) Jisas i soemaot long vas ya se, Baebol i givim raet blong divos from risen ya se man i slip wetem narafala woman we i no woman blong hem—yes, risen ya nomo i givim raet blong divos mo mared bakegen. Maet wan we i no gat fol i jus blong fogivim hasban blong hem we i mekem rong. Be, sipos wan waef i folem toktok blong Jisas, mo i jus blong divos long man blong hem we i no stap tru long hem, yumi no save talem se Jeova i no laekem nating fasin ya. Giaman fasin blong hasban blong hem we i no stap tru, hemia nao samting we God i no laekem nating.

[Tok blong pija long pej 10]

Ol waef we oli no gat fol mo ol pikinini blong olgeta oli kasem blesing from we ol narafala oli sapotem olgeta wetem lav.