‘Kambak Long Mi, Mo Bambae Mi Mi Gobak Long Yu’

FAMLE ya oli stap haremgud blong wokbaot long bus. Nao, Pita, smolwan long olgeta pikinini long famle ya, i aot long grup, i resis i godaon long wan hil blong ronem wan smol rabet. Kwiktaem, klaod i kavremap skae, ren i stat blong foldaon. Fastaem ren ya i smol nomo, be sloslou hem i kam bigwan. Kwiktaem famle ya i karem olting blong olgeta mo oli resis i go long trak blong olgeta. Mo evriwan oli wari long Pita.

Pita, long semtaem, hem i stap traem blong gobak long famle blong hem. Be i hadwok blong lukluk klia, mo rod blong go antap long hil i glis from ren. Nao, graon we hem i stanap long hem i open nao Pita i foldaon i go insaed long wan dip hol we i haed. Hem i traem blong klaem i go antap, be ol saed blong hol ya oli glis.

Wora blong ren i ron kamdaon long hil mo i stat blong fulumap hol ya wetem sofmad. Pita i stap long wan denja hem i save draon. Nao long semtaem papa blong hem i faenem hem mo i pulumaot hem wetem wan rop. Biaen, oli tok strong long hem from we hem i stap wokbaot hem wan. Be from we mama blong hem i putum blangket raon long hem mo i karem hem long han blong hem, i isi nomo long hem blong akseptem fasin stretem ya.

Store ya i soemaot wanem samting i stap hapen long sam man we bifo oli stap long medel blong ol man blong God. Oli foldaon long fasin blong wol ya olsem dip hol mo oli stap traehad blong kamaot mo kambak long ogenaesesen blong Jeova bakegen. !I gud tumas blong save se Jeova i gat fasin sore mo i rere blong ‘sakem wan rop’ mo givhan long olgeta blong oli kambak blong kasem sef!

Fasin Sore Blong Jeova

Bifo long taem blong Isrel, taem oli finisim wok long haos tempel, Solomon i mekem wan prea blong dedikesen mo hem i askem Jeova long prea blong i lesin long ol prea we ol man oli mekem i go long tempel ya. Long taem ya hem i talem se: “Sipos olgeta [ol man Isrel] oli sin agensem yu [from i no gat man we i no mekem sin samtaem], mo sipos yu yu kros long olgeta mo yu lego olgeta oli go long enemi blong olgeta, . . . mo taem oli tingtinggud bakegen long ples we oli stap kalabus long hem, mo taem oli rili kambak mo oli askem yu blong givhan long olgeta long ples we oli stap kalabus long hem, . . . yu we yu stap long heven yu mas lesin tu long olgeta, long prapa ples blong yu long heven, long prea mo ol samting we oli askem yu blong yu mekem long olgeta.”​—1 King 8:​46-49.

Prea ya blong Solomon i kamtru plante taem long histri blong ol man Isrel. Oltaem, ol man blong God oli stap tanem baksaed mo oli livim hem. Nao taem oli luksave rong blong olgeta oli kambak, oli lukaotem hem. Jeova i fogivim olgeta. (Dutronome 4:31; Aesea 44:​21, 22; 2 Korin 1:3; Jemes 5:11) Jeova i yusum Malakae, blong tokbaot olsem wanem Jeova i stap wetem ol man blong Hem long wan taosen yia, taem Hem i se: “I stat long taem blong ol bubu blong yufala, yufala i tanem baksaed long ol loa blong mi, yufala i no holem olgeta. Yufala i mas kambak long mi nao, blong mi tu mi save gobak long yufala.”​—Malakae 3:7.

Ol Samting Blong Mekem Man i Foldaon

Olsem ol man Isrel, sam man blong God tede oli aot mo oli stap seraot long ogenaesesen blong Jeova. ?From wanem? Sam man oli folem ol samting we fastaem i luk olsem i gud nomo, olsem Pita we i bin ronem smol rabet. Hemia samting we i hapen long Ada. Hem i talem se: “Hem i wan kastom blong mifala ol fren blong wok blong go samples long aftenun blong kakae tugeta. Taswe taem ol fren blong mi oli askem mi blong mifala i go dring wan kap kofe long en blong dei, i isi nomo blong mi agri. Mi ting se i oraet from hem i no taem blong ol miting no taem blong prij. Mi no luksave se samting ya i no laenap wetem rul blong Baebol long 1 Korin 15:33.

“I no longtaem, mi stap goaot wetem olgeta long evri Sarede blong ron long hos. Biaen mi stap go long ol sinima mo long ples blong pleplei wetem olgeta. Samting ya i mekem se mi stap mestem ol miting. Nao biaen, mi no moa go long ol miting, mi no moa joen long wok blong prij. Taem mi luksave samting ya, be i let finis mi no moa joen wetem ogenaesesen.”

Samtaem maet man i haedem bigfala sin blong hem mekem se hem i harem i no stret blong mekem wok blong Jeova. (Ol Sam 32: 3-5) No maet wan man i foldaon from sam samting we ol narafala Kristin fren oli talem no oli mekem long hem, hem i no luksave, olsem Solomon i talem se “i no gat man we i no mekem sin samtaem.”​—1 King 8:46; Jemes 3:2.

Mo tu i gat sam narafala man we tingting blong olgeta i foldaon taem oli kasem fasin stretem. (Hibrus 12:​7, 11) Ol flas samting blong wol oli pulum plante man blong oli no moa mekem wok blong God. Plante taem, taem man i wantem kasem sam mak long wol, oli spenem plante taem tumas long wok blong olgeta mekem se i no moa gat ples long laef blong olgeta blong mekem wok blong God. (Matyu 13:​4-9; 1 Timote 6:​9, 10) ?I gat rod blong givhan long ol man olsem?

?Bambae Yu Lesin Taem Jeova i Askem Yu Blong Kambak?

Long wan taem Jisas i talem samting we i had blong kasem mining blong hem, mo sam man oli foldaon from. Store i se: “Plante man blong hem oli gowe long hem, oli no moa biaen long hem bakegen.” Be i no evriwan i foldaon from. Store ya long Baebol i gohed i se: “Jisas i askem long ol twelef man blong hem, i se ‘?Olsem wanem long yufala? ?Yufala tu i wantem gowe long mi?’ Nao Saemon Pita i ansa long hem, i se ‘?Masta, mifala i save go long hu? Yu nomo yu gat ol tok blong laef ya we i no save finis.’” (Jon 6:​66-68) Ol aposol blong Jisas oli luksave se bambae oli kasem trabol sipos oli gowe long Jisas.

Sam man we oli bin foldaon, biaen oli luksave samting ya. Oli luksave se fasin blong lego ogenaesesen blong God i wan rod blong kasem trabol mo oli luksave se sipos man i stap wetem Jeova mo Kraes bambae oli save faenem ol tok we oli lidim man blong kasem laef we i no save finis. Taem oli luksave samting olsem, oli mas luksave tu se hem i neva let tumas blong oli tanem tingting blong olgeta, mo askem Jeova blong fogivim olgeta, mo kambak long hem. Jeova hem wan i askem se: “Kambak long mi nao, blong mi tu mi save gobak long yufala.”​—Malakae 3:7.

?Tru ya, wan trufala Kristin i save faenem glad sipos hem i no mekem wok blong Jeova? Sipos sloslou wan man i gowe long ogenaesesen blong Jeova afta we hem i bin kam haf blong hem finis, ?wanem samting bambae hem i kasem long wol afsaed long ogenaesesen blong God? Bambae kwiktaem hem i luksave se naoia hem i kam haf blong wol we fasin long hem i stap kam raf moa. Bambae hem i faenemaot se hem i joen long ol fasin blong ol man we oli gat tu fes, fasin gyaman, fasin stil, mo rabis fasin long saed blong seks, mo hem i joen long wan wol we i gat denja mo i no naes olsem hol ya we yangfala Pita i foldaon i go insaed. Taem hem i tingtinggud mo i luksave se bambae i hadwok long hem blong kasem laef we i no save finis, kwiktaem hem i mas lukaotem help blong tekemaot hem long trabol ya. Be, blong kambak bakegen i no isi.

?Yu yu stap traehad blong kambak long Jeova be yu faenem i had? Yu mas save yu nidim help. Mo yu mas bilif se ol brata mo sista blong yu long ogenaesesen blong God oli rere blong givhan long yu. Be yu mas traehad blong soemaot long Jeova se yu wantem olsem. Hem i taem naoia blong yu “tingtinggud” mo ‘kambak long Jeova.’​—1 King 8:47.

Kasem Help Blong Kambak

Ada i eksplenem wanem samting i givhan long hem blong hem i kambak long Jeova: “Long stret taem ya, sista we i stadi wetem mi i askem mi blong kam long wan seket asembli wetem hem. !Hem i kaen tumas long mi! !Hem i no mekem mi mi sem nating! Hem i soem bigfala lav tumas long mi. Wan yia i bin pas stat long taem ya we mi lego laswan miting we mi go long hem, be mi stap tingting dip se ol samting long wol ya oli blong nating nomo mo i tru se, biaen long ol naes samting blong pulum ae long wol ya, ol man oli stap harem nogud nomo, i gat wari, mo ol rabis fasin long saed blong seks. Taswe mi wantem go long asembli. Taem mi go insaed long haos we oli holem asembli long hem, mi go sidaon long laswan jea mo mi stap haed long wan dak kona. Mi no wantem ol brata oli luk mi mo askem ol kwestin long mi.

“Be, program blong asembli ya i givim ol advaes we mi rili nidim. Taem asembli i finis, mi gat strong tingting blong kambak long ol man blong Jeova mo tu i no hemia nomo, mi wantem fasgud long God wetem ful hat blong mi. Ol brata oli glad blong luk mi mo ‘gel we i lusum rod’ i kambak.” (Luk 15:​11-24) Ol samting ya oli kamaot samtaem bifo finis, mo naoia bitim 25 yia finis Ada i stap mekem wok olsem fultaem paenia.

Store blong wan narafala man we i aot long ogenaesesen, biaen taem hem i kambak hem i kasem gudfala frut from. Sam elda oli givim advaes long José we i kamaot long prapa tingting blong olgeta bitim ol rul blong Baebol. Tingting blong José i foldaon mo hem i harem nogud from, sloslou hem i no moa prij. Hem i stap hem wan i seraot long ol man blong God long eit yia, mo long taem ya hem i maredem wan woman we i no bilif. Hem i gat pikinini mo hem i letem wan long olgeta i baptaes long Skul Katolik.

Biaen, seket elda i givhan long hem taem hem i visitim hem mo i leftemap tingting blong ol elda blong oli mekem olsem tu. Hem i kambak bakegen mo i haremgud blong luk se waef blong hem i gat intres long trutok. Naoia José i stap olsem wan elda long kongregesen. Tufala ekspiryens ya i soemaot olsem wanem, Jeova i no holembak ol blesing long olgeta we oli lesin long hem taem hem i askem olgeta blong oli kambak.

Blong man i haremgud long ol blesing olsem, fastaem hem i mas luksave taem ol man oli givhan long hem mo hem i mas lesin. Long plante kongregesen ol brata oli tingbaot olgeta we oli no moa prij mo oli visitim olgeta oltaem, oli traem blong givhan long olgeta. Taem man i lesin long ol man we oli givhan long hem, hem i stap soemaot fasin tangkyu long fasin sore blong Jeova.​—Jemes 5:​19, 20.

I tru, naoia i taem blong lesin long Jeova taem hem i askem yumi se: “Kambak long mi.” (Malakae 3:7; Aesea 1:18) Yu no mas wet. Ol samting we oli stap kamaot long wol oli hapen kwiktaem tumas. Gudfala ples blong haed long taem blong hariken ya we i stap fored long yumi, hem i insaed long ogenaesesen blong Jeova, yumi save stap sef aninit long han blong hem. Olgeta ya nomo we oli wantem haed long Jeova oli gat strong hop blong oli stap sef long bigfala dei blong kros blong Jeova.​—Sefanaea 2:​2, 3.

[Tok Blong Pija Long Pej 23]

?Bambae yu yu lesin taem Jeova i askem yu se, “Kambak long mi”?