?Yu Yu Rimemba?

?Yu bin glad blong ridim ol Wajtaoa we oli kamaot long ol manis we oli jes pas? Ale traem luk sipos yu save ansa long ol kwestin ya:

◻ ?Wanem samfala kwestin we wan Kristin man mo woman i save askem long tufala, bifo tufala i tingbaot blong mekem promes blong mared?

‘Mi rili sua se brata no sista ya i strong long saed blong spirit mo hem i ona gud long God? ?Mi save pijarem long tingting blong mi we mitufala i mekem wok blong Jeova long ful laef blong mitufala? ?Mitufala i tekem inaf taem blong save gud ol prapa fasin blong mitufala? ?Mi mi sua se bambae mitufala i save joengud go kasem en? ?Mitufala i savegud ol samting we mitufala i mekem long laef blong mitufala bifo mo naoia?’​—8/15, pej 31.

◻ Jisas i minim wanem taem hem i talem long ol fren blong hem se: “Yufala i olsem sol long ol man long wol”? (Matiu 5:​13)

Jisas i minim se taem ol man blong hem oli talemaot Kingdom blong God long ol narafala, samting ya bambae i gat paoa blong sevem laef blong olgeta we oli lesin. Yes, olgeta we oli folem tok blong Jisas, bambae oli no save kam nogud long saed blong fasin mo long saed blong spirit olsem ol man long ples we oli laef no oli wok long hem.​—8/15, pej 32.

◻ ?Olsem wanem olgeta we oli stap fren oli save lukaotgud blong no foldaon long trap ya blong slip tugeta bifo mared?

Sipos yu stap fren wetem narafala, yu waes blong lukaot we yutufala i no stap yutufala nomo long ol ples we i no gat man long hem. I moagud yutufala i haremgud long kampani blong yutufala taem yutufala i joen wetem ol narafala no long ol ples we i gat ol man long hem. Putum wan mak we yutufala bambae i no mas bitim, taem yutufala i soemaot filing blong yutufala. Wanwan long yutufala i mas respektem filing blong narawan mo tingting we i stap jajem hem.​—9/1, pej 17, 18.

◻ ?Wanem fasin ya dip save?

Dip save hemia fasin blong lukluk insaed long wan samting mo luksave ol defdefren haf blong hem from we yumi kasem save olsem wanem ol haf ya oli joengud tugeta, mekem se yumi naf blong luksave ful mining blong samting ya. (Ol Proveb 4:1)​—9/15, pej 13.

◻ ?Jeova i stap askem wanem long yumi tede?

Hem i askem long yumi blong lesin long Pikinini blong hem mo blong folem eksampel mo tijing blong hem. (Matiu 16:24; 1 Pita 2:​21)​—9/15, pej 22.

◻ ?Hu nomo olgeta we oli save kasem pis?

From we Jeova i “God ya we i stamba blong pis,” ol man ya nomo we oli laekem God mo we oli gat bigfala respek long ol stretfala rul blong hem, bambae oli save gat pis long laef blong olgeta. (Rom 15:33)​—10/1, pej 11.

◻ ?Olsem wanem Josef i kasem strong tingting ya blong talem no evri dei, long waef blong Potifa?

Josef i luksave se gudfala fasin fren blong hem wetem Jeova i moa impoten i bitim nogud fasin long saed blong seks, we bambae i mekem hem i haremgud blong smoltaem nomo. Long taem ya, God i no raetem wan stret loa we Josef i save folem long saed ya. Nating se i olsem, Josef i save gud wanem fasin we i stret. (Jenesis 39:9)​—10/1, pej 29.

◻ ?I impoten olsem wanem se yumi wantem rere blong fogivim ol brata blong yumi?

Sipos yumi wantem se God i gohed blong fogivim yumi, samting ya i dipen bigwan long fasin blong yumi wanwan we yumi rere blong fogivim ol brata blong yumi. (Matiu 6:​12, 14; Luk 11:4)​—10/15, pej 17.

◻ ?Matiu 18:​15-17 i laenap moa wetem wanem kaen sin, mo wanem i soemaot samting ya?

Sin ya we Jisas i tokbaot i stap minim wan bigfala mastik. Sin ya i bigwan i naf blong mekem se man blong hem i kam olsem “wan hiten man, no wan man blong tekem mane blong takis.” Ol man Jyu oli no save meks wetem ol hiten man mo oli no wantem joen tu wetem ol man blong tekem mane blong takis. Taswe tok blong Matiu 18:15-17 i laenap wetem ol bigfala sin, i no jes ol smolsmol rong no mastik we narafala i mekem long yumi, we yumi save fogivim mo fogetem. (Matiu 18:​21, 22)​—10/15, pej 19.

◻ ?Fasin blong rili laekem Tok blong God i minim wanem?

Fasin blong laekem tok blong God i lidim man blong i laef folem wanem we tok ya i wantem hem blong i mekem. (Ol Sam 119:​97, 101, 105) Samting ya i nidim blong man i gohed oltaem blong mekem ol jenis long saed blong tingting, mo ol fasin blong laef blong hem.​—11/1 pej 14.

◻ ?From ol samting we yumi kasem long han blong Jeova oli plante tumas, wanem samting ya we yumi save givim i go long bigfala King mo Man blong Givim Presen?

Baebol i soemaot we beswan presen we yumi save givim i go long Jeova, hemia blong ‘leftemap nem blong hem olsem we yumi stap mekem sakrefaes blong givim long hem’ (Hibrus 13:15) ?From wanem? From we sakrefaes ya i joen wetem wok blong sevem laef blong man. Long taem ya blong en, wok ya i wan impoten samting long tingting blong Jeova. (Esikel 18:23)​—11/1, pej 21.

◻ ?Solomon i minim wanem taem hem i raetem se: “Ol tok blong ol waes man oli olsem sap stik we man blong lukaot long sipsip i stap karem blong stikim ol sipsip blong hem.”? (Prija 12:11)

Olgeta tok blong ol man we oli gat waes we i kamaot long God, i pusum olgeta we oli ridim no olgeta we oli lesin long hem, blong oli gruap folem olgeta waes toktok ya we oli ridim mo harem.​—11/15, pej 21.

◻ ?Wanem ya fasin luksave we i kamaot long God?

Hemia blong skelem wanem fasin i gud mo wanem fasin i nogud, mo biaen kam nafgud blong jusum stret rod. Stadi long Baebol mo folem ol rul blong hem, i save mekem fasin luksave i kamaot.​—11/15, pej 25.

◻ ?I nidim wanem blong mekem se fasin rere blong akseptem ol responsabiliti i kam stretgud nomo? (1 Timoti 3:1)

Fasin ya i mas kam stretgud nomo wetem fasin blong jajem gud bisnes ya. I no mas gat wan man we i tekem tumas wok, mekem se hem i save lusum glad we hem i gat long wok blong Jeova. Wan tingting we i rere blong mekem samting i nambawan, be tingting ya i mas soem stret fasin mo wan “tingting we i kliagud.” (Taetas 2: 12; Revelesen 3:15, 16)​—12/1, pej 28

◻ ?Olsem wanem nao ol papa mo mama oli save fesem bigfala wok ya blong lukaot long ol pikinini blong olgeta?

God i givim advaes long ol papa mo mama blong oli kam olsem ol eksampel, ol fren, ol man blong toktok gud tugeta, mo ol tija. (Dutronome 6:​6, 7)​—12/1, pej 32.