Baebol i Talem Wanem . . .

?Ol Grup Blong Man We Oli Toktok Agens Mo Oli Maj Long Rod Oli Save Jenisim Wol Ya?

“YUMI Mas Talemaot Ol Tingting Blong Yumi, Yumi Mas Maj Wetem Long Rod.” Hemia nao fastok long nyuspepa blong Roman Katolik jyos we nem blong hem National Catholic Reporter, jes bifo we faet long Pesian Galf i faerap long 1991. Nyuspepa ya i stap askem olgeta we oli ridim blong joen long maj blong pis mo ol maj long rod long Amerika, hem i gohed se: “Bambae i tekem plante milyan man mo wan strong traehad blong kasem pis blong winim fasin blong ol lida ya we oli no waes mo oli flas . . . Ol man oli mas maj long ol rod.”

Plante taem tede yumi harem ol tok blong askem man blong mekem samting olsem. Plante fasin blong politik, trabol long saed blong mane, mo trabol long saed blong win, wora mo graon we i stap spolem laef blong ol man, i fosem ol man blong oli harem se oli mas “karem samting ya i go long rod” long fasin blong toktok agens, oli sidaon long rod plante dei mo naet blong soem fasin blong olgeta blong agens, mo ol grup blong man oli maj long rod. Oli stap mekem ol samting ya blong soemaot tingting blong olgeta long plante defren kaen kwestin, i stat long saed blong fasin blong brekem loa long eria blong olgeta go kasem fasin blong mekem pis long olgeta ples long wol. I gud blong save se, bigfala namba blong ol man blong maj long rod oli karem tok we ol ogenaesesen mo ol lida blong ol jyos oli agri long ol tok ya.

?Be, i stret blong ol Kristin oli joen long ol fasin blong maj long rod olsem? ?Mo toktok agens—nating se long fasin blong maj no blong sidaon long rod kolosap long wan kandel blong plante dei mo naet—i rili jenisim wol i kamgud?

Fasin Blong Maj Long Rod—Tingting Blong Wan Kristin

Wan man we i gat save long fasin joen blong ol man i bin tokbaot fasin blong maj long rod olsem “gudfala rod blong soemaot fasin blong politik . . . wekemap tingting blong olgeta we oli holem paoa be oli no mekem wan samting, blong oli mekem sam wok we oli mas mekem.” Yes, olgeta we oli maj blong agens no we oli leftemap fasin ya, plante taem oli ting se fasin blong olgeta i save stretem rabis mo kruked fasin we oli luk long gavman mo long medel blong ol man we oli stap long taem ya.

?Be, Jisas Kraes i soemaot wanem rod long ol man blong hem blong oli folem taem hem i no moa stap? Jisas i stap long taem ya we ol man Jyu oli stap aninit long rul blong rabis gavman blong Rom. Tru ya ol man ya oli wantem tumas blong fri long ol hevi samting we ol man Rom oli stap mekem we oli stap harem nogud long olgeta. Be, neva Jisas i pulum ol man blong hem blong mekem fasin blong maj long rod, maj blong agens, no, joen long politik long sam narafala fasin. Long defren fasin, plante taem hem i talem long ol disaepol blong hem se oli “no man blong wol ya.”—Jon 15:19; 17:16; lukluk tu long Jon 6:15.

I sem mak, taem ol man blong gavman oli mekem i no stret taem oli tekem Jisas i go long kalabus, hem i no traem blong mekem fasin blong agens, nating se hem i save mekem wantaem nomo sipos hem i wantem. Be, hem i talem long gavman blong Rom se: “Mi mi no king olsem ol king blong wol ya. Sipos mi king olsem ol king blong wol ya, bambae ol man blong mi oli save faet blong blokem olgeta ya we oli wantem putum mi long han blong ol lida ya blong ol man Isrel, be mi mi no king olsem.” (Jon 18:33-36) Taem wan rao i kamaot, Jisas i no wantem gat ol fasin blong agens, hem i stap tingbaot blong stap we hem i no joen long ol politik. Mo hem i talem long ol man blong hem blong oli mekem i sem mak.

From samting ya, fasin blong joen long ol maj long rod, i save spolem stampa rul blong Kristin man we Jisas i bin tijim, blong no joen long politik. Antap long samting ya, fasin olsem i save lidim man blong mekem narafala samting we i no laenap wetem Kristin fasin. ?Long wanem rod? Nating se maet ol man oli maj long rod from wan gudfala risen, be biaen ol raf fasin oli save kamaot long medel blong olgeta, yusum ol tul blong faet, tok nogud, no faetem olgeta. Fasin blong joen long ol maj we oli brekem loa no oli blokem wan plan i no save gohed oli pulum ol man blong lukluk, be samting ya i no laenap wetem tok we Baebol i talem se “ona long gavman” mo blong “traehad tumas blong yufala i gat pis wetem olgeta man.” (Rom 12:18; 13:1) Baebol i no leftemap tingting blong ol man ples blong no gat fasin obei long sam loa blong gavman, hem i talem long ol Kristin blong mekem fasin blong olgeta i stret long medel blong ol nesen mo blong obei oltaem long ol gavman blong man, nating sipos oli no mekem ol man oli haremgud no oli no gat fasin blong tingtinggud.—1 Pita 2:12, 13, 18.

Be, maet sam man oli talem se, ‘I no olgeta fasin blong maj we oli yusum ol tul blong faet no oli faet.’ I tru, i luk olsem se sam fasin blong maj i mekem gudfala frut i kamaot. ?Be ol maj long rod—nating se wetem pis mo oli mekem from wan gudfala samting—oli rili save jenisim wol i kamgud?

?Oli Save Jenisim Wol Ya?

Ol Kristin oli wari bigwan long ol man we oli stap raonabaot long olgeta mo oli wantem givhan long olgeta. ?Be fasin blong maj long rod i rili wan gudfala rod blong givhan? Buk ya, Demonstration Democracy i talem se: “Ol frut we oli kamaot long enikaen rod blong mekem politik, i gat mak blong hem.” I tru, blong winim ol trabol we ol man oli stap fesem tede i nidim ol jenis we i no save kamaot from fasin blong agens no maj long rod.

Jisas i tokbaot sem poen ya taem hem i stap tokbaot ol fasin blong ol olfala skul long taem blong hem. Long saed blong tu tingting we ol Farisi oli gat blong mekem wosip, hem i talem se: “Mo i no gat man we i save tekem wan nyufala pis kaliko, i somap long olfala klos blong hem blong blokem hol we i stap long hem. From we nyufala pis kaliko ya i save brekemaot haf blong olfala klos ya, nao hol blong hem i save kam bigfala moa.” (Matyu 9:16) ?Jisas i minim wanem? I minim se trufala Kristin fasin ya i no save joen wetem fasin nogud mo ol fasin we i brok we oli rere blong lus. Hem i save se fasin blong traem fiksimap samting we i nogud olgeta i blong nating nomo.

Samting ya i tru long fasin ya blong wol we olgeta man oli bin stap aninit long hem long ol handred yia we oli pas finis, we i gat plante rabis fasin, fasin blong spolem narafala man, mo ol hadtaem. Eklesiastis 1:15 i eksplenem poen ya se: “Samting we i kruked finis i no save stret bakegen.” Yes, kruked fasin blong wol tede i no save kam stret, nating se plante man blong wol oli traehad blong mekem. ?From wanem oli no save mekem? From we, olsem 1 Jon 5:19 i talem, “Olgeta man blong wol oli stap long paoa blong Setan.” Jisas i poen i go long man ya se hem i olsem “masta blong wol ya.” (Jon 12:31) Taem we wol ya i stap aninit long paoa blong Setan, i no gat wan samting we man i save mekem blong mekem ol man oli haremgud blong olwe.

Samting ya i no minim se ol Kristin oli no kea long ol trabol blong wol no oli no wantem mekem sam samting blong blokem. Plante taem, Baebol i talem se ol Kristin oli mas strong, i no blong mekem maj long rod, be long wok blong prij mo tijim ol man long gud nyus blong Kingdom blong God—Kingdom gavman ya nao we Jisas i bin tijim ol man blong hem blong prea from. (Matyu 6:10; 24:14) Baebol i soemaot se Kingdom ya i no save traem blong sevem rabis fasin blong wol ya; bambae hem i spolem fulwan ol rabis gavman mo ol plan blong ol grup blong ol man we naoia oli stap givim hadtaem long ol man mo i save stanemap trufala stret fasin mo wan wol we i stretgud olgeta. (Daniel 2:44) Aninit long fasin olsem, i no moa gat wan man we i save maj long rod blong agens from we Jeova God, we i stap “givim plante kakae long olgeta we oli hanggri, [Hem i] stap mekem olgeta evri wan oli harem gud,” bambae Hem i luk se yumi gat evri samting we yumi nidim.—Ol Sam 145:16.

[Foto Credit Line blong pija long pej 18]

Labor strike, Leslie’s