?Jisas i Save Gat Bilif Long God?

Wan Problem Blong Ol Man We Oli Bilif Long Triniti

“?OLSEM wanem Jisas i save gat bilif? Hem i God; hem i no dipen long wan man nating, hem i save mo i luk evri samting. Bilif i stanap long fasin ya blong dipen long narafala mo agri se wan samting i tru nating se yu no luk; taswe, i no stret blong talem se Jisas, we hem i God, i save gat bilif.”

Franis man ya we i stap stadi long saed blong ol bilif blong skul, Jacques Guillet, i talem se hemia i bigfala tingting blong ol man Katolik. ?Yu yu sapraes long fasin ya blong eksplenem? Maet yu bin ting se from we Jisas i wan eksampel blong ol Kristin long evri samting, hem i mas wan eksampel long saed blong bilif tu. Sipos yu bin tingting olsem, yu no bin tingbaot tijing blong Krisendom long saed blong Triniti.

Ol man we oli stadi long skul Katolik, Protestan, mo Otodoks we oli bilif long Triniti olsem “stampa tijing blong Kristin bilif mo laef, we mining blong hem i haed, oli faenem i had blong eksplenem kwestin ya long saed blong bilif blong Jisas.”a Be i no evriwan we oli talem se Jisas i no gat bilif. Jacques Guillet i talem se “man i mas luksave se Jisas i gat bilif,” nating se Guillet i agri we tingting ya i no laenapgud wetem tijing blong Triniti.

Olsem bighaf blong ol man we oli stadi long ol tijing blong skul, Franis Jesuit Jean Galot i talemaot klia long magasin ya La Civiltà Cattolica se from we “Kraes i God tru mo man tru, . . . hem i no save bilif long hem wan. Bilif i stanap long fasin ya blong stap bilif long narafala, i no long yu wan.” Taswe samting we i save blokem man blong no luksave se Jisas i gat bilif, hemia tijing blong Triniti, from we i klia se tufala tingting ya i agensem tufala.

Ol man we oli stadi long ol tijing blong skul oli talem se, “Ol Gospel oli neva tokbaot we Jisas i gat bilif.” I olsem we tok ya we oli yusum long Kristin Grik haf blong Baebol pi·steuʹo (bilif, gat bilif) mo piʹstis (bilif) i tokbaot ol disaepol we oli bilif long God no long Kraes, bitim we Jisas i bilif long Papa blong hem long heven. ?From samting ya, yumi save talem se Pikinini blong God i no gat bilif? ?Yumi save talem wanem taem yumi tingbaot ol samting we hem i mekem mo i talem? ?Baebol i talem wanem?

?Ol Prea Oli No Gat Bilif Wetem?

Jisas i wan man blong prea. Hem i prea long saed blong evri samting​—taem hem i baptaes (Luk 3:21); ful naet bifo we hem i jusum ol 12 aposol blong hem (Luk 6:​12, 13); mo bifo we bodi blong hem i jenis i kam narafala antap long hil, taem i stap wetem aposol Pita, Jon, mo Jemes. (Luk 9:​28, 29) Hem i stap prea taem wan long ol disaepol i askem long hem se: “Yu tijim mifala blong mifala i prea,” taswe hem i tijim olgeta long Prea blong Masta (“Papa Blong Mifala”). (Luk 11:​1-4; Matyu 6:​9-13) Long eli moning, hem i mekem longfala prea taem i stap hem wan (Mak 1:​35-39); long aftenun, long hil, afta we i sanemaot ol disaepol blong hem (Mak 6:​45, 46); tugeta wetem ol disaepol blong hem mo from ol disaepol blong hem. (Luk 22:32; Jon 17:​1-26) Yes, prea i wan impoten haf long laef blong Jisas.

Hem i prea bifo we i mekem ol merikel, eksampel, bifo we hem i mekem fren blong hem Lasros i laef bakegen i se: “Papa, mi mi talem tangkyu long yu from we yu harem prea blong mi. Mo mi save we oltaem yu stap harem mi. Be mi talem tok ya from ol man ya we oli stap stanap raonabaot long mi, blong oli save bilif we yu yu sanem mi.” (Jon 11:​41, 42) Hem i save se Papa blong hem bambae i ansa long prea ya, mo samting ya i soemaot strong bilif we hem i gat. Fasin ya we prea long God i joen wetem bilif long Hem i kamaot klia long tok we Kraes i talem long ol disaepol se: “Taem yufala i prea, evri samting we yufala i askem long God, yufala i mas bilif se i olsem we yufala i kasem finis.”​—Mak 11:24.

?Sipos Jisas i no gat bilif, from wanem hem i prea long God? Krisendom i tijim Triniti we i no stap long Baebol, se Jisas i man mo God semtaem, tijing ya nao i mekem mesej blong Baebol i no klia. I mekem i had long ol man blong kasem save stret tok mo paoa blong Baebol. ?Jisas i askem help long hu? ?Hem wan? ?Hem i no save se hem i God? ?Mo sipos hem i God mo i save, from wanem hem i prea?

Ol prea blong Jisas long las dei blong laef blong hem long wol i mekem yumi tingting dip long strong bilif blong hem long Papa blong hem long heven. Hem i stap soemaot hop mo fasin tras taem hem i askem se: “Papa, naoia i taem blong yu yu leftemap nem blong mi, yu givim hae nem long mi, olsem we mi gat fastaem, taem we wol i no stap yet, nao mi mi stap wetem yu long gudfala laef blong heven.”​—Jon 17:5.

Hem i save se ol traem blong hem bambae oli had tumas mo i no longtaem bambae hem i ded, taswe long naet ya we hem i stap long garen blong Getsemane long Hil blong ol Oliftri, “tingting blong hem i kam hevi, hem i harem i nogud tumas,” mo hem i talem se: “Tingting blong mi i hevi tumas, we kolosap mi mi ded from.” (Matyu 26:​36-38) Biaen, hem i nildaon mo i prea: “Papa, sipos yu save letem, plis yu tekemaot kap ya, blong bambae mi mi no dring long hem. Be yu no mekem olsem we mi mi wantem, yu mekem olsem we yu nomo yu wantem.” Biaen, “wan enjel i aot long heven i kam, nao i kamtru long Jisas, i mekem hem i strong bakegen.” God i lesin long prea blong hem. From ol strong filing blong hem mo bigfala traem we hem i fesem, “swet blong hem we i drop, i foldaon long graon, i olsem blad nomo.”​—Luk 22:​42-44.

?Ol trabol we Jisas i harem nogud from, nid blong hem blong kasem moa paoa, mo ol dip prea blong hem, oli soemaot wanem? Jacques Guillet i raetem se, “Wan samting we yumi save sua long hem se, Jisas i prea, mo prea i wan impoten haf long laef blong hem mo long ol wok blong hem. Hem i prea olsem we ol man oli prea, mo hem i prea from ol man. Ol prea blong ol man oli blong nating nomo sipos oli no gat bilif. ?Bambae ol prea blong Jisas oli blong nating nomo tu sipos i no gat bilif?”

Smoltaem bifo we Jisas i ded, taem i stap hang long pos, hem i kraeaot wetem bigfala voes, i talem wan Sam we Deved i raetem. Biaen, wetem bigfala voes, hem i talemaot laswan prea long God wetem bilif se: ‘Papa, mi mi putum speret blong mi long han blong yu.’ (Luk 23:46; Matyu 27:46) Wan Baebol blong ol defren skul blong Itali, Parola del Signore, i talem se Jisas ‘i putum laef blong hem long han’ blong Papa blong hem.

Jacques Guillet i talem se: “Taem ol man we oli raetem ol Gospel oli soemaot Kraes long yumi we i stap harem nogud blong i ded, mo i stap yusum ol tok blong ol sam blong Isrel blong krae i go long Papa blong hem, oli pruvum long yumi se krae ya i kamaot long stret Pikinini blong hem nomo, mo i soem se hem i harem nogud fulwan, mo i gat ful tras, hem i wan krae blong bilif, krae blong ded wetem bilif.”

Taem ol man we oli stadi long ol bilif blong skul oli luk ol klia mo bigfala pruf ya blong bilif, oli traem blong talem se bilif i defren long “tras.” Be fasin ya blong mekem i defren olsem i no stanap long Baebol.

?Be ol strong traem ya we Jisas i stanap strong long olgeta, oli soemaot wanem long saed blong bilif blong hem?

‘Man Ya We i Mekem Bilif Blong Yumi i Stretgud’

Long japta 11 blong leta blong aposol Pol long ol man Hibru, hem i tokbaot bigfala kampani blong ol man mo woman blong bilif bifo long taem blong Kraes. Hem i stap tokbaot nambawan eksampel blong bilif we i stretgud olgeta taem i talem se: ‘Oltaem yumi mas stap luklukgud long Jisas. Hem i Bigfala Man we God i yusum blong givim bilif long yumi mo mekem bilif ya blong yumi i stret gud. Blong kasem glad we i stap long fored blong hem, hem i stanap strong long pos we hem i ded long hem, mo hem i no tingbaot sem we hem i kasem, . . . tingbaot ol hadtaem we hem i kasem, we ol man nogud oli girap, oli agensem hem tumas. Nao bambae tingting blong yufala i save stap strong, bambae yufala i no save lego fasin ya blong bilif.’​—Hibrus 12:​1-3.

Bighaf blong ol man we oli stadi long ol tijing blong skul oli talem se vas ya i no tokbaot “prapa bilif blong Jisas,” be, i minim wok blong hem olsem “faswan man blong bilif no man we i statem bilif.” Grik tok ya te·lei·o·teś we i kamaot long vas ya i tokbaot wan man we i stretgud, we i luksave no mekem samting fulwan. Olsem ‘Man ya we i mekem bilif blong yumi i stretgud olgeta,’ Jisas i mekem fasin blong bilif i kam fulwan from se taem hem i kam long wol, hem i fulumap ol profet tok blong Baebol mo samting ya i putumap wan fandesen blong bilif we i moa strong. ?Be samting ya i minim se hem wan i no gat bilif?

Ol vas blong leta ya we i go long ol man Hibru we yu save luk long bokis long pej 15 oli givim klia ansa. Jisas i kam stretgud olgeta from ol traem we hem i kasem mo from fasin obei blong hem. Nating se hem i stret man finis, ol ekspiryens blong hem oli mekem hem i kam stret olgeta mo fulwan long evri samting, long bilif tu, blong hem i nafgud blong kam Hae Pris blong sevem ol trufala Kristin. Hem i prea long Papa blong hem, “i stap krae bigfala, we wora i stap kamaot long ae blong hem,” hem i ‘holemstrong’ long God, mo i gat ‘fasin fraetgud long God.’ (Hibrus 3:​1, 2; 5:​7-9) Hibrus 4:​15 i talem se, ‘olgeta samting oli traem hem finis,’ sem mak long ol samting we oli traem yumi, mo oli sem mak long “plante samting” we oli kam blong traem ol narafala tru Kristin tu. (Jemes 1:​2, 3) ?I stret blong bilif se Jisas i save kasem traem “olsem” ol man blong hem be i no kasem traem long saed blong bilif blong hem olsem olgeta?

Ol dip prea, fasin obei, fasin blong harem nogud, ol traem, fasin blong holemstrong bilif, mo fasin fraetgud long God oli pruvum ful bilif blong Jisas. Oli soemaot se hem i kam ‘Man we i mekem bilif blong yumi i stretgud olgeta’ afta we ol samting oli mekem hem i stretgud olgeta long bilif blong hem wan. I klia se, hem i no God mo Pikinini wantaem, olsem tijing ya blong Triniti i talem.​—1 Jon 5:5.

?Hem i Bilif Long Tok Blong God?

Tijing blong Triniti i gat paoa long ol man we oli stadi long saed blong ol tijing blong skul, mekem se oli bitim mak long samting we oli bilif long hem, se Jisas “i no save bilif long Tok blong God mo ol tingting we oli stap insaed long hem” from we “hem wan hem i olsem prapa Tok blong God, taswe hem i save talemaot tok ya nomo.”​—Angelo Amato, Gesù il Signore, wan buk we skul i agri long hem.

?Be, fasin blong Jisas blong talem bakegen ol tok blong Baebol, i rili soemaot wanem? Taem hem i kasem traem, hem i talem bakegen tri taem sam vas blong Baebol. Namba tri ansa blong Jisas, hem i talem long Setan se hem i mas wosip long God nomo. (Matyu 4:​4, 7, 10) Plante taem Jisas i tokbaot ol profet tok long saed blong hem wan, samting ya i soemaot se hem i bilif se oli kamtru fulwan. (Mak 14:​21, 27; Luk 18:​31-33; 22:​37; skelem Luk 9:22; 24:​44-46.) From ol poen ya we yumi bin tokbaot, yumi luksave se Jisas i save we Baebol i kamaot long Papa blong hem, hem i folem olgeta wetem bilif, mo hem i trastem fulwan se ol profet tok ya long saed blong ol traem blong hem, harem nogud long bodi blong hem, ded mo fasin ya blong laef bakegen, bambae oli kamtru.

Jisas i Eksampel Long Saed Blong Bilif We Yumi Mas Folem

Jisas i mas faet long faet ya blong holemstrong bilif gogo kasem en blong laef blong hem, blong hem i save stap tru long Papa blong hem mo blong hem i save “winim ol samting blong wol ya.” (Jon 16:33) Sipos hem i no gat bilif, hem i no save win olsem. (Hibrus 11:6; 1 Jon 5:4) Long fasin ya blong bilif we i winim wol, hem i eksampel blong ol trufala man blong hem oli folem. Tru ya, hem i gat bilif long trufala God.

[Futnot]

[Bokis blong pija long pej 15]

Jisas, ‘Man Ya We i Mekem Bilif Blong Yumi i Stretgud Olgeta,’ i Kam Stretgud Olgeta

Hibrus 2:10: ‘God ya we i mekem olgeta samting, mo we olgeta samting oli blong hem, hem i wantem tekem plante pikinini blong hem oli kam joen long hem long gudfala laef blong hem long heven. Nao i stret gud wetem fasin blong hem, blong hem i mekem Jisas i harem nogud long bodi blong hem, blong mekem hem we i olsem prapa man blong sevem man i kam stretgud olgeta. Nao Jisas hem i lida blong olgeta ya we God i wantem sevem olgeta.’

Hibrus 2:​17, 18: ‘Hem i kam stret long olgeta samting olsem ol brata ya blong hem, blong hem bambae i save gat sore long olgeta, mo blong olgeta bambae oli save trastem hem. Taswe hem i save mekem ol wok blong hem, we hem i hae pris blong olgeta, nao hem i mekem rod blong God i fogivim olgeta from ol sin blong olgeta. Mo naoia, hem i save givhan long olgeta we ol samting oli stap traem olgeta, from we hem tu i harem nogud finis, mo ol samting ya oli traem hem finis.’

Hibrus 3:2: ‘Jisas i stap holemstrong bilif long fes blong God, we Hem i putumap hem blong wok ya, olsem we bifo Moses i stap mekem i stret, long ol wok blong hem blong lukaot long ol man blong God.’

Hibrus 4:15: “Hae pris ya blong yumi, hem i no olsem sam narafala hae pris ya we taem yumi no gat paoa, nao yumi mekem sin, be oli no gat sore long yumi. Hae pris ya blong yumi, hem i gat sore, from we olgeta samting blong traem yumi oli traem hem finis. Hemia nomo i narafala, hem i no mekem sin.”

Hibrus 5:​7-9: ‘Long laef blong hem long wol ya, Kraes i stap prea long God, i stap askem ol samting long hem, i stap krae bigfala, we wora i stap kamaot long ae blong hem. God i gat paoa blong sevem hem long ded, mo from we Kraes i fraetgud long God, God i harem hem. Kraes i pikinini blong God, be hem i lanem mining blong fasin ya blong obei, long ol samting we oli mekem hem i harem nogud long bodi blong hem; nao from we bisnes ya i mekem hem i stretgud olgeta, hem i save sevem olgeta we oli obei long hem.’