Wan Kwestin

Long Rom 9:​2, 3, aposol Pol i raetem se: “Mi stap harem nogud tumas from ol man Isrel ya, we oli olsem ol brata blong mi, oli olsem stret famle nomo blong mi. Sipos God i save tekemaot mi long Kraes, blong mekem rod blong olgeta ya oli kam joen long hem, be mi mi glad nomo blong go lus olsem.” ?Pol i min se bambae hem i givim laef blong hem blong sevem ol man Jyu?

Jisas i givim nambawan eksampel blong fasin lav. Hem i rere blong givim sol blong hem, no laef blong hem, from ol man we oli gat sin. Taem hem i stap prij long pablik, hem i givim taem mo paoa blong hem from ol man ples blong hem​—ol man Jyu​—blong mekem se plante long olgeta oli save stap long medel blong ol man ya we bambae oli kasem blesing from ransom sakrifaes blong hem. (Mak 6:​30-34) Fasin ya we oli no lesin mo oli agensem mesej blong sevem man i neva daonem lav we Jisas i gat long ol man Jyu. (Matyu 23:37) Mo hem i ‘soemaot fasin ya long yumi blong bambae yumi biaen long hem.’​—1 Pita 2:21.

?Man we i no stretgud olgeta i save folem eksampel blong Jisas blong soemaot lav? Yes, yumi luk aposol Pol i soem samting ya. Hem i laekem ol man Jyu, taswe hem i tingting tumas long olgeta, nao hem i talem se hem i wantem ‘sipos God i save tekemaot hem long Kraes, blong . . . go lus’ from olgeta.

Long ples ya Pol i yusum wan tok we i ademap moa long filing, no mekem i bigwan moa, blong mekem poen blong hem i klia. Jisas i yusum sem kaen tok long Matyu 5:​18, we hem i talem se: “Tru mi talem long yufala, bambae Loa ya i no save lus, gogo skae mo graon, tufala i lus. Bambae i no gat wan leta no wanem samting blong Loa ya i save lus, gogo wok blong hem i stanap.” Jisas i save se heven mo wol bambae tufala i no save lus. Sem mak God bambae i no tekemaot Pol blong hem i lus, no ol man Jyu bambae oli akseptem rod blong Kristin. Be poen we Pol i wantem soem se, bambae hem i traehad long evri rod blong givhan long ol man Jyu blong oli save kasem rod ya blong God blong sevem ol man tru long Jisas Kraes. !Taswe aposol Pol i save leftemap tingting blong ol Kristin, se: “Yufala i mas folem fasin blong mi, olsem we mi mi stap folem fasin blong Kraes”!​—1 Korin 11:1.

Tede, ol Kristin oli mas gat sem tingting olsem Jisas mo Pol long saed blong ol man we oli no man blong bilif. Neva yumi mas letem fasin ya we ol man oli no intres no oli agensem yumi, long teritori blong yumi, i daonem lav blong yumi long ol man raonabaot long yumi mo i daonem strong tingting we yumi gat blong givhan long olgeta blong oli lanem rod ya we God i stap yusum blong sevem ol man.​—Matyu 22:39.