“Yufala i Mas Wok Olsem Slef Blong Masta Ya, Kraes”
LONG ol yia we oli pas, plante milyan man oli stap safa tumas from we oli wok slef. Eksampel, plante taosen yia bifo, ol man Isrel oli safa bigwan aninit long strong han blong ol man Ijip. Olsem Baebol i talem, oli “putumap ol man blong bos strong long ol man Isrel we oli wok slef, blong givim ol strong wok long olgeta we i daonemgud paoa blong olgeta.” Bigfala wok we oli givim long olgeta, hemia blong mekem ol brikis.—Eksodas 1:11, The Jerusalem Bible.
Long plante kantri naoia, ol man oli no ol trufala slef. Be plante oli mas wokhad blong plante haoa, mo wok blong olgeta i no isi—samfala oli mekem wok we i had bitim mak. Oli karem wan baden we i hevi, we yumi save kolem fasin slef long saed blong mane.
Be, i gat wan fasin slef we i no hevi tumas. Aposol Pol i talem long ol brata mo sista blong hem long saed blong bilif, se: “Yufala i mas wok olsem slef blong Masta ya, Kraes.” (Kolosi 3:24, NW) Olgeta we oli jusum blong kam ol slef blong Kraes oli luk se ol hevi baden we oli stap karem, oli no moa hevi tumas. Jisas hem wan i talem se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi mi givim spel long yufala. Yufala i mas putum yok blong mi long solda blong yufala, blong yufala i mekem wok blong mi. Mo yufala i mas lan long mi, from we mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel. From we yok ya we bambae mi putum long yufala, wok blong hem i isi. Mo ol samting we mi givim long yufala blong yufala i karem, oli no hevi.”—Matyu 11:28-30.
Tekem yok blong Kraes i no minim se wan man i no nidim blong sapotem famle blong hem long saed blong mane. (1 Timote 5:8) Be yok ya i mekem man i kam fri long plante trap we oli joen wetem fasin blong ronem ol sas samting. Ol Kristin oli glad blong kasem ol samting we oli nidim nomo, i bitim we oli mekem ol sas samting oli kam olsem samting we i moa impoten long laef blong olgeta.—1 Timote 6:6-10; lukluk 1 Korin 7:31.
Mo tu, tingting blong ol Kristin i gat spel taem oli mekem wok blong talemaot “gud nyus” blong Kingdom blong God. (Matyu 24:14) !Samting ya i mekem olgeta oli rili glad, mo oli haremgud!
!Yumi mas gat tangkyu from we yumi save “wok olsem slef blong Masta ya, Kraes”!
[Foto Credit Line long pej 32]
Pictorial Archive (Near Eastern History) Est.