Yufala i Mas Ona Long Ol Man We i Stap Lidim Yufala
“Yufala i mas ona long ol man we i stap lidim yufala, mo yufala i mas obei long ol tok blong olgeta. Olgeta ya oli stap lukaot long Kristin laef blong yufala, we oli no save spel, mo bambae oli mas talemaot long God we oli holem wok ya blong olgeta olsem wanem.”—HIBRUS 13:17.
1. ?Olsem wanem yumi kasem blesing from wok blong ol Kristin man we oli stap lukaot long kongregesen?
JEOVA i putumap sam man blong lukaot long ogenaesesen blong hem long “taem blong en ya.” (Daniel 12:4) Olgeta ya oli lidim wok ya blong kea gud long ol man we oli olsem sipsip. From we oli stap lukaotgud long olgeta, ol man ya oli harem gud. (Aesea 32:1, 2) Mo tu, taem ol elda oli lukaot long sipsip blong God long lav mo kaengud fasin, samting ya i stap blokem Setan mo paoa blong rabis wol ya, oli no save kam spolem ol man blong God.—Ol Wok 20:28-30; 1 Pita 5:8; 1 Jon 5:19.
2. ?Samfala oli tingbaot aposol Pol olsem wanem? ?I stret we yumi tingting olsem wanem long ol elda?
2 ?Be yu yu tingbaot ol elda olsem wanem? Maet long hat blong yu, yu talem se: ‘Sipos mi gat wan trabol, bambae mi neva go luk wan elda long kongregesen bakegen, from we mi mi no moa trastem olgeta.’ Sipos yu yu tingting olsemia, maet yu yu stap lukaot ol smosmol rong blong olgeta nomo. Long kongregesen blong Korin long taem bifo, samfala oli tingbaot aposol Pol olsem: “Ol tok blong Pol long ol leta ya blong hem oli strong tumas, oli hevi tumas. Be taem hem i stanap long fes blong yumi, hem i no wan strong man, mo ol tok blong hem i nating nomo.” Be God i givim wan wok long Pol, blong prij. Hem i yusum hem olsem wan ‘aposol blong ol hiten man.’ (2 Korin 10:10; Rom 11:13; 1 Timote 1:12) Mifala i hop se yufala i gat tingting olsem wan sista we hem i talem se: “Ol elda long kongregesen blong mifala oli beswan elda long wol. Oli stap kolosap long mifala, rere blong givhan taem mifala i nidim.”
Obei Long Olgeta—?From Wanem?
3. ?Sipos yumi wantem se Masta blong yumi i stap wetem yumi long tingting blong yumi, yumi mas tingting olsem wanem long ol Kristin man we oli stap lukaot long ol sipsip blong God?
3 Oraet, Nambawan Man blong Lukaot long Sipsip, Jeova God, hem i putumap sam Kristin man blong lukaot long ol sipsip blong hem long kongregesen. ?Nao hem i wantem we yumi tingting olsem wanem long ol man ya? God i wantem we yumi harem tok blong ol elda ya, we oli laekem yumi tumas. Olgeta oli stap wok aninit long han blong Hed-Kampani blong ol Wetnes blong Jeova, mo ol advaes blong olgeta i kamaot long Baebol stret. Sipos yumi lesin long olgeta, ‘Masta blong yumi bambae i stap wetem yumi long tingting blong yumi.’ Ale from samting ya, bambae tingting blong yumi i stap kwaet, mo bambae yumi harem gud long saed blong speret.—2 Timote 4:22; skelem wetem Ol Wok 9:31; 15:23-32.
4. ?Olsem wanem yumi wanwan i save obei long advaes blong Hibrus 13:7?
4 Pol i talem se: “Bambae yufala i no fogetem ol man ya we bifo oli stap lidim yufala, we oli talemaot tok blong God long yufala. Yufala i mas stap tingbaot fasin blong olgeta, we laef blong olgeta i olsem wanem, . . . Nao yufala i mas biaen long olgeta, long fasin blong bilif blong olgeta.” (Hibrus 13:7) Long faswan handred yia, ol aposol oli lidim ol Kristin man. Tede, yumi save lukluk fasin blong ol man ya we oli stap long Hed-Kampani blong ol Wetnes blong Jeova, mo sam narafala elda we tabu speret i makemaot olgeta. Mo yumi save lukluk fasin blong ol man blong “bigfala kampani,” we oli stap lidim yumi. (Revelesen 7:9) Pol i no talem se yumi mas makem no folem ol fasin blong olgeta long saed blong bodi, olsem we wei we oli toktok, no fasin blong olgeta blong stanap no sidaon, no gat. Yumi mas biaen long olgeta long fasin blong bilif blong olgeta. Olsem nao, yumi save mekem fasin blong laef blong yumi i gud nomo.
5. ?Tede long wol, wok blong lukaot long kongregesen blong ol Kristin, God i givim fastaem long hu? ?Taswe i stret blong yumi mekem wanem?
5 Tede long wol, sam man oli lukaot long ol samting we yumi nidim long saed blong speret. God i givim wok ya fastaem long “slef we i stret mo waes.” Slef ya i yusum Hed Kampani blong lidim wok blong talemaot Kingdom mo mekem wok ya i gohed long olgeta ples long wol. (Matyu 24:14, 45-47) Maet yumi tingbaot ol elda ya we tabu speret i bin makemaot olgeta olsem we oli rul long yumi long saed blong speret. From we sam Baebol oli talem Hibrus 13:7 olsem: “Yufala i mas tingbaot olgeta we oli rul . . . long yufala.” (Kingdom Interlinear) Naoia i gat moa long 63,000 kongregesen long wol, mo bitim 4,000,000 man oli stap talemaot Kingdom. Taswe oltaem ol 12 elda ya long Hed-Kampani ‘oli mas wok strong long ol wok ya blong Masta blong yumi.’ (1 Korin 15:58) From we God nomo i givim wok ya long olgeta, i stret we yumi obei mo wok gud tugeta wetem olgeta. Fasin ya i sem mak long fasin blong ol Kristin long faswan handred yia, we oli obei mo wok wetem ol memba blong Hed-Kampani long taem ya.—Ol Wok 15:1, 2.
6. ?Wanem sam samting we ol elda oli stap mekem blong givhan long ol man blong Jeova?
6 Ol elda we oli lukaotgud long ol samting we kongregesen i nidim long saed blong speret, tabu speret nomo i putumap olgeta blong mekem wok ya. (Ol Wok 20:28) Olgeta oli lukaot long wok blong talemaot Kingdom long kongregesen, blong mekem se olgeta man long eria blong olgeta oli harem mesej ya. Mo ol man ya, we oli naf gud long saed blong speret, oli stap lidim kongregesen long saed blong speret, long lav. Olgeta oli givim advaes, oli leftemap tingting, mo oli toktok gud long ol brata mo sista blong olgeta, blong mekem se oli holem ol fasin we oli stret long fes blong God. (1 Tesalonaeka 2:7, 8, 11, 12) Sipos wan long kongregesen i foldaon, i mekem samting we i no stret, ol man ya oli traehad blong givhan long hem blong stretem hem “long kwaet fasin” nomo.—Galesia 6:1.
7. ?Pol i givim wanem advaes long Hibrus 13:17?
7 Taem yumi tingbaot ol gudfala fasin blong ol elda we oli laekem yumi tumas, yumi harem we yumi wantem wok wetem olgeta mo obei long olgeta. Filing ya i stret nomo, from we Pol i talem se: “Yufala i mas ona long ol man we i stap lidim yufala, mo yufala i mas obei long ol tok blong olgeta. Olgeta ya oli stap lukaot long Kristin laef blong yufala, we oli no save spel, mo bambae oli mas talemaot long God we oli holem wok ya blong olgeta olsem wanem. Yufala i mas mekem olgeta oli harem gud long wok ya blong olgeta. Sipos yufala i stap mekem olgeta oli harem nogud long wok ya, fasin ya bambae i no givhan long yufala nating.” (Hibrus 13:17) ?Wanem mining blong advaes ya?
8, 9. (a) ?From advaes long Hibrus 13:17, from wanem yumi mas obei long olgeta we oli stap lidim yumi? (b) ?Sipos yumi ona mo obei long olgeta, samting ya i save karem wanem gudfala frut?
8 Pol i talem se yumi mas ona long ol man we oli stap rul long yumi long saed blong speret. Yumi mas “obei long ol tok blong olgeta,” yes, yumi mas lego prapa tingting blong yumi blong harem tok blong ol man ya we oli lukaot long ol sipsip blong God. ?From wanem? From we ‘olgeta ya oli stap lukaot long Kristin laef blong yumi,’ laef ya we yumi givim i go long God finis. ?Mo olsem wanem oli “stap lukaot long Kristin laef ya”? Long ples ya oli yusum wan wod long olfala lanwis Grik, se a·gru·pneʹo. Prapa mining blong wod ya, se ol elda “oli mestem slip blong olgeta.” Samting ya i mekem yumi tingbaot prapa man blong lukaot long sipsip. Hem i stap hem wan ale hem i mas stap wekap nomo blong lukaotgud long ol sipsip blong hem long naet, blong wan samting i no kam spolem olgeta. Samtaem ol elda oli no save slip long naet tu. Oli stap wekap, oli stap prea long God from ol sipsip blong hem. No maet oli mestem slip blong olgeta from we oli stap givhan long saed blong speret long sam brata long kongregesen. !Yumi mas gat bigfala tangkyu from we ol man ya oli mekemgud wok blong olgeta! Yumi no mas folem fasin blong sam man long taem blong Jud, we “oli agensem God.” Olgeta oli ‘stap lukluk nogud long ol masta blong olgeta se oli no gat raet blong lidim olgeta. Mo olgeta oli stap tok nogud long ol man we paoa blong God i stap saenaot long olgeta.’ Hemia ol Kristin elda we tabu speret i makemaot olgeta finis. God nomo i givim paoa mo haenem long olgeta.—Jud 3, 4, 8.
9 Sipos yumi no ona mo obei long ol Kristin elda long kongregesen, Jeova bambae hem i no glad long yumi. Mo tu samting ya bambae i mekem wok blong ol elda i hevi tumas, mo yumi tu, fasin ya i no save givhan long yumi nating long saed blong speret. Sipos yumi no wok tugeta mo joen gud wetem ol elda, maet oli harem nogud long wok blong olgeta mo tingting blong olgeta i save foldaon from. Mo maet yumi tu yumi no moa glad blong mekem ol Kristin wok blong yumi. Be sipos yumi obei mo ona long olgeta, bilif blong yumi bambae i kam strong moa mo i leftemap ol gudfala fasin we God i glad long olgeta. Yes, ‘Masta blong yumi bambae i stap wetem yumi long tingting blong yumi,’ mo fasin glad bambae i gru i kam bigwan moa, from we kongregesen i wok tugeta, i gat pis, mo oli joen gud.—2 Timote 4:22; Ol Sam 133:1.
10. ?Olsem 1 Timote 5:17 i talem, from wanem i stret we yumi givim ona long olgeta we oli stap lidim yumi?
10 Sipos yumi ona mo obei long ol elda long kongregesen, samting ya i no min se yumi traem mekem ol man nomo oli glad long yumi. Fasin ya i no laenap wetem Baebol. Long faswan handred yia, Pol i talem long ol slef we oli Kristin man se oli mas obei long ol masta blong olgeta. Be oli no mas mekem ‘long taem ya nomo we olgeta oli stap lukluk olgeta. Hemia i olsem we olgeta oli stap wok blong mekem ol man nomo oli glad long olgeta. Olgeta i mas wok we tingting blong olgeta i tru olgeta, olsem we olgeta i stap ona long [Jeova, NW].’ (Kolosi 3:22; Efesas 6:5, 6) Ol elda ‘oli stap wok strong long wok blong lidim ol man, mo oli stap hadwok long prij mo tij.’ Bigfala risen from wanem yumi mas ona long olgeta, hemia from we tijing blong olgeta i stanap long Tok blong God nomo. Pol i talem se: “Ol elda we oli stap wok strong long wok blong lidim ol man, [kongregesen, NW] i mas tingbaot blong givim dabol [ona, NW] long olgeta. Tok ya i stret long olgeta we oli stap hadwok long prij mo tij. From we Baebol i talem se ‘Taem yufala i tekem ol buluk blong oli purumpurumbut long ol hed blong wit, blong kilimaot ol sid blong wit ya, yufala i mas letem oli kakae sam wit ya, yufala i no fasem maot blong olgeta.’ Mo i talem se ‘Sipos man i mekem wok, i stret blong hem bambae i kasem pei blong hem from.’”—1 Timote 5:17, 18.
11. ?Olsem wanem wan elda i save kasem “dabol ona”? ?Be hem i mas blokem wanem fasin?
11 Ol tok blong Pol oli soemaot se yumi save givim sam samting long saed blong bodi long ol man we oli stap lukaot gud long yumi long saed blong speret. Be samting ya i no minim se ol elda oli mas kasem pei from wok blong olgeta. Mo oli no save fosem olgeta long kongregesen blong givim “dabol ona” long olgeta. Ol memba blong kongregesen oli mas soemaot samting ya from we olgeta nomo oli wantem. Wan elda i mas neva yusum wok blong hem blong kasem paoa, no blong kasem sam samting blong hem long saed blong bodi. Hem i no mas traem leftemap hem wan, mo hem i no mas joen moa wetem olgeta we oli rij insaed long kongregesen, mo fogetem olgeta puaman, from we hem i wantem sam samting blong hem long saed blong bodi. (Proveb 25:27; 29:23; Jud 16) Long defren fasin olgeta, wan elda i mas lukaot long ol sipsip blong God ‘we tingting blong hem i glad blong mekem. I nogud hem i mekem blong kasem pei long hem.’ Yes, hem i mas wantem mekem wok ya.—1 Pita 5:2.
12. ?Yumi mas stap tingbaot wanem we bambae i givhan long yumi blong ona mo obei long olgeta we oli stap lidim yumi?
12 Yumi mas tingbaot se God nomo i givim ol elda ya long yumi. Samting ya bambae i givhan long yumi blong obei mo ona long olgeta we oli stap lidim yumi. (Efesas 4:7-13) Tabu speret nomo i putumap ol man ya, mo ogenaesesen blong God i gat wan impoten ples long laef blong yumi ol Wetnes blong Jeova. Taswe yumi wantem soemaot tangkyu mo respektem tiokratik oda we God i putumap. Mo tu, yumi save givhan long ol nyuwan long kongregesen blong kasem gudfala tingting ya tu. Yumi save mekem olsem sipos yumi givim wan gudfala eksampel long olgeta, yumi obei mo ona long olgeta we oli stap lidim yumi.
?From Wanem Yumi Mas Gat Tangkyu Long Wok Blong Olgeta?
13. (a) ?Wanem tingting blong ol man blong wol long saed blong fasin blong letem man i lidim olgeta? ?Be wanem tingting blong ol man insaed long ogenaesesen blong God long samting ya? (b) ?Wanem sam gudfala risen from wanem yumi save trastem ol man we oli stap lidim yumi? (c) I nogud yumi stap mekem ol smosmol rong blong ol elda we oli wok strong, oli kam bigfala samting. ?Taswe yumi mas soemaot wanem fasin we i narakaen olgeta?
13 Ol man blong wol oli no wantem se sam man i lidim olgeta. Wan man blong mekem pablik tok i talem se: “Naoia ol man oli gat jans blong kasem gud edukesen. Ale oli gat gudhan mo gud save long plante samting. From samting ya, oli stap lukaot ol poen nomo long ol narafala. Taswe man i no moa save lidim olgeta.” Fasin ya, we man i wantem folem tingting blong hem wan nomo, i no stap insaed long ogenaesesen blong God. Yumi gat plante gudfala risen blong trastem ol man we oli stap lidim yumi. Wan samting: Ol man we oli kasem ol mak we Baebol i putum, olgeta nomo oli save kam elda insaed long kongregesen. (1 Timote 3:1-7) Oli kasem trening blong soemaot kaengud fasin, blong laekem ol man mo givhan long olgeta, be long semtaem, oli mas holemstrong ol stret rul blong Jeova. Ol elda oli fasgud long trutok blong Baebol. Oli ‘holemstrong tok ya we i no save jenis, nao bambae [oli] save tijim ol man long ol stret toktok ya.’ (Taetas 1:5-9) Yumi no mas mekem ol smosmol rong blong olgeta oli kam wan bigfala samting, from we yumi evriwan i sinman, yumi mestem samtaem. (1 King 8:46; Rom 5:12) I nogud yumi kros from we olgeta oli mestem mak samtaem, nao yumi no moa harem advaes blong olgeta. Yumi mas gat tangkyu mo yumi mas harem ol advaes we ol elda oli givim blong lidim yumi, we i stanap long Baebol. Yumi mas tingbaot ol advaes ya olsem we oli kamaot long God stret.
14. ?Stret long tok blong 1 Timote 1:12, wan elda i mas tingting olsem wanem long wok we God i putum long han blong hem?
14 Pol i wan man we hem i soemaot fasin tangkyu. Taswe hem i talem se: “Mi mi stap talem tangkyu long Jisas Kraes, Masta blong yumi, from we hem i givim paoa long mi, mo i luk mi se mi stret blong holem wok blong hem, nao i putum mi long wok ya.” (1 Timote 1:12) Wok ya we Pol i stap tokbaot i minim wok blong prij mo wok blong lukaotgud long ol brata mo sista blong hem. Nating we tabu speret i putumap wan elda olsem wan man blong lukaot long sipsip, be hem i no mas ting se hem i hae moa long ol narafala long kongregesen. From we hem tu i wan sipsip blong God. (1 Pita 5:4) Hem i mas gat narakaen tingting. Hem i mas gat tangkyu we Jisas Kraes, we hem i Hed blong kongregesen, i luk se hem i stret blong holem wok blong lukaot long ol sipsip blong God. Mo hem i mas gat tangkyu we God i mekem se hem i naf blong holem wok ya, from we hem i givim save, waes, mo fasin luksave long hem. (2 Korin 3:5) Nao sipos wan elda i luksave se hem i gat plante risen blong talem tangkyu long Jeova from gudfala wok we hem i givim long hem, ol narafala memba blong kongregesen tu oli mas gat tangkyu from hadwok blong hem.
15. ?Wanem mining blong advaes blong Pol long 1 Tesalonaeka 5:12, 13?
15 Ol Wetnes blong Jeova oli talem tangkyu tumas long God from ogenaesesen we hem i stanemap long ol las dei ya. Tingting ya i pusum yumi blong soemaot respek long ol elda. Yumi mas glad blong wok tugeta wetem olgeta fulwan long ol plan we oli mekem blong givhan long yumi. Pol i talem se: “Ol brata mo sista. Mifala i askem strong long yufala blong yufala i onagud long olgeta ya we oli stap wok wetem yufala. Hemia olgeta ya we Masta blong yumi i jusumaot olgeta blong oli lidim yufala, mo blong oli tijim yufala. From ol wok ya we oli stap mekem, yufala i mas onagud long olgeta, mo yufala i mas laekem olgeta tumas.” (1 Tesalonaeka 5:12, 13) Sipos yumi folem ol advaes ya, bambae yumi glad, mo bambae Jeova i blesem yumi.
Yufala i Mas Kwik Blong Folem Advaes Ya
16, 17. ?Ol elda oli save givim wanem advaes long saed blong mared? ?Sipos yumi folem advaes ya, wanem blesing i save kamaot from?
16 Pol i talem long Taetas se ‘hem i mas yusum paoa we hem i gat from hae nem blong hem blong leftemap tingting blong olgeta, mo blong tok strong blong blokem ol fasin nogud blong olgeta.’ (Taetas 2:15) Long sem fasin, ol man we God i stap yusum olgeta tede, oli lidim yumi from ol loa mo rul blong Baebol nomo. Oltaem yumi stap kasem sam tok blong pulum yumi blong lesin long ol advaes we ogenaesesen blong Jeova mo ol elda we hem i putumap oli stap givim long yumi. I gat plante gudfala risen blong yumi harem ol tok ya.
17 Wan eksampel: Ol elda oli save givim advaes long wan Kristin se hem i mas folem rul blong Baebol blong mared long wan man “blong Masta blong yumi” nomo. (1 Korin 7:39; Dutronome 7:3, 4) Maet oli eksplenem long hem se sipos hem i mared long wan man we hem i no tekem baptaes yet, samting ya i save mekem bigfala trabol long hem. Maet oli yusum eksampel blong King Solomon we hem i mekem wan bigfala rong, hem i tekem ol hiten waef, nao oli pulum hem i aot long wosip blong Jeova, i stap mekem wosip long ol gyaman god nomo. (1 King 11:1-6) Mo tu ating ol elda ya oli eksplenem se Esra i bin talem long ol man Isrel long taem blong hem se oli mas lego ol hiten waef blong olgeta. Mo Nehemaea i talem se ol man we oli mared long olgeta we oli no gat bilif oli ‘mekem wan bigfala rong, from we oli no stap tru long God.’ (Nehemaea 13:23-27; Esra 10:10-14; lukluk The Watchtower, Maj 15, 1982, pej 31; Novemba 15, 1986, pej 26-30.) Hemia nao wan advaes blong Baebol we ol elda we oli laekem yumi tumas oli stap givim long Kristin ya. Sipos man ya i harem advaes ya, hem i save kasem plante blesing long Jeova, mo hem i save harem gud from we hem i stap mekem hem i glad.
18. ?Taem yumi tingbaot advaes blong Pol long 1 Korin 5:9-13, yumi mas mekem wanem sipos kongregesen i putumaot wan famle blong yumi?
18 Mo tu i stret nomo we yumi respektem ol disisin blong ol elda, taem oli jajem wan trabol insaed long kongregesen. Pol i talem long ol Kristin long Korin se: “ ‘Yufala i mas no go joen wetem ol man ya we oli stap talem se oli brata blong yumi, be oli stap mekem ol sin ya.’ Sipos oli stap mekem ol fasin nogud wetem woman, no oli stap wantem tumas samting, no oli stap prea long ol narafala god, . . . [no] oli stap spolem nem blong narafala man, no oli stap dring we oli lusum hed, no oli stap stil, bambae yufala i no go joen wetem olgeta. Bambae yufala i no go sidaon wetem ol man olsem blong kakae wetem olgeta.” Olgeta oli mas ‘putumaot man ya we i stap mekem sin oltaem, bambae hem i no moa stap wetem olgeta.’ (1 Korin 5:9-13) ?Be sipos yu yu famle wetem wan man we kongregesen i putumaot hem, bambae yu mekem wanem? Maet yu nidim blong luk hem samtaem blong storeyan long saed blong bisnes blong famle nomo. Be long saed blong speret, yu mas no moa joen wetem wan memba blong famle we kongregesen i putumaot hem finis. (Ridim The Watchtower, Septemba 15, 1981, pej 29-31.) Yes, sipos yumi gat strong tingting blong stap tru long God mo ogenaesesen blong hem, samting ya bambae i pusum yumi blong respektem ol disisin we ol elda oli mekem, taem oli jajem wan bisnes insaed long kongregesen.
19. ?Yumi mas mekem wanem sipos ol elda oli soemaot long yumi se yumi stap folem wan rong rod long saed blong speret?
19 I no isi blong stap wokbaot long smol rod we i go kasem laef. Blong mekem olsemia, yumi mas folem ol rul we oli kamaot long Tok blong God. Mo insaed long ogenaesesen blong hem, yumi mas letem olgeta we God i putumap olgeta blong lukaot long ol sipsip blong hem, oli lidim yumi. (Matyu 7:13, 14) Hemia wan eksampel: Yumi stap ron long trak blong yumi, ale yumi tanem long wan kona, nao yumi luksave se yumi tekem rong rod. ?Olsem wanem nao? Yumi mas mekem wan samting blong kambak long stret rod. Sipos no, bambae yumi neva kasem ples we yumi wantem go long hem. Oraet, nao sipos ol elda oli soemaot long yumi se yumi stap folem wan rong rod long saed blong speret, maet from we yumi stap fren wetem wan man we i no gat bilif, ale yumi mas kwik blong folem advaes we i kamaot long Baebol. Hemia wan rod blong soemaot se yumi rili “trastem Jeova.”—Proveb 3:5, 6.
Obei Long Ol Smol Samting Tu
20. ?Yumi save askem wanem kwestin long yumi, we oli save givhan long yumi blong obei mo ona long ol elda long ol smosmol samting tu?
20 Yumi mas obei long ol elda long ol smosmol samting tu. Yumi save askem sam kwestin long yumi: ‘?Sipos ol elda oli askem long mi blong visitim wan sikman no blong trenem sam nyuwan long wok blong prij, mi mi rere blong obei long olgeta? ?Mi mi glad blong mekem ol tok we oli givim long mi long ol miting, mo mi mi mekem olgeta oli reregud? ?Mi mi harem tok blong ol elda taem oli talem se mifala i no mas blokem ol jea long asembli, no taem oli givim advaes long saed blong klos, no samting olsem? ?Mi mi glad blong obei taem oli askem long mi blong givhan blong klinim Haos-Kingdom, no blong putum ripot long wok blong prij kwiktaem, no blong kam long ol miting long stret taem blong olgeta?’
21. ?Fasin blong ona long ol elda i pulum yumi blong tingbaot wanem tok blong Jisas?
21 Ol elda long kongregesen oli glad tumas taem yumi wok gud wetem olgeta, mo plante gudfala frut i kamaot from. Fasin blong ona mo wok gud wetem olgeta long ol smosmol samting tu i mekem yumi tingbaot tok blong Jisas we i talem se: “Man we i stap mekem i stret gud long smol samting nomo, hem i save mekem i stret gud long bigfala samting tu.” (Luk 16:10) Tru ya, yumi wantem mekem i stret gud long olgeta samting.
Yumi Gohed Blong Ona Long Olgeta We Oli Stap Lidim Yumi Long Fasin Kaengud
22. ?Wanem sam gudfala frut we oli kamaot from we ‘slef we i stret’ mo ol elda long kongregesen oli stap lukaotgud long yumi long kaengud fasin?
22 Plante gudfala frut oli stap kamaot from we ‘slef we i stret’ mo ol elda long kongregesen oli stap lukaotgud long yumi long kaengud fasin. Samting ya i pruvum se Jeova i stap blesem ogenaesesen blong hem long wol bigwan. Mo tu, taem ol elda we oli gat gudhan blong lidim yumi oli wok gud tugeta, ol fasin blong olgeta wanwan oli joen, mo samting ya i mekem kongregesen i joen gud tu. From samting ya, olgeta evriwan oli wok strong tugeta blong mekem se wok blong Kingdom i go moa long ples blong olgeta. Yes, wan gudfala frut we i kamaot sipos yumi ona long olgeta we oli stap lidim yumi, hemia: Bambae God i blesem yumi long wok blong prij mo blong mekem moa disaepol. (Matyu 28:19, 20) Mo tu, fasin blong wok gud tugeta wetem ol elda blong yumi, i stap mekem yumi rere blong kasem laef we i no save finis long nyufala wol.
23. ?Taem yumi tingbaot tok blong 1 Jon 5:3, yumi mas wantem mekem wanem?
23 Yumi laekem Jeova tumas, taswe i no hadwok long yumi blong obei long hem. Aposol Jon i talem se: “Sipos yumi laekem God tumas, hemia i min se yumi stap folem ol loa blong hem. Mo ol loa blong hem oli no strong tumas blong folem.” (1 Jon 5:3) Ol trufala Kristin oli glad blong obei long ol loa blong Jeova. Mo oli wantem ona long olgeta we God i putumap olgeta blong lukaot long kongregesen blong hem. !Yumi talem tangkyu tumas long God from we yumi stap insaed long ogenaesesen blong hem, mo hem i putumap “ol man we oli olsem presen long yumi”! (Efesas 4:8, NW) Yumi save trastem God fulwan se hem i stap lidim ol man blong hem tede. Taswe oltaem yumi mas obei long olgeta we oli gat gudfala wok blong lidim ol Wetnes blong Jeova.
?Wanem Tingting Blong Yu?
◻ ?From wanem yumi mas obei long olgeta we oli stap lidim yumi?
◻ ?Yumi mas tingting olsem wanem long ol elda, from ol hadwok blong olgeta?
◻ ?From wanem yumi mas kwik blong folem ol advaes blong ol elda?
◻ ?Wanem gudfala frut i save kamaot from we yumi glad blong ona long olgeta we oli stap lukaot long yumi long kaengud fasin?
[Tok Blong Pija Long Pej 15]
Pol i glad tumas blong talemaot gud nyus mo blong givhan long ol brata blong hem. ?Ol elda, yufala i stap talem tangkyu long God from ol gudfala wok we hem i givim long yufala?
[Tok Blong Pija Long Pej 16]
?Yu yu stap ona long ol elda from we yu yu mekem ol tok we oli givim long yu long miting, yu givhan blong klinim Haos-Kingdom, yu putum ripot blong wok blong prij kwiktaem, mo long plante narafala samting?