Wajtaoa LAEBRI LONG INTENET
Wajtaoa
LAEBRI LONG INTENET
Bislama
  • BAEBOL
  • OL BUK
  • OL MITING
  • w91 5/1 p. 29
  • Yumi Trastem Paoa We God i Givim Long Yumi

I no gat video yet long haf ya.

Sori, i gat problem taem i stap lodem video ya.

  • Yumi Trastem Paoa We God i Givim Long Yumi
  • Wajtaoa i Talemaot Kingdom Blong Jehova—1991
  • Ol Sabtaetol
  • Sem Samting
  • Yumi Winim Ol Nogud Fasin Mo Yumi Tijim Ol Man Long Kaen Gud Fasin
  • !Yumi Talemaot Tok Blong God!
  • ?Wanem i Save Givhan Long Yumi Blong Tijim Trutok Long Fasin We i Stretgud?
    Wajtaoa i Talemaot Kingdom Blong Jehova—2003
  • Timoti “Yu Yu Pikinini Blong Mi Stret”
    Wajtaoa i Talemaot Kingdom Blong Jehova—1999
  • 2 Timoti 1:7—“God i No Givim Spirit Blong Fraet Long Yumi”
    Eksplenesen Blong Ol Vas
  • Ol Yangfala—Traehad Blong Kasem Ol Mak We Oli Givim Ona Long God
    Wajtaoa i Talemaot Kingdom Blong Jehova—2007
Luk Moa Samting
Wajtaoa i Talemaot Kingdom Blong Jehova—1991
w91 5/1 p. 29

Yumi Trastem Paoa We God i Givim Long Yumi

Ol Bigfala Poen Blong Seken Timote

JEOVA i givim paoa long ol man blong hem blong oli winim ol traem mo ol trabol we oli kasem. !Be Timote mo ol narafala Kristin oli nidim we God i givim paoa long olgeta! Wan faea i bin kakae taon blong Rom long yia 64 K.T.,a mo wan tok i goraon se king Nero nao i stampa blong trabol ya. Nero i no wantem kasem trabol, ale hem i ripotem ol Kristin. Nao ol Kristin oli kasem plante trabol. Long taem ya bakegen (raonabaot long 65 K.T.), ol man Rom oli putum aposol Pol long kalabus bakegen. Nating se panis blong ded i stap long fored blong hem, be Pol i raetem seken leta blong hem long Timote.

Leta blong Pol i halpem Timote blong agensem ol tok blong ol Kristin we oli kam gyaman tija, mo i pusum hem blong holemfas long bilif. Nating we trabol i kamaot long hem, be Timote i gat rod blong stanap strong oltaem. Leta ya i enkarajem Timote blong gohed strong long saed blong speret mo i storebaot laef blong Pol long kalabus. Leta ya i pulum yumi blong trastem paoa we God i stap givim long yumi.

Yumi Winim Ol Nogud Fasin Mo Yumi Tijim Ol Man Long Kaen Gud Fasin

God i givim paoa long ol pablisa blong gud nyus blong oli winim ol trabol. (1:​1-18) Pol i neva fogetem Timote long ol prea blong hem mo hem i tingbaot oltaem fasin blong bilif blong hem, we i no blong gyaman. Speret no tingting ya we God i givim long Timote i mekem se Timote i no fraet. Baebol i tokbaot speret ya, nao i se: “Speret ya i blong mekem yumi gat paoa, i blong mekem yumi laekem tumas ol man, mo i blong mekem yumi naf blong blokem ol samting we yumi nomo i wantem.” From samting ya nao, Timote i no sem nating taem hem i givim wetnes mo hem i winim oltaem ol rabis fasin we ol man oli mekem long hem taem hem i talemaot gud nyus. Pol i talem long hem se hem i mas ‘holem stret toktok we Pol i tijim hem finis long hem, [we] tok ya i blong soemaot rod long hem.’ Long sem fasin, yumi tu yumi mas folem ol trutok blong Baebol, nating we sam man i sakemaot olgeta.

Ol samting we Pol i talem long hem, bambae hem tu i mas tijim sam stret man long olgeta, blong olgeta oli save go tijim man bakegen long ol samting ya. (2:​1-26) Ol tok we Timote i kasem oli pusum hem blong hem i kam wan soldia blong Kraes we i gudwan tru, wan soldia we i stanap strong oltaem long saed blong God, nating we hem i kasem trabol. Pol i naf blong talem gudfala advaes olsem from we hem tu i kasem plante trabol long kalabus. From samting ya nao, Pol i enkarajem Timote se hem i mas traehad blong mekem gudfala wok, ale hem i save stanap long fes blong God mo i no save sem long wan samting. Pol i mekem i klia long Timote se hem i mas ronwe long ol gyaman toktok we oli stap sakem doti long ol tabu samting. Mo Pol i talem long hem se wan slef blong Masta i mas tijim ol narafala man long kaen gud fasin.

!Yumi Talemaot Tok Blong God!

Ol man bambae oli nidim paoa we God i stap givim blong fesem ol las dei blong wol ya mo blong fasgud long trutok blong Baebol. (3:​1-17) Sam man nogud bambae ‘oli stap lan oltaem, be neva bambae oli kasem stret save long trutok.’ (NW) “Ol man nogud, mo ol man blong gyaman oli save gohed moa yet, bambae oli save gyaman moa long ol man, mo bambae olgeta tu oli save bilif long ol gyaman tok blong olgeta.” Be Timote i mas ‘holemstrong ol samting we hem i bin lanem bifo.’ Bambae hem i folem advaes ya from we long tingting blong hem, “olgeta tok ya blong Baebol oli kamaot long God fastaem. Hem i putum long tingting blong ol man ya bifo blong oli raetem long buk. Nao ol tok ya i stret gud blong tijim ol man long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim ol man long ol stret fasin. Ol tok ya, God i givim blong bambae ol man blong hem oli save kam waes long olgeta samting, bambae oli gat evri samting blong mekem ol gudfala wok we i stap.”

Timote i mas stanap strong agens long ol gyaman aposol we oli tanem baksaed long trutok, mo hem i mas mekem minista wok blong hem. (4:​1-22) Blong folem advaes we Pol i givim long hem, Timote i mas ‘talemaot Tok blong God’ long ol man mo hem i mas fasgud long ol tok ya. Samting ya i save givhan long kongregesen we i stap kasem ‘hadtaem.’ Hadtaem ya i kam from samfala long kongregesen we oli stat tijim sam gyaman doktrin. Ol Wetnes blong Jeova tu oli fasgud long Tok blong God naoia, oli talemaot Tok blong God insaed long kongregesen mo long ol man afsaed. Oli mekem olsem, nating se samtaem oli kasem trabol from ol man oli no glad long trutok. Pol i “holemtaet fasin blong bilif,” nating se sam Kristin oli ronwe long hem. Be “Masta blong yumi i givim paoa long hem blong hem i talemaot gud olgeta tok blong hem long fes blong ol hiten man, blong oli harem.” Long sem fasin, yumi tu yumi mas stanap strong from paoa we God i stap givim long yumi mo yumi mas gohed oltaem blong talemaot gud nyus.

[Futnot]

a K.T. i min se Kristin Taem.

[Bokis blong pija long pej 29]

Wan Gudfala Soldia: Pol i talem strong long Timote se: “Yu yu mas rere blong harem nogud from gud nyus ya, olsem we yu wan prapa soldia blong Jisas Kraes. Long taem blong faet, man we i soldia, hem i no save mekem ol bisnes blong hem. Hem i mas stap traehad oltaem blong mekem kapten blong hem i harem gud long hem.” (2 Timote 2:​3, 4) Wan soldia blong Rom we i wokbaot long leg i mas “harem nogud” taem hem i mas karem ol hevi tul blong faet olsem wan akis, wan basket, ol kakae blong tri dei, mo sam narafala samting bakegen. (Wars of the Jews, Josephus i raetem, Buk 3, japta 5) Hem i no save mekem bisnes from we fasin olsem, bos blong hem i no save glad long hem. Mo ol samting we hem i nidim, gavman blong Rom nao i pem olgeta. Long sem fasin, wan Kristin i mas winim ol traem we ol “gudfala soldia blong Kraes” oli kasem. Maet hem i mas wok blong winim mane blong lukaot long famle blong hem olsem we Baebol i talem. Be hem i no mas letem ol samting long saed blong bodi oli blokem faet we hem i mekem long saed blong speret. (1 Tesalonaeka 2:9) Taem we hem i prij long olgeta haos wanwan, hem i ‘holem tok blong God, we tok ya i olsem naef blong faet we tabu speret i givim finis long olgeta.’ Kristin ya i givhan long ol man blong oli no moa slef blong ol mastik blong ol gyaman jyos. (Efesas 6:​11-17; Jon 8:​31, 32) From we laef blong olgeta i stap long klia ples, ol Kristin soldia oli mas gohed nomo blong mekem Jisas Kraes mo Jeova God tufala i glad long wok blong olgeta.

    Ol buk long Bislama (1987-2026)
    Logaot
    Login
    • Bislama
    • Serem
    • Setemap Olsem Yu Wantem
    • Copyright © 2025 Watch Tower Bible and Tract Society of Pennsylvania
    • Ol Rul
    • Privacy Policy
    • Privacy Settings
    • JW.ORG
    • Login
    Serem