Ol Refrens Blong Kristin Wok Mo Laef Buk Blong Miting
2-8 JULAE
OL GUDGUDFALA SAMTING LONG BAEBOL | LUK 6-7
“Mekem i Gud Long Ol Man”
nwtsty not blong stadi long Lu 6:37
Yufala i mas gohed blong fogivim ol narafala, nao God bambae i fogivim yufala: O “Gohed blong lego man i go fri, mo God bambae i lego yufala i go fri.” Grik tok we oli tanem i kam “yu fogivim” i minim “yu lego i go fri, yu sanemaot, o yu rilisim (eksampol, wan presina).” Long vas ya, taem oli yusum tok ya fogivim narafala, we i defren long tok ya stop blong jajem mo stop blong talem se narafala man i rabis, hemia i blong givim tingting se man i lego narafala i go fri fulwan, mo hem i mas fogivim man ya, nating se hem i gat raet blong panisim o givimbak long man ya.
w08 1/5 pej 15 haf 13-14
Gohed Blong Mekem i Gud Long Ol Man
13 Gospel blong Matiu i talemaot tok blong Jisas i se: “Bambae yufala i no moa jajem narafala man, nao bambae oli no jajem yufala.” (Mat. 7:1, NW) Gospel blong Luk i talem klosap sem tok olsem Matiu, i se: “Bambae yufala i no moa jajem narafala man, nao bambae oli no jajem yufala. Bambae yufala i no moa tok agensem narafala man, nao bambae oli no tok agensem yufala. Yufala i mas gohed blong mekem man i kamfri, nao bambae oli mekem yu yu kamfri.” (Luk 6:37, NW) Long faswan handred yia, ol Farisi oli jajem strong ol narafala man, folem ol kastom blong olgeta we oli no stanap long Baebol. Sipos samfala we oli lesin long Jisas oli stap mekem fasin ya, oli mas “no moa” mekem. Oli mas mekem defren fasin, oli mas “gohed blong mekem man i kamfri,” i min se oli mas “fogivim narafala” from ol mastik blong hem. Aposol Pol i givim advaes we i klosap sem mak long saed blong fasin blong fogivim narafala man, olsem we yumi luk finis antap.
14 Sipos ol disaepol blong Jisas oli glad blong fogivim narafala, bambae samting ya i save pulum ol narafala blong fogivim olgeta. Jisas i talem se: “Jajmen we yufala i givim long narafala, bambae oli givimbak long yufala. Mo fasin we yufala i folem blong makemaot samting blong givim, bambae oli folem sem fasin blong makemaot samting blong givim long yufala.” (Mat. 7:2, NW) Long saed blong fasin we yumi mekem long ol narafala, bambae yumi kakae frut blong sid we yumi planem.—Gal. 6:7.
nwtsty not blong stadi long Lu 6:38
Yufala i mas gat fasin ya blong givim samting long ol man: O “Gohed blong givim.” Tingting we i stap long Grik tok we oli yusum long vas ya, oli save tanem i kam “yu givim” mo i minim wan aksen we i gohed.
nwtsty not blong stadi long Lu 6:38
bag blong yufala: Prapa tok long lanwis Grik i minim “jes blong yufala,” be long vas ya, tok ya i minim haf kaliko long wan klos we i hang stat long ples blong strap i godaon. Maet fasin ya blong fulumap samting long bag o long haf klos we i hang i godaon, i wan fasin we sam man blong salem samting oli mekem, taem oli fulumap ol samting we man i pem.
Traem Faenem Ol Gudfala Samting Ya
?Olsem Wanem Blong Kam Bigman Long Saed Blong Spirit?
Jisas i spenem plante taem blong Prea. (Jon 17:1-26) Traem tingbaot, bifo we Jisas i jusum ol 12 man we bambae oli kam ol aposol, hem “i go antap long wan bigfala hil, blong i prea. Mo hem i stap long ples ya wan fulnaet, i stap prea long God.” (Luk 6:12) Olgeta we oli bigman long saed blong spirit oli folem eksampol blong Jisas, nating se oli no prea fulnaet. Bifo we oli mekem wan desisen, oli tekem taem blong prea long God, oli askem God blong i givim tabu spirit long olgeta, blong oli save mekem ol desisen we i givhan long olgeta long saed blong spirit.
nwtsty not blong stadi long Lu 7:35
soemaot se waes ya i tru: Long sam Baebol oli transletem tok ya se “ol pikinini blong waes.” Tok ya waes long vas ya, i olsem wan samting we i gat frut o risal blong hem. Long semfala stori we i stap long Mt 11:19, tok ya waes i joen wetem “ol gudfala wok.” Ol pikinini blong waes, o ol wok blong waes, hemia ol pruf we Jon Baptaes mo Jisas tufala i soemaot agensem ol giaman tok we oli talem long tufala. Jisas i talem stret, i se: ‘Yufala i luk ol gudfala wok mo ol fasin ya, nao bambae yufala i save se ol tok ya oli no tru.’
9-15 JULAE
OL GUDGUDFALA SAMTING LONG BAEBOL | LUK 8-9
“?Yu Mas Mekem Wanem Blong Biaen Long Jisas?”
it-2 pej 494
Bed blong pijin
Taem wan tija blong Loa i kam talem long Jisas se: “Tija, mi bambae mi biaen long yu long evri ples we yu go long hem,” Jisas i ansa long hem se: “Ol wael dog oli gat hol blong oli slip long hem, mo ol pijin oli gat bed blong olgeta, be Pikinini blong man i no gat ples blong go slip long hem.” (Mt 8:19, 20; Lu 9:57, 58) Jisas i wantem soemaot se, sipos man ya i wantem kam disaepol blong hem, man ya i mas lego tingting ya blong gat plante samting mo lego ol gudfala samting we hem i stap haremgud long olgeta, mo i mas trastem Jehova fulwan. Mo tu, Jisas i soemaot tingting ya taem hem tijim ol disaepol blong hem long prea ya, we i se: “Plis yu givim kakae long mifala tede, we i naf blong tede,” mo i gohed i se: “Long sem fasin, yufala i mas save se sipos wan long yufala i no talem tata long olgeta samting blong hem, hem i no save kam disaepol blong mi.”—Mt 6:11; Lu 14:33.
nwtsty ol not blong stadi long Lu 9:59, 60
berem papa blong mi: Tok ya i no minim se papa blong man ya i jes ded mo hem i askem blong go mekemrere funerol blong papa blong hem. Sipos i tru se papa blong hem i ded, ating man ya bambae i aot finis, i no save toktok long Jisas. Long Medel Is bifo, taem wan long famle i ded, kwiktaem nomo oli berem hem mo plante taem oli mekem long semfala dei nomo. So maet papa blong man ya i sik tumas o maet hem i olfala finis, be hem i no ded yet. Mo Jisas bambae i no save talem long man ya blong i lego papa blong hem we i sik tumas mo we i nidim man blong i lukaot long hem, taswe i mas gat sam narafala memba blong famle we oli stap we oli save lukaot long ol impoten nid ya. (Mk 7:9-13) Taswe man ya i wantem minim se: ‘Bambae mi biaenem yu, be i no naoia, from we papa blong mi i laef yet. Bambae mi wet kasem we hem i ded mo mi berem hem.’ Be Jisas i luk se man ya i mestem wan nambawan janis, hemia blong putum Kingdom blong God fasples long laef blong hem.—Lu 9:60, 62.
Yu letem ol dedman oli berem ol dedman blong olgeta: Olsem we not blong stadi long Lu 9:59 i soemaot, papa blong man ya we Jisas i stap toktok long hem, maet i sik tumas o i olfala finis, be hem i no ded yet. Taswe, Jisas i talem se: ‘Yu letem olgeta we oli ded long saed blong spirit oli berem ol dedman blong olgeta,’ hemia i min se, man ya i sud letem ol narafala memba blong famle oli lukaot long papa blong hem kasem we i ded mo oli berem hem. Sipos man ya i biaen long Jisas, bambae hem i no folem ol man ya we God i luk olgeta se oli ded long saed blong spirit, be bambae hem i stap long rod blong kasem laef we i no save finis. Ansa we i Jisas i givim, i soemaot se blong stap laef long saed blong spirit, man i mas putum Kingdom blong God fasples long laef blong hem mo i mas gohed blong talemaot Kingdom ya.
nwtsty pija mo video
Wud blong brebrekem graon
Plante taem ol man oli brebrekem graon long taem we ol lif oli folfoldaon, mo ren i mekem strong graon we san i bonem, i kam sofsof bakegen. (Lukluk App. B15.) Blong brebrekem graon, samfala oli yusum wan pis wud we i sap, o maet wan aean we i ben smol, mo oli joenem i go long wud we wan anamol o plante anamol oli pulum. Afta we oli brebrekem graon, oli saksakem ol sid. Long Hibru haf blong Baebol, fasin ya blong brebrekem graon, oli yusum olsem wan pijatok, mo i stap long plante vas. (Ja 14:18; Aes 2:4; Jer 4:3; Mae 4:3) Jisas tu i yusum ol wok we man i mekem long garen, olsem ol pijtok, blong tijim ol impoten samting. Eksampol, hem i tokbaot wok blong brebrekem graon, blong makemgud se i impoten blong mekem wok blong Kingdom wetem fulhat. (Lu 9:62) Sipos man blong brebrekem graon i stap lukluk olbaot, bambae hem i no save wokem wan stret laen. Long sem fasin, wan disaepol blong Kraes we i letem ol defren samting oli pulum tingting blong hem, o i no moa mekemgud wok blong hem, bambae i no save mekemgud wok blong Kingdom.
w12 1/4 pej 21-22 haf 11-13
Yu Mas Wok Blong Jehova Long Olgeta Hat Blong Yu
11 I gud yumi tingting moa long pijatok ya blong luk se hem i tijim yumi long wanem samting. Wan man blong wokem garen i stap wok strong blong brebrekem graon. Be taem hem i stap brebrekem graon, hem i stap tingting long haos blong hem. Hem i stap tingbaot se long haos i gat ol famle mo ol fren blong hem, i gat kakae, miusik, hem i save laf gud, mo hem i save sidaon long sado. Hem i stap tingting strong long ol samting ya. Afta we hem i stap brebrekem graon longtaem lelebet, hem i wantem tumas ol samting ya. Ale, hem i luklukbak long “ol samting biaen.” Nating se i gat plante wok yet blong mekem long garen, tingting blong man ya i no stap gud long wok blong hem, mo hem i no moa wok gud. Ale masta blong hem i no glad long hem from we hem i no wok strong longtaem.
12 Tede, wan samting olsem i save hapen long wan Kristin. Maet i luk olsem se hem stap wok strong, i gohed gud, be wan samting i stap spolem hat blong hem. Yu traem tingbaot wan brata we i strong blong go long ol miting mo blong joen long wok blong prij. Hem i stap mekem ol samting ya, be hem i stap tingting long sam samting blong wol we hem i laekem. Long hat blong hem, hem i wantem tumas ol samting ya. Afta sam yia i pas we hem i stap mekem wok blong God, tingting blong wantem ol samting long wol i kam strong tumas long hem. Nao hem i luklukbak long “ol samting biaen.” Nating se i gat plante wok yet blong mekem long wok blong prij, tingting blong hem i no moa stap long wok ya, mo hem i no moa mekem gud wok ya olsem fastaem. (Fil. 2:16) Jehova i “masta blong garen.” Hem i harem nogud tumas we wan man blong wok blong hem i no wok strong longtaem.—Luk 10:2.
13 Tijing we yumi kasem i klia nomo. Yumi mas wok strong moa, blong soemaot se yumi mekem wok blong Jehova long olgeta hat blong yumi. I no naf we yumi joen oltaem long ol miting blong kongregesen mo long wok blong prij. (2 Kron. 25:1, 2, 27) Sipos long hat blong yumi, yumi stap laekem “ol samting biaen,” hemia ol samting blong wol ya, yumi stap spolem fasin fren blong yumi wetem Jehova. (Luk 17:32) Taswe, blong yumi save mekem wok blong Jehova long olgeta hat blong yumi, yumi mas “agens long ol rabis fasin,” mo yumi mas “holemstrong ol gudfala fasin.” (Rom 12:9; Luk 9:62, NW) Yes, nating we i luk olsem se sam samting long wol blong Setan oli save givhan long yumi mo oli save mekem yumi harem gud, yumi mas lukaot se oli no blokem yumi blong mekem wok blong Jehova long olgeta hat blong yumi.—2 Kor. 11:14; ridim Filipae 3:13, 14.
Traem Faenem Ol Gudfala Samting Ya
nwtsty not blong stadi long Lu 8:3
blong givhan long olgeta: O “blong sapotem (givim samting long) olgeta.” Grik tok ya di·a·ko·neʹo i save minim givim samting we narafala i nidim long saed blong bodi olsem, kukum kakae, givim kakae, mo sam narafala samting. Hemia sem tingting we i stap long Lu 10:40 (“mekem olgeta wok”), Lu 12:37 (“givim kakae”), Lu 17:8 (‘karem kakae i kam’), mo Wok 6:2 (“seraot kakae”), be Grik tok ya i save minim ol narafala samting we i joen wetem fasin blong givim samting long saed blong bodi. Long Luk 8: 2, 3 i tokbaot klia olsem wanem ol woman ya oli sapotem Jisas mo ol disaepol, mo oli halpem olgeta blong gohed long wok blong God. Ol woman ya oli mekem samting we i soemaot se oli ona long God, mo God i soemaot se hem i glad long olgeta, taem hem i letem stori blong olgeta i stap long Baebol, nao ol man we oli kamaot biaen oli save ridim stori ya, long saed blong sori mo gladhat blong givim samting. (Pro 19:17; Hib 6:10) Oli yusum semfala Grik tok ya tu blong tokbaot ol woman long Mt 27:55; Mk 15:41.
w08 1/3 pej 31 haf 3
Ol Bigfala Poen Long Buk Blong Luk
9:49, 50—?From wanem Jisas i letem wan man we i no man blong hem, i ronemaot devel long ol man? Jisas i no blokem man ya from we long taem ya, Kristin kongregesen i no stat yet. Taswe i no nid blong man ya i wokbaot wetem Jisas, blong hem i save bilif long nem blong Jisas mo ronemaot ol devel.—Mak 9:38-40.
16-22 JULAE
OL GUDGUDFALA SAMTING LONG BAEBOL | LUK 10-11
“Parabol Blong Man Sameria”
nwtsty pija mo video
Rod Blong Jerusalem Kasem Jeriko
Rod (1) we yu luk long sot video ya hem i klosap semak long olfala rod we i pas long Jerusalem i go kasem Jeriko. Longfala blong rod ya i moa long 20 kilometa (12 mael), mo rod ya i tantanem olbaot. Be distens long Jerusalem we i godaon stret long Jeriko, hem i 1 kilometa (0.6 mael). Plante taem ol stilman oli stap olbaot long rod ya, taswe i mas gat wan grup blong ol soldia i stap blong protektem ol man we oli travel. Roman Jeriko (2) i stap long ples ya we rod i seraot i go long draeples blong Judia. Wan olfala taon blong Jeriko (3) i stap samwe long 2 kilometa (samwe moa long 1 mael) long taon blong Rom.
“Hem i Toktok Long Olgeta Long Parabol Nomo”
14 Seken parabol, hemia long saed blong gudfala man Sameria. Jisas i statem toktok blong hem olsem: “I gat wan man i aot long Jerusalem, i stap godaon long Jeriko. Nao long rod, sam man blong stil oli kam holem hem. Ol man ya oli stilim olgeta samting blong hem, mo oli kilim hem long stik, nao oli livim hem i stap long rod, we i hafded, mo oli girap oli ronwe long hem.” (Luk 10:30) Makem gud we Jisas i tokbaot rod we i aot ‘long Jerusalem i godaon long Jeriko.’ Taem hem i talem parabol ya, hem i stap long wan ples long Judia we i no longwe long Jerusalem. Taswe, ating ol man we oli stap lesin long hem oli save gud rod ya. Oli save se rod ya i denja tumas, antap moa, sipos wan man i stap wokbaot hem wan. Rod ya i pastru long ol ples we i no gat man nating i stap long olgeta. From samting ya, i gat plante ples we ol man blong stil oli save haed blong kilim man.
15 Yumi makem wan narafala samting long saed blong rod ya we i aot ‘long Jerusalem i godaon long Jeriko.’ Long parabol ya, wan pris i folem rod ya fastaem, mo biaen, wan Livaet. Be i no gat wan long tufala ya we i givhan long man ya we i hafded long rod. (Luk 10:31, 32) Ol pris oli wok long tempol long Jerusalem, mo ol Livaet oli givhan long olgeta. Plante pris mo Livaet oli stap long Jeriko taem oli no stap wok long tempol. Jeriko i no longwe long Jerusalem, samwe 23 kilometa nomo. Ale, i klia se oli folem rod ya oltaem. Makem tu se pris mo Livaet ya oli “aot long Jerusalem.” Hemia i min se oli kamaot long tempol, oli stap gohom. From samting ya, ol man we oli lesin long Jisas oli no save mekem eskius from fasin blong tufala ya blong no gat sore. Oli no save talem se: ‘Tufala i no givhan long man we i slip long rod from we tufala i ting se man ya i ded, mo sipos tufala i tajem wan dedbodi, bambae tufala i no klin blong smoltaem, mo bambae i tabu blong tufala i mekem wok long tempol.’ (Levitikas 21:1; Namba 19:11, 16) Yes, i klia se parabol ya blong Jisas i tokbaot ol samting we ol man long taem ya oli save gud long olgeta.
nwtsty ol not blong stadi long Lu 10:33, 34
wan man Sameria: Ol man Jiu oli lukluk daon long ol man Sameria mo oli no wantem mekem eni samting wetem olgeta. (Jon 4:9) Sam man Jiu oli yusum tok ya “man Sameria” olsem wan tok blong daonem mo spolem man. (Jon 8:48) Buk blong Misna i talem bakegen ol tok blong wan lida blong ol man Jiu we i talem se: “Man we i kakae bred blong ol man Sameria, i olsem se hem i kakae mit blong pig.” (Shebith 8:10) Plante man Jiu oli no bilivim tok blong ol man Sameria mo oli no wantem wok wetem olgeta. Jisas i savegud fasin blong ol man Jiu, taswe hem i makem strong poen long pijatok ya blong wan man Sameria.
i putum waen mo oel long ol soa blong hem, mo i fasemgud olgeta: Dokta Luk i raetemdaon klia pija tok blong Jisas, taem hem i eksplenem gud tritmen we man Sameria ya i mekem, we i stret long taem blong olgeta. Waen mo oel oli ol impoten samting we ol man oli gat long haos blong tritim ol soa. Oli yusum oel blong mekem soa i kam drae (skelem wetem Aes 1:6), mo oli yusum waen olsem meresin blong kilim ol jem mo klinim soa. Mo tu Luk i tokbaot olsem wanem oli fasemgud soa, blong mekem i no kam bigwan.
wan smol hotel: Prapa tok long lanwis Grik i minim “wan ples we eniman i save kam stap long hem.” Ol man we oli travel, wetem ol anamol blong olgeta, oli save kam stap long wan ples olsem. Man we i lukaot long smol hotel ya, i givim ol samting we ol man blong travel oli nidim, mo sipos hem i mas lukaot long sam man, be maet oli mas pem hem.
Wan Man Sameria i Soem Se Hem i Wan Man Blong Mekem i Gud Long Ol Man Raonabaot Long Hem
Parabol ya blong Jisas i soem se wan man we i rili stret, hemia wan man we i obei long ol loa blong God, mo antap long samting ya, we i folem ol nambawan fasin blong God. (Efesas 5:1) Eksampol, Baebol i talem se: “God i stap mekem i sem mak nomo long olgeta man.” (Ol Wok 10:34) ?Yumi stap folem fasin ya blong God? Parabol ya blong Jisas we i wekemap filing blong yumi, i soem se tok ya ‘ol man raonabaot long yumi’ i no jes minim ol man blong sem kantri, kastom no skul blong yumi. Tru ya, ol Kristin oli kasem oda ya blong “mekem i gud long olgeta man,” hemia i no minim olgeta we oli gat sem bilif olsem yumi nomo, be i minim tu ol man blong narafala laen, kantri, mo defren kaen laef.—Galesia 6:10.
Traem Faenem Ol Gudfala Samting Ya
nwtsty not blong stadi long Lu 10:18
Mi mi luk Setan i foldaon finis long heven i kamdaon olsem wan laetning: Hemia wan profet tok we Jisas i stap talem, hem i luk se hem i sakemaot Setan finis long heven. Re 12:7-9 i tokbaot se Kingdom blong Mesaea i stanap afta we i gat wan bigfala faet mo oli sakemaot Setan long heven mo olgeta we oli joen wetem hem. Jisas i stap tokbaot faet we bambae i hapen long fiuja agensem Setan mo ol rabis enjel blong hem, hemia from we God i jes givim paoa long ol 70 disaepol, we oli sinman, blong oli ronemaot devel long ol man.—Lu 10:17.
w08 1/3 pej 32 haf 1
Ol Bigfala Poen Long Buk Blong Luk
10:18—?Jisas i stap tingbaot wanem, taem hem i talem long ol seventi disaepol se: “Mi mi luk Setan i aot long heven, i foldaon olsem we laetning i sut i kamdaon?” Jisas i no talem se oli sakemaot Setan finis long heven i kamdaon long wol, from we samting ya i jes hapen smoltaem afta we Kraes i kam King long heven long 1914. (Rev. 12:1-10) Yumi no save sua gud long wan samting we i no kamtru yet, yumi no save mekem olsem we i hapen finis. Be Jisas i stap makemgud se samting ya bambae i sua blong kamtru.
nwtsty ol not blong stadi long Lu 11:5-9
?Fren, yu save givim tri bred fastaem?: Folem kastom blong Medel Is, ol man oli gat nambawan fasin blong tekem narafala i kam long haos blong olgeta, olsem we pijatok ya i soemaot. Nating se man ya i kamtru long medel naet, man blong haos i harem se i mas givim wan samting long hem blong i kakae. Be sipos man blong haos i no moa gat kakae, hem i harem se hem i mas go askem kakae long neba blong hem long semtaem ya nomo.
Yu no mekem hadwok long mi: Long pijatok ya neba i no wantem givhan, i no from we hem i no laekem man ya, be from we hem i stap slip finis. Ol haos long taem ya, speseli blong olgeta we oli pua, evriwan oli slip long wan bigfala rum nomo. Taswe sipos man blong haos i girap, bambae hem i distebem ful famle, we hemia i minim tu ol smol pikinini we oli slip finis.
no sem blong askem samting: Grik tok we oli yusum long ples ya i save minim “no gat tingting daon” o “no gat sem.” Be stori ya i wantem soemaot se man i mas gohed blong gat strong tingting. Man ya long pijatok blong Jisas, i no sem nating blong gohed blong askem samting we hem i nidim, mo Jisas i talem long ol disaepol blong hem se ol prea blong olgeta i mas semak, oli mas gohed blong askem.—Lu 11:9, 10.
23-29 JULAE
OL GUDGUDFALA SAMTING LONG BAEBOL | LUK 12-13
“Yufala i Gud Moa i Winim Plante Smol Pijin”
nwtsty not blong stadi long Lu 12:6
smol pijin: Grik tok ya strou·thiʹon i minim eni pijin we saes blong hem i smol, be plante taem hem i tokbaot smol pijin ya sparo, we i jip moa long ol narafala pijin we man i pem blong kakae.
nwtsty not blong stadi long Lu 12:7
ol hea long hed blong yufala, hem i kaontem evriwan: Oli talem se namba blong hea long hed blong wan man, i moa long 100,000. Intres we Jehova i gat long saed blong ol smosmol samting olsem, i pruvum se hem i gat bigfala intres long ol wanwan man blong Kraes.
cl pej 241 haf 4-5
I No Gat Wan Samting “i Save Tekemaot Yumi Long Lav Ya Blong God”
4 Faswan samting, Baebol i tijim se God i tinghae long ol wanwan man blong hem. Eksampol, Jisas i talem se: “Tingbaot ol smol pijin ya we oli salem tu blong wan selen nomo, be Papa blong yufala i save taem wan nomo long olgeta i foldaon long graon. Be yufala, ol hea blong hed blong yufala, hem i kaontem evriwan. From samting ya, yufala i no fraet. Long fes blong hem, yufala i gud moa i winim plante smol pijin.” (Matiu 10:29-31) Traem tingbaot mining blong ol toktok ya, long taem we ol man oli stap lesin long Jisas.
5 Maet yu stap tingting se ?from wanem ol man oli wantem pem ol smol pijin ya? Hemia from we long taem blong Jisas, oli salem ol smol pijin ya i jip nomo we man i save pem blong kakae. Makem se wan man i save pem tu smol pijin, long wan selen nomo. Biaen Jisas i gohed moa se, sipos wan man i givim tu selen, hem i save karem faef pijin, i no fo. Namba faef pijin oli givim fri nomo. Maet ol pijin ya oli olsem nating nomo long ae blong ol man, ?be olsem wanem long tingting blong Man we i Wokem olgeta? Jisas i talem se: “God i no fogetem wan long olgeta.” (Luk 12:6, 7) Naoia maet yumi luksave poen we Jisas i wantem tijim. !Sipos ol smol pijin ya oli sas long ae blong Jehova, be hemia i minim se yumi sas moa! Olsem we Jisas i eksplenem, Jehova i save evri smosmol samting long saed blong yumi. !Yes, olgeta hea long hed blong yumi, hem i kaontem evriwan!
Traem Faenem Ol Gudfala Samting Ya
nwtsty not blong stadi long Lu 13:24
Yufala i mas fosem yufala: O “Gohed blong traehad.” Jisas i makem klia se yumi mas traehad long olgeta haf blong laef blong yumi blong gotru long doa ya we i smol. Long plante refrens oli transletem tok ya se, “Yusum olgeta paoa blong yu; Mekem evri samting we yu naf blong mekem.” Grik veb ya a·go·niʹzo·mai i joen wetem Grik tok ya a·gonʹ, we plante taem oli yusum blong tokbaot ol man blong resis. Long Hib 12:1, oli yusum tok ya blong tokbaot “resis” blong laef blong wan Kristin. Oli yusum tu blong tokbaot wan man we i “wok had” (Fil 1:30; Kol 2:1) o wan “faet” (1Ti 6:12; 2Ti 4:7). Grik veb we oli yusum long Lu 13:24 oli tanem i kam “resis blong winim praes” (1Ko 9:25), “fosem [yu wan]” (Kol 1:29; 4:12; 1Ti 4:10), mo “faet” (1Ti 6:12). From we tok ya i joen wetem kompetisin blong resis, samfala oli talem se traehad we Jisas i wantem pulum ol man blong hem blong oli mekem, i semak olsem we wan man blong resis i fosem hem wan long ful paoa blong hem blong winim praes.
nwtsty not blong stadi long Lu 13:33
i no stret: O “i no save hapen olsem.” I no gat wan profet tok long Baebol we i eksplenemgud se Mesaea bambae i ded long Jerusalem, maet tingting ya i tru, we i stap long Da 9:24-26. Mo tu, sipos ol man Jiu nao bambae oli kilim wan profet, speseli Mesaea, hemia bambae i hapen long taon ya. Ol 71 memba blong Sanhedrin, hae kot, oli mit long Jerusalem, so olgeta we oli agensem olgeta se oli ol giaman profet, bambae oli jajem olgeta long ples ya. Maet Jisas i save gat tingting ya se Jerusalem i ples we oli givim sakrefaes i go long God mo hemia ples we oli kilim smol sipsip blong Pasova. Ol samting we oli hapen, oli mekem tok blong Jisas i kamtru. Oli tekem hem i pas long Sanhedrin long Jerusalem mo jajem hem se i mas ded. Mo i no longwe tumas long stonwol blong taon blong Jerusalem, we oli kilim hem i ded olsem ‘smol sipsip blong Pasova.’—1Ko 5:7.
30 JULAE–5 OGIS
OL GUDGUDFALA SAMTING LONG BAEBOL | LUK 14-16
“Parabol Blong Boe We i Lusum Rod”
nwtsty ol not blong stadi long Lu 15:11-16
Wan man i gat tu boe: Sam long ol haf blong parabol blong boe we i lusum rod oli spesel. Hemia wan long ol longfala parabol we Jisas i tokbaot. Wan nambawan samting hemia gudfala fasin fren blong famle ya. Long ol narafala parabol, plante taem Jisas i tokbaot ol samting we oli no gat laef, olsem ol defrenkaen sid o graon, o fasin fren blong wan masta mo ol slef blong hem. (Mt 13:18-30; 25:14-30; Lu 19:12-27) Be long parabol ya, Jisas i wantem makemaot fasin fren bitwin wan papa mo tufala boe blong hem. Maet plante we oli harem stori ya, oli no gat samfala filing olsem papa ya. Be parabol ya i blong soemaot bigfala fasin sore mo lav we Papa blong yumi long heven i gat long ol pikinini blong hem long wol, olgeta we oli stap oltaem wetem hem mo olgeta we oli kambak long hem afta we oli bin lusum rod.
sekenbon: Folem Loa blong Moses, fasbon i kasem dabol blong ol samting we papa i seraot long ol pikinini blong hem. (Du 21:17) So sipos boe long parabol ya hem i fasbon, be hemia i minim se sekenbon i kasem haf nomo blong ol samting we bigfala brata blong hem i kasem.
westem: Grik tok we oli yusum long ples ya i minim “go olbaot (long ol defren daereksen).” (Lu 1:51; Wok 5:37) Long Mt 25:24, 26, oli tanem tok ya se “tekem ol sid blong wit we narafala i klinim.” Oli yusum tok ya blong givim tingting ya se man i westem, i spenem long fasin we i no waes.
wan rabis laef: O “westem (no kea; wael) laef.” Oli yusum wan Grik tok we i klosap semak olsem long vas blong Ef 5:18; Tae 1:6; 1Pi 4:4. From we maet Grik tok ya tu i givim tingting se spenem tumas o westem mane, sam Baebol translesen oli yusum tok ya “spenem mane olbaot.”
lukaot long ol pig: Folem Loa, ol anamol ya oli no klin, so hem ya i mekem sem long man ya, from long tingting blong ol man Jiu, wok ya i daon moa long olgeta narafala wok.—Le 11:7, 8.
kakae blong pig: Hemia wan kaen frut we sel blong hem i saen, mo we kala blong hem i pepol mo i braon lelebet mo folem mining blong hem long Grik lanwis (ke·raʹti·on, “smol hon”), hem i ben olsem sep blong wan hon. Stat bifo kasem tede ol man oli stap yusum frut ya blong fidim ol hos, ol buluk, mo ol pig. From we yangfala man ya i kakae ol kakae ya blong pig, hemia i soemaot se hem i rili trabol o hanggri.—Lukluk not blong stadi long Lu 15:15.
nwtsty ol not blong stadi long Lu 15:17-24
agens long yu: O “long lukluk blong yu.” Grik tok ya e·noʹpi·on, i minim “bifo; long lukluk blong,” we oli yusum long semfala fasin long 1Sa 20:1 long Septuagint. Long vas ya, Deved i askem long Jonatan se: “?Wanem ya we mi mi mekem we i nogud long papa blong yu?”
wokboe blong yu: Taem hem i gohom, yangfala boe ya i plan se bambae hem i askem papa blong hem blong i tekembak hem, i no olsem wan pikinini boe, be olsem wan wokboe. Man olsem i no haf blong ol samting we masta i gat, olsem ol slef, be hem i wan man aotsaed we oli yusum hem wanwan taem nomo taem oli nidim.—Mt 20:1, 2, 8.
i kis long hem: Grik tok we oli tanem i kam “i kis long” i kamaot long veb ya phi·leʹo, we samtaem oli tanem i kam se “kis” (Mt 26:48; Mk 14:44; Lu 22:47) be plante taem tok ya i karem mining ya se “gat lav long” (Jon 5:20; 11:3; 16:27). Taem hem i welkamem bak boe ya long kaen fasin, mo long fasin we soem se oli frengud, papa long parabol ya i soemaot we hem i wantem tumas blong tekembak boe blong hem we i tanem tingting blong hem.
mi mi pikinini blong yu: Sam hanraet oli ademap se: “Yu mekem long mi olsem we mi mi wokboe blong yu nomo,” be ol toktok we oli stap long vas ya naoia, oli folem ol olfala hanraet we i gat plante pruf blong sapotem vas ya. Sam man blong stadi oli talem se, ol man oli ademap ol tok ya jes blong mekem i laenap wetem Lu 15:19.
longfala klos . . . ring . . . sandel: Longfala klos ya we oli putum long hem i no wan klos olbaot nomo. Hem i wan longfala klos we i beswan, maet hem i wan longfala klos we oli flasemgud olsem hemia blong ol haeman. Fasin ya blong putum ring long han blong boe i soemaot we papa ya i lavem hem tumas, i gat respek, i ona, mo i givim haenem i gobak long pikinini ya. Ol slef oli no stap putum ring mo sandel. Taswe, papa ya i soemaot klia se hem i agri fulwan se boe ya i kambak olsem stret pikinini blong hem.
Traem Faenem Ol Gudfala Samting Ya
nwtsty not blong stadi long Lu 14:26
lavem mi moa bitim: Long Baebol, tok ya “lavem mi moa i bitim” i save gat plante mining. I save minim filing ya blong agensem narafala, pulum wan man blong spolem narafala. O i save minim wan strong filing blong no laekem nating wan man o wan samting, we biaen i save pulum wan man blong i no mekem eni samting we i joen wetem man ya o samting ya. O tok ya i save minim nomo se yu lavem wan man o samting i bitim narafala man o samting. Eksampol, taem Baebol i talem se Jekob i “laekem Rejel moa i winim we i laekem Lea,” hemia i blong minim se hem i no rili laekem Lea olsem we i laekem Rejel (Je 29:31; Du 21:15), mo oli yusum tok ya tu long sam narafala buk blong ol man Jiu. Be long ples ya, Jisas i no stap minim se ol man blong hem oli mas gat filing ya blong no laekem nating o agensem ol famle blong olgeta mo long olgeta wan bakegen. From sipos i olsem, hemia bambae i go agensem ol narafala vas. (Skelem wetem Mk 12:29-31; Ef 5:28, 29, 33.) Long vas ya, tok ya “lavem mi moa i bitim” i save minim “lavem narafala smol nomo.”
Wok Had Blong Kasem Ol Rij Samting We Oli Tru
7 Ridim Luk 16:10-13. Slef long stori ya blong Jisas i fren gud wetem sam man, we biaen oli save givhan long hem. Be Jisas i no wantem se yumi fren gud wetem hem mo Jehova blong kasem samting nomo. Hem i wantem tijim yumi se yumi mas lukaot gud olsem wanem yumi yusum ol rij samting. Long rod ya, yumi soemaot se yumi lavem God. ?Olsem wanem yumi yusum gud ol rij samting?
8 Yumi yusum gud ol rij samting taem yumi givim presen mane blong sapotem wok blong prij long fulwol, we Jisas i tokbaot. (Matiu 24:14) Wan gel long India, i stap putum ol smosmol mane blong hem long wan tin. Hem i no moa pem ol pleplei, from hem i wantem fulumap tin ya, mo givim olsem presen mane blong sapotem wok blong prij. Wan narafala brata long India we i gat wan plantesen blong ol kokonas, hem tu i mekem ‘fasin we i waes.’ Hem i givim kokonas i fri nomo, long olgeta we oli wok long ofis blong tanem ol buk i go long lanwis Malaelam. Hem i harem se taem hem i mekem samting ya, i olsem se hem i givim presen mane. Ol brata long Gris tu oli stap givim olif oel, jis, mo sam narafala kakae, long Betel.