Yumi Kam Long Stret Taem​—Wan Fasin Blong Tingbaot Ol Narafala

¹ Maet yufala i harem finis ol tok ya se: “!I moa gud we mi kamlet, i bitim we mi no kam samtaem! !Maet mi no stap long stret taem, be mi go oltaem long ol miting!” ?Yu yu harem finis toktok olsem? ?Sipos yumi let oltaem long ol miting, wanem gudfala samting yumi mestem? Bambae yumi no singsing blong mekem wosip long Jeova, no maet yumi no gat jans blong prea long Jeova wetem kongregesen. Olgeta we oli let oltaem oli no save leftemap tingting blong ol narafala bifo long ol miting, mo ol narafala tu bambae oli no gat rod blong leftemap tingting blong olgeta ya. Be moa yet, sipos yumi let, maet ol brata sista mo ol fren blong trutok oli lukluk yumi taem yumi kamtru long Haos-Kingdom, ale oli no moa lesin gud long ol tok we i kamaot long platfom.​—Ekles. 3:1. Rom 1:​11, 12.

² Be sipos yumi kam long stret taem, yumi soemaot we yumi rili tingbaot ol narafala. Blong kasem mak ya, ol samting we yumi mas mekem oli mas klia long tingting blong yumi, mo yumi mas tingbaot ol samting we oli save blokem yumi. I tru we wanwan taem yumi no kam long stret taem long wan miting, be i no fol blong yumi. Maet yumi let from we bas we yumi tekem i goraon olbaot no maet from we trak blong yumi i nogud. Be yumi mas lukaot gud long fasin blong kamlet oltaem. Rabis fasin ya i save kasem yumi sipos yumi no gat plan long laef blong yumi, no from we yumi no kea tumas long ol samting we yumi mas mekem. Maet yumi let oltaem from we yumi livim haos blong yumi i let tumas. Taswe, yumi mas traem bes blong yumi blong mekem se taem miting i stat, be yumi stap long Haos-Kingdom finis.

³ Samfala oli kamlet from we oli no ting se oli mas rere fastaem blong kam long stret taem blong ol miting. Sipos wan man i let oltaem nomo, sloslou olgeta long kongregesen bambae oli no moa respektem hem. ?From wanem? I olsem from we fasin blong man ya i soemaot we hem i no kea long wan samting, nao ol man oli no save trastem hem. Mo olgeta long kongregesen oli save gat tingting se man ya i mekem sem fasin nomo long ol narafala wok blong laef blong hem. Be sipos yumi kam long stret taem, yumi folem ol stret fasin blong speret blong Jeova.​—Gal. 5:​22, 23.

⁴ Yumi evriwan i glad blong go long ol miting. Mo yumi hapi nomo taem yumi luk ol elda mo ol man blong givhan oli mekem welkam long yumi mo oli soemaot se oli glad tumas we yumi evriwan i joen long wan tiokratik famle nomo.​—Rom 15:7.

⁵ I impoten tu we yumi kam long stret taem long ol miting blong prij. Long fasin olsem, yumi wanwan i save spenem moa taem long wok blong prij mo long wok blong mekem disaepol. Sipos yu no gat jans blong stap long miting blong prij, be stil yu yu wantem prij wetem ol pablisa, i moa gud we yu mekem rod blong go faenem olgeta long ples blong prij, ale yu yu save prij wetem olgeta.

⁶ Sipos yumi kam long stret taem, fasin ya i soemaot we yumi tingbaot ol samting we yumi mekem mo yumi tinghae long ogenaesesen we yumi tekem nem blong hem. Mo tu, yumi stap soemaot se yumi tingbaot ol narafala mo yumi minista blong God we yumi mekem olgeta samting long fasin we i stret gud, we ol man oli glad long hem nomo. (1 Korin 14:40) Sipos wan man i singaot yumi blong go kakae long haos blong hem, bambae yumi no kamlet long haos blong man ya. Fasin blong kam long stret taem long haos blong man ya i olsem wan rod blong soemaot respek long hem. ?Be olsem wanem nao? ?Ol kakae long saed blong speret we kongregesen i rerem gud long yumi oli impoten sem mak, no olsem wanem? Yes, yumi mas stap long ol miting long stret taem, from we long fasin ya yumi soemaot we yumi gat respek long Jeova God we i singaot yumi, mo yumi tinghae long ol rod we hem i putumap blong givim ol kakae blong speret long yumi.

⁷ Ol papa mama oli mas lukaot gud long saed ya, oli mas soemaot gudfala rod long ol pikinini blong ol. Sipos yumi mekem fasin ya i wok long laef blong yumi, bambae yumi evriwan, nating se yumi yangfala no yumi pikinini nomo, be yumi tu yumi gat jans blong givim wan gudfala wetnes. Bambae ol man oli save gud long ogenaesesen we yumi karem nem blong hem mo long fasin blong yumi. Maet bambae yumi tu yumi save tok olsem aposol Pol, se: “Mifala i no wantem we sam man oli save faenem sam rabis poen long ol wok blong mifala. Nao mifala i stap traehad, blong mifala i no mekem sam fasin we narafala man bambae i save foldaon long hem. Long olgeta samting we mifala i mekem, mifala i stap soemaot we mifala i man blong wok blong God.”​—2 Korin 6:​3, 4.”