Kraes i Eksampel Blong Ol Yangfala
1 Afta we wan yangfala i bin storeyan long Baebol blong longtaem, hem i talem se: “Mi mi sapraes long prapa fasin blong Jisas Kraes, we hem i no slak, be hem i gat plante paoa mo laef long hem. Hemia wan lida we mi save trastem.” Yumi no save talem samting ya long saed blong ol haeman blong politik, mo ol jampion blong spot, mo ol sta blong sinema. Ol man we oli soem klia se oli agri wetem ol tingting blong wol mo folem ol fasin blong laef we oli no Kristin, ol trufala Kristin oli no luk olgeta olsem eksampel blong olgeta.—Sam 146:3, 4.
2 Ol yangfala oli save sua se taem oli soemaot bilif long Jisas Kraes, oli kam olsem sipsip blong God, mo Jisas i save olgeta. Gudfala Man Blong Lukaot Long Sipsip i stap keagud long olgeta. (Jon 10:14, 15, 27) Ol yangfala we oli folem Kraes olsem Eksampel blong olgeta, oli kasem blesing.
3 Wan brata we naoia i stap wok long Betel long Bruklin, hem i putum mak blong kasem nambawan wok ya, taem hem i gat eit yia nomo. Hem i kasem tok blong pulum hem, blong tingbaot wok long Betel olsem wan rod blong soemaot, taem hem i kam bigman, se hem i stap folem eksampel blong Kraes. Papa mama blong hem, wetem ol elda we oli goraon long ol kongregesen, oli pulum hem blong kasem mak ya. Blong mekem hem i rere long wok ya, oli leftemap tingting blong hem blong traehad long ol wok blong hem, olsem we hem i wan memba blong Betel famle. Hemia ol wok olsem wok long haos, wok blong mekem Haos Kingdom i stap gud, mo blong kamgud moa long minista wok blong hem. Naoia, hem i bin haremgud long wok blong hem long Betel blong plante yia finis. Hem i glad we, taem hem i stap gruap, hem i traehad blong folem eksampel blong Kraes.
4 Jisas i no givim laef blong hem blong mekem wan wok long wol. Hem i jusum blong mekem minista wok. Wan yangfala sista i wantem kam wan paenia afta we hem i finis long skul. Be hem i fraet from we hem i no gat wan gudfala haftaem wok. Hem i stap tingting se: ‘Fastaem bambae mi faenem wan wok. Afta, bambae mi fulumap pepa blong paenia.’ Wan elda i storeyan long hem se, sipos hem i stap wet blong plante manis, bambae tingting blong hem i save pulum hem blong wantem wok fultaem, from we i no gat wan samting i blokem hem blong tekem fultaem wok. Sista ya i talem se: “Mi prea blong askem Jeova blong givim speret blong hem blong lidim mi.” Kwiktaem nomo, hem i fulumap pepa blong haftaem paenia, mo biaen hem i kam wan fultaem paenia. Smoltaem biaen, hem i faenem wan nambawan haftaem wok, we i stretgud long program blong hem blong paenia.
5 Jisas i no fraet blong talemaot mesej blong Kingdom long olgeta man. (Mat. 4:23) Ol yangfala Kristin tu, oli save lanem blong no fraet long wok blong prij, mo blong no letem ol narafala oli mekem olgeta oli fraet. Wan Wetnes we i gat 14 yia, i talem se: “Evriwan long skul oli save tingting blong mi olsem wan Kristin. . . . Oli savegud, taswe sipos mi mitim wan long olgeta taem mi stap prij, mi no sem. Kolosap olgeta fren blong mi long skul oli lesin, mo plante taem oli tekem ol buk.”
6 Fasin blong tingting dip long eksampel blong Kraes, i save givhan long ol yangfala blong mekem ol waes disisen long saed blong fyuja blong olgeta. Bambae oli no tingting tumas long ol samting blong wol. Be bambae oli ‘tingbaot Bigfala Man we i Wokem’ olgeta, mo wok strong long wok blong Jeova blong soem samting ya. (Ekles. 12:1) Oli olsem Kraes Jisas, oli stap wokem fasin blong ‘laekem Papa blong olgeta.’ Samting ya i save karem ol blesing we oli moa gud bitim eni samting we wol i save givim. Bambae oli no “lus” wetem olfala wol ya, be oli save ‘stap we bambae oli no save lus samtaem.’—1 Jon 2:15-17.