Ol Paenia Oli Givim Mo Oli Kasem Blesing

“WOK blong paenia i gud moa bitim ol narafala gud wok we man i save jusum olsem faswan wok long laef blong hem. I no gat wan samting we i save mekem yu yu haremgud bitim we yu stap givhan long ol man blong kasem save long Jeova mo long trutok blong hem.” Hemia tok blong wan Kristin woman we i jusum blong mekem wok blong paenia​—⁠talemaot Kingdom fultaem​—⁠olsem faswan wok long laef blong hem. ?Hamas wok moa we oli save givim glad ya?

Wok blong paenia i wan nambawan mak blong kasem mo wan sas samting we i save mekem yu yu haremgud tumas. ?Olsem wanem wan i save jusum wan laef olsem? ?I nidim wanem blong stap strong long wok blong paenia longtaem blong kasem ol blesing we hem i save givim?

I nidim tu impoten samting. Faswan, ol samting blong laef oli mas stret. Plante oli gat fasin blong laef we i soemaot klia se oli no save mekem wok blong paenia. Mo namba tu, man i mas kasem ol mak we hem i naf long saed blong speret mo i mas gat stret tingting. I tru, nating se ol samting blong laef blong wan man naoia i letem hem blong mekem wok blong paenia no no gat, evriwan oli save wok blong kasem ol Kristin fasin blong bigman long saed blong speret.

?From Wanem Sam Oli Paenia?

?Wanem ol mak we wan i mas kasem blong save mekemgud wok blong paenia? Yes, gat gudhan long wok blong prij i impoten tumas. Ol paenia oli mas save olsem wanem blong talemaot gud nyus long ol man we oli no save olgeta, mekem visit bakegen long olgeta we oli intres, mo mekem ol Baebol stadi. Tingting blong wan paenia i save foldaon sipos hem i no gat gudhan long ol wok ya. Be, i gat ol narafala samting we oli impoten tu.

Eksampel, evri samting we i joen long wosip blong yumi i laenap long fasin fren blong yumi wetem Jeova mo ogenaesesen blong hem. Wok blong paenia tu i stap insaed. Wan yang paenia we nem blong hem Rado i eksplenem se: “Blong wan yangfala man, i no gat wan samting we i nambawan bitim we hem i tingbaot Jeova mo wokbaot long rod blong trutok.” Yes, wok blong paenia i wan nambawan rod blong ol yangfala oli soemaot lav blong olgeta long Jeova mo stap kolosap long hem.​—⁠Eklesiastis 12:⁠1.

I nidim save mo fasin blong kasem save tu. (Filipae 1:​9-11) I olsem se, tufala samting ya oli olsem bensin we i mekem enjin blong yumi long saed blong speret i stap wok. Stadi wanwan oltaem i impoten blong no kam slak long saed blong speret, lusum glad mo bilif blong yumi. I tru, save we yumi stap kasem i no mas kasem tingting blong yumi nomo be hat tu. (Proveb 2⁠:⁠2) From samting ya, antap long stadi wanwan, yumi nidim taem blong prea mo tingting dip blong mekem se save we yumi kasem i tajem hat blong yumi. Nao, sipos ol samting long laef blong yumi i letem, bambae yumi wantem mekem wok blong paenia.​—⁠Skelem wetem Esra 7:⁠10.

Mekem wok blong paenia i nidim tingting we man i rere blong livim sam samting we hem nomo i wantem. Wan yangfala man we nem blong hem Ron, i bin mekem olgeta plan finis blong mekem wok blong paenia. Hem i jes wet nomo long taem we olgeta samting blong laef oli stret blong hem i save stat. Wan samting, hem i wantem wan wok we i save letem hem blong mekem paenia mo long semtaem haremgud long sam sas samting long laef. Taem hem i tokbaot samting ya long wan sista we i bigman long saed blong speret, sista i givim wan ansa we i jokem hem wantaem. Hem i talem se: “Jeova i stap blesem ol wok we man i mekem, i no ol promes.” Yangfala man ya i faenem wan wok wetem pei we i stap daon moa we i givim taem long hem blong mekem wok blong paenia. Mekem Matyu 6:​25-34 i wok bambae i halpem wan man blong laef nating se hem i no kasem plante mane.

Gat tingting daon blong folem ol gudfala tingting i save givhan long yumi blong joen long wok blong paenia. Long stat long laef blong hem olsem wan Kristin, Hanna, i bin gat tingting ya blong wantem mekem paenia. Be hem i no mekem paenia from hem i stap lukaot long ol pikinini blong hem mo samtaem afta hem i joen long wok blong wan bisnes. Hem i lesingud long ol gudfala advaes blong ol elda we oli stap lukaotgud, hem i lego wok we hem i intres tumas long hem mo i joen long wok blong paenia. Naoia Hanna i stap kasem bigfala glad taem hem i givhan long ol narafala blong givim laef blong olgeta long Jeova mo halpem olgeta we oli no moa prij longtaem.

Fasin tangkyu long wanem trutok i mekem finis long laef blong yumi i save pusum yumi tu blong mekem paenia. Tingbaot store blong wan woman we tingting blong hem i foldaon bigwan from mared blong hem i stap kam nogud. Fasin ya i jenis kwiktaem nomo taem hem i lanem ol trutok long Tok blong God mo mekem i wok long laef blong hem. From we hem i glad tumas long wanem trutok i bin mekem long hem, hem i tingting se nambawan rod blong hem i soem fasin tangkyu blong hem, hemia blong hem i paenia mo givhan long ol narafala man. Hem i mekem samting ya, mo naoia hem i kasem ol blesing blong mekem plante Baebol stadi mo gat wan laef long famle we i glad.

Ol Narafala Oli Save Givhan

Ol paenia plante taem oli mekem se ol narafala oli kam paenia. Rado we yumi tokbaot finis, i gat sikis yia taem tu paenia oli stadi Baebol wetem papa mo mama blong hem. Taem hem i yangfala nomo, hem i go oltaem long wok blong prij wetem tufala fultaem paenia ya. Rado tu i kam paenia taem hem i gat 17 yia. Arno i wan narafala yangfala man, we i stap long wan Kristin famle be hem i kam slak long saed blong speret. Biaen, hem i wok strong blong karembak paoa blong hem long saed blong speret, mo naoia hem i talem se: “Ol paenia oli leftemap tingting blong mi plante. Mi bin stap joen moa wetem olgeta long taem we mi spel long skul mo samtaem mi stap kasem 60 haoa long wok blong prij. Afta long hemia, rod blong go kasem fultaem paenia [blong mekem 90 haoa evri manis] i no bigwan tumas.” Tingting dip long advaes long 1 Korin 7: 29-31 blong no yusum wol fulwan i rili halpem ol yangfala olsem.

Tingting blong paenia i save gat rus isi nomo long wan famle we ol samting long saed blong speret oli stap long faswan ples mo papa mama oli leftemap tingting blong ol pikinini blong olgeta blong joen long fultaem paenia. Philo, we i gruap long wan famle olsem, i talem se: “Plante oli advaesem mi blong gohed long skul blong mi, blong wok blong gat wan fyuja long wol. Be papa mama blong mi oli bin halpem mi blong mekem wan jus we i moa waes. Oli bin tijim mi se sipos mi wantem wok blong mekem wan gudfala fyuja, faswan samting we mi mas mekem hemia blong gat wan fasin fren wetem Jeova.”

Wan yangfala woman we nem blong hem Thamar, i talem se paenia wok blong hem i kamaot from eksampel mo fasin traehad blong papa mama blong hem. Hem i talem se: “Mi no save talem stret wetaem mi stat lukluk laef wetem tingting long saed blong speret, be mi save se mi no bin bon wetem tingting olsem. Kastom ya blong papa mama blong mi i blong joen oltaem long wok blong prij mo go long ol miting, mo tu dip lav we oli gat long trutok, oli givhan bigwan long mi blong wokem fyuja blong mi long saed blong speret.”

Holem Strong Disisen Blong Yu

Afta we wan man i joen long wok blong paenia, holem strong long wok ya i save mekem man no woman ya blong kasem fulwan frut blong waes disisen ya. I gat plante advaes we oli rili wok we oli save kasem long saed ya. Eksampel, ol paenia oli mas lanem olsem wanem blong gat wan gud program long saed blong taem blong olgeta, blong oli save kasem frut from. Be, impoten samting se oli mas gat fasin fren wetem Jeova mo ogenaesesen blong Hem.

Gudfala fasin blong prea i joen wetem samting ya. Cor i talem se: “Taem mi kam long trutok mi wantem tumas blong mekem paenia.” Be, papa blong hem i askem se hem i mas finisim fastaem wan kos blong agrikalja long yunivesiti. Samtaem afta, Cor i stat mekem wok blong paenia. Samtaem i pas hem i mared, mo waef blong hem i joen wetem hem long wok blong paenia. Taem waef blong hem i gat bel, nao maet hem i mas lego wok blong paenia. Cor i talem se: “Mi prea oltaem long Jeova mo putum fored long hem wanem we hat blong mi i wantem tumas, hemia gohed long wok blong paenia.” Samtaem afta Cor i faenem wan wok we i givim taem long hem blong mekem paenia mo long semtaem hem i lukaot long famle blong hem.

Stap glad long samting blong laef we hem i gat i wan narafala samting we plante taem i givhan long wan man blong stap long wok blong paenia. Aposol Pol i bin raetem se: “I nogud yufala i mekem fasin ya we yufala i laekem mane tumas. Sipos yufala i gat wanem samting, be yufala i mas haremgud long hem. From God i talem finis se, ‘Bambae mi mi no save livim yu yu stap yu wan. Bambae mi mi no save lego yu samtaem.’ ” (Hibrus 13⁠:⁠5) Stap glad long samting blong laef we oli gat naoia i bin halpem Harry mo Irene blong gohed long wok blong paenia. Irene we i blaen, i bin stap olsem wan paenia long eit yia. Hem i talem se: “Mifala i neva luk mane olsem wan problem. Mifala i bin lukaotgud blong no gat sam samting we mifala i no nidim blong pem we i save kam olsem wan baden long mifala. Mifala i bin kaontem praes oltaem. Oltaem mifala i no gat plante samting long laef blong mifala, be i gud tumas, mo i gat plante blesing from.”

Plante Glad Mo Blesing

Lukluk bak long ol naen yia long wok blong paenia, Thamar i talem se: “Yu kam kolosap moa long Jeova, olsem we hem i stap holem han blong yu.” (Ol Sam 73⁠:23) Sam traem oli kam long tingting tu. Thamar i talem se: “Ol slak fasin blong mi i joen long ol slak fasin blong narafala, oltaem i mekem mi mi harem nogud. Mo tu, mi stap luk long ol brata mo sista we oli jusum rod blong laef ya blong gat plante samting long laef, plante taem mi tingbaot se jus blong olgeta i moa gud taem mi stap wokbaot i go long ol haos wanwan long taem we i gat ren mo ples i kolkol. Be dip insaed long hat blong mi, neva bambae mi wantem jenisim laef blong mi wetem olgeta. ?Wanem samting moa we i save givim glad fasin ya blong haremgud long saed blong speret, mo ol blesing olsem wok blong paenia?” ?Yu yu luksave se glad mo ol blesing ya oli sas moa?

From we ol paenia oli spenem plante taem long Kristin minista wok, oli stap long wan ples we oli save givhan long plante man blong kasem save long trutok blong Baebol. Harry mo Irene we yumi jes tokbaot tufala oli talem se: “I gat plante blesing blong stap insaed long ogenaesesen blong Jeova, be blong halpem wan nyuwan we i intres blong gohed gogo hem i kam wan man blong wok blong Jeova, i bigwan moa.”

Wan narafala paenia i talemgud ol samting taem hem i talem se: “Ol tok blong Proveb 10⁠:22 oli tru long saed blong mi: ‘Blesing blong Jeova, hemia nao samting we i mekem man i rij. Mo hem i no givim soa wetem.’ Oltaem, vas ya i kamtru long saed blong mi long ol yia we mi bin mekem wok blong Jeova.”

Ol papa mama, ?yu yu stap putum insaed long pikinini blong yu tingting blong wantem mekem paenia? Ol paenia, ?yufala i traehad blong putum tingting ya blong wantem paenia long ol narafala? Ol elda, ?yufala i stap sapotem ol paenia long kongregesen blong yufala mo givhan blong wokem tingting blong paenia long ol narafala? I gud we plante moa man blong Jeova oli traehad blong kasem moa blesing olsem taem oli joen long wok blong paenia.