Olgeta We Oli Lidim Kongregesen—Presiden Elda
1 I wan bigfala responsabiliti blong stap olsem wan elda long kongregesen. (Ol Wok 20:28; 1 Tim. 3:1) Atikol ya i faswan long ol defren haf we bambae i tokbaot ol defren wok blong ol Kristin elda. Ol haf ya bambae oli pulum yumi blong gat bigfala tangkyu long impoten wok we ol elda oli stap mekem blong givhan long yumi.
2 Sosaeti i putumap presiden elda blong i holem wok ya oltaem. Faswan wok blong hem, i blong lukaot mo lidim wok blong bodi blong ol elda. (Ol Rul Blong Mekem Minista Wok Blong Yumi, pej 42) ?Wanem ol wok ya?
3 Presiden elda nao i kasem ol leta blong kongregesen mo hem i mas givim kwiktaem long sekretari blong i jekemap. Taem hem i stap rerem miting blong ol elda, hem i mas askem ol narafala elda sipos i gat sam samting we i nidim blong oli tokbaot, mo hem i mas mekem wan lis blong ol nid ya. Mo tu, hem nao i jeaman long miting blong ol elda. Taem oli mekem sam disisen, hem i mas meksua se oli folem disisen ya. Hem i lukaot long wok blong rerem Miting Blong Kingdom Wok mo program blong ol pablik tok. Olgeta mesej we oli mas ridimaot long kongregesen, mo ol vatu we oli mas spenem blong pem ol samting we kongregesen i nidim, presiden elda i mas agri long olgeta fastaem. Mo hem i mas meksua se evri tri manis, oli mas stretem kaon blong kongregesen.
4 From we hem i jeaman, presiden elda i lukaot long wok blong Sevis Komiti Blong Kongregesen. Sipos wan Baebol studen i askem blong kam wan pablisa we i no baptaes, no wan pablisa i wantem tekem baptaes, presiden elda i mas mekem plan wetem sam elda blong oli storeyan wetem pablisa ya. Presiden elda i lukaot tu, long wok blong rerem visit blong seket elda. Hemia blong mekem se kongregesen i save kasem blesing fulwan from wok we oli mekem long spesel wik ya.
5 Ol wok blong presiden elda oli plante mo oli defdefren. Taem oli stap ‘wok strong’ blong lukaot ol responsabiliti ya, yumi evriwan i save traehad blong wok wanples wetem olgeta. (Rom. 12:8) Sipos yumi “obei” mo “ona” long olgeta ya we oli stap lidim yumi, bambae oli haremgud tumas long wok ya blong olgeta.—Hib. 13:17.