“Isrel Blong God” Mo “Bigfala Hif Blong Man”

“Mi luk bakegen, nao i gat wan bigfala hif blong man, we olgeta i plante tumas, i no gat man i save kaontem olgeta.”​—REVELESEN 7:9.

1-3. (a) ?Ol tabu Kristin oli gat wanem nambawan hop long heven? (b) ?Olsem wanem Setan i traem blong spolem kongregesen long faswan handred yia? (c) ?Wanem samting i hapen long 1919, we i soem se Setan i no win, taem hem i traehad blong mekem Kristin kongregesen i kam doti?

LONG yia 33 K.T., wan bigfala haf blong stampa tingting blong Jeova i kamtru, taem “Isrel blong God” i stanap. (Galesia 6:16) Ol memba blong hem, we tabu speret i makemaot olgeta, oli gat hop blong laef wetem wan speret bodi we i no save ded samtaem. Bambae oli rul wetem Kraes long Kingdom blong God long heven. (1 Korin 15:​50, 53, 54) Long ples ya, bambae oli joen plante long wok blong mekem nem blong Jeova i tabu, mo blong smasem hed blong bigfala Enemi ya, Devel Setan. (Jenesis 3:15; Rom 16:20) !Yumi no sapraes, we Setan i bin yusum ful paoa blong hem blong traem spolem nyufala kongregesen ya! Hem i pulum ol man blong ronem ol memba blong hem, mo i traem blong mekem kongregesen ya i kam doti.​—2 Timote 2:18; Jud 4; Revelesen 2:10.

² Taem ol aposol oli laef, Setan i no save spolem kongregesen. Be, afta we ol aposol oli ded, fasin apostasia i kam antap bigwan we i no gat samting blong blokem. Biaen, Setan i yusum fasin apostasi blong mekem plante gyaman skul oli stanap. Tede, yumi kolem olgeta se Krisendom. Nao, long tingting blong man, i luk olsem se klin Kristin kongregesen we Jisas i stanemap, i kam doti. (2 Tesalonaeka 2:​3-8) Nating se i olsem, trufala Kristin skul i gohed.​—Matyu 28:20.

³ Long parabol blong Jisas long saed blong wit mo rabis gras, hem i talem se ol trufala Kristin bambae oli gru smoltaem wetem “rabis gras,” no ol gyaman Kristin. Mo samting ya i hapen. Be hem i talem tu se, long taem blong ol las dei, bambae i kam klia se ‘ol pikinini blong kingdom’ oli seraot bakegen long ol “rabis gras.” (Matyu 13:​36-43) Samting ya tu i kamtru. Long 1919, ol trufala tabu Kristin oli kam fri long kalabus blong Babilon. God i agri long olgeta olsem “slef ya we i stret mo waes,” mo oli gohed strong blong talemaot gud nyus blong Kingdom. (Matyu 24:​14, 45-47, NW; Revelesen 18:4) Bighaf blong olgeta, oli ol Jentael. Be from we oli gat bilif olsem Ebraham, oli kam olsem ol stret ‘pikinini blong Ebraham.’ Oli ol memba blong “Isrel blong God.”​—Galesia 3:​7, 26-29.

“Bigfala Hif Blong Man”

4. ?Biaen long 1930, oli luksave moa wanem grup blong ol Kristin?

⁴ Fastaem, taem ol tabu Kristin ya oli prij, ol man we oli harem tok blong olgeta, oli kam ol man Isrel long saed blong speret. Olgeta ya, oli ol laswan memba blong ol 144,000 man long wol ya, we oli gat hop blong go long heven. (Revelesen 12:17) Be, long ol yia biaen long 1930, oli luksave moa wan narafala hif blong man. Oli kasem save se narafala grup ya i sem mak long “ol narafala sipsip,” we parabol blong ol yad blong sipsip i tokbaot. (Jon 10:16) Oli ol disaepol blong Kraes we oli gat hop blong laef foreva long wan paradaes wol. Long saed blong speret, oli olsem ol pikinini blong ol tabu Kristin. (Aesea 59:21; 66:22; skelem wetem 1 Korin 4:​15, 16.) Oli luksave se tabu Kristin kongregesen, hem i slef ya we i stret mo waes. Mo sem mak long ol tabu brata blong olgeta, oli gat dip lav long Jeova, oli bilif long sakrifaes blong Jisas, oli strong blong presem God, mo oli rere blong safa from stret fasin.

5. ?Olsem wanem save long saed blong ol narafala sipsip i kam klia sloslou?

⁵ Fastaem, save long saed blong ol narafala sipsip ya i no kliagud. Be, taem ol yia oli stap pas, ol samting oli kam klia moa. Long 1932, ol tabu Kristin oli kasem save se oli mas pulum ol narafala sipsip blong joen long wok blong prij​—wan wok we plante narafala sipsip oli stap mekem finis. Long 1934, ol narafala sipsip oli kasem tok we i leftemap tingting blong olgeta blong tekem baptaes long wora. Long 1935, i kam klia se olgeta nao oli “bigfala hif blong man” we Revelesen japta 7 i tokbaot. Long 1938, oli singaot olgeta blong joen long Memoriol blong ded blong Jisas Kraes, olsem ol man we oli lukluk nomo. Long 1951, oli luksave se sam long olgeta, we oli bigman long saed blong speret, oli sam long ‘ol prins’ we oli olsem “ples blong haed long hem taem i gat bigfala win, mo olsem wan sefples taem bigfala ren i foldaon.” (Ol Sam 45:16; Aesea 32:1, 2) Long 1953, oli luksave se ogenaesesen blong God long wol ya​—we, long taem ya, ol narafala sipsip oli bighaf blong hem​—i olsem stampa blong bigfala grup blong man we bambae oli laef long nyufala wol. Long 1985, oli kasem save se, tru long ransom sakrifaes blong Jisas, God i save luk ol narafala sipsip olsem we oli stret man, ale, oli kam olsem fren blong Hem, mo oli gat hop blong pastru long Amageden.

6. ?Tede, olsem wanem long ol tabu Kristin mo ol narafala sipsip, mo wanem ol kwestin oli kamaot from?

⁶ Naoia, long laswan haf blong ‘ol las dei,’ bighaf blong ol 144,000 man, oli ded finis mo oli kasem pei blong olgeta finis long heven. (2 Timote 3:1; Revelesen 6:​9-11; 14:13) Long taem blong yumi, ol Kristin we oli gat hop blong laef long wol ya, oli mekem bighaf blong wok blong talemaot gud nyus. Mo oli tingbaot wok ya olsem wan nambawan jans blong givhan long ol tabu brata blong Jisas. (Matyu 25:40) Be, ol tabu Kristin, oli slef ya we i stret mo waes, we oltaem i bin givim kakae long saed blong speret long ol man long ol las dei ya. ?Olsem wanem long ol narafala sipsip, taem olgeta tabu man evriwan oli kasem pei blong olgeta long heven? ?Long taem ya, olsem wanem bambae ol narafala sipsip oli kasem ol samting we oli nidim? Taem yumi lukluk smol long store blong ol man Isrel bifo, samting ya i save halpem yumi blong ansarem ol kwestin ya.

Wan ‘Kingdom Blong Ol Pris’ We i Olsem Saen

7, 8. ?Olsem wanem ol man Isrel bifo oli olsem wan kingdom blong pris mo wan tabu nesen aninit long kontrak blong Loa?

⁷ Taem Jeova i jusum ol man Isrel olsem spesel nesen blong hem, hem i mekem wan kontrak wetem olgeta, se: ‘Sipos yufala i obei long mi, mo yufala i holemgud kontrak ya we mi mekem wetem yufala, bambae yufala i nambawan man blong mi, i winim ol narafala man long wol, from we olgeta man long wol ya oli blong mi. Mo bambae yufala i kam wan kingdom blong ol pris mo wan tabu nesen we i blong mi.’ (Eksodas 19:​5, 6) Kontrak blong Loa i mekem se ol man Isrel oli kam olsem ol spesel man blong Jeova. ?Be, olsem wanem promes long saed blong wan kingdom blong ol pris mo wan tabu nesen i kamtru?

⁸ Taem ol man Isrel oli stap bilif strong long Jeova, oli obei long hae rul blong Hem mo oli agri long hem olsem King blong olgeta. (Aesea 33:22) Olsem nao, oli wan kingdom. Be, biaen i kam klia se, promes long saed blong ‘wan kingdom,’ i gat moa mining bitim samting ya. Mo tu, taem oli obei long Loa blong Jeova, oli klin, oli defren long ol nesen we oli stap raon long olgeta. Oli wan tabu nesen. (Dutronome 7:​5, 6) ?Oli wan kingdom blong ol pris? Tingbaot: Long Isrel, oli jusum laen blong Livae blong mekem wok long tempel. Mo long laen ya, i gat olgeta we oli mekem wok blong pris. Taem Loa blong Moses i stanap, oli makemaot ol pikinini boe long laen blong Livae, olsem we oli tekem ples blong ol fasbon pikinini blong olgeta famle we oli no long laen blong Livae.b (Eksodas 22:29; Namba 3:​11-16, 40-51) Taswe, i olsem we evri famle long Isrel, i gat wan we i stap wok long nem blong olgeta long tempel. Long smol fasin ya nomo, nesen ya i kam olsem ol pris. Nating se i olsem, oli ol spesel man blong Jeova long medel blong ol narafala nesen. Eni man long narafala kantri we i wantem wosip long trufala God, hem i mas joen wetem ol man Isrel.​—2 Kronikel 6:​32, 33; Aesea 60:10.

9. ?Wanem i mekem se Jeova i sakemaot kingdom blong Isrel long not, ‘blong i no moa wok olsem pris blong hem’?

⁹ Afta we Solomon i ded, ol man blong God oli seraot long tu haf. King Jerobom i rul long nesen blong Isrel long not, mo King Reobom i rul long nesen blong Juda long saot. Tempel, we hem i stampa ples blong trufala wosip, i stap long graon blong Juda. Taswe, Jerobom i putumap ol aedol blong buluk long graon blong nesen blong hem. Taem hem i mekem olsem, hem i stanemap wan gyaman fasin blong wosip. Mo tu, “hem i stat blong mekem wan haos blong ol haeples mo i jusum ol man olbaot, we oli no long laen blong Livae, blong oli kam pris.” (1 King 12:31) Taem King Ehab i letem waef blong hem, Jesebel, wan woman blong narafala kantri, i stanemap wosip blong Bal, gyaman wosip i kam antap moa long nesen blong not. Biaen, Jeova i talemaot jajmen agens long kingdom ya we i no moa obei long hem. Tru long Hosea, Hem i talem se: “Bambae ol man blong mi oli stap kwaet, from we oli no gat save. From we yu bin sakemaot ol save blong mi, bambae mi mi sakemaot yu blong yu no moa wok olsem pris blong mi.” (Hosea 4:6) Smoltaem biaen, ol man Asiria oli kam, oli spolemgud kingdom blong Isrel long not.

10. ?Olsem wanem kingdom blong Juda long saot, i wok long nem blong Jeova long fored blong ol narafala nesen, taem hem i stap bilif strong long Jeova?

¹⁰ ?Olsem wanem long nesen blong Juda long saot? Long taem blong Hesekaea, Jeova i yusum Aesea blong talem long olgeta, se: “Yufala i wetnes blong mi, . . . yufala i man blong wok blong mi we mi mi jusumaot, . . . wan nesen we mi stanemap blong mi nomo, blong i save presem mi bakegen.” (Aesea 43:​10, 21; 44:21) Taem ol man long kingdom blong saot oli bilif strong long God, oli talemaot ol tok blong presem Jeova long ol narafala nesen. Mo oli pulum ol man we hat blong olgeta i stret, blong oli kam wosip long Jeova long tempel blong hem, we ol trufala pris long laen blong Livae oli save givhan long olgeta.

Ol Man Blong Narafala Kantri Long Isrel

11, 12. Talem nem blong sam man blong narafala kantri we oli joen wetem ol man Isrel blong mekem wok blong Jeova.

¹¹ Ol man blong narafala kantri we oli lesin long wetnes we nesen ya i givim, Loa we ol man Isrel oli kasem tru long Moses​—we waef blong hem, Jipora, i wan woman Midian​—i givhan long olgeta. ‘Wan bigfala kampani blong man,’ we oli no man Isrel, oli folem ol man Isrel taem oli goaot long Ijip. Mo ol man ya oli stap, taem God i givim Loa. (Eksodas 2:​16-22; 12:38; Namba 11:4) Rehab mo famle blong hem, oli stap sef taem Jeriko i foldaon. Biaen, oli joen long kongregesen blong ol man Jyu. (Josua 6:​23-25) Smoltaem biaen, ol man Gibeon oli mekem pis wetem ol man Isrel. Nao oli kasem sam wok we i joen wetem haos tapolen.​—Josua 9:​3-27; mo tu, lukluk 1 King 8:​41-43; Esta 8:17.

¹² Biaen, sam man blong narafala kantri oli mekem impoten wok. Hasban blong Batsiba, Uria, we i wan man Hitaet, hem i wan long “ol strong man” blong Deved. Selek, wan man long laen blong Amon, hem tu i wan long olgeta. (1 Kronikel 11:​26, 39, 41; 2 Samuel 11:​3, 4) Ebed-melek, wan man Itiopia, hem i wok long haos blong king, mo hem i save toktok wetem king. (Jeremaea 38:​7-9) Afta we ol man Isrel oli kamaot long kalabus long Babilon, ol Netinim we oli no man Isrel, oli kasem moa wok blong givhan long ol pris. (Esra 7:24) Sam long ol man narafala kantri no strenja ya we oli bilif strong long Jeova, oli olsem pija blong bigfala hif blong man tede. Taswe, yumi intres long ol samting we oli hapen long laef blong olgeta.

13, 14. (a) ?Wanem ol blesing mo wok blong ol proselaet long Isrel? (b) ?Ol man Isrel oli mas mekem wanem fasin long ol proselaet we oli stap tru long God?

¹³ Ol man ya, oli ol proselaet. Hemia ol man we oli givim laef blong olgeta blong wosip long Jeova aninit long Loa blong Moses. Olsem ol man Isrel, oli no joen wetem ol narafala nesen raonabaot. (Levitikas 24:22) Oli mekem sakrifaes, oli stap longwe long ol gyaman wosip, mo oli no yusum blad. Oli mekem sem mak olsem ol man Isrel. (Levitikas 17:​10-14; 20:2) Oli givhan blong bildim tempel blong Solomon. Mo oli joen long wok blong stanemap bakegen trufala wosip aninit long rul blong King Asa mo King Hesekaea. (1 Kronikel 22:2; 2 Kronikel 15:​8-14; 30:25) Taem Pita i yusum faswan ki blong Kingdom long Pentekos long yia 33 K.T., ol ‘man Jyu wetem ol proselaet we oli no man Jyu,’ oli harem ol tok blong hem. Maet sam long ol tri taosen man we oli baptaes long dei ya, oli proselaet. (Ol Wok 2:​10, 41) Smoltaem biaen, Filip i baptaesem wan man Itiopia we hem i wan proselaet​—bifo we Pita i yusum laswan ki blong Kingdom long Konilyas mo famle blong hem. (Matyu 16:19; Ol Wok 8:​26-40; 10:​30-48) I klia nomo se, long tingting blong olgeta, ol proselaet oli defren long ol Jentael.

¹⁴ Nating se i olsem, ol proselaet oli no sem mak long ol prapa man Isrel. Ol proselaet oli no save mekem wok blong pris. Mo i no gat wan pris long laen blong Livae we i wok long nem blong ol fasbon blong ol proselaet.c Mo ol proselaet oli no gat graon long Isrel. Be, ol man Isrel oli kasem oda se oli mas tingbaot ol proselaet ya we oli gat strong bilif, oli mas mekem i gud long olgeta olsem we oli brata blong olgeta.​—Levitikas 19:​33, 34.

Wan Nesen Long Saed Blong Speret

15. ?Wanem i kamaot taem ol prapa man Isrel oli no wantem Mesaea?

¹⁵ God i givim Loa long ol man Isrel, blong oli save stap klin, mo blong oli no joen wetem ol nesen we oli stap raon long olgeta. Be oli kasem Loa from wan narafala risen tu. Aposol Pol i raetem se: “Loa ya, hem i olsem tija blong mifala, i stap lukaot long mifala kam kasem taem ya we Kraes i kamtru, we mifala i kam stret man long fes blong God, from we mifala i bilif long Kraes.” (Galesia 3:24) Sore tumas, bighaf blong ol man Isrel, oli no wantem we Loa i lidim olgeta, oli go long Kraes. (Matyu 23:15; Jon 1:11) From samting ya, Jeova i sakemaot nesen ya mo i mekem se “Isrel blong God” i stanap. Mo tu, hem i singaot olgeta we oli no man Jyu, blong olgeta tu oli save kam joen long nyufala Isrel ya. (Galesia 3:28; 6:16) Promes we Jeova i mekem long Eksodas 19:​5, 6, long saed blong wan kingdom blong pris, i kamtru fulwan long nyufala nesen ya, long nambawan fasin. ?Olsem wanem?

16, 17. ?Long wanem rod, ol tabu Kristin long wol ya oli ‘olsem ol king’? ?Mo olsem wanem oli ‘olsem ol pris’?

¹⁶ Pita i talem bakegen tok blong Eksodas 19:​6, taem hem i raet i go long ol tabu Kristin long taem blong hem. Hem i se: ‘Be yufala, God i bin jusumaot yufala blong yufala i laen blong hem. Yufala i olsem ol pris mo king. Yufala i olsem ol man blong wan ples nomo, we yufala i tabu man blong God. Yufala i olsem ol man we God i tekem yufala i blong hem nomo.’ (1 Pita 2:9) ?Samting ya i minim wanem? ?I minim se ol tabu Kristin we oli stap long wol, oli ol king? No gat. Bambae oli kam ol king long fyuja nomo. (1 Korin 4:8) Be, yumi save talem se oli ‘olsem ol king,’ from we God i jusumaot olgeta finis se long fyuja, bambae oli mekem wok blong ol king. Naoia, oli wan nesen we i stap aninit long wan king finis. King ya, hemia Jisas, we Bigfala King, Jeova God i putumap hem. Pol i raetem se: “[Jeova] i tekemaot yumi finis long paoa blong tudak, i putum yumi long paoa blong Pikinini ya blong hem we i laekem hem tumas. Nao yumi stap singaot Pikinini ya blong hem se king blong yumi.”​—Kolosi 1:13.

¹⁷ ?Ol tabu Kristin we oli stap long wol ya, oli ol pris? Yumi save talem se, yes, oli pris long wan fasin. Olsem wan kongregesen, oli joengud blong mekem wok we i klia se i olsem wok blong pris. Pita i eksplenem samting ya, taem hem i talem se: “God bambae i mekem yufala i kam olsem wan haos blong hem we i laef, . . . yufala i olsem ol tabu pris blong God.” (1 Pita 2:5; 1 Korin 3:16) Tede, grup blong ol tabu Kristin we oli stap yet long wol, oli “slef ya we i stret mo waes,” we God i stap yusum blong givimaot kakae long saed blong speret. (Matyu 24:​45-47, NW) Olsem ol man Isrel bifo, eni man we i wantem wosip long Jeova, hem i mas joen wetem ol tabu Kristin ya.

18. ?Olsem ol pris, wanem faswan wok blong kongregesen blong ol tabu Kristin long wol ya?

¹⁸ Mo tu, ol tabu Kristin ya oli karem ples blong ol man Isrel, blong mekem nambawan wok ya blong talemaot paoa mo haenem blong Jeova long olgeta nesen. Ol vas raonabaot long vas ya, oli soem se taem Pita i talem se ol tabu Kristin oli olsem ol pris mo king, long tingting blong hem, hem i stap tingbaot wok blong prij. Yes, long wan vas nomo, hem i joenem promes blong Jeova long Eksodas 19:6 wetem ol tok we Hem i talem long ol man Isrel, long Aesea 43:​21. Pita i talem se: ‘Yufala i olsem ol pris mo king. God i tekem yufala i blong hem nomo . . . blong bambae yufala i save talemaot ol gudfala wok blong hem. Hem i singaot yufala finis blong yufala i aot long tudak, yufala i kam long gudfala laet blong hem.’ (1 Pita 2:9) Pol i tokbaot samting we i kolosap sem mak. Hem i talem se taem man i talemaot ol gudfala wok blong Jeova, hemia i olsem we hem i mekem sakrifaes long tempel. Hem i raetem se: “Yumi mas stap joen long Jisas ya, nao oltaem yumi mas stap leftemap nem blong God. Fasin ya i olsem we oltaem yumi stap kilim anamol blong givim i go long hem. From we evri taem yumi talemaot nem blong Jisas long fes blong ol man, i olsem we yumi givim presen i go long God.”​—Hibrus 13:15.

Profet Tok Ya i Kamtru Long Heven

19. ?Wanem fulwan mining blong promes ya se bambae ol man Isrel oli kam wan kingdom blong pris?

¹⁹ Be, biaen, Eksodas 19:​5, 6 i kamtru long wan nambawan fasin we i bigwan moa. Long buk blong Revelesen, aposol Jon i harem ol enjel long heven oli stap talem ol tok blong vas ya, taem oli stap presem Jisas we i laef bakegen. Oli se: “Yu yu gudfala tumas. Ol man oli kilim yu finis, mo long ded blong yu, we blad blong yu i ron, yu yu pemaot ol man, oli blong God. Olgeta ya oli kamaot long olgeta laen, mo long olgeta lanwis, mo long olgeta kantri, mo long olgeta kala. Yu yu king, nao yu mekem olgeta oli kam ol man blong yu, we oli pris blong mekem wok blong God blong mifala, mo bambae oli king, oli rul long olgeta man long wol.” (Revelesen 5:​9, 10) Olsem nao, fulwan mining blong grup blong ol pris mo king, hemia Kingdom blong God long heven, gavman we Kraes i tijim yumi blong prea from. (Luk 11:2) Ol 144,000 tabu Kristin we oli stanap strong gogo oli ded, bambae oli joen long Kingdom ya. (Revelesen 20:​4, 6) !Nao promes ya we Moses i bin talemaot longtaem bifo bambae i kamtru long nambawan fasin!

20. ?Wanem kwestin we yumi mas faenem ansa blong hem?

²⁰ ?Olsem wanem olgeta samting ya i joen wetem bigfala hif blong man mo fyuja blong olgeta, taem olgeta tabu Kristin oli kasem nambawan pei blong olgeta finis? Bambae poen ya i kam klia long nekis haf.

[Ol futnot]

?Yu Yu Save Eksplenem?

◻ ?Olsem wanem save long saed blong ol narafala sipsip i kam klia sloslou?

◻ ?From wanem Jeova i sakemaot kingdom blong Isrel long not, blong oli no moa stap olsem pris blong hem?

◻ ?Taem ol man Juda oli stap tru long God, wanem wok blong olgeta long fored blong ol narafala nesen?

◻ ?Ol proselaet we oli stap tru long God, oli gat wanem ples long Isrel?

◻ ?Olsem wanem kongregesen blong ol tabu Kristin i wok olsem wan kingdom blong ol pris?

[Tok blong pija long pej 16]

Olsem ol king mo pris, ol tabu Kristin oli talemaot paoa mo haenem blong Jeova long wol

[Tok blong pija long pej 18]

Kingdom nao i mining blong Eksodas 19:6