Save Jeova, God Ya We i Wan Trufala Man

TIJA S. Radhakrishnan i skelem bilif blong ol Hindu long saed blong God wetem hemia blong ol narafala skul, i se: “God blong ol Hibru man i defren. Hem i wan trufala man, hem i bin mekem plante samting blong kam insaed long bisnes blong ol man long ol yia we oli pas, mo hem i intres long ol jenis we oli kamaot long wol ya, mo ol rod we man i faenem blong kamgud moa. Hem i wan laef Man we i stap toktok wetem yumi.”

Long Hibru lanwis, nem blong God ya blong Baebol hemia יהוה, we kolosap oltaem oli tanem i kam “Jeova.” Hem i gat moa paoa mo i hae moa long ol narafala god. ?Yumi gat wanem save long saed blong hem? ?Hem i mekem wanem fasin long ol man long taem blong Baebol?

Jeova Mo Moses “Tufala i Lukluk Tufala”

Jeova mo man blong hem Moses, tufala i frengud, mekem se i olsem we “tufala i lukluk tufala,” nating se Moses i no save luk God wetem prapa ae blong hem. (Dutronome 34:10; Eksodas 33:20) Taem Moses i yangfala, oltaem hem i stap tingbaot ol man Isrel we oli stap wok slef long Ijip. Hem i tanem baksaed blong hem long gudfala laef we hem i save gat olsem wan pikinini blong Fero, mo “hem i glad blong go joen long ol man blong God blong harem nogud wetem olgeta.” (Hibrus 11⁠:25) From samting ya, Jeova i givim plante spesel wok mo blesing long Moses.

Taem Moses i stap long haos blong Fero, “oli tijim hem long waes blong ol man Ijip.” (Ol Wok 7:22) Be, blong lidim nesen blong Isrel, hem i nidim tu blong gat ol narafala fasin, olsem tingting daon, longfala tingting, mo kwaet fasin. Hem i kasem ol fasin ya taem hem i mekem wok blong lukaot long sipsip blong 40 yia long Midian. (Eksodas 2:​15-​22; Namba 12:⁠3) Moses i neva luk Jeova wetem prapa ae blong hem, be Jeova i soemaot fasin mo tingting blong hem long Moses, mo Hem i yusum ol enjel blong givim ol Ten Komanmen long Moses. (Eksodas 3:​1-​10; 19:​3 kasem​20:20; Ol Wok 7:53; Hibrus 11:27) Baebol i talem se: “Jeova i toktok wetem Moses stret long fes blong hem, olsem wan man i toktok wetem narafala man.” (Eksodas 33:11) Yes, Jeova hem wan i talem se: “Maot blong mi i toktok stret long maot blong hem.” !Tru ya, Moses i gat wan nambawan fasin fren we i kolosap tumas long God ya we i wan trufala man, nating se Moses i no save luk hem!​—Namba 12:⁠8.

Moses i raetemdaon ol samting we i hapen long ol faswan yia we nesen blong Isrel i stanap. Antap long hemia, hem i raetemdaon Loa ya wetem ol smosmol rul we oli joen long hem. Mo tu, God i trastem hem blong mekem wan narafala wok we i impoten tumas, hemia blong raetemdaon buk blong Jenesis. Long lashaf blong buk ya, hem i tokbaot ol samting we oli hapen long ol yia we oli pas finis, we prapa famle blong hem oli savegud long olgeta. Taswe, i no hadwok tumas long Moses blong raetemdaon ol store ya. ?Be long weples Moses i bin kasem ol save long saed blong ol faswan man? Maet Moses i bin gat sam olfala hanraet we ol bubu blong hem oli bin holemgud i stap, mo maet hem i bin yusum ol save insaed long olgeta. Sipos no, maet Jeova i bin talem stret long hem, no maet Hem i bin yusum wan narafala rod blong soemaot ol save ya long Moses. Olgeta man we oli bin onagud long God long ol yia we oli pas, oli luksave mo agri se, taem Moses i mekem wok ya, God i stap kolosap long hem.

Elaeja i Save Jeova Olsem Wan Trufala Man

Profet Elaeja tu i save Jeova olsem wan trufala man. Elaeja i wok strong blong leftemap trufala wosip. Nating se ol man blong wosip long Bal, jif god blong ol man Kenan, oli no laekem hem nating mo oli agensem hem bigwan, be hem i gohed nomo blong mekem wok blong Jeova.​—1 King 18:17-40.

Ehab, King blong Isrel, mo waef blong hem, Jesebel, tufala i wantem kilim Elaeja i ded. Elaeja i fraet se bambae tufala i mekem olsemia, taswe hem i girap i ronwe i go long Ber-seba, long wes saed blong Ded Si. (1 King 19:​1-4) ?Samting ya i soemaot se Jeova i lego Elaeja? ?Hem i no moa intres long gudfala man ya we i stap tru long Hem? !Maet Elaeja i bin tingting olsem, be hem i rong! Biaen, Jeova i toktok long hem long wan smol voes, i askem long hem se: “?Elaeja, yu yu stap mekem wanem long ples ya?” Nao Jeova i mekem sam bigfala saen long fored blong Elaeja blong soemaot bigfala paoa blong hem. Biaen, “i gat wan voes i kamaot mo i askem long Elaeja [bakegen] se: ‘?Elaeja, yu yu stap mekem wanem long ples ya?’ ” Olsemia nao, Jeova i soemaot se hem i intres long Elaeja hem wan, mo long rod ya, hem i leftemap tingting blong man ya we Hem i trastem. !God i gat wan moa wok blong givim long Elaeja, mo Elaeja i glad tumas blong ansa long voes blong God we i singaot hem blong mekem wok ya! Elaeja i holemstrong long wok ya gogo i finis fulwan, mo i mekem nem blong God blong hem, Jeova, we i wan trufala man, i kam tabu.​—1 King 19:​9-​18.

Afta we Jeova i sakemaot nesen blong Isrel, hem i no moa toktok stret long ol man blong hem long wol ya. Be samting ya i no minim se hem i no moa intres long olgeta wanwan. Hem i yusum tabu speret blong hem blong gohed blong lidim olgeta mo givim paoa long olgeta blong mekem wok blong hem. Yumi save tingbaot aposol Pol, we fastaem oli singaot hem se Sol.

Tabu Speret i Lidim Pol

Sol i kamaot long wan impoten taon long Silisia, nem blong hem Tasas. Papa mama blong hem, tufala i Hibru, be Sol i bon olsem wan man Rom. Nating se i olsem, papa mama blong Sol oli tijim hem long bilif blong ol Farisi we i strong tumas. Biaen, hem i gat jans blong skul long Jerusalem, ‘long fored blong leg blong Gameliel,’ wan bigfala tija blong Loa.​—Ol Wok 22:⁠3, 26-​28.

Sol i strong blong folem ol kastom blong ol man Jyu, be hem i no save se rod ya i no stret. Samting ya i lidim hem blong joen long wan rabis plan blong kilim olgeta we oli folem Jisas Kraes. Hem i agri tu we ol man oli kilim Steven i ded, hemia faswan Kristin we i ded from bilif blong hem. (Ol Wok 7:​58-​60; 8:​1, 3) Biaen, Sol i talemaot klia se, fastaem hem i tok nogud long God, i ronem ol man blong Hem, mo i no gat respek nating, be biaen, ‘God i gat sore long hem, from we hem i no save ol samting ya we hem i stap mekem, mo hem i no soemaot bilif.’​—1 Timote 1:​13.

Tingting we i pusum Sol, se hem i rili wantem mekem wok blong God. Ale, wan bigfala jenis i kamaot long laef blong Sol long rod we i go long Damaskas, mo biaen, Jeova i yusum hem blong mekem ol bigbigfala wok. Kraes we i laef bakegen finis long heven, i talem long wan long ol faswan Kristin, Ananaeas, blong go halpem Sol. Afta long taem ya, tabu speret blong Jeova i lidim Pol (wan nem we i kamaot long Rom, mo we ol man oli putum long hem afta we i kam Kristin), blong gohed longtaem blong mekem wok blong prij, we i karem bigfala frut long plante defren ples long Yurop mo Esia Maena.​—Ol Wok 13:​2-5; 16:​9, 10.

?Yumi luksave tede tu se tabu speret i stap lidim wan wok olsem? Yes.

Jeova i Intres Tu Long Ol Man We Oli No Bilif Long Hem

Joseph F. Rutherford i namba tu presiden blong Watch Tower Sosaeti. Long 1906, hem i tekem baptaes olsem wan Baebol Studen​—⁠hemia nem blong ol Wetnes blong Jeova long taem bifo. Long nekiswan yia, oli putumap hem olsem wan loea blong Sosaeti. Long Janewari 1917, hem i kam presiden. Be bifo, yangfala man ya we i wan loea, i no bilif long God. ?Olsem wanem hem i kam wan Kristin we i gat strong tingting blong mekem wok blong Jeova?

Long Julae 1913, Rutherford i jeaman blong wan asembli blong ol Intenasnal Baebol Studen. Oli mekem asembli ya long Springfil, Masajuset, Yunaeted Stet. Wan man blong raetem ol store long nyuspepa ya, The Homestead, i askem sam kwestin long Rutherford. Oli prentem ol tok blong hem bakegen long wan smol buk we oli wokem long saed blong asembli ya, blong ol man oli save ridim buk ya biaen, mo tingtingbak long ol bigfala poen blong asembli ya.

Rutherford i eksplenem se hem i skul Baptis bifo we hem i mared, be gel we bambae hem i maredem, i Presbiterian. Pasta blong Baptis i talem long Rutherford se “woman blong hem bambae i go bon long helfaea from we hem i no bin tekem baptaes, be hem bambae i go stret long heven from we hem i baptaes finis. Nao tingting blong Rutherford i trabol tumas, mo from samting ya, hem i no moa bilif long God.”

Rutherford i stadi dip blong plante yia blong kasem bakegen bilif ya se God i wan trufala man. Hem i talem se, hem i bin tingting se, “sipos man i no save agri long wan bilif long tingting blong hem, ale hem i no mas letem hat blong hem i pulum hem blong folem bilif ya.” Rutherford i eksplenem se, ol Kristin oli “mas sua se Baebol we oli bilif long hem, i tru.” Mo hem i gohed se: “Oli mas savegud ol samting we bilif blong olgeta i stanap long hem.”​—Ridim 2 Timote 3:​16, 17.

Yes, tede tu, wan man we i no bilif se God i stap, no wan man we i no bilif se God i intres long ol man, i save stadi Baebol, mo wokem bilif mo wan gudfala fasin fren wetem Jeova God. Wan yangfala man i yusum buk ya blong Watch Tower Sosaeti, Save Blong Lidim Yu Long Laef We i No Save Finis, blong stadigud long Baebol. Biaen, hem i talem se: “Taem mi stat stadi, mi no bilif long God. Be naoia, mi luk se ol save we mi kasem long Baebol oli jenisim tingting blong mi fulwan. Mi stat blong save Jeova mo trastem hem.”

“Olgeta We Oli Krangke” Mo God

Tija Jemes Hastings i talem long buk blong hem, A Dictionary of the Bible, se: “Ol man we oli raetem OT [Hibru haf blong Baebol], oli neva gat tingting blong traem pruvum no rao se God i stap no nogat. Tingting ya se i no gat wan God, i no laenap wetem fasin blong ol man long taem bifo, mo oli no traem pruvum samting ya. Bilif long God i stret nomo long tingting blong olgeta, yes olgeta man evriwan.” Samting ya i no minim se olgeta man long taem bifo oli onagud long God. No gat. Ol Sam 14:1 mo 53:1 i tokbaot “olgeta we oli krangke,” we oli tingting long hat blong olgeta se, “I no gat Jeova.” King James Version i kolem olgeta se “ol man we oli no gat hed.”

?Hu nao ol man ya we oli no gat hed, we oli talem se i no gat wan God? Hemia i no minim ol man we oli no gat save. Hibru tok ya na·valʹ i karem mining se oli no gat ol gudfala fasin. Tija S. R. Driver i raetem ol tingting blong hem long buk ya, The Parallel Psalter. Hem i talem se problem blong ol man ya we oli no gat hed, “i no se oli no naf blong tingtinggud, be se oli no haremsave we oli mas folem ol gudfala fasin mo oli mas wosip, oli no tingting stret, mo oli no gat fasin luksave nating.”

Man we i raetem Ol Sam i gohed blong tokbaot olsem wanem ol gudfala fasin oli stap lus, from we plante man oli no moa bilif long God. Hem i se: “Olgeta ya evriwan ol rabis man nomo, oli stap mekem ol samting nomo we i nogud we i nogud. I no gat wan long olgeta we i stap mekem ol samting we i stret.” (Ol Sam 14:⁠1) Tija Hastings i ademap ol tingting blong hem, i se: “Ol man ya oli no wantem bilif se God i stap mo se hem i save panisim olgeta. From samting ya, oli gohed blong mekem ol kaen rabis fasin mo ol wok blong sem.” Ol man ya oli talemaot klia se oli agri wetem ol nogud fasin we God i no laekem, mo oli sakemaot bilif ya se God i wan trufala man, from we oli no wantem se oli mas talemaot ol fasin blong olgeta long hem. Be man we i tingting olsemia tede, i no gat hed mo i krangke, i sem mak long ol man we Ol Sam i tokbaot 3,000 yia bifo.

Ol Woning We God Ya We i Wan Trufala Man i Givim

Ale, naoia yumi gobak long ol kwestin we yumi bin stanemap fastaem finis. ?From wanem plante man oli no save bilif se God i wan trufala man taem oli luk se ol man long wol tede oli safa tumas?

Ol man oli bin raetemdaon ol save long Baebol we ‘tabu speret i givim long olgeta, nao oli talemaot tok we i kamaot long God.’ (2 Pita 1:​21) Baebol nomo i soemaot ol fasin blong God ya we i wan trufala man, Jeova. Mo tu, Baebol i givim woning se i gat wan rabis man, we yumi no save luk, mo we i gat paoa blong lidim mo bos long tingting blong ol man. Hemia Setan. Be, sipos yumi no bilif se God i wan trufala man, ?olsem wanem yumi save bilif se Setan i wan trufala man?

Tabu speret i pulum aposol Jon blong raetem se: “ ‘Setan’ no ‘Man we i agensem man’ . . . i gyaman long olgeta man long wol finis, i lidim olgeta oli go krangke.” (Revelesen 12⁠:⁠9) Biaen, Jon i talem se: “Yumi save we yumi ya, yumi man blong God, be olgeta man blong wol oli stap long paoa blong Setan.” (1 Jon 5:​19) Ol tok ya oli kolosap sem mak long tok blong Jisas, we Jon i raetemdaon long Gospel blong hem: “Setan ya we i masta blong wol ya, hem i stap kam. Hem i no gat paoa long mi.”​—⁠Jon 14:⁠30.

!Tijing ya blong Baebol i defren olgeta long bilif blong ol man naoia! Buk ya Catholic Herald i talem se: “I no gat plante man tede we oli tokbaot Setan. Ol man long taem blong yumi, we bilif blong olgeta i hafhaf mo oli strong blong leftemap ol rod blong sayens, oli sakemaot Setan finis.” Be long ol strong tok we Jisas i talem long ol man we oli wantem kilim hem i ded, hem i se: “Yufala i gat sem fasin ya nomo we papa blong yufala Setan, hem i gat. Mo oltaem yufala i wantem mekem ol samting ya we hem i wantem.”​—Jon 8:​44.

Ol tok blong Baebol blong eksplenem paoa blong Setan, i stret nomo mo i isi blong kasem save long hem. Ol tok ya i soemaot klia from wanem wol i fulap long fasin blong no laekem narafala man, faet, mo ol krangke, raf fasin, olsem hemia long Dunblen (we yumi tokbaot long pej 3 mo 4), nating se bighaf blong ol man oli wantem wan kwaet laef wetem pis mo fasin joengud. Mo tu, i no Setan nomo we yumi mas faet agensem olsem enemi blong yumi. Baebol i givim woning long saed blong ol narafala devel no rabis enjel tu​—⁠hemia ol rabis speret man, we long taem bifo, oli joen wetem Setan blong lidim ol man oli go krangke, mo blong spolem ol man. (Jud 6) Plante taem, Jisas Kraes i stanap strong agensem paoa blong ol rabis speret ya, mo hem i winim olgeta.​—Matyu 12:​22-​24; Luk 9:​37-​43.

Trufala God ya, Jeova, i gat wan stampa tingting blong ravemaot ol rabis fasin long wol ya, mo blong finisim ol wok blong Setan mo ol rabis enjel blong hem. From we yumi savegud fasin blong Jeova, yumi save trastem mo bilif fulwan long ol promes blong hem. Hem i talem se: “I no gat wan god we i kamaot fastaem long mi. Mo olwe biaen long mi tu i no gat wan narafala god nating. Mi ya, mi mi Jeova, mo mi nomo mi save sevem yufala.” Yes, Jeova i rili wan trufala man long olgeta we oli save hem, wosip long hem, mo mekem wok blong hem. Yumi save lukluk i go long hem, yes long hem nomo, blong sevem yumi.​—Aesea 43:​10, 11.

[Tok Blong Pija Long Pej 7]

Wan pija we oli katem long ston long ol yia 1700, long soem Moses taem paoa blong God i pusum hem blong raetem Jenesis 1⁠:1

[Credit Line]

From The Holy Bible by J. Baskett, Oxford

[Tok Blong Pija Long Pej 8]

Plante taem Jisas Kraes i winim paoa blong ol rabis enjel