Tingtingbak Long Ol Laswan Dei Blong Laef Blong Jisas Long Wol

HEMIA yia 33 K.T.,a namba 7 dei blong manis we ol man Jyu oli kolem Naesan. Tingbaot sipos yu stap lukluk ol samting we oli hapen long Judia, ples ya we gavman blong Rom i rul long hem. Jisas Kraes mo ol man blong hem oli aot long taon blong Jeriko we i gat plante tri mo flaoa long hem, mo oli stap wokbaot i go long wan rod we i tantanem olbaot mo i fulap long smok blong graon. Plante narafala man oli stap wokbaot i go long Jerusalem tu, blong mekem lafet blong Pasova, olsem evri yia. Be, ol man blong Kraes oli no stap tingbaot nomo we oli taed from oli stap klaem i go antap long wan hil, be oli stap tingbaot wan narafala samting tu.

Ol man Jyu oli bin wet longtaem finis blong luk Mesaea we i save mekem olgeta oli fri long strong rul blong ol man Rom. Plante blong olgeta oli bilif se Jisas blong Nasaret nao i Man ya blong Sevem olgeta we oli bin wet long hem longtaem finis i kam. Jisas i bin tokbaot Kingdom blong God blong tri yia haf. Hem i mekem plante sikman oli kamgud bakegen, mo hem i givim kakae long sam man we oli hanggri. Yes, hem i mekem ol man oli haremgud. Be ol lida blong skul oli kros from we Jisas i talemaot ol strong tok blong jajem olgeta, taswe oli wantem tumas blong kilim hem i ded. Nating se i olsem, Jisas i stap wokbaot strong long rod ya we i draegud, mo ol disaepol blong hem oli kam biaen.​—Mak 10:32.

Taem san i godaon biaen long Hil blong ol Oliftri we i stap fored long Jisas, hem mo ol man blong hem oli kamtru long velej blong Betani. Bambae oli stap sikis naet long ples ya. Ol gudfala fren blong olgeta hemia Lasros, Meri mo Mata, oli welkamem olgeta. Afta long bigfala wokbaot we oli bin mekem long hot san long dei ya, oli haremgud blong spel long naet we ples i kolkol lelebet. Mo tu, naet ya i makem stat blong Sabat dei, Naesan 8.​—Jon 12:​1, 2.

Naesan 9

Afta long Sabat dei, Jerusalem i bisi tumas. Plante taosen man oli kam finis long taon ya blong mekem lafet blong Pasova. Be long yia ya, i gat moa noes i bitim ol narafala yia. Plante man oli wantem save wanem i mekem ol noes ya, ale oli stap ron i godaon long ol smosmol rod blong go kasem get blong taon. !Oli puspusum olgeta blong pastru long bigfala hif man we oli stap long get, nao oli sek long samting we oli luk! Fulap man we oli glad tumas oli stap kamdaon long Hil blong ol Oliftri, folem rod we i aot long Betfas i kam. (Luk 19:37) ?Ol samting ya oli minim wanem?

!Yu luk! Jisas blong Nasaret i stap raed i kam long wan pikinini dongki. Sam man oli stap sakem kot blong olgeta oli godaon long rod long fored blong hem. Sam narafala oli stap sakem ol han blong pamtri we oli jes katem, mo oli stap singaot wetem glad se: “!Hae God, yu blesem man ya we i kam long nem blong yu! !Yu blesem king ya blong ol man Isrel!”​—Jon 12:12-​15.

Taem bigfala hif blong man ya i kam kolosap long Jerusalem, Jisas i lukluk long taon ya mo hem i sore tumas. Hem i stat krae, mo yumi harem tok blong hem se bambae taon ya i lus. Smoltaem biaen, Jisas i kamtru long haos prea, nao hem i tijim ol man mo i mekem ol blaenman mo ol man we leg blong olgeta i nogud, oli gud bakegen.​—Matyu 21:14; Luk 19:41-​44, 47.

Ol jif pris mo ol tija blong Loa oli stap luklukgud ol samting ya. !Oli kros from ol gudgudfala wok we Jisas i stap mekem mo from we ol man oli glad long hem! Ol Farisi oli no save haedem kros blong olgeta, nao oli talem strong se: “Tija. I gud yu blokem ol man ya blong yu oli stap kwaet.” Jisas i ansa, i se: “Mi mi talem long yufala, sipos olgeta ya oli stap kwaet, bambae ol ston ya nomo oli save singaot.” Bifo we Jisas i aot long haos prea, hem i makemgud bisnes we ol man oli stap mekem long ples ya.​—Luk 19:39, 40; Matyu 21:15, 16; Mak 11:11.

Naesan 10

Jisas i kamtru long haos prea long eli moning. Long dei bifo, hem i kros tumas blong luk se ol man oli yusum wosip blong Papa blong hem, Jeova God, blong mekem bisnes. Taswe, wetem strong tingting, hem i ronemaot ol man ya we oli stap pem mo salem olting long haos prea. Nao, hem i kafsaedem ol tebel blong ol griri man we oli stap jenisim mane mo ol jea blong ol man we oli stap salem nawemba. Hem i talem se: “Oli raetem long Baebol we God i talem se ‘Haos blong mi, bambae ol man oli talem hem se Haos blong prea blong olgeta man.’ Be yufala i stap tanem i kam ples blong haed blong ol man blong stil.”​—Matyu 21:12, 13.

Ol jif pris, ol tija blong Loa mo ol haeman, oli no laekem nating ol samting we Jisas i mekem mo i tijim. !Oli wantem tumas blong kilim hem i ded! Be oli no save mekem olsem from we ol man oli sapraes tumas long tijing blong Jisas mo “oli wantem tumas blong harem ol tok blong hem.” (Luk 19:47, 48) From we naet i kolosap, Jisas mo ol fren blong hem oli wokbaot i gobak long Betani blong spelgud long naet ya.

Naesan 11

Eli long moning, Jisas mo ol disaepol blong hem oli folem rod we i pas antap long Hil blong ol Oliftri i go kasem Jerusalem. Taem oli kamtru long haos prea, ol jif pris mo ol olfala blong ol man Isrel oli kam luk Jisas kwiktaem. Olgeta oli stap tingbaot samting we Jisas i mekem agensem ol man we oli jenisim mane mo mekem maket long haos blong God. Ol enemi ya blong Jisas oli askem long hem wetem bigfala kros se: “?Olsem wanem yu yu stap mekem ol samting ya? ?Hu i givim raet long yu olsem?” Jisas i ansa i se: “Oraet, mi tu mi askem wan kwestin long yufala. Sipos yufala i ansa long kwestin ya blong mi, bambae mi mi talemaot long yufala we mi mi gat raet olsem wanem blong mekem ol samting ya. ?Baptaes ya we Jon i mekem long olgeta, hem i kamaot olsem wanem? ?God i talem long hem blong i mekem olsem, no ol man nomo oli talem?” Ol enemi ya blong Jisas oli kam wanples mo oli stap toktok long olgeta, oli se: “?Bambae yumi talem olsem wanem? Sipos yumi talem se ‘God i talem long hem blong i mekem olsem,’ bambae hem i mas talem long yumi se ‘?Ale, be weswe yufala i no bilif long Jon?’ Be yumi no save talem se ‘Ol man nomo oli talem long hem blong i mekem.’ Yumi fraet long ol man ya, from we olgeta ya oli bilif finis se Jon i wan profet.” Oli no save wanem blong talem, ale oli ansa long slak fasin se: “Mifala i no save.” Jisas i tok slou, i se: “Ale, be mi tu mi no save talemaot long yufala from wanem mi mi gat raet blong mekem ol samting ya.”​—Matyu 21:23-​27.

Naoia ol enemi blong Jisas oli traem trikim hem blong i talem wan samting we oli save holem hem from. Oli askem se: “?I stret long Loa blong yumi blong yumi pem takis long Sisa, hed gavman ya blong ol man Rom, no i no stret olsem?” Jisas i ansa se: “Yufala i tekem sam mane blong pem takis ya i kam, yufala i soem long mi.” Nao hem i askem se: “?Fes ya i fes blong hu? ?Mo nem ya i nem blong hu?” Oli talem se: “Fes blong Sisa ya, mo nem blong hem tu.” Tok blong Jisas i mekem tingting blong olgeta i fasfas, nao hem i talem i klia nomo blong olgeta man oli save harem, i se: “Oraet, samting we i blong Sisa, yufala i givimbak long Sisa. Samting we i blong God, yufala i givimbak long God.”​—Matyu 22:15-​22.

Ol gudfala ansa blong Jisas oli satem maot blong ol enemi blong hem. Naoia, Jisas i tok strong agensem olgeta long fored blong ol man mo ol disaepol. Lesin long ol tok blong hem we i jajem ol tija blong Loa ya mo ol Farisi. Hem i se: “I nogud yufala i folem fasin blong olgeta, from we olgeta oli no mekem fasin blong olgeta i stret long tok blong olgeta.” Jisas i no fraet, hem i talemaot plante trabol long olgeta, mo i makemaot olgeta se oli ol blaenman we oli stap lidim ol narafala, mo we oli gat tu tingting. Jisas i talem se: ‘!Yufala i olsem snek! !Yufala i olsem pikinini blong snek stret! !Yufala i man blong ronwe nomo! ?Weswe yufala i ting se yufala i save ronwe long panis blong yufala, bambae yufala i no go long Gehena?’​—Matyu 23:​1-​33.

Ol strong tok blong Jisas blong jajem ol man ya i no min se hem i no stap luksave ol gudfala fasin blong ol man tu. Biaen, hem i stap lukluk ol man we oli sakem kleksin long haos prea. Taem hem i luk wan wido we i pua i sakem olgeta mane blong hem​—tu smol mane we i olsem ten vatu nomo, !samting ya i pulum filing blong hem! Nao Jisas i talem wetem ol gudfala toktok we i soem lav mo kaengud fasin se wido ya i sakem moa i bitim olgeta rijman we “oli stap sakem haf mane ya nomo blong olgeta we i stap nating.” Jisas i gat sore long man mo i gat bigfala tangkyu from eni gudfala samting we man i mekem.​—Luk 21:​1-4.

Naoia, Jisas i goaot long haos prea blong laswan taem. Samfala man blong hem oli tokbaot olsem wanem haos prea ya i naes tumas, “we i gat ol bigbigfala ston blong hem mo plante samting blong flasem, we ol man oli bin givim.” Oli sapraes bigwan taem Jisas i ansa se: “Taem i stap kam we bambae ol man oli brekemdaon olgeta ston blong haos ya. Bambae i no gat wan ston i save stap long ples blong hem, bambae oli brekemdaon olgeta evriwan.” (Luk 21:​5, 6) Ale, ol aposol oli folem Jisas oli goaot long bisi taon ya, be oli stap tingbaot se wanem nao mining blong ol tok ya blong hem.

Smoltaem biaen, Jisas wetem ol aposol blong hem oli sidaon long Hil blong ol Oliftri, mo oli haremgud long pis mo kwaet blong ples ya. Taem oli stap luklukdaon long Jerusalem mo naesfala haos blong God, Pita, Jemes, Jon, mo Andru, oli wantem se Jisas i eksplenem ol tok blong hem we i bin mekem olgeta oli sapraes. Oli askem se: “Plis yu talem long mifala: ?Wetaem bambae ol samting ya oli kamtru? ?Mo wanem saen bambae i soemaot we yu yu stap finis mo we fasin ya blong wol i kasem en blong hem?”​—Matyu 24:​3, NW; Mak 13:​3, 4.

Blong ansa long olgeta, Nambawan Tija ya i talemaot wan bigfala profet tok. Hem i talemaot se bambae i gat ol bigbigfala faet, graon i seksek, kakae i sot, mo ol strong sik. Jisas i talemaot tu se ol man blong hem bambae oli prij long olgeta ples blong wol long saed blong gud nyus blong Kingdom. Nao, hem i givim woning ya se: “Long taem ya, bambae i gat bigfala trabol tumas, we neva man i luk olsem bifo, i stat long taem we God i mekem wol, i kam kasem tede. Yes, mo bambae i no moa gat sam bigfala trabol olsem bakegen samtaem.”​—Matyu 24:​7, 14, 21; Luk 21:10, 11.

Fofala aposol ya oli lesingud taem Jisas i tokbaot ol narafala haf blong ‘saen ya we bambae i makem se hem i stap finis.’ Hem i talem strong se oli nidim blong “lukaot gud.” ?From wanem? Hem i talem se: “From we yufala i no save long wanem dei, mi, mi Masta blong yufala, bambae mi kamtru.”​—Matyu 24:42; Mak 13:33, 35, 37.

Hemia wan dei we Jisas wetem ol aposol blong hem oli neva save fogetem. Yes, hemia laswan dei we Jisas i tijim ol man bifo we ol enemi blong hem oli holem hem, jajem hem, mo kilim hem i ded. From we i let lelebet, oli stat wokbaot i go long sotfala rod we i pas antap long hil, blong gobak long Betani.

Naesan 12 mo 13

Jisas i stap kwaet long Naesan 12 wetem ol disaepol blong hem. Hem i luksave se ol lida blong skul oli wantem tumas blong kilim hem i ded, mo hem i no wantem we olgeta ya oli blokem lafet blong Pasova long nekis naet. (Mak 14:​1, 2) Long nekis dei, hemia Naesan 13, ol man oli bisi blong rerem ol laswan samting blong lafet blong Pasova. Long aftenun, Jisas i sanem Pita mo Jon i go blong mekemrere ol samting blong lafet ya, long wan rum antap long wan haos long Jerusalem. (Mak 14:12-​16; Luk 22:8) Smoltaem bifo we san i godaon, Jisas mo ol narafala ten aposol oli joenem tufala long ples ya, blong mekem lafet blong Pasova. Hemia laswan taem we oli mekem lafet ya tugeta.

Naesan 14, Afta We San i Godaon

Taem ful mun i stat kam antap long Hil blong ol Oliftri, smol laet blong hem i saenaot i kavremap Jerusalem. Long wan bigfala rum we i gat ol samting i stap rere finis, Jisas mo ol twelef aposol blong hem oli sidaon fored long wan tebel we i gat ol kap long hem finis. Hem i talem se: “Long tingting blong mi, mi mi wantem tumas blong yumi kakae kakae ya blong Pasova fastaem, nao biaen bambae olgeta oli mekem mi mi harem nogud long bodi blong mi.” (Luk 22:14, 15) Afta we smoltaem i pas, ol aposol oli sapraes blong luk we Jisas i stanap, mo i tekemaot kot blong hem. Hem i tekem wan taoel mo wan besin wora, nao i wasem leg blong olgeta. !Bambae oli no fogetem lesen ya we hem i tijim long olgeta, hemia blong mekem wok blong ol narafala wetem tingting daon!​—Jon 13:​2-​15.

Be, Jisas i save se wan long ol man ya​—Judas Iskariot​—i mekem plan finis blong putum hem i go long han blong ol lida blong skul. Yumi kasem save from wanem Jisas i harem nogud bigwan. Hem i talem se: “Wan long yufala bambae i letem mi mi go long han blong ol enemi blong mi.” Ol aposol oli harem nogud tumas long samting ya. (Matyu 26:​21, 22) Afta we oli mekem lafet blong Pasova, Jisas i talem long Judas se: “Samting ya we bambae yu mekem, yu hareap long hem.”​—Jon 13:27.

Taem Judas i go afsaed finis, Jisas i stanemap wan kakae blong tingbaot ded blong hem we i kolosap. Hem i tekem wan bred we i no gat is long hem, i talem tangkyu long God from, i brekem, mo i givim long ol leven aposol blong oli kakae. Hem i talem se: “Hemia i minim bodi blong mi, we bambae mi givim from yufala. Yufala i mas stap mekem samting ya blong tingbaot mi bakegen.” Nao, Jisas i tekem wan kap blong red waen. Hem i talem tangkyu long God from, i pasem kap ya long wanwan blong olgeta, mo i talem long olgeta blong dring long hem. Hem i gohed se: “Hemia i minim blad blong mi, we i blong mekem kontrak i stanap. Blad blong mi bambae i ron blong tekemaot ol sin blong plante man.”​—Luk 22:19, 20, NW; Matyu 26:26-​28, NW.

Long spesel naet ya, Jisas i tijim plante gudfala lesen long ol aposol blong hem. Wan long olgeta, hemia se i impoten we oli laeklaekem olgeta olsem ol brata nomo. (Jon 13:34, 35) Hem i promes long olgeta se bambae oli kasem ‘speret blong givhan,’ hemia tabu speret. Bambae speret ya i mekem olgeta oli tingbaot olgeta tok we Jisas i talem finis long olgeta. (Jon 14:26) Ating ol aposol ya oli haremgud tumas smoltaem biaen, long semfala naet ya, taem Jisas i prea from olgeta wetem dip filing. (Jon, japta 17) Afta we oli singsing blong presem God, oli aot long rum we i antap long haos ya, mo oli folem Jisas. Afsaed, ples i kolkol lelebet.

Jisas wetem ol aposol ya oli gokros long Vali blong Kedron, go kasem wan ples we oli laekem tumas, nem blong hem, garen blong Getsemane. (Jon 18:​1, 2) Nao ol aposol oli wet, mo Jisas i go longwe lelebet blong prea. I no gat toktok blong eksplenem olsem wanem Jisas i trabol long filing blong hem, taem i prea wetem fulhat blong hem blong askem God blong givhan long hem. (Luk 22:44) Hem i harem i soa bitim mak blong tingbaot bigfala sem we hem i save sakem long nem blong Papa blong hem long heven, sipos hem i no stap tru long Hem.

Jisas i stap prea yet taem Judas Iskariot wetem fulap narafala man oli kamtru long ples ya. Olgeta ya oli karem ol naef blong faet, ol nalnal, mo ol stik faea. Judas i talem long Jisas i se: “!Halo, Tija!” mo i kis long hem. Hemia blong mekem saen long ol man blong oli holem Jisas. Be wantaem nomo, Pita i pulumaot naef blong faet blong hem mo i katemaot wansaed sora blong slef blong hae pris. Jisas i mekem sora blong man ya i gud bakegen, mo i talem se: “Yu putumgud naef blong yu long paos blong hem bakegen. Man we i stap tekem naef blong faet, hem bambae i ded long naef blong faet.”​—Matyu 26:47-​52.

!Evri samting i hapen kwiktaem nomo! Oli holem Jisas mo fasem hem. Ol aposol oli fraet, mo tingting blong olgeta i fasfas, ale oli ronwe long Masta blong olgeta. Ol man we oli holem Jisas, oli lidim hem i go long Anas we i hae pris fastaem finis. Biaen, oli tekem hem i go long hae pris Kaeafas, blong hem i pas long kot. Eli long moning, kot ya Sanhedrin i talemaot ol gyaman toktok agensem Jisas se hem i tok nogud long God. Afta, Kaeafas i givim oda blong oli tekem hem i go long Ponjes Paelet, hedgavman blong ol man Rom. Paelet i sanem hem i go long Herod Antipas, rula blong Galili. Herod wetem ol soldia blong hem oli laf long Jisas. Nao hem i sanem Jisas i gobak long Paelet bakegen. Paelet i talem bakegen se hem i no faenem wan poen long Jisas. Be ol lida blong skul blong ol man Jyu, oli pulum hem blong jajem Jisas se hem i mas ded. Oli tok nogud long Jisas mo oli mekem hem i harem nogud long bodi blong hem. Biaen, oli tekem hem i go long Golgota. Long ples ya, oli no gat sore nating long hem, oli nilim hem long wan pos blong i harem i soa tumas long bodi blong hem, gogo hem i ded.​—Mak 14:50 kasem 15:39; Luk 23:​4-​25.

Sipos Jisas i stap ded blong olwe, samting ya bambae i moa nogud i bitim olgeta narafala samting we oli bin hapen long histri blong man. Yumi glad tumas we i no olsem. Long Naesan 16, 33 K.T., ol disaepol blong hem oli sapraes tumas blong luk se hem i laef bakegen long ded. Biaen, bitim 500 man oli luk Jisas afta we hem i laef bakegen. Mo 40 dei afta we hem i girap long ded, wan grup blong man we oli stap tru long hem, oli luk hem taem i go antap long heven.​—Ol Wok 1:​9-​11; 1 Korin 15:​3-8.

Laef Blong Jisas Mo Yu

?Ol samting ya oli mekem wanem long laef blong yu​—yes, long laef blong yumi evriwan? Wok blong Jisas long wol ya, ded blong hem, mo fasin we hem i laef bakegen long ded, oli leftemap nem blong Jeova God i kam hae we i hae, mo oli impoten tumas blong mekem stampa tingting blong Hem i kamtru. (Kolosi 1:​18-​20) Ol samting ya oli impoten tumas long yumi, from we Jeova God i save fogetem ol sin blong yumi tru long ded blong Jisas, mekem se yumi save frengud wetem Hem.​—Jon 14:6; 1 Jon 2:​1, 2.

Ol samting ya oli givhan long ol dedman tu. Taem Jisas i laef bakegen long ded, hem i openem rod blong ol dedman oli save girap bakegen long paradaes long wol ya we God i promes finis blong mekem. (Luk 23:39-​43; 1 Korin 15:20-​22) Sipos yu wantem save moa long saed ya, mifala i singaot yu blong kam long Memoriol blong ded blong Jisas Kraes long Epril 11, 1998, long Haos Kingdom blong ol Wetnes blong Jeova long ples blong yu.

[Futnot]

[Bokis blong pija long pej 6]

“Wan Ples Blong Haed Blong Ol Man Blong Stil”

JISAS i gat gudfala risen blong talem se ol griri bisnesman oli mekem haos blong God i kam “wan ples blong haed blong ol man blong stil.” (Matyu 21:​12, 13) Ol man Jyu mo ol proselaet we oli kam long ol narafala kantri, oli mas jenisim mane blong olgeta blong pem takis long haos blong God. Alfred Edersheim i eksplenem long buk ya The Life and Times of Jesus the Messiah, se ol man blong jenisim mane oli stat mekem bisnes long ol defren ples long kantri long Ada 15, hemia wan manis bifo long Pasova. Stat long Ada 25, oli muf i go long haos blong God long Jerusalem, blong winim plante mane long bigfala namba blong man Jyu mo proselaet we oli kam. Ol man ya oli wingud from we evritaem oli jenisim wan mane, oli askem smol mane antap bakegen. Taem Jisas i talem se oli man blong stil, hem i soem se oli stap tekem tumas mane blong olgeta nomo, i olsem se oli stilim ol puaman.

Samfala oli no save karem ol prapa anamol blong olgeta oli kam blong mekem sakrifaes. Sipos oli karem prapa anamol blong olgeta, wan man long haos blong God i mas jekemgud anamol ya​​—⁠mo ol man ya oli mas pem samting ya. Plante man oli fraet se anamol we oli karem i kam, bambae i no stret blong mekem sakrifaes. Taswe, oli pem wan anamol long ol kruked bisnesman long haos blong God, wan anamol we ol Livaet oli “agri” long hem. Wan man blong hae save i talem se: “Long ples ya, oli stilim plante mane blong ol puaman.”

I gat pruf blong soem se, wan taem, hae pris Anas mo famle blong hem i bin joen wetem ol man ya blong mekem bisnes long haos blong God. Ol hanraet blong ol tija blong Loa, oli tokbaot “maket blong ol pikinini blong Anas [long haos blong God].” Bigfala rod blong olgeta blong winim mane, hemia from ol man blong jenisim mane mo from bisnes ya blong salem ol anamol. Wan man blong hae save i talem se taem Jisas i ronemaot ol bisnesman, “hemia i no jes blong daonem ol pris long fored blong ol man, be i blong spolem bisnes blong olgeta tu, we oli winim plante mane from.” !Nomata wanem ol risen, be ol enemi blong Jisas oli wantem tumas blong kilim hem i ded!​​—⁠Luk 19:​45-​48.

[Bokis blong pija long pej 4]

Ol Las Dei Blong Laef Blong Jisas Long Wol Ya

Naesan 33 K.T Ol Samting We Oli Hapen Man We i Hae Moa*

7 Fraede Jisas mo ol man blong hem 101, haf 1

(Naesan 7 oli aot long Jeriko oli

wokbaot i go long Jerusalem

i stret long Sande, Epril 5,

1998, be dei blong ol man

Jyu i stat taem san i

godaon go kasem san i

godaon long nekis dei)

8 Fraede Jisas mo ol man blong hem 101,

naet oli kamtru long Betani; haf 2-4

Sabat dei i stat

Sarede Sabat (Mande, 101, haf 4

Epril 6, 1998)

9 Sarede Kakae wetem Saemon, man 101,

naet ya we i gat leprosi; Meri haf 5-9

i kafsaedem oel i go

long Jisas. Plante man

oli aot long Jerusalem

oli kam luk mo lesin

long Jisas

Sande Ol man oli presem Jisas 102

taem hem i kamtru long

Jerusalem; Hem i tijim ol

man long haos prea

10 Mande Long moning, hem i go long 103

Jerusalem; i sakemaot ol man 104

blong mekem bisnes long

haos prea; toktok blong

Jeova i kamaot long heven

11 Tusde Long Jerusalem, hem i yusum 105

ol pijatok blong tijim ol man kasem

long haos prea; i talem ol 112,

strong tok blong jajem ol haf 1

Farisi; i tokbaot presen mane

we wan wido i givim; i

talemaot saen we bambae i

soem se hem i stap bakegen

12 Wenesde Jisas wetem ol man blong 112,

hem oli stap kwaet nomo; haf 2-4

Judas i mekem plan blong

putum hem long han

blong ol enemi blong hem

13 Tasde Pita mo Jon oli mekemrere ol 112,

samting blong Pasova long haf 5

Jerusalem; Jisas mo ol ten kasem

narafala aposol oli joen 113,

wetem tufala let long haf 1

aftenun (Sarede, Epril 11,

1998)

14 Tasde naet Oli mekem lafet blong Pasova; 113,

Jisas i wasem leg blong haf 2

ol aposol; Judas i goaot kasem

blong putum Jisas 117

long han blong ol enemi;

Jisas i stanemap Memoriol

blong ded blong hem

(Afta we san i godaon,

Sarede, Epril 11, 1998)

Afta long Jisas i go long han blong ol 118

medel naet enemi blong hem we oli kam kasem

holem hem long garen blong 120

Getsemane; ol aposol oli ronwe;

hem i pas long fored blong

ol pris mo kot blong Sanhedrin;

Pita i gyaman se hem i no

save Jisas

Fraede taem Hem i pas long Sanhedrin bakegen; 121

san i kam antap biaen, hem i go long Paelet, long kasem

go kasem san Herod mo long Paelet bakegen; 127,

i godaon hem i jajem Jisas se i mas ded; haf

oli nilim Jisas long pos; 7

oli berem hem

15 Sarede Sabat; Paelet i letem ol soldia 127,

oli gad long gref blong Jisas haf 8-10

16 Sande Jisas i laef bakegen long ded 128

* Long ples ya, i gat ol japta blong buk ya Man We i Hae Moa Long Olgeta Man. Blong faenem plante moa vas blong Baebol long saed blong ol laswan dei blong laef blong Jisas long wol ya, lukluk buk ya “All Scripture Is Inspired of God and Beneficial,” pej 290. Watchtower Bible and Tract Society of New York, Inc. i prentem ol buk ya.