Oli Mekem Samting We Jeova i Wantem

Jisas i Sanemaot 70 Disaepol

Hem i yia 32 K.T.,a mo ol tri oli stap putum flaoa. I gat sikis manis i stap yet bifo we Jisas i ded. Taswe, blong mekem moa long wok blong prij mo blong givim moa trening long sam man we oli folem hem, hem i jusumaot 70 disaepol. Hem i “sanem olgeta oli go tutu man, blong oli go fastaem, hem i kam biaen. Olgeta ya oli blong go long ol velej mo ol narafala ples we bambae i no longtaem, hem i save pas long olgeta.”​—Luk 10:1.b

Jisas i sanem ol disaepol ya “oli go fastaem, hem i kam biaen.” Olsem nao, taem Jisas i kamtru biaen, ol man oli save tekem disisen blong olgeta kwiktaem, se oli bilif long hem olsem Mesaea, no nogat. ?From wanem hem i sanemaot ol disaepol “oli go tutu”? I klia se, hemia blong mekem se wan i save leftemap tingting blong narawan taem sam man oli agensem olgeta.

Jisas i makemgud se wok blong prij we ol man blong hem oli mekem i impoten tumas, i se: “Tru, i gat plante kakae tumas i stap long garen, be smol man nomo oli stap blong karem i kam. Yufala i mas askem strong long masta blong garen ya, blong hem i sanem sam moa man oli go karem kakae blong hem i kam.” (Luk 10:2) Pijatok ya long saed blong taem blong karem kakae long garen i stret nomo, from we sipos man i slou tumas blong karem kakae we i rere, plante gudfala kakae i save kam rotin. !Long sem fasin, sipos ol disaepol oli no tinghevi long wok blong prij, plante man oli save lus!​—Esikel 33:6.

Ol Man Blong Prij We i No Gat Samting i Save Blokem Olgeta

Jisas i givim moa advaes long ol disaepol blong hem, i se: “Yufala i no tekem paos blong mane, no basket, no sandel blong yufala. Yufala i no spel long rod blong store long ol man.” (Luk 10:4) Long taem bifo, ol man we oli wokbaot long wan longfala trep, oli karem wan basket blong kakae, wetem sam narafala sandel, from we sus blong olgeta i save kam nogud mo brok. Be, ol disaepol blong Jisas oli no mas karem ol samting ya. Long defren fasin, oli mas trastem Jeova se bambae hem i lukaot long olgeta, mo bambae hem i pulum ol man Isrel blong givim ol samting we oli nidim. I tru se, fasin blong tekem strenja i go long haos mo soem kaengud fasin long hem, hemia wan kastom blong ol man Isrel.

?From wanem Jisas i talem long ol disaepol blong hem blong no storeyan long wan man long rod? ?Oli no save soem gudfala fasin? ?Oli mas gat strong fasin? !No gat! Grik tok ya a·spaʹzo·mai, we Baebol i tanem i kam store long ol man, i no minim se oli talem “halo” nomo. Maet hem i minim kastom ya blong kisim mo putum han i goraon long narafala man, mo storeyan wetem hem blong longtaem. Wan man blong eksplenem ol tok blong Baebol, i talem se: “Ol man long ol kantri blong Is oli no talem halo long semfala fasin olsem yumi, we yumi benem hed blong yumi smol no yumi sekhan. Blong talem halo, oli holholem olgeta plante taem, oli bendaon, mo samtaem oli bodaon kasem graon. Samting ya i tekem plante taem.” (Skelem wetem 2 King 4:​29.) Taswe, Jisas i givhan long ol man blong hem blong no letem wan samting i blokem wok blong olgeta, nating se samting ya i wan kastom.

Laswan samting we Jisas i talem long ol disaepol blong hem, se taem oli go long wan haos we ol man oli welkamem olgeta, oli mas ‘stap oltaem long sem haos ya, oli no mas muf i go olbaot long ol narafala haos. Oli save kakae ol kakae we ol man oli givim long olgeta, mo dring wora we oli givim long olgeta.’ Be taem oli go long wan velej nao ol man oli no mekem i gud long olgeta, oli mas ‘stanap long klia ples long velej ya mo talem se “Doti blong graon ya nomo blong ples blong yufala, we i stap long leg blong mifala, be mifala i ravemaot blong mekem saen long yufala.” ’ (Luk 10:​7, 10, 11) Taem ol disaepol oli ravemaot no tekemaot graon long leg blong olgeta, hemia i soem se long kwaet fasin, oli livim haos ya no velej ya, blong i kasem panis we bambae i kamaot long God long fyuja. Be ol man we oli soem kaengud fasin long ol disaepol blong Jisas, bambae oli kasem blesing. Wan narafala taem, Jisas i talem long ol aposol blong hem se: “Man we i tekem yufala i go insaed long haos blong hem, i olsem we hem i tekem mi mi go insaed. Mo man we i tekem mi mi go insaed long haos blong hem i olsem we hem i tekem hemia tu we i sanem mi, i go insaed. Mo man we i givim kap kolwora nomo long wan man blong mi we i daon moa long ol narafala man blong mi, be from we i man blong mi, tru mi talem long yufala, hem bambae i mas gat pei blong hem from.”​—Matyu 10:40, 42.

Ol Lesen Blong Yumi

Long taem blong yumi, bitim 5 milyan Wetnes blong Jeova long olgeta ples blong wol, oli stap talemaot gud nyus blong Kingdom blong God mo pulum ol narafala man oli kam man blong Kraes. (Matyu 24:14; 28:19, 20) Oli save se mesej blong olgeta i impoten tumas. Taswe, oli yusumgud taem blong olgeta, oli no letem wan samting i blokem olgeta blong putum tingting i stap fulwan long impoten wok ya.

Ol Wetnes blong Jeova oli traehad blong soem fasin fren long ol man. Be, oli no storeyan long ol samting we oli no impoten, mo oli no joen long ol rao blong ol man blong velej, no ol rao long saed blong fasin we man i stap folem blong stretem ol trabol long wol ya, we i no stap wokgud nating. (Jon 17:16) Defren olgeta, oli tokbaot wan samting nomo we i naf blong stretem ol problem blong man blong olwe, hemia Kingdom blong God.

Kolosap oltaem, ol Wetnes blong Jeova oli prij tutu. Ating oli save mekem moa wok sipos oli prij wanwan, ?i tru no? Maet samting ya i tru. Be, ol Kristin tede oli luksave se i gud blong wokbaot wetem wan narafala man blong bilif. Fasin ya i moa sef taem tufala i stap prij long wan ples we i denja. Mo tu, ol man we oli jes stat blong prij oli save lanem plante samting from ol man we oli bin talemaot gud nyus longtaem finis. Yes, tufala i save leftemap tingting blong tufala.​—Proveb 27:17.

I klia nomo se, wok blong prij i moa impoten i bitim olgeta narafala wok we oli stap gohed long ‘ol las dei ya.’ (2 Timote 3:1) Ol Wetnes blong Jeova oli glad we oli gat fulap Kristin brata long olgeta ples blong wol blong sapotem olgeta, mekem se oli save “wok olsem wan tim nomo, blong traehad blong mekem ol man oli bilif long gud nyus.”​—Filipae 1:​27.

[Ol futnot]