?Yu Save Trastem Tingting We i Stap Jajem Yu?

PLANTE taem, kampas i wan tul we, yumi save trastem. Ara blong hem, we stil blong graon i lidim, i poen oltaem i go long not. Long fasin ya, ol man we oli aot long wan ples blong go long narafala ples, oli save dipen long kampas blong i soem rod long olgeta, taem i no gat wan narafala samting blong lidim olgeta. Be, ?wanem i save hapen sipos yu putum wan stil kolosap long kampas? Ara blong hem bambae i no moa poen i go long not, be bambae i poen i go long ples we stil ya i stap. Nao yu no moa save dipen long kampas ya.

Sem samting i save hapen long tingting we i stap jajem yumi. Man we i Wokem yumi, i putum tingting ya insaed long yumi blong lidim yumi. From we God i wokem yumi long pija blong hem, oltaem tingting ya we i stap jajem yumi, i mas soem stret rod long yumi taem yumi mekem wan disisen. Tingting ya i mas pulum yumi blong soemaot ol stret fasin blong God long laef blong yumi. (Jenesis 1:​27) Plante taem, tingting we i stap jajem yumi, bambae i mekem olsem. Eksampel, Kristin aposol Pol i tokbaot sam man we oli no save loa blong God be “oli stap mekem ol samting olsem we Loa ya i talem.” ?From wanem? From we “samtaem oli harem long tingting blong olgeta se oli mekem i stret, mo samtaem oli harem se oli mekem i no stret.”​—Rom 2:​14, 15.

Nating se i olsem, tingting ya we i stap jajem yumi, i no stap wokgud oltaem. From we yumi sinman, plante taem yumi wantem mekem samting we yumi save se i no stret. Pol i talem se: “Long tingting blong mi, mi glad tumas long Loa ya blong God. Be mi luk we rabis fasin ya we i stap wok long laef blong mi, hem i narafala. Mo narafala fasin ya i agens long Loa ya blong God, we long tingting blong mi, mi glad tumas long hem. Narafala fasin ya i stap mekem mi, olsem we mi mi slef blong fasin blong sin, we i stap wok oltaem long tingting blong mi.” (Rom 7:​22, 23) Sipos yumi letem ol rong fasin oli winim yumi oltaem, sloslou tingting ya we i stap jajem yumi bambae i no moa wokgud, mo bambae hem i no moa save talem long yumi se yumi mekem i rong.

Be nating se yumi sinman, yumi save mekem tingting ya we i stap jajem yumi, i laenap wetem ol rul blong God. Yes, i impoten tumas blong mekem olsem. Sipos tingting ya we i stap jajem yumi, i klin mo yumi trenemgud hem, bambae yumi kam gudfala fren blong God. Antap long samting ya, bambae tingting olsem i save lidim yumi long rod blong sef. (Hibrus 10:22; 1 Pita 1:​15, 16) Mo tu, gudfala tingting bambae i halpem yumi blong mekem ol waes disisen long laef, nao bambae yumi save gat pis mo glad. Man blong raetem Ol Sam i tokbaot ol man we tingting blong olgeta i jajem olgeta long stret fasin, i se: “Oli stap holem loa blong God blong olgeta long tingting blong olgeta, mo neva oli lego loa ya.”​—Ol Sam 37:31.

Trenem Tingting Ya We i Jajem Yu

Blong trenem tingting ya we i stap jajem yumi, i no minim nomo se yumi rimemba wan lis blong loa, mo biaen yumi folemgud olgeta loa ya. Hemia nao samting we ol Farisi long taem blong Jisas oli bin mekem. Ol lida ya blong skul oli savegud Loa mo oli bin stanemap plante smosmol kastom. Oli ting se ol kastom ya bambae oli halpem ol man blong no brekem Loa. Taswe, taem ol disaepol blong Jisas oli pikimap sam wit blong kakae long Sabat, ol lida ya oli kwik blong tok agens long olgeta. Mo oli agensem Jisas taem hem i mekem han blong wan man i kamgud bakegen long Sabat. (Matyu 12:​1, 2, 9, 10) Folem kastom blong ol Farisi, taem Jisas i mekem tufala wok ya, hem i brekem namba fo komanmen.​—Eksodas 20:​8-​11.

I klia se, ol Farisi oli stadi long Loa. Be, ?tingting blong olgeta i laenap wetem ol rul blong God? !No gat! Traem tingbaot, jes afta we ol Farisi oli tok smosmol agensem wan samting we oli talem se i brekem rul blong Sabat, oli mekem plante toktok blong ‘traem faenem rod blong kilim Jisas i ded.’ (Matyu 12:14) Tingbaot. Ol lida ya blong skul we oli ting se oli stretgud, oli kwik blong girap agensem fasin ya blong kakae wit mo mekem man i kamgud bakegen long Sabat. Be tingting blong olgeta i no stikim olgeta nating taem oli mekem plan blong kilim Jisas i ded.

Ol jif pris tu oli soemaot semkaen kruked tingting olsemia. Ol rabis man ya, oli no harem nating se oli mekem i rong taem oli tekem 30 pis selva long mane blong haos prea mo givim long Judas blong i letem Jisas long han blong olgeta. Biaen, oli sek taem Judas i karem mane ya i kambak, mo i sakem insaed long haos prea. Nao, tingting blong olgeta i stikim olgeta, from we oli no moa save wanem i stret blong mekem folem loa. Oli talem se: “I no stret long Loa blong yumi, blong yumi putum mane ya i go wetem mane blong haos blong God, from we mane ya i gat blad blong man i stap long hem.” (Matyu 27:​3-6) I klia se, ol jif pris oli wari long mane ya blong Judas se naoia i doti. (Skelem wetem Dutronome 23:18.) !Be, semfala grup blong ol man ya oli no ting se oli mekem i rong taem oli spenem mane blong pem narafala blong i letem Pikinini blong God i go long han blong olgeta!

Mekem Tingting Blong Yumi i Laenap Wetem Tingting Blong God

Ol eksampel we yumi tokbaot antap, oli soemaot se blong trenem tingting ya we i stap jajem yumi, i no naf blong jes fulumap tingting wetem wan lis blong plante loa. I tru se, i impoten blong savegud ol loa blong God, mo blong folem olgeta sipos yumi wantem kasem laef. (Ol Sam 19:​7-​11) Be, antap long fasin ya, yumi mas mekem hat blong yumi i laenap wetem tingting blong God. Nao bambae profet tok we Jeova i talem tru long Aesea, i kamtru long laef blong yumi, i se: ‘Ae blong yufala bambae i luk Bigfala Man blong tijim yufala. Sipos yufala i lusum rod, we yufala i gowe long hem long saed i go long lef no long saed i go long raet, be bambae yufala i save harem voes blong hem biaen long yufala, we hem i stap stanap long baksaed blong yufala, i talem se: ‘Hemia rod ya. Yufala i folem.’​—Aesea 30:20, 21; 48:17.

I tru, samting ya i no minim se taem i gat wan bigfala disisen blong mekem, bambae yumi harem wan voes i talem long yumi wanem we yumi mas mekem. No gat. Be, taem tingting blong yumi i laenap wetem tingting blong God long sam samting, tingting ya we i stap jajem yumi bambae i nafgud blong halpem yumi blong mekem disisen we God i glad long hem.​—Proveb 27:11.

Tingbaot Josef, we i laef long ol yia 1700 B.K.T. Taem woman blong Potifa i traem pulum hem blong slip wetem hem, Josef i no agri. Hem i talem se: ‘?Weswe mi save sin agensem God long fasin ya we i nogud tumas?’ (Jenesis 39:9) Long taem blong Josef, oli no raetemdaon yet ol loa blong God we oli agensem fasin ya blong slip wetem hasban no waef blong narafala. Mo tu, Josef i laef long Ijip, we i longwe long rul blong famle blong hem mo ol rul blong ol bubu blong hem. Taswe, ?wanem i halpem Josef blong faet agensem traem ya? Blong talem stret, hemia tingting ya we i stap jajem hem, we hem i bin trenemgud. Josef i kasem save long tingting blong God, se wan hasban mo wan waef, tufala i olsem “wan bodi nomo.” (Jenesis 2:​24) Hem i kasem save se i rong blong tekem waef blong narafala man. Tingting blong Josef i laenap wetem tingting blong God long bisnes ya. Fasin blong slip wetem woman blong narafala man i go agensem stret tingting we hem i gat.

Tede, i no plante man we oli olsem Josef. Rabis fasin long saed blong seks i kam antap bigwan. Mo plante man, oli no filim nating se oli mas holem fasin klin blong mekem i gud long God, long olgeta bakegen, mo long hasban no waef blong olgeta. Fasin blong ol man ya i sem mak long wanem we Jeremaea i tokbaot se: “I no gat wan long yufala we i save tingting se from wanem hem i stap mekem ol samting nogud. Mo i no gat wan long yufala nating, we i tanem tingting blong hem, from ol samting nogud ya we hem i stap mekem. Oltaem nomo, yufala evriwan i stap gohed blong mekem ol rabis fasin. Yufala i olsem hos, we i spid i go long faet.” (Jeremaea 8:6) Taswe naoia yumi nidim blong mekem tingting blong yumi i laenap moa wetem tingting blong God, i bitim ol taem bifo. I gat wan nambawan samting blong halpem yumi blong mekem olsem.

Wan Help Blong Trenem Tingting We i Stap Jajem Yumi

Olgeta tok blong God long Baebol, oli “stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.” (2 Timote 3:​16, 17) Fasin blong stadi long Baebol bambae i halpem yumi blong trenem paoa ya we Baebol i talem se i mekem yumi “naf blong jusumaot wanem fasin i gud mo wanem fasin i nogud.” (Hibrus 5:​14) Hem i save givhan long yumi blong laekem ol samting we God i laekem, mo blong no laekem nating ol samting we hem i no laekem.​—Ol Sam 97:10; 139:21.

Taswe, taem yumi stadi Baebol, mak blong yumi i blong kasem bigfala tingting mo mining blong trutok, be i no jes blong luk ol wanwan haf blong save ya nomo. Wajtaoa blong Septemba 1, 1976, i talem se: “Taem yumi stadi long Baebol, yumi mas traehad blong kasem save long bigfala tingting biaen long fasin blong God blong jajem man, wetem lav mo stretfasin blong hem tu. Yumi mas putum ol fasin ya oli stap dip insaed long hat blong yumi, blong oli kam wan impoten samting long laef blong yumi, olsem fasin blong kakae mo blong pulum win. Yumi mas traem wekemap tingting blong yumi blong i haremsave se i wok blong yumi wanwan blong mekem ol gudfala fasin. Blong mekem olsem, yumi mas savegud wanem i stret mo wanem i no stret. Antap long samting ya, yumi mas mekem tingting ya we i stap jajem yumi, i gat strong filing long saed blong wok we hem i mekem long fored blong Man ya we i Givim Loa mo Jaj ya we i stretgud olgeta. (Aes. 33:22) Taswe, taem yumi stap lanem moa long saed blong God, yumi mas traem folem eksampel blong hem long ful laef blong yumi.”

Kasem “Tingting Blong Kraes”

Fasin blong stadi long Baebol bambae i halpem yumi blong kasem “tingting blong Kraes” tu. Hemia i min se tingting blong yumi i kam olsem tingting blong Jisas, we hem i rere blong obei mo i gat tingting daon. (1 Korin 2:​16) Jisas i glad blong mekem wok blong Papa blong hem. Hem i no mekem wok ya olsem wan mesin, we i girap evri dei blong mekem wok, be i no yusum tingting blong hem nating. No gat. Tru long wan profet tok, man ya blong raetem Ol Sam, Deved, i tokbaot tingting blong Jisas, se: “Mi mi wantem tumas blong mekem ol samting we yu yu wantem. Oltaem mi mi holem tok blong yu long tingting blong mi.”a​—Ol Sam 40:8.

Blong trenem tingting ya we i stap jajem yumi, i impoten tumas blong kasem “tingting blong Kraes.” Taem Jisas i laef long wol ya, olsem wan man we i stretgud olgeta, hem i soemaot ol fasin blong Papa blong hem fulwan, go kasem mak we wan man long wol ya i naf blong kasem. Taswe, hem i save talem se: “Man we i luk mi, hem i luk Papa blong mi.” (Jon 14:9) Long olgeta samting we Jisas i fesem long wol ya, hem i mekem stret olsem we Papa blong hem i wantem hem blong mekem. Taswe, taem yumi stadi long laef blong Jisas, i olsem we yumi stap luk klia pija blong Jeova God se hem i olsem wanem.

Yumi ridim se Jeova i gat ‘sore long man, i stap givhan long olgeta wetem gladhat blong hem, i no save kros kwik mo i laekem tumas ol man.’ (Eksodas 34:6) Plante taem, Jisas i soemaot ol fasin ya taem hem i stap wok wetem ol disaepol blong hem. Taem oli stap raorao from kwestin ya se hu long olgeta i hae moa, Jisas i gat longfala tingting blong tijim olgeta tru long toktok mo fasin blong hem. Hem i talem se: ‘Sipos wan long yufala i wantem kam haeman blong yufala, hem i mas kam olsem man blong wok blong yufala, mo sipos wan long yufala i wantem kam bos blong yufala, hem i mas kam olsem slef nomo blong yufala.’ (Matyu 20:26, 27) Hemia wan nomo long ol eksampel we i soem se yumi save mekem tingting blong yumi i laenap wetem tingting blong God sipos yumi lukluk moa long laef blong Jisas.

Moa we yumi save Jisas, moa we bambae yumi kam naf blong folem fasin blong Papa blong yumi long heven, Jeova. (Efesas 5:​1, 2) Sipos tingting we i stap jajem yumi, i laenap wetem tingting blong God, bambae hem i lidim yumi long stret rod. Jeova i promes long ol man we oli trastem hem, se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.”​—Ol Sam 32:8.

Kasem Blesing From Tingting We Yumi Trenemgud

From we Moses i savegud stronghed fasin blong ol sinman, hem i givim woning long ol man Isrel se: “Yufala i mas lukaot gud blong obei long olgeta loa ya we mi mi givim long yufala tede. Oltaem yufala i mas tijim ol loa ya long ol pikinini blong yufala, blong [hat] blong olgeta i save stap strong blong obei long olgeta tok ya blong Hae God.” (Dutronome 32:46) Yumi tu, yumi mas raetem loa blong God long hat blong yumi. Sipos yumi mekem olsem, tingting ya we i stap jajem yumi bambae i naf blong lidim yumi, mo halpem yumi blong mekem ol disisen we oli stret.

Be, yumi mas lukaotgud tu. Wan proveb long Baebol i talem se: “I gat rod i stap we man i ting se i stret gud, be hem i rod blong ded nomo.” (Proveb 14:12) ?From wanem plante taem samting ya i hapen? From we, Baebol i talem se: ‘?Hu man i save savegud hat blong man? Oltaem nomo, hat blong man i stap gyaman long hem bakegen. I no gat narafala samting we i save gyaman olsem, i nogud we i nogud olgeta.’ (Jeremaea 17:9) Taswe, yumi evriwan i mas folem advaes blong Proveb 3:​5, 6 we i talem se: ‘I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta hat blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.’

[Futnot]

[Tok Blong Pija Long Pej 7]

Olsem wan kampas, tingting we Baebol i trenem i save soemaot stret rod long yumi

[Credit Line]

Compass: Courtesy, Peabody Essex Museum, Salem, Mass.