Wajtaoa LAEBRI LONG INTENET
Wajtaoa
LAEBRI LONG INTENET
Bislama
  • BAEBOL
  • OL BUK
  • OL MITING
  • w98 9/1 pp. 30-31
  • Pol i No Fraet Blong Givim Wetnes Long Fored Blong Ol Haeman

I no gat video yet long haf ya.

Sori, i gat problem taem i stap lodem video ya.

  • Pol i No Fraet Blong Givim Wetnes Long Fored Blong Ol Haeman
  • Wajtaoa—1998
  • Ol Sabtaetol
  • Sem Samting
  • Pol i No Fraet Blong Givim Ansa Blong Hem
  • Samting We Yumi Lanem
  • Halpem Ol Narafala Blong Oli Bilif Long Tok Blong Kingdom
    Wajtaoa—2003
  • Yumi Mas No Fraet Blong Talemaot Kingdom Blong Jeova
    Wajtaoa—1991
  • ?Olsem Wanem Long Ol Spesel Nem We Oli Soem Ona?
    Wekap!—2008
  • ‘Mi Wantem Go Talemaot Bisnes Ya Long Sisa’
    Wajtaoa—2001
Luk Moa Samting
Wajtaoa—1998
w98 9/1 pp. 30-31

Oli Mekem Samting We Jeova i Wantem

Pol i No Fraet Blong Givim Wetnes Long Fored Blong Ol Haeman

TUFALA man ya oli defren olgeta, i no gat wan samting we i save mekem se oli defren moa. Wan i werem hat blong king, be ol jen oli fasem narawan. Wan i king, be narawan i wan presina. Pol i bin stap tu yia long kalabus, mo naoia hem i stanap long fored blong rula blong ol man Jyu, Herod Agripa 2. King ya mo waef blong hem, Benis, oli kam “wetem ol naesfala flas klos blong tufala mo oli go long rum ya we oli stap mekem kot long hem. Mo ol nambawan kapten blong ol soldia, mo ol haeman blong taon oli stap tu.” (Ol Wok 25:​23, NW) Wan buk i talem se: “Ating i gat plante plante handred man oli stap.”

Nyufala hedgavman ya, Festas, i singaotem ol man oli kam long miting ya. Feliks, hedgavman we i stap bifo Festas, i bin letem Pol i stap wet nomo long kalabus. Be Festas i wantem save sipos i rili stret we Pol i stap long kalabus. !Yes, from we Pol i wantem tumas blong pruvum se hem i no gat fol, hem i askem blong go talemaot bisnes blong hem long fes blong Sisa! Store ya i mekem se King Agripa i intres long Pol. Hem i talem se: “Mi tu mi wantem harem tok blong man ya.” Ale, kwiktaem nomo Feliks i mekemrere miting ya, from we hem i wantem save se king bambae i tingting wanem long saed blong spesel presina ya.​—Ol Wok 24:⁠27–​25:22.

Long nekis dei, Pol i stap long fored blong wan bigfala hif blong haeman. Hem i talem long Agripa se: ‘Mi harem se mi glad tumas tede, from we yu yu stap, nao mi mi gat jans blong talemaot ansa blong mi long fes blong yu. Tok ya i tru tumas, from we yu yu savegud ol kastom mo fasin blong yumi ol laen blong Isrel. From samting ya, mi askem long yu blong yu letem tingting blong yu i longfala, blong harem olgeta tok blong mi.’​—Ol Wok 26:​2, 3.

Pol i No Fraet Blong Givim Ansa Blong Hem

Faswan samting, Pol i talem long Agripa olsem wanem we fastaem hem i wan man blong ronem mo kilim ol Kristin. Hem i talem se: “Mi stap traem tanem tingting blong olgeta, blong mekem olgeta oli tok nogud long Jisas. Mi stap ronem olgeta oltaem, gogo oli go stap long ol narafala taon longwe, be mi mi biaen long olgeta yet.” Pol i gohed, i talem olsem wanem hem i kasem wan nambawan vison blong Jisas we i laef bakegen, we i askem long hem se: “?Weswe yu yu stap mekem i nogud long mi olsem? Fasin ya blong gohed blong kikbak long stik we i sap, i stap spolem yu nomo.”a​—Ol Wok 26:​4-​14, NW.

Ale Jisas i givim oda long Sol blong talemaot long ol man blong olgeta nesen “ol samting ya we yu luk long mi tede, mo ol samting we bambae mi soemaot long yu.” Pol i storebaot se hem i traehad tumas blong mekem wok ya we hem i kasem. Be, olsem hem i talem long Agripa, “from wok ya nao, taem mi mi stap long haos blong God long Jerusalem, ol laen blong Isrel ya oli girap, oli holem mi, mo oli stap traem blong kilim mi mi ded.” Pol i save se Agripa i intres long skul blong ol man Jyu. Taswe hem i soemaot gud se tok we hem i stap talem, “i sem tok nomo we ol profet mo Moses tu oli talemaot fastaem, se bambae i olsem,” hemia se Mesaea i mas ded, mo i mas laef bakegen.​—Ol Wok 26:15-​23.

Festas i blokem tok blong Pol. Hem i singaot se: “Yu stap lukluk insaed long bisnes ya tumas. !Naoia, hed blong yu i krangke finis!” Pol i ansa se: “Masta. Yu yu haeman blong mi, be mi mi no krangke. Ol tok ya we mi mi stap talem oli stret nomo, mo oli tru.” Ale Pol i tokbaot Agripa se: “Mi mi save toktok stret long King Agripa, we mi no gat sem from we mi save we hem i save ol samting ya finis. Mi savegud we hem i no mestem wan long ol samting ya, from we i tru, bisnes ya i no wan samting we i kamtru long wan kona nomo.”​—Ol Wok 26:24-​26.

Ale, Pol i toktok stret long Agripa, hem i talem se: “King Agripa. ?Olsem wanem? ?Yu yu bilif long ol tok blong ol profet?” I sua se kwestin ya i mekem Agripa i harem nogud lelebet. I tru, hem i mas lukaot long gudnem blong hem, be sipos hem i agri wetem Pol, bambae i olsem se hem i agri wetem fasin ya we Festas i kolem “krangke fasin.” Ating Pol i luksave se Agripa i no wantem ansa, taswe hem i ansarem kwestin blong hem, i se: “Mi mi savegud we yu bilif long olgeta.” Naoia, Agripa i toktok, be hem i lukaotgud blong talem sam tok we oli no spolem hem wan. Hem i talem long Pol se: “?Yu yu ting se long smoltaem ya nomo, bambae yu pulum mi mi kam Kristin man?”​—Ol Wok 26:27, 28.

Tok ya blong Agripa i no ansa long kwestin blong Pol, be Pol i yusum tok ya blong makem wan impoten poen. Hem i talem se: “Maet smoltaem nomo no i longtaem, be mi mi prea long God, i no from yu nomo, be from yufala evriwan ya we yufala i stap lesin long ol tok ya blong mi tede. Mi mi wantem tumas blong bambae yufala evriwan i kam Kristin olsem mi. Jen ya nomo we oli fasem mi long hem, mi no wantem blong oli fasem yufala long hem.”​—Ol Wok 26:29.

Agripa mo Festas oli no faenem wan samting long Pol we i stret blong hem i ded no i stap kalabus from. Be from we Pol i askem finis blong talemaot bisnes blong hem long fored blong Sisa, oli no save stopem kot ya. Hemia from wanem Agripa i talem long Festas se: “Sipos man ya i no talem se i wantem tekem bisnes ya blong hem i go long Sisa, blong hem i jajem, bambae i isi nomo blong yumi letem hem i gofri.”​—Ol Wok 26:30-​32.

Samting We Yumi Lanem

Fasin blong Pol blong givim wetnes long fored blong ol haeman i soem wan nambawan eksampel long yumi. Taem Pol i toktok long King Agripa, hem i yusum fasin waes. I sua se hem i harem finis nogud store ya we olgeta man oli save long saed blong Agripa mo Benis. Tufala i mekem nogud fasin ya blong slip wetem wan memba blong prapa famle blong olgeta, from we Benis hem i sista blong Agripa. Be long taem ya, Pol i jusum blong no tokbaot nogud fasin blong tufala ya long saed blong seks. Defren olgeta, hem i leftemap ol samting we hem mo Agripa oli agri long hem. Antap moa, nating se Pol i bin kasem tijing from wan Farisi we i gat hae save, nem blong hem Gameliel, be hem i agri se Agripa tu i wan man we i save gud ol kastom blong ol man Jyu. (Ol Wok 22:3) Nating se Agripa i gat sam nogud fasin blong laef, Pol i toktok long hem wetem respek from we Agripa i gat wan hae posisen mo paoa.​—Rom 13:7.

Taem yumi no fraet blong tokbaot ol bilif blong yumi, i nogud yumi gat mak ya se yumi wantem soemaot klia, no jajem ol rabis fasin blong olgeta we oli stap lesin long yumi. I moagud sipos yumi tokbaot ol nambawan samting long saed blong gud nyus, mo yumi soemaot hop we yumi evriwan i gat, ale bambae i moa isi long ol man blong akseptem trutok. Taem yumi toktok long sam olfala no long sam haeman, yumi mas soem respek long posisen blong olgeta. (Levitikas 19:32) Long rod ya, yumi save folem eksampel blong Pol, we i talem se: “Long fes blong ol man we oli gat ol defdefren kaen fasin, be mi mekem olsem we mi tu mi gat sem fasin we olgeta oli gat, blong yusum olgeta rod blong sevem sam long olgeta.”​—1 Korin 9:​22.

[Futnot]

a Tok ya “kikbak long stik we i sap” i tokbaot fasin blong wan buluk we i kasem kil taem hem i kikim sap stik we man i yusum blong lidim hem. Long sem fasin, taem Pol i ronem ol Kristin, hem i stap spolem hem wan nomo, from we hem i agensem wan nesen we God i sapotem.

    Ol buk long Bislama (1987-2026)
    Logaot
    Login
    • Bislama
    • Serem
    • Setemap Olsem Yu Wantem
    • Copyright © 2025 Watch Tower Bible and Tract Society of Pennsylvania
    • Ol Rul
    • Privacy Policy
    • Privacy Settings
    • JW.ORG
    • Login
    Serem