Yumi Evriwan i Mas Talemaot Olgeta Fasin Blong Yumi Long God
“Bambae yumi evriwan i mas talemaot olgeta fasin blong yumi long fes blong God.”—ROM 14:12.
1. ?Fasin fri blong Adam mo Iv i kasem wanem mak?
JEOVA GOD i wokem faswan papa mama blong yumi, Adam mo Iv, we oli fri blong jusum samting we oli wantem. Nating se oli daon moa long ol enjel, be oli gat wan gudfala bren mo oli naf blong mekem ol waes disisen. (Ol Sam 8:4, 5) Be, fasin fri ya we God i givim long tufala i no minim se oli gat raet blong makemaot samting we i stret mo samting we i no stret folem prapa tingting blong olgeta. Oli mas talemaot olgeta fasin blong olgeta long Man ya we i Wokem Olgeta, mo olgeta pikinini blong tufala oli mas mekem samting ya tu.
2. ?I no longtaem bambae Jeova i askem hu blong talemaot olgeta fasin blong olgeta long hem, mo from wanem?
2 Naoia we yumi stap kam kolosap long taem we rabis wol ya bambae i lus, Jeova bambae i askem olgeta man blong wol blong talemaot ol fasin blong olgeta long hem. (Skelem wetem Rom 9:28.) I no longtaem, ol man we oli no obei long God bambae oli mas talemaot long Jeova God from wanem oli spolem wol ya, oli spolem laef blong plante man, mo antap moa, from wanem oli ronem mo mekem trabol long ol man blong hem.—Revelesen 6:10; 11:18.
3. ?Wanem ol kwestin we bambae yumi tingbaot?
3 From we yumi stap go from taem ya we i nogud, i impoten we yumi tingtinggud long ol stret fasin we Jeova i mekem long ol man long taem bifo. ?Olsem wanem Baebol i save halpem yumi wanwan, blong yumi save talemaot ol gudfala samting nomo long fes blong Man ya we i Wokem yumi? ?Wanem ol eksampel we oli save givhan long yumi, mo wanem ol eksampel we yumi no mas folem?
Ol Enjel Oli Mas Talemaot Ol Fasin Blong Olgeta Long God
4. ?Olsem wanem yumi save se ol enjel tu oli mas talemaot long God ol samting we oli mekem?
4 Ol enjel blong Jeova long heven tu, oli mas talemaot ol fasin blong olgeta long God, olsem yumi. Bifo we Bigfala Wora i ron long taem blong Noa, i gat sam enjel we oli no obei long God. Oli karem bodi olsem man blong mekem nogud fasin long saed blong seks wetem ol woman. Ol speret man ya oli fri blong mekem prapa disisen blong olgeta, be oli mas talemaot long God from wanem oli mekem samting we oli mekem. Taem ol stronghed enjel ya oli gobak long ples blong ol speret man, Jeova i no letem olgeta blong kasem bakegen haenem we Hem i givim long olgeta fastaem. Disaepol Jud i talem se: “God i fasem olgeta long jen we i no save brok samtaem, mo i lokem olgeta long ples blong tudak. Nao oli stap wet long bigfala Dei ya we God bambae i jajem olgeta.”—Jud 6.
5. ?Wanem samting i daonem Setan mo ol rabis enjel blong hem, mo olsem wanem bambae God i stretem kaon we oli gat from fasin rebel we oli mekem?
5 Ol stronghed enjel ya, no ol rabis speret, oli stap aninit long rula blong olgeta, Devel Setan. (Matyu 12:24-26) Rabis enjel ya i rebel agensem Man we i Wokem Hem, mo i traem soem se rul blong Jeova i no stret. Setan i lidim faswan papa mama blong yumi blong mekem sin, mo from samting ya, biaen oli ded. (Jenesis 3:1-7, 17-19) Afta long samting ya, Jeova i letem Setan blong smoltaem blong kam insaed long ples blong hem long heven. Nating se i olsem, buk blong Baebol, Revelesen, i talem se long stret taem blong God, oli sakemaot rabis enjel ya long heven i kamdaon long wol ya. Ol pruf oli soemaot se samting ya i kamaot smoltaem afta we Jisas Kraes i kam king blong Kingdom long 1914. Long taem we i stap kam, Devel Setan mo ol rabis enjel blong hem bambae oli go lus blong olwe. Taem God i stretem bisnes ya long saed blong hae rul blong hem, bambae i olsem we hem i stretem kaon we oli gat from fasin rebel we oli bin mekem.—Job 1:6-12; 2:1-7; Revelesen 12:7-9; 20:10.
Pikinini Blong God i Talemaot Ol Fasin Blong Hem Long God
6. ?Jisas i tingting olsem wanem long saed blong fasin ya we hem i mas talemaot ol wok blong hem long Papa blong hem?
6 !Pikinini blong God, Jisas Kraes, hem i soemaot wan nambawan eksampel! Jisas, we hem i stretgud olgeta olsem Adam, hem i glad tumas blong mekem samting we God i wantem. Hem i glad tu blong talemaot long fes blong God fasin blong hem blong folem loa blong Jeova. Man blong raetem Ol Sam i talem stret, taem hem i tokbaot Jisas long profet tok ya, se: “God blong mi, mi mi wantem tumas blong mekem ol samting we yu yu wantem. Oltaem mi mi holem tok blong yu long tingting blong mi.”—Ol Sam 40:8; Hibrus 10:6-9.
7. ?Taem Jisas i stap prea long naet bifo we hem i ded, from wanem i stret nomo we hem i talem ol tok blong Jon 17:4, 5?
7 Nating se ol man oli mekem trabol mo agensem Jisas, hem i mekem samting we God i wantem, mo hem i stanap strong gogo kasem ded long wan pos. Long rod ya, hem i givim laef blong hem blong sevem olgeta man oli aot long ded we i kamaot from sin blong Adam. (Matyu 20:28) Taswe, long naet bifo we Jisas i ded, hem i prea wetem strong tingting se: “Mi mi leftemap nem blong yu long wol ya, mo mi finisim ol wok ya we yu givim long mi blong mi mekem. Papa, naoia i taem blong yu yu leftemap nem blong mi, yu givim hae nem long mi, olsem we mi gat fastaem, taem we wol i no stap yet, nao mi mi stap wetem yu long gudfala laef blong heven.” (Jon 17:4, 5) Jisas i save talem ol tok olsem long Papa blong hem long heven, from we hem i winim ol samting we oli traem hem. Hem i save talemaot ol gudfala fasin blong hem long God, mo God i agri long hem.
8. (a) ?Olsem wanem Pol i soem se yumi wanwan i mas talemaot long Jeova God olgeta fasin we yumi mekem? (b) ?Wanem samting bambae i halpem yumi blong mekem se God i agri long yumi?
8 Yumi defren olgeta long Jisas Kraes, from we yumi sinman, be hem i stretgud olgeta. Nating se i olsem, yumi mas talemaot olgeta fasin blong yumi long God tu. Aposol Pol i talem se: “From samting ya, yufala i no gat raet blong jajem ol brata blong yufala, mo yufala i no gat raet tu blong lukluknogud long olgeta. Bambae yumi evriwan i mas stanap long fes blong God, blong bambae hem i jajem yumi. From we Baebol i talem we Hae God i talem se ‘Tok ya i tru olsem we mi mi laef, se bambae olgeta man oli mas foldaon long mi blong ona long mi, bambae olgeta man oli mas talemaot we mi mi God.’ Hemia i min se bambae yumi evriwan i mas talemaot olgeta fasin blong yumi long fes blong God.” (Rom 14:10-12) Blong mekem se yumi save talemaot ol gudfala fasin we Jeova i agri long olgeta, hem i givim wan tingting long yumi we i save jajem yumi, mo hem i givim Tok blong hem, Baebol tu, blong lidim yumi long ol samting we yumi talem mo mekem. (Rom 2:14, 15; 2 Timote 3:16, 17) Taem yumi yusumgud olgeta samting ya long saed blong speret we Jeova i givim long yumi, mo lesin long tingting we i jajem yumi mo we yumi trenem folem ol tok blong Baebol, samting ya bambae i halpem yumi blong kam olsem we God i save agri long yumi. (Matyu 24:45-47) Tabu speret blong Jeova, no paoa blong hem we i stap wok, hem i wan narafala samting we i stap mekem yumi strong mo we i stap lidim yumi. Sipos yumi wok folem rod we speret i lidim yumi long hem, mo lesin long tingting we i jajem yumi we i stanap long Baebol, yumi stap soem se yumi no ‘tanem baksaed long God,’ Hemia we yumi mas talemaot olgeta fasin blong yumi long hem.—1 Tesalonaeka 4:3-8; 1 Pita 3:16, 21.
Ol Nesen Oli Mas Talemaot Ol Fasin Blong Olgeta Long God
9. ?Hu ya ol man Edom, mo wanem i hapen long olgeta from ol nogud fasin we oli mekem long Isrel?
9 Olgeta nesen oli mas talemaot long Jeova, ol samting we oli bin mekem. (Jeremaea 25:12-14; Sefanaea 3:6, 7) Tingbaot kingdom blong Edom bifo, we i stap long saot blong Ded Si mo not blong Galf blong Akaba. Ol man Edom oli kamaot long laen blong Sem, mo oli famle wetem ol man Isrel. Olfala papa blong ol man Edom hem i Esao, smol bubu blong Ebraham. Nating se i olsem, ol man Edom oli no letem ol man Isrel oli pastru long kantri blong Edom, long “rod blong king,” taem oli stap go long Promes Lan. (Namba 20:14-21) Long ol handred yia we oli kam biaen, fasin agens blong ol man Edom i kam nogud olgeta, gogo oli no gat sore nating mo oli no laekem nating ol man Isrel. Biaen, ol man Edom oli mas talemaot long fes blong God from wanem oli pusum ol man Babilon blong spolem Jerusalem long 607 B.K.T.a (Ol Sam 137:7) Long ol yia 500 B.K.T., ol ami blong Babilon we King Nabonidas i lidim olgeta, oli winim Edom, mo hem i kam olsem wan draeples, olsem Jeova i bin talemaot.—Jeremaea 49:20; Obadaea 9-11.
10. ?Ol man Moab oli mekem wanem long ol man Isrel, mo God i mekem wanem long Moab from ol fasin we hem i talemaot long fes blong God?
10 Moab tu i kasem semkaen trabol. Kingdom blong ol man Moab i stap long not blong Edom mo long is blong Ded Si. Bifo we ol man Isrel oli go insaed long Promes Lan, ol man Moab oli no soem kaengud fasin long olgeta. Oli givim bred mo wora long ol man Isrel from wan samting nomo, hemia blong kasem mane. (Dutronome 23:3, 4) King blong Moab, Balak, i pem profet Balam blong tok nogud long ol man Isrel. Mo oli yusum ol woman Moab blong pulum ol man Isrel blong mekem nogud fasin long saed blong seks, mo blong wosip long ol gyaman god. (Namba 22:2-8; 25:1-9) Jeova i no fogetem ol fasin ya blong Moab blong no laekem nating Isrel. Olsem profet tok i talem, Moab i kam olsem draeples taem ol man Babilon oli spolem hem. (Jeremaea 9:25, 26; Sefanaea 2:8-11) Yes, God i askem Moab blong talemaot from wanem hem i bin mekem ol fasin we hem i mekem.
11. ?Moab mo Amon oli kam sem mak long wanem tufala taon, mo ol profet tok blong Baebol oli soemaot wanem long saed blong rabis wol blong naoia?
11 I no Moab nomo be Amon tu, we God i askem hem blong talemaot from wanem hem i mekem ol fasin blong hem. Jeova i bin talem se: “Bambae Moab i kam olsem Sodom, mo ol pikinini blong Amon bambae oli kam olsem Gomora. Bambae oli kam olsem wan ples we i fulap long ol grasnil, wan hol we i fulap long sol, mo olsem wan draeples, yes, blong olwe.” (Sefanaea 2:9) Kantri blong Moab mo Amon oli kam nogud olgeta, long sem fasin we God i bin spolem tufala taon ya Sodom mo Gomora. Folem tok blong Jiolojikal Sosaeti blong London, sam man blong stadi oli talem se oli bin faenem stret ples we tufala taon ya Sodom mo Gomora oli bin stap long hem, long is saed blong Ded Si. Enikaen pruf we maet oli faenem yet long saed ya, bambae i sapotem moa ol profet tok blong Baebol se, rabis wol blong naoia tu i mas talemaot long fes blong God from wanem hem i mekem ol rabis fasin blong hem.—2 Pita 3:6-12.
12. Nating se ol man Isrel oli mas kasem panis from ol sin we oli talemaot long fes blong God, ?profet tok i talem wanem long saed blong wan smol grup blong ol man Jyu?
12 Nating se Jeova i bin mekem plante gudfala samting long ol man Isrel, be oli mas talemaot long Hem from wanem oli mekem ol sin blong olgeta. Taem Jisas Kraes i kamtru long nesen blong Isrel, bighaf blong ol man ya oli no wantem hem. Wan smol grup blong man nomo oli bilif long hem mo oli kam ol man blong hem. Pol i tokbaot sam profet tok we oli stret long smol grup ya blong ol man Jyu, taem hem i raetem se: “Profet Aesea, hem i tokbaot ol man Isrel i se ‘Sipos ol man Isrel oli plante tumas olsem ol sanbij kolosap long solwora, be bambae Hae God i sevem smol haf nomo blong olgeta. From we hem bambae i no tektaem, bambae hem i givim panis long olgeta man long wol, we i fulmak blong hem.’ Hemia i olsem tok we Aesea i talemaot fastaem, taem we ol samting ya oli no kamtru yet. Hem i talem se ‘Sipos Hae God ya we i gat olgeta paoa i no letem we sam laen blong yumi oli stap laef, bambae yumi kam olsem ol man Sodom, bambae yumi kam olsem ol man Gomora nomo.’ ” (Rom 9:27-29; Aesea 1:9; 10:22, 23) Aposol ya i tokbaot eksampel blong ol 7,000 man long taem blong Elaeja we oli no bin bodaon long Bal, ale, hem i talem se: “Long taem ya nao, i gat sem fasin nomo i stap. I gat smol kampani i stap, we God i jusumaot olgeta finis, long gladhat blong hem.” (Rom 11:5) Olgeta man wanwan long smol kampani ya oli mas talemaot olgeta fasin blong olgeta long God.
Sam Man Wanwan We Oli Mas Talemaot Ol Fasin Blong Olgeta Long God
13. ?Wanem i hapen long Ken taem God i askem hem from wanem hem i kilim i ded brata blong hem Ebel?
13 Baebol i tokbaot plante man we olgeta wanwan oli mas talem long Jeova God from wanem oli mekem ol fasin we oli mekem. Eksampel, tingbaot fasbon pikinini blong Adam, hemia Ken. Hem wetem brata blong hem, Ebel, tufala tugeta oli mekem sakrifaes i go long Jeova. God i glad long sakrifaes blong Ebel, be hem i no agri long sakrifaes blong Ken. Taem God i askem Ken from wanem hem i mekem raf fasin ya blong kilim brata blong hem i ded, Ken i ansa wetem strong fasin, se: “?Yu ting se mi mi stap lukaot long brata blong mi?” From sin blong Ken, God i sanem hem i go long ‘Ples we man i no save stap kwaet, long narasaed Iden i go, long saed ya we san i stap kam antap.’ Hem i no soemaot nating se hem i rili tanem tingting blong hem from sin we hem i mekem. Hem i harem nogud nomo from we hem i kasem panis we i stret long hem.—Jenesis 4:3-16.
14. ?Olsem wanem store blong hae pris Eli mo tufala boe blong hem, i soemaot se wanwan man i mas talemaot olgeta fasin blong olgeta long God?
14 Yumi luk olsem wanem ol wanwan man oli mas talemaot ol fasin blong olgeta long God tu, long eksampel blong hae pris blong Isrel, Eli. Josephus, man blong raetem histri, i tokbaot tufala pikinini blong Eli, Ofni mo Finehas, we oli mekem wok olsem pris. Hem i talem se “oli no mekem i stret long ol man, oli no soem respek long God, mo oli stap folem olkaen rabis fasin nomo.” Tufala man ya we oli “man nogud nomo” oli no tingbaot Jeova, oli mekem fasin we i no givim ona nating long God, mo oli mekem bigfala nogud fasin long saed blong seks. (1 Samuel 1:3; 2:12-17, 22-25) From we Eli hem i papa blong tufala mo hem i hae pris blong Isrel, hemia wok blong hem blong stretem tufala ya. Be hem i toktok smosmol nomo blong stretem tufala. Eli ‘i stap ona moa long tufala boe blong hem i bitim we hem i ona long Jeova.’ (1 Samuel 2:29) Panis i kasem famle blong Eli. Tufala boe ya blong hem oli ded long semfala dei we papa blong tufala i ded, mo biaen, laen blong olgeta we i laen blong ol pris, i finis olgeta. Long rod ya, oli pem kaon we oli gat from ol rabis fasin we oli talemaot long fes blong God.—1 Samuel 3:13, 14; 4:11, 17, 18.
15. ?From wanem pikinini blong King Sol, Jonatan, i kasem blesing?
15 Wan eksampel we i defren olgeta, hemia pikinini blong King Sol, Jonatan. Smoltaem afta we Deved i kilim i ded Golaeat, “laef blong Jonatan i joen fulwan wetem laef blong Deved,” mo tufala i mekem promes blong stap olsem gudfala fren olwe. (1 Samuel 18:1, 3) Ating Jonatan i luksave se speret blong God i lego Sol finis, be tingting blong hem long saed blong trufala wosip i stap strong gud. (1 Samuel 16:14) Respek we Jonatan i gat long haenem we God i givim long Deved, i neva kam slak. Jonatan i luksave se hem i mas talemaot olgeta fasin blong hem long God, mo Jeova i givim presen long hem from gudfala fasin we hem i folem. Taswe, God i mekem sua se laen blong Jonatan i gohed blong plante yia.—1 Kronikel 8:33-40.
Kristin Kongregesen i Mas Talemaot Olgeta Fasin Blong Hem Long God
16. ?Hu ya Taetas, mo from wanem yumi save talem se hem i talemaot ol gudfala fasin nomo long fes blong God?
16 Kristin Grik haf blong Baebol i toktokgud long saed blong plante man mo woman we oli talemaot ol gudfala fasin nomo long fes blong God. Eksampel, i gat Grik Kristin ya we nem blong hem Taetas. Sam man oli talem se hem i kam wan Kristin taem Pol i mekem faswan misinari trep blong hem i go long Saepras. Long Pentekos 33 K.T.,b maet i gat sam man Jyu mo sam narafala man we oli joen long skul blong ol man Jyu, we oli kamaot long aelan blong Saepras. Taswe, maet Kristin skul i kasem aelan ya smoltaem nomo biaen long Pentekos. (Ol Wok 11:19) Nating se i olsem wanem, Taetas i wan man we i rili wok strong wetem Pol. Hem i folem Pol mo Banabas long trep blong tufala long Jerusalem raonabaot 49 K.T., long taem ya we oli stretem kwestin long saed blong sakomsaes. From we Taetas i no sakomsaes, samting ya i givim moa paoa long tok blong Pol, taem hem i eksplenem se ol hiten man we oli kam Kristin oli no nid blong stap aninit long Loa blong Moses. (Galesia 2:1-3) Baebol i talem plante pruf se Taetas i mekem gudfala wok, mo tu, God i pulum Pol blong raetem wan leta i go long hem. (2 Korin 7:6; Taetas 1:1-4) I klia se go kasem en blong laef blong Taetas long wol ya, hem i gohed blong soemaot ol gudfala fasin long fes blong God.
17. ?Timote i talemaot wanem kaen fasin blong hem long God, mo eksampel ya i save mekem wanem long yumi?
17 Timote i wan narafala man we i wok strong mo we i save talemaot ol gudfala fasin long fes blong Jeova God. Nating se Timote i gat sam problem long saed blong helt, hem i soemaot ‘bilif we i no blong gyaman,’ mo ‘hem i wok strong wetem Pol long wok blong gud nyus blong Kraes.’ Taswe, aposol Pol i save talem long ol Kristin long Filipae, se: “I no gat narafala man long ples ya we i gat sem tingting we Timote i gat, we hem i stap tingbaot yufala tumas.” (2 Timote 1:5; Filipae 2:20, 22; 1 Timote 5:23) Taem yumi no strong long bodi no taem yumi kasem sam narafala traem bakegen, yumi save soemaot se bilif blong yumi i no blong gyaman, mo yumi save talemaot ol gudfala fasin long fes blong God we oli mekem se hem i agri long yumi.
18. ?Hu ya Lidia, mo hem i soemaot wanem fasin?
18 Lidia i wan woman we i obei long God oltaem, mo i klia se, hem i save talemaot ol gudfala fasin long fes blong God. Hem mo famle blong hem oli sam long ol faswan man long Yurop blong joen long Kristin skul. Samting ya i kamaot from wok we Pol i mekem long Filipae raonabaot long yia 50 K.T. Lidia we hem i blong Tuatira, ating hem i wan hiten woman we i joen long skul blong ol man Jyu. Be maet i no gat plante man Jyu long Filipae mo maet i no gat wan haos prea tu. Hem mo sam narafala woman we oli ona long God, oli stap miting kolosap long wan reva, taem Pol i storeyan long olgeta. From samting ya, Lidia i kam wan Kristin mo i askem long Pol mo ol fren blong hem blong kam stap long haos blong hem. (Ol Wok 16:12-15) Kaen fasin ya we Lidia i soem long olgeta, i stap yet olsem wan samting we i makemaot ol trufala Kristin.
19. ?Wanem ol gudfala wok blong Dokas we i mekem se hem i save talemaot ol gudfala fasin long God?
19 Dokas i wan narafala woman we i save talemaot ol gudfala fasin blong hem long Jeova God. Taem Dokas i ded, Pita i go long Jopa from we ol disaepol long ples ya oli askem hem blong kam. Tufala man we oli kam mitim Pita oli “tekem hem i go long rum ya antap. Nao olgeta wido oli kam, oli stanap raon long hem oli stap krae. Mo oli stap soem long Pita, ol klos we Dokas i somap taem hem i stap laef yet.” Nao Pita i mekem Dokas i laef bakegen. Be ?yumi mas rimemba hem from nambawan fasin ya nomo we hem i glad blong givim presen long narafala? No gat. Hem i wan ‘disaepol’ tu, we i joen long wok blong pulum ol narafala oli kam disaepol. Ol Kristin woman tede tu, oli mas ‘mekem ol gudfala wok, mo stap givhan long ol puaman.’ Mo oli glad blong joen bigwan long wok blong talemaot gud nyus blong Kingdom mo mekem ol disaepol.—Ol Wok 9:36-42; Matyu 24:14; 28:19, 20.
20. ?Wanem ol kwestin we yumi save askem long yumi wanwan?
20 Baebol i soemaot klia se ol nesen mo ol wanwan man oli mas talemaot olgeta fasin blong olgeta long Haefala Masta Jeova. (Sefanaea 1:7) Sipos yumi givim laef blong yumi finis long God, yumi save askem long yumi se, ‘?Wanem tingting blong mi long ol blesing mo wok we God i givim long mi? ?Mi mi stap talemaot wanem kaen fasin long Jeova God mo Jisas Kraes?’
[Ol futnot]
a B.K.T. i minim Bifo Kristin Taem.
b K.T. i minim Kristin Taem.
?Wanem Ol Ansa Blong Yu?
◻ ?Olsem wanem yu save pruvum se ol enjel mo Pikinini blong God tu, oli mas talemaot ol fasin blong olgeta long Jeova?
◻ ?Baebol i tokbaot wanem eksampel blong soemaot se ol nesen oli mas talemaot ol fasin blong olgeta long God?
◻ ?Baebol i talem wanem blong soem se ol wanwan man oli mas talemaot ol fasin blong olgeta long God?
◻ ?Hu ya sam man we Baebol i tokbaot se oli talemaot ol gudfala fasin long fes blong Jeova God?
[Tok blong pija long pej 10]
Jisas Kraes i save talemaot ol nambawan fasin long fes blong Papa blong hem long heven
[Tok blong pija long pej 15]
Olsem Dokas, ol Kristin woman tede, oli save talemaot ol gudfala fasin long fes blong Jeova God
[Foto Credit Line blong pija long pej 13]
The Death of Abel/The Dore Bible Illustrations/Dover Publications, Inc.