!Yu No Mas Fraet Blong Prij!
1 Taem yumi stap mekemrere blong go prij, samtaem i had blong girap mo aot long haos blong yumi. Maet ol filing we yumi no naf oli mekem se yumi fraet blong go talemaot trutok long “olgeta man.” (1 Tim. 2:4) Be, yumi no mas fraet blong talemaot gud nius. ?From wanem?
2 Hemia Mesej Blong Jeova: Long Baebol, Jeova i talemaot tok blong hem. Taem yumi karem tok ya i go long ol narafala, yumi stap talemaot tingting blong God, i no tingting blong yumi. (Rom. 10:13-15) Taem ol man oli no wantem harem gud nius blong Kingdom, i olsem se oli no wantem harem tok blong Jeova. Be, tingting blong yumi i no foldaon from. Yumi sua se gud nius ya bambae i kasem hat blong olgeta we oli harem nogud from ol samting we oli stap hapen long wol, mo we oli luksave nid blong olgeta long saed blong spirit.—Ezik. 9:4; Mat. 5:3, 6.
3 Jeova i Pulum Ol Man: Maet i gat sam man we fastaem oli no wantem lesin long yumi. Be biaen, ol samting long laef blong olgeta i jenis, mekem se hat blong olgeta i kam sofsof. Maet naoia Jeova i soemaot gladhat long ol man ya, mo ‘pulum olgeta oli kam.’ (Jon 6:44, 65) Taem samting ya i hapen, yumi mas rere blong letem Jeova i yusum yumi, mo letem ol enjel oli lidim yumi blong faenem ol man olsem.—Rev. 14:6.
4 God i Givim Tabu Spirit Long Yumi: Tabu spirit i mekem yumi naf blong toktok long fasin we yumi ‘no fraet, yumi gohed blong talemaot gud nius long paoa blong Jeova.’ (Wok 14:1-3, NW) Sipos yumi rimemba se Jeova, we i gat olgeta paoa, i sapotem minista wok blong yumi, bambae yumi no fraet blong talemaot trutok long ol man we oli stap raonabaot long yumi, ol man we oli wok wetem yumi, ol fren blong yumi long skul, ol famle blong yumi, olgeta we oli skul gud, mo ol rijman tu.
5 Jisas i Soemaot Rod: Jisas i bin yusum ol kwestin we oli pulum tingting blong man, ol pijatok we man i kasem save long olgeta, mo ol toktok we i stanap long Baebol. Hem i eksplenem trutok long fasin we i kamaot long hat blong hem, i klia, mo i pulum tingting blong man. Ol fasin ya oli beswan rod blong yusum tede tu. (1 Kor. 4:17) Maet laef blong ol man we yumi prij long olgeta i save jenis, be mesej blong Kingdom we i gat paoa i no save jenis.
6 I wan nambawan blesing, taem Jeova i yusum yumi blong givhan long ol man long spesel rod ya. !I gud we yumi no fraet blong prij! Holem strong tingting mo letem Jeova i ‘openem rod long yumi,’ blong yumi save talemaot gud nius long ol narafala.—Kol. 4:2-4.