?Yu Yu Stap Mekem Ol Samting We Yu Bin Lanem Long Distrik Asembli?
1 Eniman we i joen long distrik asembli blong yia ya, “Ol Man Blong Tijim Tok Blong God,” i save luk we ol man blong Jeova, oli gat strong tingting blong mekem wok blong tijim Tok blong God. (Mat. 28:19, 20) ?Taem yu stap gobak long ples blong yu, wanem ol poen we yu bin tingbaot blong folem long prapa laef blong yu mo long wok blong prij?
2 Tok Blong Baebol i Stretgud Blong Tijim Man: Stamba tok blong faswan dei i stanap long 2 Timoti 3:16. Bigfala tok blong dei ya i soem se sipos yumi wantem “Nafgud Blong Tijim Tok Blong God,” yumi mas tinghae long Baebol, respektem moa ol tok blong Baebol i bitim ol tingting mo kastom blong man, mo yusum oltaem. Mo tu, yumi mas prea evri dei from tabu spirit blong i givhan long yumi long wok blong prij mo blong yumi save wokem bigfala frut ya blong tabu spirit—lav. Mo yumi mas letem ogenaesesen blong Jeova long wol i trenem yumi long ol miting blong kongregesen, blong yumi save kam man blong prij.
3 Long Fraede, i gat wan tok we i gat tri haf blong hem, stamba tok blong hem se, “Tijim Yu Wan Mo Tijim Narafala Tu.” Tok ya i eksplenem se yumi mas (1) folem loa blong God long olgeta fasin blong laef, (2) holemtaet gudfala fasin blong stadi oltaem, mo (3) sakemaot ol tingting mo fasin long hat mo maen blong yumi we Setan i save yusum blong spolem yumi. Biaen, yumi lanem ol gudfala rod blong protektem famle blong yumi long wan rabis fasin blong wol ya, hemia ol doti buk mo video kaset long saed blong seks. Tok ya i pulum ol papa mama blong oli soemaot eksampol, taem oli no lukluk nating long eni haf blong film we i soem rabis fasin long saed blong seks, nating se haf ya i smol nomo. Mo tu, oli mas jekemgud ol samting we pikinini i stap lukluk long Intenet mo long televisin. ?Wanem sam poen long program blong Fraede we yu mekem i wok finis?
4 Laswan tok blong dei ya i mekem yumi strong moa blong laekem laet we i kamaot long Jeova, blong stap klosap long grup blong ol tabu man we oli holemstrong long God, mo blong givhan blong mekem pis i stap long medel blong ol man blong Jeova. ?Yu yu ridim finis niufala buk ya Isaiah’s Prophecy—Light for All Mankind II?
5 Oli Nafgud Blong Tijim Ol Narafala: Stamba vas blong namba tu dei hemia 2 Timoti 2:2. ?Long Sarede moning, taem yu stap lesin long tok ya we i gat tri haf blong hem, yu stap makem gud ol advaes we i soem olsem wanem blong (1) faenem man we hat blong hem i stret, (2) mekem intres blong olgeta i gru, mo (3) tijim olgeta blong folem ol tok blong Kraes? ?Yu yu stap folem ol samting we yu bin lanem—blong soemaot wan no moa vas blong Baebol long man blong haos mo blong putum fandesen blong visitim hem bakegen?
6 Program blong aftenun i soemaot se i impoten blong folem fasin blong Bigfala Tija ya, Jisas. ?Long wanem fasin yu yu stap traehad blong kam sem mak long hem? Long dei ya, yu lanem plante samting long namba tu tok we i gat tri haf blong hem. ?Olsem wanem yu save “Kasem Moa Frut From Tiokratik Edukesen”? ?Wanem advaes yu yu folem finis blong tingting dip moa taem yu mekem prapa stadi blong yu wan mo taem yu stap long miting blong kongregesen?
7 I klia se niufala buk ya Benefit From Theocratic Ministry School Education bambae i halpem yumi blong kam gud moa blong mekem ol tok long miting mo blong tijim ol narafala long Tok blong God. Bambae yumi lukluk moa long ol gudfala fasin blong toktok we ol man blong God long Baebol oli bin gat. Wanwan lesen blong niufala buk ya i gat ol bokis we oli soemaot long ol sot klia toktok nomo, wanem samting we yumi nidim blong mekem, from wanem yumi mas mekem olsem, mo olsem wanem yumi save mekem. I gat ol fasin blong lanem samting tu we yumi save folem. I gat 29 defren fasin blong mekem tok we ol sista oli save jusumaot wan long olgeta, taem oli givim tok. Biaen, bambae oli talemaot sam jenis long plan blong skul ya. ?Evri wik, yu yu stap stadi, mo reregud Tiokratik Skul, blong i save givhan long yu fulwan?
8 Naoia i Stret Taem Blong Tijim Ol Narafala: Hibrus 5:12 i mekem evriwan oli rere blong lesin long Sande. Long moning i gat wan tok we i gat tri haf blong hem, stamba tok blong hem, “Malakae i Rerem Yumi From Dei Blong Jeova.” Tok ya i pulum yumi blong givim bes blong yumi long God, mo blong agensem fulwan enikaen fasin blong no stap tru long God, sipos yumi wantem stap sef long bigfala dei blong Jeova we bambae i mekem man i fraet. Drama ya, “Respektem Hae Rul Blong Jeova” i soemaot klia olsem wanem fasin praod, fasin blong wantem kasem hae posisen no haenem, fasin jalus, mo fasin blong sapotem samting we i no stret, oli lidim Kora mo ol fren blong hem long taem bifo, blong rebel agens long Jeova stret. Tok we i kam biaen long drama ya i soemaot se ol wanwan memba blong famle mo kongregesen tede oli mas stap aninit long hae rul blong God. Pablik tok ya, “?Hu Ya i Stap Tijim Trutok Long Ol Nesen?,” i givim pruf se, ol Witnes blong Jeova nao oli stap mekem olsem, i no Krisendom, from se hem i stap talem nomo se i tijim ol man long trutok blong Baebol.
9 I klia we Jeova i stap trenem yumi blong kamgud moa long wok blong tijim ol narafala long Tok blong hem. Yumi mas folem samting we yumi lanem, ‘yumi mas lukaot gud long fasin blong yumi, mo long ol tok we yumi stap tijim ol man long hem. . . . Sipos yumi mekem olsem bambae yumi save sevem yumi, wetem ol man we oli stap lesin long yumi.’—1 Tim. 4:16.