?Yu Yu Rimemba?

?Yu faenem se ol Wajtaoa we oli jes kamaot i no longtaem oli bin givhan long yu? Ale traem luk sipos yu save ansa long ol kwestin ya:

◻ ?Wanem tufala kwestin we oli bin givhan long plante Kristin blong mekem prapa disisen blong olgeta long saed blong wok?

Fasfala kwestin i olsem: ?Wok ya, hem i wan kaen wok we Baebol i agensem? Seken kwestin i olsem: ?Taem yumi mekem wok ya, yumi stap sapotem wan fasin we Baebol i agensem?​—4/15, pej 28.

◻ ?Long wanem fasin ‘olgeta man we God i mekem, oli mas kam nating’? (Rom 8:​20)

God i jajem yumi finis, se yumi “mas kam nating” from we tufala faswan papa mama blong yumi Adam mo Iv, oli bin mekem nogud. Hemia “i no from we yumi wantem olsem,” hem i no risal blong wan jus we yumi mekem, no gat. Taem yumi bon, trabol ya i stap long yumi finis. Tufala faswan papa mama oli no moa save pasem wan laef we i stretgud i go long ol pikinini blong tufala. Tufala i save givim sin mo ded nomo long olgeta. Be God i gat sore long ol man, nao hem i letem tufala i gat pikinini. Taswe ol man oli stap ded mo long fasin ya, “God i jajem finis [olgeta man] se oli mas kam nating.”​—5/1, pej 5.

◻ ?From wanem i stret blong talem se bambae long fiuja, “rabis samting” i mas “stanap long wan tabu ples”? (Matiu 24:15)

Olsem long eksampel blong bifo, ‘rabis samting ya we i go stanap long wan tabu ples’ i laenap wetem ol man Rom taem oli go faet aninit long kapten blong olgeta, Sestias Galas, long yia 66 K.T. Samting ya i sem mak long “bigfala trabol” long taem blong yumi. Hem i no kam yet, bambae hem i kam long fiuja. (Matiu 24:21) Taswe “rabis samting ya we i spolem evri samting,” i no go stanap yet long wan tabu ples.​—5/1, pej 16, 17.

◻ ?Olsem wanem ol papa mama we oli wok, oli save faenem taem blong spenem wetem pikinini blong olgeta?

Wan mama we i mas wok mo i harem se i taed tumas long en blong dei, i save askem ol pikinini blong hem blong givhan blong rerem kakae. Wan papa we i gat plante wok blong mekem long Sarede mo Sande, i save askem ol pikinini blong hem blong givhan long hem.​—5/15, pej 6.

◻ ?Ol man we oli stap ‘wokbaot long rod blong Jeova’ oli mas mekem wanem? (Jeremaea 7:​23)

Yumi nidim fasin blong stap tru long Jeova oltaem, sipos yumi wantem wokbaot long rod blong hem. Yumi mas gat strong tingting blong mekem wosip long Jeova nomo. Yumi nidim fasin blong trastem hem mo bilif fulwan se ol promes blong hem oli no save jenis, bambae oli mas kamtru. Blong wokbaot long rod blong Jeova, yumi nidim fasin obei​—yumi mas folemgud ol loa mo ol hae rul blong hem. (Ol Sam 11:7)​—5/15, pej 14.

◻ ?Wanem fofala impoten wok we “ol man we oli olsem presen” oli mas mekem? (Efesas 4:8)

Oli mas stretem yumi long kaen fasin, bildimap yumi wetem lav, oli traehad oltaem blong mekem yumi joengud wetem kongregesen, mo oli no fraet blong protektem yumi. (Efesas 4:​12-​14)​—6/1, pej 14.

◻ ?Yumi lanem wanem long fasin joengud blong Pol wetem samwe wan handred man we hem i tokbaot olgeta long buk blong Ol Wok mo ol leta blong hem?

Yumi mas wok oltaem wetem ogenaesesen blong God, wetem kongregesen blong yumi, mo wetem ol Kristin brata sista blong yumi. Long ol gudfala taem mo long ol taem blong trabol, yumi nidim narafala blong halpem yumi, sapotem yumi, mo leftemap tingting blong yumi.​—6/1, pej 31.

◻ ?Wanem trifala poen we yu save yusum blong halpem ol man blong tingbaot Man ya we i Wokem olgeta samting?

Stret oda we olgeta samting long skae oli stap folem, stamba blong laef long wol ya, mo nambawan bren blong yumi we i naf blong mekem plante samting.​—6/15, pej 18.

◻ ?From wanem i impoten tumas blong save mining blong nem blong Man we i Wokem olgeta samting?

Nem blong God i minim “Hem i Mekem i Kamaot” mo i makemaot hem se, wanem we hem i talem, bambae hem i mekem. Taem yumi save nem blong God mo yumi yusum nem ya, bambae yumi luksave moa se hem i stap mekem olgeta promes mo stamba tingting blong hem oli kamtru.​—6/15, pej 21.

◻ ?Yu save mekem wanem blong ol pikinini oli joen long famle Baebol stadi?

I gud sipos ol wanwan pikinini oli gat prapa Baebol mo buk blong stadi blong olgeta. Maet hed blong famle i askem wan smol pikinini blong eksplenem pija we i joen wetem stadi. Mo tu, bifo long taem blong stadi, hem i save givim wan vas long wan pikinini blong ridim long taem blong stadi. Maet wan yangfala i save soem olsem wanem yumi save mekem ol samting we yumi lanem oli wok long laef blong yumi.​—7/1, pej 15.

◻ ?Wanem ol mak we wan famle i save putum taem oli stap rerem ol miting?

(1) Ol wanwan memba blong famle oli rere blong ansa long ol miting; (2) evriwan i traehad blong ansa long prapa tok blong hem; (3) ansa wetem ol vas blong Baebol; mo (4) stadi long haf ya blong mekem samting ya i wok long laef blong yu.​—7/1, pej 20.

◻ ?Wanem spesel rod blong gat wan gudfala mared?

Blong kasem mo haremgud long ol glad long wan gudfala mared, i impoten tumas we hasban mo waef, tufala i storeyan gud tugeta. Samting ya i minim se tufala i mas soemaot ol filing mo talemaot ol tingting blong tufala. Mo fasin blong storeyan gud tugeta, hemia i min se tufala i serem ol samting we i givhan blong mekem narafala i strong, i harem gud, mo i kamgud moa. Storeyan olsem, i save leftemap stret fasin, ol man oli tinghae long hem, mo hem i leftemap tingting. (Efesas 4:​29-​32; Filipae 4:8)​—7/15, pej 21.

◻ ?Wanem ya ‘rod blong Jeova’? (Ol Sam 25:​8, 9, 12)

Rod ya, hem i rod blong lav. Hem i stanap long ol fasin we oli stret folem ol rul blong God. Baebol i tokbaot fasin blong folem lav ya long laef blong yumi se, “wan fasin we i nambawan blong folem, i winim ol narafala fasin.” (1 Korin 12:31)​—8/1, pej 12.