Ol Famle We Oli Joen Long Kongregesen, Oli Presem God
“Bambae mi mi presem yu long fes blong olgeta man blong yu.”—OL SAM 26:12.
1. Antap long fasin blong stadi mo prea long famle, ?wanem wan narafala impoten haf blong trufala wosip?
WOSIP blong Jeova i no minim nomo se yumi prea mo mekem Baebol stadi long haos blong yumi. Hem i minim tu se yumi joen long wok we kongregesen blong God i stap mekem. Long taem bifo, God i talem long ol man Isrel se oli mas “singaot olgeta man wetem ol woman oli kam wanples, wetem ol pikinini” blong olgeta blong lanem ol loa blong God. Olsem nao, oli save wokbaot long rod blong hem. (Dutronome 31:12; Josua 8:35) Ol olfala mo ol ‘gel wetem ol boe,’ oli kasem tok we i singaot olgeta blong kam presem nem blong Jeova. (Ol Sam 148:12, 13) Kristin kongregesen i stap folem sem plan olsem. Long ol Haos Kingdom raonabaot long wol, ol man, ol woman, mo ol pikinini, oli fri blong joen long ol haf blong miting we evriwan i save talem tingting blong olgeta. Plante oli glad tumas blong joen long ol haf ya.—Hibrus 10:23-25.
2. (a) ?From wanem fasin blong rerem ol miting i stamba samting blong halpem ol yangfala blong laekem ol miting? (b) ?Eksampel blong hu i impoten tumas?
2 I tru se i no isi blong givhan long ol pikinini blong folem wan gudfala program blong joen long wok blong kongregesen. Sipos sam pikinini we oli joen wetem papa mama blong olgeta long ol miting, oli no harem gud long ol miting ya, ?wanem nao problem blong olgeta? Yes, plante pikinini oli no lan blong lesin longtaem mo oli les kwiktaem blong stap kwaet. Fasin blong rerem ol miting i save givhan blong winim problem ya. Sipos ol pikinini oli no reregud fastaem, oli no save joen fulwan long ol miting. (Ol Proveb 15:23) Sipos oli no reregud fastaem, bambae i had long olgeta blong oli gru long saed blong spirit, mo bambae oli no save glad. (1 Timoti 4:12, 15) ?Bambae yu mekem wanem blong halpem olgeta? Fastaem, papa mama i mas askem long tufala bakegen se, ‘?Mi mi stap rerem ol miting?’ Eksampel blong tufala i gat bigfala paoa long pikinini. (Luk 6:40) Gudfala plan blong mekem famle stadi tu i wan impoten rod blong givhan.
Bildimap Hat
3. Long taem blong famle stadi, ?from wanem i nidim fasin traehad blong bildimap hat, mo i nidim wanem blong mekem samting ya?
3 Famle stadi i no jes wan taem blong fulumap hed, be i wan taem blong bildimap hat tu. Blong mekem olsem, yu mas luksave ol problem we ol wanwan memba blong famle oli kasem mo yu mas lavem wanwan long olgeta. Jeova i “stap skelem hat blong olgeta man.”—1 Kronikel 29:17, NW.
4. (a) ?Tok ya “no gat hat,” i minim wanem? (b) ?‘Kasem wan gudfala hat’ i minim wanem?
4 ?Jeova i faenem wanem, taem hem i skelem hat blong ol pikinini blong yumi? Plante long olgeta bambae oli talem se oli lavem God. Hemia i gud tumas. Be, wan yangfala, no hemia we i jes stat kasem save long Jeova, hem i no gat gud save yet long saed blong olgeta rod blong Jeova. From samting ya, maet “hem i no gat hat,” olsem Baebol i talem. I no olgeta tingting we oli stap bos long hat blong hem we oli nogud. Be i tekem taem blong mekem hat i folem rod we God i glad long hem. Samting ya i minim se tingting blong wan man, ol samting we hem i laekem, ol filing blong hem, mo ol mak blong hem, oli mas laenap wetem samting we God i agri long hem, kasem mak we ol sinman oli naf blong kasem. Taem wan man i jenisim ol tingting mo fasin we oli stap insaed long hem, blong folem rod blong God, man ya i ‘kasem wan gudfala hat.’—Ol Proveb 9:4, NW; 19:8.
5, 6. ?Olsem wanem ol papa mama oli save halpem ol pikinini blong olgeta blong ‘kasem wan gudfala hat’?
5 ?Olsem wanem ol papa mama oli save halpem ol pikinini blong olgeta blong ‘kasem wan gudfala hat’? I tru, i no gat wan man long wol ya we i save putum wan hat we i gud i go insaed long narafala man. Wanwan long yumi i fri blong jus. Mo plante taem, yumi jusum samting we tingting blong yumi i stap strong long hem. Be, wetem fasin luksave, plante taem ol papa mama oli storeyan wetem pikinini blong olgeta, blong save wanem i stap long hat blong hem, mo help we hem i nidim. Askem ol kwestin olsem, ‘?Wanem filing blong yu long saed blong samting ya?’ mo ‘?Wanem samting nao yu rili laekem blong mekem?’ Biaen, yu mas gat longfala tingting mo lesingud long hem. Yu no mas kros long hem. (Ol Proveb 20:5) Sipos yu wantem kasem hat blong hem, yu mas soem kaen fasin, kasem save long hem, mo soem lav long hem.
6 Blong mekem gudfala tingting blong famle i kam moa strong, oltaem famle i mas tokbaot ol frut blong tabu spirit, mo givgivhan long olgeta blong wokem ol frut ya. (Galesia 5:22, 23) Bildimap fasin blong lavem Jeova mo Jisas Kraes. Blong mekem olsem, i no naf blong talem nomo se yumi mas lavem tufala. Be i gud blong soem risen from wanem yumi mas lavem tufala mo olsem wanem yumi save soemaot lav ya. (2 Korin 5:14, 15) Tokbaot ol gudfala frut we oli kamaot taem man i mekem i stret. Long rod ya, ol pikinini blong yumi bambae oli gat strong tingting blong wantem mekem ol samting we oli stret. Pulum tingting blong pikinini blong mekem hem i wantem sakemaot ol rong tingting, toktok, mo fasin. Blong mekem olsem, i gud blong tokbaot ol rabis frut we oli kamaot taem man i mekem ol fasin ya. (Amos 5:15; 3 Jon 11) Soem olsem wanem ol tingting, toktok, mo fasin—hemia we i gud mo hemia we i nogud—i save gat paoa long fasin fren blong yumi wetem Jeova.
7. ?Papa mama i save mekem wanem blong halpem ol pikinini blong winim ol problem mo mekem ol disisen long fasin we bambae i pulum olgeta blong stap klosap long Jeova?
7 Taem wan pikinini i gat problem, no i mas mekem wan impoten disisen, yumi save askem long hem se: ‘?Wanem tingting blong Jeova long saed ya? ?Wanem samting long saed blong Jeova we i pusum yu blong talem olsem? ?Yu yu prea long Jeova finis from samting ya?’ I gud blong stat mekem olsem, taem ol pikinini blong yumi oli smol yet. Fasin ya bambae i halpem olgeta blong bildimap wan fasin blong laef we oltaem, oli traehad blong sua gud long samting we God i wantem, mo blong mekem ol samting ya. Taem oli gat wan gudfala fasin fren wetem Jeova, bambae oli harem gud blong wokbaot long ol rod blong hem. (Ol Sam 119:34, 35) Samting ya bambae i mekem se oli tinghevi long jans ya we oli gat blong joen wetem kongregesen blong trufala God.
Rerem Ol Miting Blong Kongregesen
8. (a) ?Wanem i save halpem yumi blong no fogetem olgeta samting we yumi nidim blong tokbaot long famle stadi blong yumi? (b) ?Stadi ya i impoten olsem wanem?
8 I gat plante samting we famle i nidim blong tingbaot long taem blong stadi blong olgeta. ?Olsem wanem yu save mekem evri samting ya? Yu no save mekem evri samting ya long sem taem. Be maet i givhan bigwan long yu sipos yu mekem wan lis blong olgeta samting ya. (Ol Proveb 21:5) Ale, wanwan taem, yu jekem lis ya blong luk wanem samting yu nidim blong tokbaot fastaem. Soem intres long fasin traehad we ol wanwan memba blong famle oli stap mekem blong kam moa gud. Plan ya blong mekem famle stadi i wan impoten haf blong Kristin edukesen. Hem i mekem se yumi gat evri samting long laef naoia mo i rerem yumi from laef we i no save finis long fiuja.—1 Timoti 4:8.
9. ?Taem yumi stap rerem ol miting, wanem ol mak we maet yumi save wok long hem sloslou long taem we yumi mekem famle stadi?
9 ?Yu mo famle blong yu, yufala i stap rerem ol miting blong kongregesen wanples? I gat sam samting we maet yu save wok long hem sloslou taem yufala i stadi tugeta. Sam long ol samting ya, maet i tekem plante wik, manis, no maet sam yia, blong kasem olgeta. Tingbaot ol mak olsem: (1) ol wanwan memba blong famle oli rere blong ansa long ol miting blong kongregesen; (2) evriwan i traehad blong ansa long prapa tok blong hem; (3) ansa wetem ol vas blong Baebol; mo (4) stadi long haf ya blong mekem samting ya i wok long laef blong yu. Olgeta samting ya oli save givhan long yumi blong folemgud trutok.—Ol Sam 25:4, 5.
10. (a) ?Olsem wanem yumi save tingbaot ol wanwan miting blong kongregesen blong yumi? (b) ?From wanem samting ya i gud tumas?
10 Sipos famle blong yu i stap mekem famle stadi long Wajtaoa, yu no mas fogetem se i impoten tu blong rerem Buk Stadi, Tiokratik Skul, mo Miting Blong Kingdom Wok. Ol narafala miting ya tu oli impoten haf blong program we i tijim yumi blong wokbaot long rod blong Jeova. Maet wanwan taem, famle blong yu i save joen wanples blong rerem ol miting ya. Taem yufala i rerem miting tugeta, fasin ya bambae i mekem yufala i kam gud moa blong stadi. Ale, bambae yufala i kasem plante gudfala samting long ol miting. I gud blong tokbaot ol nambawan frut we yumi save kasem sipos yumi rerem ol miting ya oltaem mo putum wan stret taem blong rerem olgeta.—Efesas 5:15-17.
11, 12. ?Olsem wanem fasin blong rerem singsing blong kongregesen i save givhan long yumi, mo olsem wanem yumi save rerem singsing?
11 Long Distrik Asembli ya, “Fasin Blong Laef We God i Glad Long Hem,” yumi kasem advaes blong rerem wan narafala haf blong miting—hemia singsing. ?Yu yu rerem haf ya samtaem? Taem yumi rerem singsing, samting ya i givhan blong mekem ol trutok blong Baebol oli gru long maen mo hat blong yumi mo long semtaem, i mekem se glad we yumi gat long ol miting blong kongregesen i kam bigfala moa.
12 Blong rerem singsing, i gud blong ridim mo tokbaot mining blong ol tok we oli stap long ol singsing blong miting. Fasin ya bambae i halpem yumi blong singsing wetem fulhat blong yumi. Long Isrel bifo, oltaem oli yusum ol samting blong plei myusek long wosip blong olgeta. (1 Kronikel 25:1; Ol Sam 28:7) ?I gat wan long famle blong yu we i save plei myusek? Ale, i gud yufala i wantem yusum jans ya blong lanem wan singsing blong Kingdom long wik ya, mo singsing tugeta. Wan narafala samting we yufala i save yusum, hemia ol myusek we i stap long kaset. Long sam kantri, ol brata sista blong yumi oli singsing nomo olsem, we i no gat myusek, mo ol singsing ya oli naes tumas. Taem oli stap wokbaot long rod, no taem oli stap wok long garen blong olgeta, plante taem oli singim ol singsing we bambae kongregesen i sing long hem long ol miting long wik ya.—Efesas 5:19.
Famle i Rere From Wok Blong Prij
13, 14. ?From wanem i impoten tumas we famle i storeyan tugeta blong mekem hat blong olgeta i reregud blong prij?
13 Fasin ya blong givim witnes long saed blong Jeova mo stamba tingting blong hem, i wan impoten haf blong laef blong yumi. (Aesea 43:10-12; Matiu 24:14) Nating se yumi yangfala no yumi olfala, yumi save haremgud moa long wok ya mo yumi save karem gudfala frut sipos yumi reregud. ?Olsem wanem blong reregud insaed long famle blong yumi?
14 I impoten tumas blong rerem hat blong yumi long saed blong olgeta samting we oli joen wetem wosip blong yumi. Yumi nidim blong tokbaot ol samting we bambae yumi mas mekem, be tu yumi nidim blong tokbaot from wanem yumi mas mekem ol samting ya. Long taem blong King Jeosafat, ol man oli kasem tijing long saed blong loa blong God. Nating se i olsem, be Baebol i talem long yumi se, “oli no rerem hat blong olgeta yet.” From samting ya, kwiktaem nomo ol samting blong pulum man oli tekem olgeta oli gowe long trufala wosip. (2 Kronikel 20:33; 21:11) Mak blong yumi i no jes blong fulumap aoa long wok blong prij, no blong seremaot plante buk nomo, nogat. Wok blong yumi blong prij i mas soemaot se yumi lavem Jeova mo ol man we oli nidim jans ya blong jusum laef. (Hibrus 13:15) Taem yumi mekem wok ya, i olsem we yumi “stap joen wetem God blong mekem wok blong hem.” (1 Korin 3:9) !I rili wan nambawan jans blong wok wetem God! Taem yumi joen long wok ya, yumi joen blong wok wetem ol tabu enjel. (Revelesen 14:6, 7) !Nambawan taem blong bildimap fasin tangkiu long saed ya, hemia taem famle i storeyan tugeta, maet long famle stadi blong olgeta, no taem oli tokbaot wan vas blong dei we i stret long poen ya!
15. ?Wetaem famle i save joen wanples blong rerem wok blong prij?
15 ?Samtaem yu stap tekem taem long famle stadi blong yu blong halpem ol memba blong famle blong rerem wok blong prij long wik? Fasin ya i save givhan bigwan. (2 Timoti 2:15) Hem i save givhan blong mekem se wok blong yufala i gat mining mo i karem frut. Wanwan taem, maet i gud we yufala i yusum fulwan taem blong famle stadi jes blong rerem wok blong prij. Maet i gud se oltaem, yufala i tekem smoltaem long en blong famle stadi no wan narafala taem long wik, blong tokbaot sam haf blong wok blong prij.
16. Eksplenem from wanem ol wanwan step we i stap long paragraf ya oli impoten tumas.
16 Maet i gat sam step we famle i save tokbaot tugeta. Hemia sam long ol step ya: (1) Rerem gud wan fastok mo yusum wan vas blong Baebol sipos i gat jans. (2) Mekem sua se evriwan i gat prapa bag blong hem, wan Baebol, wan not buk, wan pen, ol traket, mo ol narafala buk we oli klin. I no nidim wan bag blong prij we i flas, be nomo se bag ya i mas klin. (3) Tokbaot weples mo wetaem i stret blong tekem jans blong prij. Folem ol wanwan step ya taem yufala i prij tugeta. Givim advaes we i givhan, be lukaot blong no givim tumas advaes.
17, 18. (a) ?Wanem fasin blong rerem wok blong prij i save givhan blong mekem se wok ya i karem moa frut? (b) ?Wanem haf blong wok ya we yumi save rerem evri wik?
17 Wan bigfala haf blong wok we Jisas Kraes i givim long ol man blong hem, hemia blong mekem disaepol. (Matiu 28:19, 20) Blong mekem disaepol, i no minim se yumi mas prij nomo. Yumi mas tijim ol man tu. ?Olsem wanem famle stadi blong yu i save givhan blong gat gudhan long saed ya?
18 I gud we famle i storeyan tugeta, mo tokbaot hemia we maet i gud blong visitim hem bakegen. Sam long ol man ya, maet oli bin tekem sam buk, no oli jes lesin nomo. Maet sam long famle i bin mitim ol man ya long haos blong olgeta, no taem oli tekem jans blong prij long maket no long skul. Letem Tok blong God i lidim yu. (Ol Sam 25:9; Esikel 9:4) Jusum hu man we wanwan long yufala i wantem visitim long wik ya. ?Bambae yufala i tokbaot wanem wetem man ya? Taem famle i storeyan tugeta, samting ya i givhan long wanwan long olgeta blong reregud. Makemgud ol vas we bambae yu tokbaot wetem olgeta we oli intres. Mo tu, makemgud ol poen we i stret blong tokbaot wetem ol man ya, taem yu yusum buklet ya ?Wanem Samting We God i Wantem Yumi Blong Mekem? mo buk ya Save Blong Lidim Yu Long Laef We i No Save Finis. Yu no mas tokbaot tumas samting taem yu mekem visit. Bifo we yu aot long man ya, askem wan kwestin we bambae yu ansa long nekis visit. I gud we famle i mekem wan program evri wik blong save wanem visit bambae ol wanwan memba blong famle oli mekem, wetaem bambae oli mekem visit ya, mo wanem mak oli wantem kasem. Taem wan famle i mekem olsem, samting ya i save givhan bigwan long olgeta blong karem moa frut long wok blong prij blong olgeta.
Gohed Blong Tijim Olgeta Long Rod Blong Jeova
19. Sipos ol memba blong famle oli wantem wokbaot oltaem long rod blong Jeova, ?oli mas kasem wanem samting mo wanem i save givhan blong kasem samting ya?
19 Long rabis wol ya, i wan bigfala traem blong stap olsem hed blong famle. Setan mo ol rabis enjel blong hem oli stap traehad blong spolem ol man blong Jeova long saed blong spirit. (1 Pita 5:8) Mo tu, tede ol papa mama oli gat plante wari, antap moa sipos papa no mama nomo i lukaot long famle. I hadwok blong faenem taem blong mekem evri samting we yumi wantem mekem. Be nating sipos yumi jes folem wan advaes nomo long wan taem, mo sloslou yumi kam moa gud long program blong famle stadi blong yumi, fasin traehad blong yumi i no blong nating nomo. Taem yu luk se ol memba blong famle blong yu oli stap gohed blong wokbaot long rod blong Jeova, samting ya i mekem yu yu harem gud tumas long hat blong yu. Blong wokbaot oltaem long rod blong Jeova, ol memba blong famle oli mas glad blong joen long ol miting blong kongregesen mo long wok blong prij. Blong faenem glad ya, i impoten blong reregud—fasin blong rere we i bildimap hat mo i mekem se yu kam naf blong mekem wok we i gat mining.
20. ?Wanem i save halpem plante papa mama blong gat glad olsem 3 Jon 4 i soemaot?
20 Aposol Jon i tokbaot olgeta we hem i bin halpem olgeta long saed blong spirit. Hem i talem se: “Taem mi harem we oltaem ol pikinini blong mi oli stap folem ol tok we i tru, hemia i mekem mi mi harem gud moa, i winim we mi harem gud long ol narafala samting.” (3 Jon 4) I gud blong mekem famle stadi wetem wan plan mo i gud we hed blong famle i kaengud blong givhan long ol wanwan memba blong famle. Taem papa mo mama, tufala i wokem fasin ya blong tinghae long rod blong laef we God i glad long hem, samting ya bambae i givhan bigwan long famle blong tufala blong haremgud long beswan rod blong laef.—Ol Sam 19:7-11.
?Yu Yu Save Eksplenem?
◻ ?From wanem fasin blong rerem ol miting i impoten tumas long ol pikinini?
◻ ?Olsem wanem ol papa mama oli save givhan long ol pikinini blong olgeta blong ‘kasem wan gudfala hat’?
◻ ?Olsem wanem famle stadi i save givhan blong rerem olgeta miting?
◻ ?Taem famle blong yumi i joen wanples blong rerem wok blong prij, olsem wanem samting ya i givhan long yumi blong karem moa frut long wok ya?
[Tok Blong Pija Long Pej 20]
Yu save rerem ol miting long taem blong famle stadi
[Tok Blong Pija Long Pej 21]
Fasin blong lanem ol singsing blong ol miting i givhan bigwan