Baebol—Oli Raetem Blong Ol Man Oli Kasem Save Long Hem

SAM man oli bilif se Baebol, hem i klia Tok blong God we man i mas folem stret. Sam narafala oli talem se, “mesej blong Baebol i no klia olsem, i save gat plante defren mining.” Hemia nao tok we wan komiti blong 12 man we oli lukaot long bilif mo ol tijing blong skul long bigfala Protestan Jyos long Kanada, oli talem. Clifford Elliott, wan lida blong Yunaeted Jyos, i harem se, long tingting blong samfala man, “Baebol i no joen nating long laef blong olgeta, i no gat filing mo i no save wokgud.”

Ol tingting olsem oli stanemap ol kwestin long bisnes ya we i nidim ansa blong olgeta. Long olgeta kwestin ya, sam we i impoten se, ?From wanem oli raetem Baebol? ?Baebol i fasfas mo i strong tumas blong kasem save long hem? ?Ol man we oli no gat hae save, oli save kasem save long hem? ?Wan man i nidim wanem help blong kasem save long mining blong Baebol? ?Mo from wanem stret save blong Baebol i impoten tumas naoia, taem i gat tumas trabol?

?From Wanem Oli Raetem Baebol?

Stat long taem bifo i kam, stadi long Tok blong God i bin stap oltaem olsem wan samting we ol man oli mas mekem bifo we Jeova, God ya we i Hae Olgeta, i save glad mo i agri long olgeta. Ol king, ol pris, ol papa mama, ol man, ol woman, mo ol pikinini​—ol rijman mo ol puaman tu—​oli kasem oda blong tekemaot taem long ol samting we oli mekem long evri dei laef, blong prea mo tingtinggud long Tok blong God we oli raetemdaon.​—Dutronome 6:​6, 7; 17:​18-20; 31:​9-12; Nehemaea 8:8; Ol Sam 1:​1, 2; 119:​7-11, 72, 98-100, 104, 142; Proveb 3:​13-18.

Eksampel, Josua i kasem oda se: “Mekem sua se yu mas ridim buk ya blong Loa oltaem long wosip blong yu. Stadi long hem long dei mo long naet, mo mekem sua se yu mas obei long evri samting we oli raetem long hem. Nao bambae yu save win long ol rod blong yu mo bambae yu save gat wan gudfala laef.” (Josua 1:​8, Today’s English Version) Fasin ya blong stadigud mo folemgud Loa blong God bambae i mekem se wan man i win long ol rod blong hem mo hem i glad. Jeova i no wantem se “olgeta man” oli kasem save nomo long Tok blong hem, Baebol, be oli mas obei long hem tu, wetem hop blong kasem presen blong laef.​—1 Timote 2:​3, 4; Jon 17:3.

?I Strong Tumas Blong Kasem Save Long Baebol?

Bifo we Jisas i go antap long heven, hem i mekem i klia se hem i wantem wan bigfala program blong tijim Baebol i mas stap gohed raonabaot long wol. (Ol Wok 1:8) Hem i save se oli raetem Baebol blong man i kasem save long hem. Afta we hem i eksplenem se Jeova i givim paoa long hem, long olgeta samting long heven mo long wol, hem i stanemap wan stret oda se: “Yufala i mas go, mo yufala i mas mekem disaepol [no, ol man blong lanem samting] long ol man blong olgeta nesen, mo yufala i mas baptaesem olgeta long nem blong Papa, mo long nem blong Pikinini, mo long nem blong tabu speret. Mo yufala i mas tijim olgeta blong oli folem olgeta loa we mi mi givim finis long yufala.”​—Matyu 28:​19, 20, NW.

Bifo we ol nyufala disaepol oli tekem baptaes, oli mas kasem tijing long saed blong Jeova, Pikinini blong hem, mo wok blong tabu speret. Antap long samting ya, oli mas kasem tijing long saed blong ol loa blong Kristin fasin. (1 Korin 9:21; Galesia 6:2) Blong kasem mak ya, faswan samting we ol gudfala man ya oli mas bilif long hem se Baebol i kam long Jeova, mo seken samting se oli raetem blong man i kasem save long hem.​—Matyu 10:​11-13.

?Yu nidim wanem blong kasem save long Baebol? Pikinini blong God i mekem wan spesel traehad blong eksplenem Baebol. Hem i save se Baebol i tru mo se hem i karem ol tok we oli talemaot wil blong Jeova. (Jon 17:17) Long saed blong wok we God i sanem hem i kam blong mekem, Jisas Kraes i talem se: “Mi mi bon mo mi kam long wol from wan samting nomo, blong mi talemaot trutok. Mo man we i laekem trutok, hem i save lesin long tok blong mi.” (Jon 18:​37, TEV; Luk 4:43) Jisas i no slak blong tijim olgeta we oli akseptem hem wetem hat mo maen blong olgeta. Luk 24:45 i talem long yumi se: “Nao hem [Jisas Kraes] i openem tingting blong olgeta blong oli savegud ol tok blong Baebol.”

Taem Jisas i stap mekem minista wok blong hem, plante taem hem i talem bakegen ol Tok we oli raetem finis, i stap eksplenem mo i stap pulum tingting blong ol man i go long ol tok we oli raetem “long buk blong Moses, mo long ol tok blong ol profet mo long Ol Sam.” (Luk 24:​27, 44) Olgeta we oli harem ol vas blong Baebol we hem i eksplenem, oli sapraes tumas long save blong hem we i klia nomo, mo tu gudfala fasin blong hem blong tijim man. (Matyu 7:​28, 29; Mak 1:22; Luk 4:32; 24:32) Long Jisas, Baebol i wan buk we i isi nomo blong kasem save long hem.

Baebol Mo Ol Man Blong Jisas

Aposol Pol, wan man blong folem Jisas Kraes, i luksave nid blong tijim ol narafala long samting we i stap long Baebol. Hem tu i save se oli raetem blong man i kasem save long hem. Samting ya nao i mekem se hem i tijim ol man long pablik ples mo i eksplenemgud Baebol long haos blong olgeta we oli wantem kasem save long hem. Pol i mekem yumi kasem save long wok blong hem taem hem i talem se: “Yufala i save we taem mi stap talemaot gud nyus, mo taem mi stap tijim yufala long fes blong ol man, mo long ol haos blong yufala, mi mi no haedem sam samting we i save givhan long yufala.” (Ol Wok 20:​20, TEV) Taem hem i stap storeyan wetem ol man, hem i pulum tingting blong olgeta i go long Baebol, hem i stap yusum ol vas blong eksplenem mo pruvum ol tok blong hem. (Ol Wok 17:​2, 3) Hem i intres tumas blong halpem ol narafala blong kasem save long mining blong Baebol.

?Yu yu wantem tumas blong kasem save long ol samting we Jisas mo ol disaepol blong hem oli bin tijim? (1 Pita 2:2) Ol man Berea bifo oli wantem tumas blong kasem save, mo oli traehad blong bilivim samting we aposol Pol i stap tijim olgeta long hem long saed blong Kraes. Taswe Pol i leftemap tingting blong olgeta blong stadi long Baebol evri dei, mo olsem nao, oli save sua se gud nyus we oli stap harem i rili trutok. From we oli openem tingting blong olgeta, “plante man long olgeta oli bilif long Jisas.”​—Ol Wok 17:11, 12.

Sipos wan man i wantem kasem save long Baebol, hem i mas gat wan hat we i stret, i rili wantem blong lanem, mo ‘i mas luksave we hem i nidim ol samting long saed blong speret.’ (Matyu 5:3) Taem ol man blong Jisas oli askem long hem se: “?Yu yu stap tok long olgeta long parabol from wanem?” hem i ansa se: “From we yufala ya, God i openem rod long yufala blong yufala i save ol tok haed blong fasin ya we hem i stap kam king blong ol man blong hem. Be olgeta ya, hem i no openem rod long olgeta olsem.” Wan profet blong bifo i bin talem se bambae hem i ‘talemaot ol tok long parabol. Bambae hem i talemaot ol samting ya we God i bin haedem olgeta.’ (Matyu 13:​10, 11, 35) Taswe Jisas i tok long olgeta long parabol blong seraotem ol man we oli no intres tumas be oli jes lesin blong faenemaot sam samting, long ol man we long hat blong olgeta, oli rili wantem kasem save. Wan taem, ol disaepol blong Jisas oli soem se oli rili wantem kasem save taem oli folem hem i go long wan haos mo oli talem se: “?Plis yu talem long mifala, wanem mining blong parabol ya blong rabis gras we i gru long garen?”​—Matyu 13:36.

I klia nomo se yumi nidim help sipos yumi wantem kasem save long Baebol. Hal Llewellyn, wan lida blong jyos, we hem i sekretari blong Yunaeted Jyos long saed blong ol tijing blong skul, bilif, mo fasin blong pulum ol jyos long wol blong gat wan tingting, i talem se: “I impoten tumas blong kasem klia se Baebol i minim wanem long yumi mo olsem wanem yumi mas ridim mo eksplenem.” Be smol man nomo oli luksave samting ya we i tru se, yumi no save kasem save long Baebol sipos yumi no kasem help. Yumi nidim help.

?Yumi Save Kasem Wanem Help?

Long Baebol, i gat sam tok we oli had blong kasem save long olgeta, sam kwestin we oli strong, mo i gat sam waes tok we i nidim fasin blong eksplenem. Maet i gat sam tok we oli minim nomo blong mekem i no klia, oli raetem sam dip pija tok we oli no minim blong ol man oli kasem save long olgeta long taem we oli raetem. Be oli joen wetem ol stampa tingting blong Jeova. Eksampel, Revelesen 13:18 i talem se “namba blong anamol ya” hem i “sikis handred sikistesikis.” Nating se vas ya i talem se ‘man i mas gat waes blong faenemaot mining blong namba blong anamol ya,’ hem i no eksplenem mining blong namba ya. Be, tru long ogenaesesen blong hem, Jeova i letem ol man blong hem we oli fasgud long hem blong kasem save long mining blong pija tok ya tede. (Lukluk long bokis, “Rod Blong Kasem Save Long Baebol.”) Yu tu bambae yu kasem save ya wetem help blong olgeta we oli gat ekspiryens blong “tijim ol man long trutok blong God, long stret fasin nomo.”​—2 Timote 2:​2, 15, 23-25; 4:​2-5; Proveb 2:​1-5.

Samtaem Jisas i yusum ol parabol blong luk sipos ol man oli laekem no oli no laekem mesej blong Kingdom. Hem i soemaot se samfala oli no save gohedgud from ol fren mo famle oli tok agens blong blokem olgeta. Sam narafala bambae oli letem ‘hadtaem no fasin we sam man oli ronem mo mekem nogud long olgeta,’ i spolem fasin tangkyu blong olgeta long mesej blong Kingdom. Sam narafala bakegen, oli save letem ol bisnes blong evri dei laef, fasin blong ‘tingting tumas from laef blong olgeta long wol ya, mo blong wantem kam rijman,’ i spolem lav we oli gat long gud nyus. Be i gat sam we oli gat defren fasin, oli glad blong harem nambawan tok blong gud nyus ya mo oli kasem mining blong hem. Oli stap “sore mo oli krae from olgeta rabis fasin we ol man oli mekem” long Krisendom, we oli talem se oli stap mekem long nem blong Jisas Kraes. Oli wantem tumas se man i tijim olgeta long rod blong Jeova mo from samting ya, bambae oli save kasem mining blong ol samting we oli stap ridim long Baebol.​—Matyu 13:​3-9, 18-23; Esikel 9:4; Aesea 2:​2-4.

Long olgeta we oli wantem kasem save long ol stampa tingting blong Jeova, bambae Jeova i mekem sua se olgeta wanwan oli kasem help we oli nidim. Blong mekem wan eksampel, Baebol i talem se tabu speret i lidim Filip, wan man blong talemaot gud nyus, blong givhan long wan man Itiopia we i stap ridim buk blong Aesea taem we hem i aot long Jerusalem. Long rod i gobak long ples blong hem, hem i stap ridim buk ya long kat we hos i pulum. Filip i folem rod we tabu speret i lidim hem long hem, ale, hem i ron i kam kolosap long kat mo i askem se: “?Yu yu save mining blong tok ya we yu stap ridim, no yu no save?” Man ya i tok stret mo i gat tingting daon, taswe hem i talem se hem i nidim help. Filip i glad blong tijim man ya we i hanggri long saed blong speret mo i wantem blong Filip i tijim hem. Tijing ya i halpem hem blong kasem save long Baebol. Hem i lanem samting we hem i mas mekem blong Jeova i glad long hem, nao hem i save kasem laef we i no save finis from. Hem i tekem baptaes ale i kam wan man blong Jeova we i glad, mo i folem wan laef we God i glad long hem.​—Ol Wok 8:​26-39.

Maet yu gat wan Baebol long haos blong yu, mo maet yu bin ridim plante taem finis. Maet yu gat sem problem olsem man Itiopia we i gat tingting daon mo i rili wantem kasem save long Baebol. Hem i no save kasem save long samting we hem i stap ridim. Hem i nidim help mo hem i no fraet blong akseptem help we Jeova God i glad blong givim long hem. Olsem Filip, ol Wetnes blong Jeova oli glad blong givhan long yu blong kasem save long ol samting long saed blong God we oli stap long Tok blong hem, Baebol. Oli save se Jeova i givim Baebol mo Hem i wantem we bambae ol man oli kasem save long hem.​—1 Korin 2:10; Efesas 3:18; 2 Pita 3:16.

?From Wanem Baebol i Impoten?

Yumi stap laef long wan taem we i moa impoten bitim ol narafala taem long histri blong man. Baebol i tokbaot taem ya se ‘en blong ol fasin ya blong wol.’ (Matyu 24:3) Stat long 1914, plante samting we oli stap kamaot blong fulumap ol profet tok blong Baebol, oli soem se kolosap nomo bambae Kingdom blong God long heven ‘i smasem mo i finisim ol narafala gavman.’​—Daniel 2:44.

Yu wan yu save ridim samting we Baebol i talem long Matyu japta 24, Mak japta 13, mo Luk japta 21. Bambae yu luk se ol samting we Baebol i tokbaot, oli ol samting we bambae oli kamaot long olgeta man long wol. Olsem ol bigfala faet blong wol​—ol faet we oli defren olgeta long ol narafala faet. Stat long Faswan Bigfala Faet blong Wol, yumi stap luk ol hadtaem blong kasem kakae, graon i seksek, mo wan taem we man i gohed nomo blong brekem loa, ol samting we Baebol i bin talem se bambae oli kamaot. Mo naoia, i luk olsem se i no longtaem nating, bambae ol nesen oli mekem bigfala toktok we i olsem wan saen we yumi no save mestem, blong makem se bigfala trabol blong spolem rabis fasin blong wol i kolosap nomo. Long saed blong samting ya, aposol Pol i raetem se: “Dei blong Jeova i stap kam stret olsem man blong stil i kam long naet. Taem bambae ol man oli talem se: ‘!Pis mo seftaem!’ long taem ya nao, bambae trabol i kam blong spolem ol man ya olgeta. Bambae trabol ya i kam long olgeta wantaem nomo, . . . mo olgeta bambae oli no save ronwe nating.” (1 Tesalonaeka 5:​2, 3, NW) ?Hu ya olgeta ya we bambae oli no save ronwe nating? Pol i eksplenem se: ‘Olgeta we oli no save ona long God, mo olgeta we oli no save obei long gud nyus blong Jisas, Masta blong yumi.’ (2 Tesalonaeka 1:​7-9) Olgeta we oli obei long oda we i stap long Matyu 24:14 blong talemaot ‘gud nyus blong Kingdom long olgeta ples long wol,’ oli mekem haf blong ol saen ya we oli mekemap wan bigfala saen, i kamtru.

Plante milyan Wetnes blong Jeova oli stap obei long oda ya long 231 kantri mo aelan long solwora. Oli go long haos blong ol man mo askem olgeta wanwan blong stadi long Kingdom gavman blong Jeova. Wetem kaen fasin, oli makem ol samting we wanwan long olgeta i mas mekem blong stap long medel blong olgeta we bambae oli pastru long en blong ol fasin nogud blong naoia, mo blong stap long wan paradaes wol we bambae i no gat man i krae, man i sore, i harem nogud, mo i ded.​—Revelesen 21:​3, 4.

Taem we i stap naoia, bifo we en blong rabis wol ya i kamtru, i sot we i sot, mo i impoten tumas long olgeta we oli wantem pastru long en blong wol ya blong lanem samting we oli mas mekem blong ‘obei long gud nyus’, olsemia nao bambae oli no ded. Nekis taem we ol Wetnes blong Jeova oli kam long haos blong yu, i gud yu akseptem taem oli askem yu blong stadi Baebol wetem olgeta evri wik. Samting we i moa gud yet, yu nomo yu askem olgeta blong stadi Baebol wetem yu from we yu wantem kasem save long Baebol.

[Bokis blong pija long pej 8]

ROD BLONG KASEM SAVE LONG BAEBOL

JISAS i promes long yumi se afta we hem i ded mo i laef bakegen, bambae hem i putumap wan ‘slef we i stret mo waes’ we bambae i stap olsem rod we hem i yusum blong toktok long ol man. (Matyu 24:​45-47, NW) Aposol Pol i eksplenem rod ya long ol Kristin long Efesas taem hem i raetem se ‘hem i wantem yusum kongregesen blong soemaot waes blong God we i bigfala tumas, i gat plante rod blong hem. Hemia i stret nomo long tingting blong God, we hem i tingbaot fastaem, we i kamtru long Jisas Kraes, Masta blong yumi.’ (Efesas 3:​10, 11) God i putum ‘ol waes we hem i stap soemaot’ long han blong kongregesen blong ol Kristin we tabu speret i makemaot, we i stanap long dei blong Pentekos long yia 33 K.T. (Dutronome 29:29) Olsem wan grup, ol Kristin we tabu speret i makemaot oli stap wok olsem slef ya we i stret mo waes. (Luk 12:​42-44) Wok we God i putumap olgeta blong mekem i blong givim save long saed blong speret long ‘ol waes we hem i stap soemaot.’

Olsem we profet tok blong Baebol bifo i stap tokbaot Mesaea we i kam, long sem fasin i lidim yumi tu long grup we i stap joengud tugeta, hemia ol Kristin Wetnes we tabu speret i makemaot olgeta we naoia oli stap wok olsem slef ya we i stret mo waes.a Slef ya i givhan long yumi blong kasem save long Tok blong God. Olgeta we oli wantem kasem save long Baebol oli mas luksave se tru long rod ya nomo we Jeova i yusum blong toktok, slef ya we i stret mo waes, bambae oli kasem save long ‘waes blong God we i bigfala tumas, i gat plante rod blong hem.’​—Jon 6:68.

[Futnot]