?Olsem Wanem Blong Halpem Ol Hasban We Oli No Witnes?

¹ Plante Witnes blong Jeova oli gat ol hasban we oli frengud wetem ol brata mo oli laekem kampani blong ol memba blong kongregesen, be oli no tekem step yet blong kam man blong God.a Wan hasban i talem stret se: “Samting we mi faenem se i hadwok long mi, hemia blong go prij long haos blong ol man.” Sam narafala maet oli stap folem sam fasin blong laef we oli nidim yet blong jenisim, no maet oli harem se bambae i hadwok tumas blong folem program blong ol tiokratik wok we waef blong olgeta i stap mekem. ?Olsem wanem yumi save givhan long olgeta ya?

² Soem Intres: Taem yumi soem intres long olgeta mo yumi traem kasem save long ol filing blong olgeta, maet yumi openem rod long olgeta blong oli folem trutok blong Baebol. (Fil. 2:4) Plante long olgeta we oli kam long trutok oli talem se samting we i pulum olgeta, hemia intres we ol narafala Witnes oli soem long olgeta. Hasban ya we yumi tokbaot hem antap, i talem se: “Jose, wan elda long kongregesen, i soem spesel intres long mi. Mi ting se hem nao i leftemap tingting blong mi mekem se biaen mi rili stat stadi mo mi rili mekem ol samting we mi lanem i wok long laef blong mi.” Wan narafala hasban i rimemba se ol brata we oli kam long haos blong hem oli traehad oltaem blong storian wetem hem long ol samting we hem i intres long olgeta. Hem i se: “Samting ya i mekem we naoia tingting blong mi long saed blong bilif blong [woman blong mi] i jenis. Mi luk se ol fren blong hem oli ol man we oli gat hed, oli save storebaot plante defdefren kaen samting.”​—1 Kor. 9:20-23.

³ Givim Help We i Stret: Samting we i stap tajem hat blong ol hasban we oli no stap long trutok, hemia taem yumi givhan long olgeta. (Prov. 3:27; Gal. 6:10) Taem trak blong hasban blong wan sista i brokdaon, wan yangfala Witnes i kam givhan long hem. Hasban ya i tingtingbak long taem ya i se: “Samting ya i rili tajem hat blong mi.” Wan narafala brata i spenem wan ful dei blong givhan long hasban blong wan sista blong bildim fenis i goraon long haos blong olgeta. Taem tufala i wok tugeta, tufala i kam gud fren. Tu wik nomo biaen, man ya i kam luk brata ya mo i talem se: “I taem nao blong mi mekem sam jenis long laef blong mi. ?Yu yu wantem mekem Baebol stadi long mi?” Hem i gohed gud long trutok mo naoia hem i wan Witnes.

⁴ Taem yumi stap gohed blong traem faenem ol man long teritori blong yumi we maet oli intres long trutok, i gud yumi tingbaot ol man we oli mared wetem ol Kristin sista blong yumi.​—1 Tim. 2:1-4.

[Futnot]