?Olsem Wanem Tiokratik Skul i Givhan Long Yumi?
1 Ol man blong Jeova oli gat nambawan blesing ya we ol narafala man oli no gat, hemia blong kasem tijing we i kamaot tru long Tiokratik Skul. (Aes. 54:13; Jon 6:45) Be, blong tijing ya i givhan long yumi, yumi mas traehad. ?Yu yu luksave olsem wanem Tiokratik Skul i stap givhan long yu long saed blong spirit?
2 Ol Gudfala Toktok: Plante elda we oli lidim Tiokratik Skul oli luk se stadi we yumi mekem long ol fasin blong toktok, i givhan bigwan long ol brata sista long kongregesen long saed blong wok blong prij. Mo tu, from we olgeta we oli lesin oli save givim ansa long taem blong ol bigfala poen blong Baebol riding, wan elda i luk se plante moa long kongregesen oli stap folem program ya blong ridim Baebol. Plante brata oli talem gudfala toktok long saed blong Tok N. 2, from we oli no moa mekem rere ol fastok mo lastok blong tok ya, mekem se oli save spenem moa taem mo paoa blong mekem reregud haf ya we bambae oli ridim. Naoia ol brata we oli stap mekem tok ya oli stap traehad moa blong kamgud long fasin blong rid.—1 Tim. 4:13.
3 Evriwan Oli Save Haremgud From: Yumi save kasem bigfala glad taem yumi ansa long ol miting. (Prov. 15:23) Taem yumi kasem pepa blong lukluk bakegen ol poen blong Tiokratik Skul sam wik bifo we yumi mekem miting ya, hem i blong givhan long yumi blong yumi reregud mo blong yumi glad blong givim ansa long taem blong miting ya. Antap moa, stat long Wajtaoa blong Jenuware 1, 2004, ol bigfala poen long ol buk blong Baebol oli kamaot, mo oli joen wetem Baebol riding blong yumi long Tiokratik Skul. Ol haf blong Wajtaoa ya oli bin givhan long plante blong oli givim ol gudfala ansa long taem blong lukluk ol bigfala poen blong Baebol riding.
4 Evriwan we oli putum nem finis long skul ya oli gat spesel blesing blong mekem rere mo givim wan tok. Evriwan long yumi i save haremgud from ol gudfala tok blong leftemap tingting we brata we i lukaot long skul i givim long platfom. Wanwan studen i save kasem gudfala samting bakegen from ol narafala advaes we brata ya i givim long olgeta taem miting i finis. Ol wok we yumi mas mekem (Exercises) we oli stap long en blong wanwan japta blong buk ya Benefit From Theocratic Ministry School Education oli save givhan bigwan long yumi blong yumi kam gud moa long fasin blong toktok.
5 Sipos long taem blong skul mo afta long skul yu harem sam gudfala advaes long saed blong fasin blong toktok mo long saed blong Baebol, yu mas raetemdaon long buk blong yu blong Ministry School. Tingting dip long samting we yu lanem, mo tingbaot olsem wanem tijing ya we i kamaot long God i stap mekem yu yu kamgud moa long saed blong spirit.