Gohed Blong Prij
1 Naoia yumi stap long wan taem we laef i strong tumas. Ol faet oli kamaot insaed long ol wanwan kantri, wo i kamaot bitwin ol laen, ol disasta, mo plante narafala nogud samting oli stap hapen tede. Naoia ol man oli nidim gud nius i bitim bifo. Be plante man oli no moa intres long ol samting long saed blong spirit. Long sam ples, maet i no isi blong faenem ol man long haos blong olgeta, mo i hadwok moa blong faenem olgeta we oli glad blong lesin long yumi no we oli wantem stadi long Baebol. Nating se i olsem, i impoten we yumi gohed blong talemaot gud nius blong Kingdom blong God we i stanap finis.—Mat. 24:14.
2 Lavem Ol Man: Taem yumi prij, wok ya i soemaot lav we Jeova i gat long ol man. “Hem i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9; Esik. 33:11) Taswe, hem i tekem desisen ya, olsem Jisas i bin talem, se “gud nius ya i mas go long olgeta man long wol fastaem.” (Mak 13:10) God i askem strong long ol man blong oli kam long hem mo ronwe long jajmen we bambae i kasem wol blong Setan. (Joel 2:28, 29, 32; Sef. 2:2,3) Yumi mas gat tangkiu from we Jeova i givim janis ya long yumi tu.—1 Tim. 1:12, 13.
3 !Ripot blong wok blong prij long fulwol i soemaot se long seves yia 2004, i gat samwe 6,085,387 Baebol stadi evri manis, mo klosap 5,000 niufala disaepol we oli baptaes evri wik! Sam long ol niuwan ya we oli givim laef blong olgeta i go long God, oli olgeta ya we ol pablisa oli faenem long wok blong prij taem oli traehad blong prij long evriwan long teritori blong olgeta, nao Jeova i blesem wok blong olgeta. !Hemia i wan bigfala glad long ol kongregesen! !Mo yumi gat bigfala blesing ya tu blong joen wetem God blong mekem wok ya blong sevem man!—1 Kor. 3:5, 6, 9.
4 Presem Nem Blong God: Yumi gohed blong prij, blong yumi save presem nem blong Jeova long fes blong ol man, mo blong yumi mekem nem ya i kam tabu long fored blong olgeta. (Hib. 13:15) Setan i lidim “olgeta man long wol” oli go krangke finis, taswe oli ting se God i no gat paoa blong stretem ol problem blong wol ya, hem i no kea nating long ol man we oli stap safa, mo samfala oli ting se i no gat God nating. (Rev. 12:9) Taem yumi prij, yumi leftemap trutok long saed blong nambawan Papa blong yumi long heven. I gud we yumi gohed blong presem nem blong hem—naoia mo blong olwe.—Sam 145:1, 2.