!Gohed Blong Prij!
1 God i “wantem sevem olgeta man, mo i wantem we olgeta man bambae oli save trutok.” (1 Tim. 2:4) From risen ya, hem i givim wan wok long yumi blong talemaot gud nius. (Mat. 24:14) Sipos yumi luksave from wanem yumi mas gohed blong prij, ol samting we oli save mekem tingting blong yumi i foldaon no eni samting we oli save pulum tingting blong yumi i gowe long wok ya, bambae oli no naf blong mekem yumi stop long wok ya.
2 ?From Wanem Yumi Mas Gohed? I gat plante samting long wol we oli stap pulum tingting blong ol man mekem se oli fogetem no oli no tinghevi long wanem we yumi stap talem long olgeta. Taswe, bakegen mo bakegen, yumi mas mekem olgeta oli tingbaot mesej blong God we i blong sevem olgeta. (Mat. 24:38, 39) Mo tu, laef blong ol man i jenis oltaem. Ol samting long wol ya tu oli save jenis kwiktaem nomo. (1 Kor. 7:31) Tumora, nekis wik, no maet nekis manis, ol man ya we yumi bin prij long olgeta bambae oli fesem sam niufala problem no wari we i mekem se oli save stat intres long gud nius we yumi karem i go long olgeta. ?Yu yu no glad se Witnes ya we i karem trutok i kam long yu i no slak blong mekem olsem?
3 Blong Soem Sore Olsem God: Jeova i soem longfala tingting taem hem i letem taem i pas bifo we hem i mekem jajmen blong hem i kamaot long ol rabis man. Hem i gohed blong yusum yumi blong faenem ol man we hat blong olgeta i stret mo pulum olgeta oli kam long hem blong oli save sef. (2 Pita 3:9) Bambae yumi gat fol from blad blong ol man sipos yumi no talemaot mesej blong sore we God i gat long olgeta mo givim woning long olgeta long saed blong jajmen blong God agensem ol man we oli no lego ol rabis fasin blong olgeta. (Esik. 33:1-11) Nating sipos ol man oli no lesin oltaem long yumi taem yumi prij, yumi no mas kam slak mo lego traehad ya blong halpem ol gudfala man blong luksave bigfala sore blong God.—Wok 20:26, 27; Rom 12:11.
4 Blong Soemaot Lav Blong Yumi: Tru long Jisas Kraes, Jeova God i givim oda ya blong talemaot gud nius long olgeta ples blong wol. (Mat. 28:19, 20) Nating se ol man oli no wantem lesin long gud nius ya, yumi gat janis blong soemaot se yumi lavem God mo se yumi fasgud long hem taem yumi gohed blong mekem ol samting we oli stret.—1 Jon 5:3.
5 !I gud yumi gat strong tingting blong gohed long wok blong prij! Yumi mas mekem samting ya wetem strong tingting taem yumi stap yet long “dei blong [Jeova blong] sevem man.”—2 Kor. 6:2.