?Olsem Wanem Blong Holemtaet Tingting Ya Blong Wok Strong?

¹ Apolos i wok strong blong talemaot gud nius, olsem we faea i laet insaed long hem, mo hemia i mekem yumi tingbaot sam Kristin brata sista tede we olgeta tu oli rili wok strong long wok blong prij. (Ol Wok 18:​24-28) Be yumi evriwan i kasem advaes ya se: ‘Yufala i mas wok had, i nogud yufala i stap les. Tingting blong yufala i mas glad oltaem.’ (Rom 12:11) ?Wanem i save halpem yumi blong gat tingting ya blong wok strong long wok blong prij olsem we faea i laet insaed long yumi, mo blong yumi holemtaet tingting ya?

² Save i Pusum Yumi Blong Wok: Afta we Jisas i kamtru long tu disaepol blong hem mo “i talemaotgud long tufala, olgeta tok blong Baebol we oli bin raetem blong tokbaot hem,” tufala disaepol ya i talem se: “Yu luk. Taem hem i stap tok long yumitu long rod, mo taem hem i stap talemaot ol tok ya blong Baebol, be tok blong hem i nambawan. Tok ya i bonem tingting [“hat,” NW] blong yumi olsem faea.” (Luk 24:​27, 32, Gud Nius Bilong Jisas Krais) ?Olsem wanem long yumi? ?Taem yumi kasem moa save long Tok blong God, save ya i olsem wan faea we i bonem hat blong yumi? Yes, save i givim paoa long bilif, mekem se i kam strong moa. Rom 10:17 i eksplenem se: “Ol man oli stap bilif long God, taem oli harem gud nius ya.” !Taem hat blong yumi i fulap long bilif ya se ol promes blong Jeova bambae oli kamtru, i no gat wan samting we i save stopem yumi blong tokbaot ol save ya we yumi lanem!​—Sam 145:7; Wok 4:20.

³ Yumi no save dipen nomo long save we yumi bin kasem bifo finis long stadi blong yumi, blong mekem se lav blong yumi long God mo strong tingting we i pusum yumi blong wok i gohed blong laet olsem wan faea. Yumi mas gohed blong mekem save blong yumi long saed blong trutok i kam bigwan moa, mo mekem lav blong yumi long Jeova i kam dip moa. Sipos yumi no mekem olsem, sloslo bambae yumi wok wetem tingting we i hafhaf, olsem we yumi folem wan kastom nomo. (Rev. 2:4) Tok blong God i pusum yumi blong “gohed blong save God moa.”​—Kol. 1:​9, 10.

⁴ Fasin Blong Yumi Blong Stadi: From samting ya, yumi mas lukluk gud long fasin blong yumi blong stadi. Olsem nao, maet yumi naf blong makem ol ansa long ol haf we yumi stadi long hem long Wajtaoa mo yumi givim ol stret ansa. ?Be yumi stap jekem ol vas blong Baebol we oli joen long ol haf ya, mo yumi stap tingting gud olsem wanem blong mekem ol save ya oli wok long laef blong yumi? ?Long Baebol riding blong yumi evri wik, yumi stap traehad blong lukaotem sam moa save, mo yumi stap tingting dip long ol tijing we oli stap long ol Baebol riding ya? (Sam 77:​11, 12; Prov. 2:​1-5) !Bambae i givhan bigwan long yumi sipos yumi tingting dip long Tok blong God mo yumi mekem tingting blong yumi i strong blong folem! (1 Tim. 4:​15, 16) Fasin blong stadi dip olsem bambae i fidim hat blong yumi mo i givim paoa long yumi blong yumi “strong blong mekem ol gudfala samting.”​—Taet. 2:14.