“Yufala i Mas Glad, Tabu Spirit i Mas Fulap Long Yufala”

1. ?Wanem tingting we yumi mas gat long saed blong wok blong prij?

¹ I no gat wan haf blong Kristin wok blong yumi we yumi save lego. Defren olgeta, yumi kasem advaes ya we i talem se yumi ‘mas glad, tabu spirit i mas fulap long yumi, mo yumi mas wok olsem ol slef blong Jeova.’ (Rom 12:11, NW) Be i gat plante samting we oli save mekem strong tingting blong yumi long wok blong prij i kam slak.?Olsem wanem yumi save stap glad oltaem mo mekem tingting blong yumi long saed blong wok blong Kingdom “i kam strong bakegen” olsem wan faea we i laet?—2 Tim. 1:6, 7.

2. ?Olsem wanem stadi we yu yu mekem long Baebol i save mekem tingting blong yu i strong long wok blong prij?

² Stadi Yu Wan Long Baebol: Wan man we i mekem gud wok blong talemaot Kingdom hem i wan man we i laekem tumas loa blong God, mo ol trutok we oli stap long Baebol oli tajem hat blong hem. (Sam 119:97) Ol trutok we yumi lanem taem yumi stadi yumi wan, oli pulum yumi blong wantem mekem wok blong God mo oli mekem tingting blong yumi i strong moa olsem faea we i laet bigwan. Yumi lavem Man ya we i Givim ol trutok ya long yumi, mo yumi harem se yumi wantem talemaot gud nius long ol narafala. Ale ol strong filing ya oli pulum yumi blong presem God mo talemaot nem blong hem long ol man. (Hib. 13:15, NW) Yes, taem yumi wok had blong talemaot gud nius yumi soemaot we yumi tinghevi long gud nius ya we i impoten tumas.

3. ?Olsem wanem tabu spirit blong God i save givhan long yumi long wok blong prij?

³ Prea From Tabu Spirit Blong God: Yumi no save mekem gud wok blong prij long paoa blong yumi nomo. Tabu spirit we God nao i stap givim oltaem long yumi i mekem tingting blong yumi i strong. (1 Pita 4:11) Yumi mas kam klosap moa long Man ya we i Stamba blong ‘paoa ya we i strong we i strong.’ Ale tingting blong yumi bambae i stap strong long Jeova nao yumi no fraet blong givim witnes long saed blong hem. (Aes. 40:26, 29-31) Taem ol man oli agensem aposol Pol from wok blong prij, ‘God i givhan long hem.’ (Wok 26:21, 22) Tabu spirit blong Jeova i save givhan long yumi blong stap glad mo wok strong long wok blong prij. Taswe yumi mas prea from tabu spirit blong hem.—Luk 11:9-13.

4. ?Strong tingting blong yumi i save karem wanem gudfala frut? ?Wanem ol narafala fasin we oli impoten tu?

⁴ Sipos yumi gat strong tingting we i olsem faea we i laet blong talemaot Kingdom, bambae samting ya i pulum ol Kristin brata sista blong yumi blong gat strong tingting tu. (2 Kor. 9:2) Ating bambae ol man we yumi prij long olgeta oli glad moa blong lesin long ol tok blong yumi sipos yumi toktok wetem glad mo strong bilif. Nating se strong tingting i impoten, be oltaem yumi mas gat kwaet fasin tu, mo toktok wetem kaen fasin long ol man. (Taet. 3:2) Oltaem yumi mas tinghae long man we yumi toktok wetem, mo yumi mas respektem raet blong hem blong jusum samting we hem i wantem.

5. ?Wanem advaes blong Baebol we yumi mas traehad blong folem?

⁵ Yumi ol man blong talemaot Kingdom, yumi “mas glad, tabu spirit i mas fulap” oltaem long yumi. Taswe i gud yumi wokem tingting ya blong wok strong, taem yumi stadi yumi wan long Baebol mo yumi prea strong long Jeova, man ya we i save givim tabu spirit we i strong we i strong. Long rod ya, bambae yumi wok strong long wok blong prij ‘long paoa blong tabu spirit mo wetem strong bilif.’—1 Tes. 1:5.