?Olsem Wanem Kongregesen i Wok Mo Hu i Lukaot Long Hem?

LONG faswan leta we aposol Pol i raetem i go long ol Kristin long Korin, hem i talemaot wan stamba trutok long saed blong God, i se: “God i no stamba blong fasin ya we olgeta samting oli paspas, hem i stamba blong pis.” Nao Pol i tokbaot ol miting long kongregesen, i se: “Yufala i mas mekem olgeta samting long fasin we i stret gud, we ol man oli glad long hem.”​—1 Kor. 14:​33, 40.

Pol i harem nius se kongregesen blong Korin i stap seseraot. Taswe long fas tok blong leta ya, hem i talem se ‘oli mas joen gud we oli gat wan tingting nomo, mo we fasin blong olgeta i wan nomo.’ (1 Kor. 1:​10, 11) Nao Pol i tokbaot sam samting we oli stap spolem fasin joen gud insaed long kongregesen. Hem i talem se kongregesen i olsem bodi blong man, we olgeta haf blong hem oli mas wokgud tugeta. Taswe olgeta evriwan long Kristin kongregesen oli mas givgivhan long olgeta mo laeklaekem olgeta, nomata wanem wok we oli gat long kongregesen. (1 Kor. 12:​12-26) Blong olgeta long kongregesen oli wokgud tugeta mo joengud, i mas gat oda mo oli mas wok folem wan plan.

?Ale, Kristin kongregesen i wok olsem wanem? ?Hu i lukaot long hem? ?Wanem ol wok insaed long hem, mo hu i mekem ol wok ya? Sipos yumi letem Baebol i lidim tingting blong yumi, bambae yumi save faenem ansa blong ol kwestin ya.​—1 Kor. 4:6.

KONGREGESEN I WOK FOLEM TIOKRATIK ODA

Kristin kongregesen i stat long yia 33 K.T., long dei we ol man Jiu oli mekem lafet blong Pentekos. ?Yumi save wanem samting long saed blong kongregesen long taem bifo ya? Yumi save se kongregesen i folem tiokratik oda. God nao i mekem plan we kongregesen i mas folem, mo ol man we oli lukaot long kongregesen oli obei long God nomo. Hemia i min se God (the·osʹ long lanwis Grik) i rul (kraʹtos) long kongregesen. Baebol i tokbaot samting we i hapen long Jerusalem long dei blong Pentekos klosap 2,000 yia bifo. Ol tok blong Baebol i soemaot klia se God nomo i stanemap kongregesen ya blong ol Kristin we hem i makemaot wetem tabu spirit. (Wok 2:​1-47) Kongregesen i olsem haos we God i wokem, mo i olsem famle blong God. (1 Kor. 3:9; Efes. 2:19) Tede Kristin kongregesen i folem ol semfala rul mo plan we kongregesen bifo i folem. Be tede, i gat wan “bigfala kampani” we i joen tu long kongregesen wetem olgeta we tabu spirit i makemaot olgeta.​—Rev. 7:​9, 10, NW.

Faswan Kristin kongregesen i gat 120 man nomo long hem. Tabu spirit i kamdaon long olgeta ya, olsem profet tok blong Joel 2:​28, 29 i bin talem. (Wok 2:​16-18) Be long sem dei ya, 3,000 man bakegen oli baptaes long wota mo oli joen long kongregesen we tabu spirit i makemaot ol man blong hem. Oli bilif long ol tok long saed blong Kraes mo ‘oltaem olgeta ya oli stap lesin long ol tok ya we ol aposol oli stap tijim olgeta long hem.’ Ale, “evri dei, [Jeova] i stap sevem ol man, i stap joenem olgeta long grup ya blong ol aposol.”​—Wok 2:​41, 42, 47.

Kongregesen blong Jerusalem i kam bigwan, gogo hae pris blong ol man Jiu i tok agensem olgeta long kongregesen ya se Jerusalem i kam fulap finis long ol tijing blong olgeta. Sam pris blong ol man Jiu tu oli kam disaepol mo oli joen long kongregesen.​—Wok 5:28; 6:7.

Jisas i bin talem se: “Bambae yufala i mas go talemaot mi long Jerusalem, mo long olgeta ples long Judia mo Sameria, gogo yufala i finisim olgeta ples long wol.” (Wok 1:8) Tok ya i kamtru afta we ol man oli kilim Steven i ded. Oli mekem nogud long ol disaepol long Jerusalem, nao ol disaepol oli go wanwan long ol defren ples long Judia mo Sameria. Long evri ples, oli gohed blong talemaot gud nius mo pulum plante man oli kam disaepol, wetem sam man Sameria tu. (Wok 8:​1-13) Biaen bakegen, ol disaepol oli talemaot gud nius long ol man blong ol narafala laen we oli no sakomsaes, ale, plante long olgeta tu oli kam disaepol. (Wok 10:​1-48) From bigfala wok blong prij we oli mekem, plante niufala kongregesen oli stanap long ol defren ples raonabaot long Jerusalem.​—Wok 11:​19-21; 14:​21-23.

?Oli mekem olsem wanem blong meksua se wanwan long ol niufala kongregesen ya oli folem plan we God i stanemap mo wok folem tiokratik oda? God i yusum tabu spirit blong hem blong putumap sam man we oli wok aninit long Hem mo Kraes blong lukaot long ol sipsip blong Hem. Taem Pol mo Banabas tufala i mekem faswan misinari trip blong tufala, tufala i putumap sam elda long ol kongregesen we tufala i go long olgeta. (Wok 14:23) Ol Wok japta 20 i givim save long yumi long saed blong miting we aposol Pol i mekem wetem ol elda long kongregesen blong Efesas. Pol i talem long olgeta se: “Yufala i mas lukaot gud long yufala, mo long ol man ya we Tabu Spirit i putum olgeta oli stap finis long han blong yufala. Yufala i mas lukaot long ol man blong [kongregesen] blong God, olsem we man blong lukaot long sipsip i stap lukaot long ol sipsip blong hem. Yufala i mas mekem olsem, from we God i pemaot ol man ya finis long blad blong Pikinini blong hem.” (Wok 20:28) Ol man ya oli olfala long trutok. Oli naf blong mekem wok insaed long kongregesen from we oli kasem ol mak we Baebol i putum. (1 Tim. 3:​1-7) Taetas we hem tu i wok wetem Pol, i gat raet blong putumap ol elda long ol kongregesen long Krit.​—Taet. 1:5.

Taem ol niufala kongregesen oli stanap, i gat ol elda blong lukaot long olgeta. Be ol aposol mo ol elda long Jerusalem oli lukaot long olgeta kongregesen evriwan long faswan handred yia. Oli wok olsem hed kampani blong fulwan Kristin kongregesen.

Aposol Pol i raetem leta i go long kongregesen blong Efesas, mo i talem se Kristin kongregesen i mas wok folem rod we tabu spirit i soemaot. Olsem nao, bambae ol Kristin oli soem se oli obei long hed blong kongregesen Jisas Kraes, nao kongregesen bambae i gohed blong joen gud long wan tingting nomo. Pol i talem long ol Kristin blong Efesas se oli mas gat tingting daon, mo se oli mas holem pis mo joen gud wetem evriwan long kongregesen. (Efes. 4:​1-6) Nao Pol i yusum ol tok blong Ol Sam 68:18 blong soem se Jeova i givim sam man olsem presen long kongregesen. Ol man ya we oli kasem ol mak we Baebol i talem, oli mekem ol defren wok, olsem samfala oli mekem wok blong aposol, sam oli mekem wok blong profet, sam oli man blong talemaot gud nius, man blong lukaot long ol sipsip blong God, no tija. Ol man ya oli olsem presen we Jeova i givim blong mekem kongregesen i kam strong gud, nao bambae God i save harem gud long hem.​—Efes. 4:​7-16.

KONGREGESEN TEDE I FOLEM ROD WE OL APOSOL OLI SOEMAOT

Tede, ol kongregesen blong ol Witnes blong Jeova oli folem semfala rod we ol kongregesen bifo oli folem. Olgeta kongregesen tugeta oli olsem wan bigfala kongregesen we i joen gud long fulwol, mo ol Kristin we tabu spirit i makemaot olgeta oli lukaot long bigfala kongregesen ya. (Sek. 8:23) Oli save mekem olsem from we Jisas Kraes i stap wetem olgeta. Hem i bin promes se: “Bambae mi stap wetem yufala oltaem, gogo wol ya i finis.” Ol niuwan we oli joen long kongregesen tede oli bilif long gud nius we i kamaot long God, ale oli givim laef blong olgeta i go fulwan long Jeova God blong mekem wil blong hem, mo oli tekem baptaes blong kam ol disaepol blong Jisas Kraes. (Mat. 28:​19, 20; Mak 1:14; Wok 2:41) Oli glad blong obei long ‘gudfala man blong lukaot long ol sipsip,’ Jisas Kraes, we hem i Hed blong kongregesen, hemia olgeta Kristin we tabu spirit i makemaot olgeta wetem “ol narafala sipsip” tu. (Jon 10:​11, 16; Efes. 1:​22, 23) Olgeta ya we oli mekemap “wan kampani nomo” oli joengud from we olgeta evriwan oli luksave Kraes olsem hed blong olgeta, mo tu oli glad blong obei long rod we Kraes i yusum blong lidim ogenaesesen blong God, hemia ‘slef we i stret mo waes.’ I gud yumi gohed blong trastem “slef ya” mo putum tingting blong yumi i stap strong long ol samting we hem i talem.​—Mat. 24:​45, NW.

OL ASOSIESEN MO SOSAETI

Long ol las dei ya, ol samting blong Masta Jisas oli kam plante long wol ya. Hemia i min se “slef ya” i gat bigfala wok blong mekem. Taswe, blong givimaot kakae no save i go long olgeta Kristin long stret taem blong hem, mo blong finisim wok blong talemaot gud nius blong Kingdom bifo we en i kam, “slef ya” i stanemap sam asosiesen no sosaeti we oli stret folem loa blong ol kantri. Long ol yia we i pas, i kam klia se i wan waes desisen blong yusum ol sosaeti ya we gavman blong wanwan kantri i agri long olgeta. Ol sosaeti ya oli gat plante faktri mo mesin blong wokem ol buk mo ol Baebol, mo blong sanemaot ol buk ya oli go long ol defren ples long wol, blong ol Witnes oli save yusum olgeta long wok blong prij.

Ol asosiesen mo sosaeti ya oli blong mekem trufala wosip i gohed long wol. Oli wok tugeta blong givhan long wok blong talemaot gud nius long olgeta ples blong wol, mo blong givim ol samting long saed blong spirit we kongregesen blong God long fulwol i nidim.

?OL BRANJ OFIS OLI WOK OLSEM WANEM?

Taem oli openem wan niufala branj ofis samples long wol, oli putumap wan Branj Komiti. Hemia tri elda, no maet i bitim tri, we oli lukaot long wok blong Kingdom long kantri we branj ofis i stap long hem, mo maet long sam narafala kantri tu. Wan long ol elda ya hem i presiden blong Branj Komiti.

Branj ofis i seraotem ples we hem i lukaot long hem i go long ol distrik mo i seraotem ol distrik oli kam ol seket. I gat sam bigfala distrik mo seket we oli gat plante kongregesen long olgeta, mo i gat sam smol distrik mo seket we oli gat sam kongregesen nomo long olgeta, i dipen se ol ples oli longwe olsem wanem, mo i dipen long ol lanwis we ol man oli toktok long hem, mo tu, long namba blong ol kongregesen long ples we branj ofis i lukaot long hem. Oli putumap wan seket elda blong goraon long ol kongregesen we oli stap long wan seket. Distrik elda i stap goraon long ol seket, hem i gat wok blong mekem long ol seket asembli tu, mo hem i spenem taem wetem sam kongregesen, klosap oltaem hem i joen wetem seket elda blong mekem samting ya. Samtaem, Kingdom Wok Blong Yumi i talem wanem wok ol seket mo distrik elda bambae oli mekem. Mo branj ofis i stap sanem leta i go long olgeta tu blong talemaot sam wok we oli mas mekem.

Olgeta evriwan insaed long ogenaesesen oli glad blong letem God i rul long olgeta. Ol kongregesen oli agri long ol plan we ogenaesesen i mekem blong givhan long olgeta mo oli folem ol plan ya. Oli agri long ol elda we ogenaesesen i putumap olgeta blong lukaot long wok long ol branj ofis, ol distrik, ol seket, mo ol kongregesen. Oli trastem “slef ya we i stret mo waes” blong givim save no kakae long stret taem blong hem. Gudfala “slef ya” i obei gud long Kraes we i hed blong kongregesen, i folem gud ol rul blong Baebol, mo i letem tabu spirit i soemaot rod long hem. Taem olgeta evriwan oli wok gud tugeta wetem wan tingting nomo, i gat gudfala frut i kamaot, olsem i bin kamaot long faswan handred yia. Ol Wok 16:5 i talem se: “[Ol kongregesen] long evri ples oli stap kam strong moa long bilif blong olgeta. Mo evri dei, namba blong olgeta i stap kam antap moa.”