?Yu Yu Stap Yusum Laswan Pej Blong Wajtaoa?

Taem ol man oli tekem wan magasin, plante taem oli lukluk ol samting we oli stap long fored blong magasin ya. Biaen, oli tanem magasin ya mo oli ridim toktok we i stap long Laswan Pej blong hem. Long Laswan Pej blong sam Wajtaoa long Franis mo Inglis, i gat ol kwestin we oli pulum tingting blong man. Long sam narafala Wajtaoa i gat sam toktok i stap, mo nem blong sam haf insaed long magasin ya, wetem stret namba blong ol pej we ol haf ya oli stap long hem.

Yumi save yusum Laswan Pej ya blong statem wan storian long wok blong prij. Sipos yumi prij oltaem long sem eria, i gud blong jenisim toktok blong yumi. Yumi save mekem olsem taem yumi yusum wan kwestin, no nem blong wan haf blong magasin we i stap long Laswan Pej ya. Long rod ya, yumi save jenisim storian blong yumi plante taem long wan manis. Sipos yumi faenem wan man we i bisi, yumi save mekem toktok blong yumi i sot nomo. Maet yumi soem wan kwestin no wan poen long pej ya, mo yumi talem se: “Sipos yu wantem save ansa blong kwestin ya, no yu wantem save moa long poen ya, mi save lego ol magasin ya wetem yu. Olsemia, yumitu save storian moa long saed ya nekis taem.” Maet sam pablisa oli soem Laswan Pej ya long man blong haos, mo oli askem long hem blong jusum wan long ol poen we hem i wantem save moa long hem. Biaen, oli soem stret pej we ansa blong kwestin ya i stap long hem. Mo oli ridim wan vas blong Baebol we oli rerem finis. Maet yu save tingbaot sam narafala rod blong yusum ol toktok we i stap long Laswan Pej ya, blong pulum tingting blong ol man i go long Wajtaoa.