Baebol i Talem Wanem

?I Stret Blong Prea Long Ol “Tabu Man”?

Marie mo Theresa, tufala i talem se tufala i “strong Katolik.” Tufala tugeta i bilif long ol “tabu man.” Marie i bilif se hem i save prea long olgeta blong oli givhan long hem. Theresa i prea oltaem long “tabu man” ya we i lukaot long vilej blong hem. Mo tu, hem i prea long “tabu woman” ya Theresa, we oli putum nem blong hem long hem.

OLSEM Marie mo Theresa, plante milian man long wol oli prea long ol “tabu man” blong olgeta, blong askem wan blesing. Buk ya New Catholic Encyclopedia, i talem se “ol tabu man ya oli toktok long God from ol man,” mo i talem tu se “sipos yumi prea long ol tabu man blong oli askem . . . long God blong i blesem yumi, fasin ya ‘i gud mo i save givhan long yumi.’”

?Be wanem tingting blong God long saed ya? ?Hem i agri blong yumi prea long ol “tabu man,” blong oli toktok long Hem from yumi? I gud yumi luk samting we Baebol i talem.

?Yumi Mas Prea Long Ol “Tabu Man”?

I no gat wan ples long Baebol we i talem se wan man we i wosip long God, i prea long wan “tabu man.” ?From wanem? Buk ya The World Book Encyclopedia, i talem se “fasin ya we ol man oli prea long ol tabu man blong oli toktok long God from olgeta, i kam strong long ol yia 200 nomo.” Hemia samwe 200 yia afta we Jisas i ded. Samting ya i soemaot se tijing ya i no kamaot long Jisas. Mo i no kamaot long ol man ya we tabu spirit i lidim olgeta blong raetemdaon long Baebol, wok blong prij we Jisas i mekem. ?From wanem tijing ya i no kamaot long olgeta?

Baebol i tijim oltaem se yumi mas prea long God nomo, mo prea ya i mas pastru long nem blong Jisas Kraes. Jisas i talem se: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sipos mi mi no tekem hem i kam.” (Jon 14:6) Ol tok ya we oli kliagud, oli laenap wetem tijing blong Jisas we i stap long Matiu 6:9-13. Jisas i stap eksplenem fasin blong prea long ol man blong hem, mo hem i talem se: “Taem yufala i prea bambae yufala i prea olsem. ‘Papa blong mifala. Yu yu stap long heven. Nem blong yu i tabu. . . . ’” (Matiu 6:9) I klia se, yumi mas prea long Papa blong yumi nomo long heven. Trutok ya i stanap long wan stamba tijing blong Baebol.

Prea i Wan Haf Blong Wosip

Sem buk ya (The World Book Encyclopedia) i talem se: “Prea hem i ol toktok mo tingting we man i talem long God, ol god, ol woman god, mo ol narafala samting we man i wosipim, blong ona long olgeta. . . . Klosap olgeta jos long wol oli tingbaot prea olsem wan impoten haf blong wosip blong olgeta.” (Mifala nomo i jenisim raeting ya.) I gud we yu askem kwestin ya se: ‘?I stret we yumi bodaon blong prea mo wosipim ol narafala god ya? ?No i stret we yumi wosipim God ya nomo we i Mekem yumi mo we i Givim laef long yumi?’ (Ol Sam 36:9) Jisas i talem se: “Ol man blong mekem tru wosip, bambae oli mekem wosip long Papa blong yumi long spirit mo trutok, from we, tru ya, Papa blong yumi i stap lukaot ol man olsemia, blong oli mekem wosip long hem.” (Jon 4:23, NW) Baebol i talem tu se God ya we i Mekem yumi, hem i ‘no save letem we yumi mekem wosip long narafala god bakegen.’—Dutronome 4:24; 6:15.

Tingbaot eksampol blong aposol Jon. Hem i luk plante bigbigfala vison we hem i raetemdaon long buk blong Revelesen long Baebol. Afta we hem i kasem ol vison ya, hem i sapraes tumas, ale hem i ‘bodaon long fes blong enjel ya we i soemaot ol samting ya long hem, blong mekem wosip long hem.’ ?Enjel ya i mekem wanem? Hem i talem se: “No, yu no mekem olsem. Yumitufala i man blong wok nomo, wetem ol brata blong yu . . . Yu mas mekem wosip long God nomo.” (Revelesen 22:8, 9) Yes, Baebol i makem strong bakegen se yumi mas wosipim Jeova God nomo.

Hemia i laenap wetem wanem we Baebol i talem long saed blong God, se hem nomo i “stap ansa long ol prea.” (Ol Sam 65:2) Mo tu, hem i God ya we i Hae olgeta. Taswe hem nomo i gat raet, save, mo paoa blong ansa long prea blong man we i askem samting we i stret long tingting blong hem. (Job 33:4) Jisas Kraes hem wan i talem se i gat sam samting we hem i no save mekem. (Matiu 20:23; 24:36) Nating se i olsem, God i givim raet long hem blong mekem plante samting. Mo wan long ol samting ya hemia blong toktok long God from ol man.

Jisas i Toktok From Ol Man Mo i Sore Long Olgeta

Baebol i tokbaot Jisas se: “Hem i save sevem olgeta we oli joen long hem blong kam long God, i stat naoia, gogo i no save finis, from we hem bambae i laef oltaem, mo bambae i stanap oltaem long fes blong God, blong prea from olgeta.” (Hibrus 7:25) Jisas i sore long ol man mo i save toktok long God from olgeta we oli “joen long hem blong kam long God.” Hemia i no min se yumi mas prea long Jisas mo hem bambae i pasem prea blong yumi i go long God, nogat. Hemia i min se yumi mas prea long God long nem blong Jisas. Long rod ya, yumi soemaot se yumi luksave bigfala wok we Jisas i mekem. ?From wanem Jisas i stret Man ya we i save Toktok long God From Yumi?

Jisas i bin laef olsem wan man, mo hemia i givhan long hem blong kasem save long ol samting we oli mekem ol man oli harem nogud. (Jon 11:32-35) Mo tu, hem i soemaot long ol man se hem i lavem olgeta taem hem i mekem ol sikman oli gud bakegen, ol dedman oli girap bakegen, mo i halpem ol man we oli kam long hem blong oli save God. (Matiu 15:29, 30; Luk 9:11-17) Hem i fogivim sin blong ol man tu. (Luk 5:24) Hemia i mekem tingting blong yumi i strong from we, sipos yumi mekem sin, “i gat Jisas Kraes i stap, we fasin blong hem i stret gud, mo hem i man blong givhan long yumi, blong toktok long Papa blong yumi long saed blong yumi.”—1 Jon 2:1.

Yumi mas traem blong folem fasin blong Jisas blong lavem man mo gat sore. I tru, yumi no gat raet blong karem toktok blong ol narafala i go long God. Be yumi save prea long God blong i givhan long olgeta. Blong talem stret, lav i mas pulum yumi blong mekem olsem. Jemes i raetem se: “I gud yufala i stap prea from yufala . . . Taem we stret man i prea, prea blong hem i gat bigfala paoa mo i save karem plante frut.”—Jemes 5:16, NW.

Marie mo Theresa tufala i stadi long Baebol, mo tufala i lanem ol nambawan trutok ya. Ol Witnes blong Jeova oli askem long yu blong mekem sem mak. Olsem Jisas i talem, “olgeta we oli mekem wosip long God, oli mas wosip long spirit mo trutok.”—Jon 4:24, NW.

?YU YU BIN TINGBAOT?

● ?Jisas i talem se yumi mas prea long hu nomo?—Matiu 6:9.

● ?Jisas i mekem wanem wok?—Hibrus 7:25.

● ?I stret blong yumi prea long God blong i givhan long ol narafala?—Jemes 5:16, NW.