Ogenaesesen We i Mekem Wok Blong Jeova,

Japta 9

Ol Rod Blong Talemaot Gud Nius

JISAS KRAES i tinghevi long wok ya we Jeova i sanem hem blong mekem. Hem i wokhad blong talemaot gud nius blong Kingdom blong God. Long fasin ya, hem i soemaot rod long ol man blong hem. Hem i no wet blong ol man oli kam long hem, be hem i go long haos blong ol man mo long ol pablik ples, blong storian wetem olgeta mo blong tijim olgeta. (Mat. 9:35; Luk 8:1) Jisas i toktok wetem ol man wanwan, i tijim ol disaepol blong hem taem olgeta nomo oli stap wetem hem, mo i toktok long ol grup blong plante taosen man. (Mat. 13:36; Mak 4:​10-13; 6:​35-44; Jon 3:​2-21) Hem i tekem evri janis blong talem ol tok we i leftemap tingting blong ol man mo i pulum olgeta blong tingbaot wan gudfala fiuja. (Luk 4:​16-19) Nating sipos hem i taed mo i hanggri, be hem i no mestem wan janis blong prij. (Mak 6:​30-34; Jon 4:​4-34) Taem yumi ridim stori blong Baebol long saed blong wok blong prij we Jisas i mekem, yumi harem se yumi wantem folem eksampol blong hem, olsem ol aposol oli bin mekem.​—Mat. 4:​19, 20; Luk 5:​27, 28; Jon 1:​43-45.

Tingbaot ol rod we ol Kristin tede oli save yusum blong joen long wok ya we Jisas Kraes i statem klosap 2000 yia bifo.

PRIJ LONG OL HAOS WANWAN

Ol Witnes blong Jeova long taem blong yumi, oli luksave se sipos oli folem wan gudfala plan blong prij long ol haos wanwan, hemia i nambawan rod blong talemaot gud nius. From we oli yusum rod ya oltaem blong talemaot Kingdom, ol man oli luksave olgeta. Gudfala frut we i kamaot i soemaot se Jeova i glad mo i blesem rod ya, mo i soemaot tu se hemia wan gudfala rod blong talemaot gud nius long plante milian man long sot taem nomo. (Mat. 11:19; 24:14) I klia se, hemia wan gudfala rod blong soemaot lav long Jeova mo long ol man raonabaot long yumi.​—Mat. 22:​34-40.

I no naoia nomo we ol Witnes blong Jeova oli yusum rod ya blong prij long ol haos wanwan. Ol aposol tu oli bin mekem olsem. Long plante leta we aposol Pol i raetem, hem i tokbaot wok blong hem blong tijim ol man long haos blong olgeta. Hem i tokbaot wok blong prij wetem ol elda blong Efesas, i se: “I stat long taem ya we mi kamtru long Esia fastaem . . . Yufala i save we taem mi stap talemaot gud nius, mo taem mi stap tijim yufala long fes blong ol man, mo long ol haos blong yufala, mi mi no haedem sam samting we i save givhan long yufala.” Long fasin ya mo long plante narafala fasin, hem i ‘talemaot long ol laen blong Isrel mo long ol narafala man, se oli mas tanem tingting blong olgeta from ol sin blong olgeta blong kam long God, mo oli mas bilif long Jisas, Masta blong yumi.’ (Wok 20:​18, 20, 21) Long taem ya, ol hed gavman blong Rom oli pulum ol man blong wosipim aedol, mo ol man oli “strong blong mekem wosip long plante god.” Taswe oli rili nidim blong harem gud nius. Yes, oli mas hareap blong lukaot trufala God ya we “i mekem wol ya, mo olgeta samting we oli stap long hem,” from we Hem i stap talem long “evriwan long evri ples se, ‘Yufala evriwan i mas tanem tingting blong yufala from ol sin blong yufala.’”​—Wok 17:​22-31.

Long taem blong yumi, i impoten moa blong kasem ol man wetem gud nius, from we en blong rabis fasin blong wol ya i stap kam kwik. Laef blong olgeta man i stap long denja. Taswe yumi mas hadwok moa naoia, bifo we en i kam. Sipos yumi luksave samting ya, bambae yumi traehad blong prij moa long ol haos wanwan. Bambae yumi luksave se i no gat wan narafala rod we i gud moa, blong faenem ol man we oli hanggri from trutok. Long taem blong Jisas mo ol aposol, fasin ya blong prij long ol haos wanwan i karem plante frut, mo long taem blong yumi i sem mak. Taem yumi yusum rod ya, yumi harem gud.​—Mak 13:10.

?Olsem wanem long yu? ?Nomata wanem samting i hapen long laef blong yu, yu yu stap mekem bes blong yu blong joen fulwan long wok blong prij long ol haos wanwan? Sipos yu stap tekem evri janis blong mekem olsem, mifala i save se yu yu stap kasem glad mo harem gud long wok blong God. (Esik. 9:11; Wok 20:35) Ating yu harem se wok blong prij long ol haos wanwan i no isi long yu. Maet bodi blong yu i no strong tumas, no maet yu mas prij long ol man we oli no glad blong lesin. Maet gavman i putum tabu long sam haf blong wok blong yumi, nao i hadwok blong prij. Ating yu yu man blong sem ale i had long yu blong statem ol storian wetem olgeta we yu no save olgeta. Taswe, ating evri taem yu joen long wok blong prij long ol haos wanwan, yu mas winim filing ya blong fraet. Be yu no mas letem samting ya i blokem yu. (Eks. 4:​10-12) Plante Kristin brata sista long ol narafala ples long wol oli fesem semkaen trabol.

Jisas i mekem promes long ol disaepol blong hem se bambae hem i stap wetem olgeta “oltaem, gogo wol ya i finis.” (Mat. 28:20) Promes ya i leftemap tingting blong ol disaepol blong hem tede mo i mekem olgeta oli strong blong gohed long wok blong mekem ol disaepol. Yumi no mas fraet, be yumi mas mekem tingting blong yumi i strong olsem Pol we i talem long Filipae 4:13 (NW), se: “Mi mi naf blong mekem evri samting long paoa blong Hemia we i stap givim paoa long mi.” Joen fulwan long plan blong kongregesen evri wik blong go prij long ol haos wanwan. Taem yu go prij wetem ol narafala, bambae oli leftemap tingting blong yu mo oli givhan long yu, blong yu save toktok gud wetem ol man mo seremaot ol buk mo magasin. Yu mas prea long Jeova blong bilif blong yu i kam strong moa, nao bambae yu yu naf blong winim olgeta trabol we i save blokem yu, mo blong wok strong moa blong talemaot gud nius.​—Luk 17:5.

Taem yu stap talemaot gud nius long ol narafala, bambae yu gat janis blong eksplenem from wanem yu yu bilif olsem, mo bambae bilif blong yu i kam strong moa tu. (1 Pita 3:15) Bambae yu yu luksave moa, olsem wanem ol man we oli putum tingting blong olgeta i stap strong long Kingdom blong God oli defren long ol man we oli no mekem olsemia. Taem yu faenem sam man we oli glad blong harem tok blong Kingdom, mo yu lukluk fasin blong olgeta we oli no wantem harem, bambae yu yu kasem save gud long ol tok we Jisas i talem long ol disaepol blong hem long Matiu 10:​11-14. Bambae yu harem gud se yu bin obei long tok blong Jisas blong ‘letem laet blong yu i saenaot.’ Mo maet bambae yu gat janis blong givhan long samfala blong oli kasem save long trutok we i save lidim olgeta blong kasem laef blong olwe.​—Mat. 5:16; Jon 17:3; 1 Tim. 4:16.

Ol kongregesen oli mekem plan blong prij long ol haos wanwan long wiken mo long ol dei blong wik tu. Long sam ples we i no gat plante man oli stap long haos long dei, kongregesen i putum sam taem blong prij long sapa. Oli faenem se ol man oli glad moa blong storian long aftenun no long sapa, i bitim long moning. Mo tu, i gat sam narafala rod blong prij we maet oli karem frut long ples blong yu.

FAENEM OLGETA WE OLI WANTEM LESIN

Jisas i talem long ol disaepol blong hem se oli mas “faenem” olgeta we oli wantem harem gud nius. (Mat. 10:11) I no long ol haos wanwan nomo we hem i faenem ol man we oli wantem lesin. Hem i tekem janis blong prij long evri ples. (Luk 8:1; Jon 4:​7-15) Ol aposol tu oli prij long ol man long ol defren ples.​—Wok 17:17; 28:​16, 23, 30, 31.

Tede tu, yumi wantem talemaot gud nius blong Kingdom long olgeta man. Blong mekem olsem, yumi mas folem fasin blong Jisas mo ol disaepol blong hem. Mo tu, yumi mas luksave ol samting we oli stap jenis long wol ya mo long laef blong ol man long ples blong yumi.​—1 Kor. 7:31.

Antap long wok blong prij long ol haos wanwan, yumi mas traem faenem ol man long ol narafala ples. Plante pablisa oli kasem gudfala frut taem oli prij long ol stoa mo ofis. Long plante kantri, ol Witnes oli luk se i gud blong prij long rod, long ol ples blong spel, ol ples blong putum trak, long bas mo plen, mo long ol narafala ples we i gat man. Olsem nao, oli save prij long plante man we oli no faenem olgeta long haos blong olgeta.

Wan gudfala rod blong prij long ol man, i blong givim Wajtaoa mo Wekap! long olgeta. Yumi toktok long kaen mo kwaet fasin, mo storian long wan haf blong magasin we i pulum tingting blong olgeta. Sipos man i intres, yumi save soemaot wan long ol narafala buk blong stadi long Baebol, mo mekem plan blong go luk hem bakegen long haos blong hem. Kingdom Wok Blong Yumi i givim advaes long saed ya, mo i leftemap tingting blong yumi blong joen long olgeta haf blong wok blong prij. Maet yu haremgud blong traem sam niufala fasin blong prij, olsem prij long ol pablik ples.

God i givim wok long ol Kristin tede blong talemaot wan woning long ol man, mo blong talemaot gud nius long olgeta. Be i no hemia nomo. Sipos yu rili wantem halpem ol narafala blong oli bilif long trutok we i save givim laef long olgeta, yu mas gobak plante taem blong visitim olgeta. Olsem nao, oli save gohed gogo oli kam ol strong Kristin.

MEKEM OL VISIT

Jisas i talem long ol man blong hem se: “Bambae yufala i mas go talemaot mi . . . gogo yufala i finisim olgeta ples long wol.” (Wok 1:8) Hem i talem tu se: “Yufala i mas go long ol man long olgeta ples long wol, blong pulum olgeta oli kam man blong mi. . . . Mo yufala i mas tijim olgeta blong oli folem olgeta tok ya we mi mi givim finis long yufala.” (Mat. 28:​19, 20) Yumi save faenem bigfala glad long wok blong Jeova taem yumi gobak blong visitim man we i intres. Wan man we i laekem gud nius long fastaem we yu storian long hem, ating bambae hem i glad sipos yu kambak blong luk hem bakegen. Yu save serem sam moa save blong Baebol wetem hem, nao bambae yu mekem bilif blong hem i kam strong moa, mo bambae yu givhan long hem blong luksave se hem i nidim tok blong God olsem kakae. (Mat. 5:3) Sipos yu yu mekem plan blong gobak long wan taem we i stret long man ya mo yu reregud fastaem, maet yu save statem wan Baebol stadi wetem hem. Taem yu mekem ol visit, yu mas putum mak ya blong statem Baebol stadi. Yumi no “planem” sid blong trutok nomo, be yumi mas “wasem” tu.​—1 Kor. 3:​6, NW.

Maet samfala oli faenem se i hadwok blong mekem ol visit. Ating yu yu save finis olsem wanem blong storian long ol man long ol haos wanwan, mo yu harem gud blong mekem wok ya. Be taem yu wantem gobak blong storian moa long Baebol, maet yu harem se yu no naf. Yu no mas tingting olsemia. Ating yu bin givim wan buk long wan man we i intres long faswan taem we yu bin storian long hem. Taem yu gobak, yu save soemaot sam save long buk ya. Yu mas rere gud fastaem. Sipos yu ting se yu no naf, yu save tekem wan narafala pablisa i go wetem yu blong givhan long yu.

Ogenaesesen blong Jeova i halpem ol pablisa blong oli gat gudhan blong mekem ol visit. Yu wan yu mas tekem evri janis blong kasem save moa long ol tok blong Baebol. Trastem Jeova, mo stap glad long help we ol brata sista we oli prij longtaem finis oli givim long yu. Long fasin ya, bambae yu save kamgud moa blong mekem ol visit, mo bambae yu glad moa.

OL BAEBOL STADI

Filip, wan man blong prij long taem bifo, i toktok wetem wan man we i intres long ol tok blong Baebol. Filip i askem long hem se: “?Olsem wanem? ?Yu yu save mining blong tok ya we yu stap ridim?” Man ya i ansa se: “?Bambae mi mi save olsem wanem? I no gat man blong i talemaot mining blong hem long mi.” Ol Wok japta 8 i talem se Filip i stat long vas ya blong Baebol we man ya i stap ridim, “i talemaot gud nius blong Jisas long hem.” (Wok 8:​26-36) Yumi no save sipos Filip i storian longtaem wetem man ya no olsem wanem. Be hem i tijimgud man ya long gud nius, mekem se man ya i bilif mo i wantem baptaes long wota blong kam wan disaepol blong Jisas Kraes.

Taem yumi faenem wan man we i intres long gud nius, maet hem i no save gud ol tok blong Baebol. Ating yumi mas gobak plante taem mo stadi wetem hem blong plante wik, plante manis, wan yia no ating bitim wan yia, blong hem i save gat strong bilif mo kam naf blong tekem baptaes. Be sipos yu soemaot longfala tingting mo lav taem yu givhan long ol man ya we hat blong olgeta i stret blong oli kam disaepol, bambae yu kasem bigfala glad. Jisas i talem se: “Man we i stap givim presen i go, hem i save harem gud moa, i winim man we i stap kasem presen blong hem.”​—Wok 20:35.

Bambae i isi moa blong mekem Baebol stadi long wan man, sipos yu yusum wan buk we ol Witnes blong Jeova oli wokem blong stadi long hem. Yu save kamgud moa blong tijim ol man mo halpem olgeta blong kam disaepol blong Jisas Kraes, sipos yu folem fasin blong pablisa we i mekem stadi long yu bifo, no yu askem wan narafala brata no sista we i tijgud blong i givhan long yu.

Sipos yu nidim help blong statem mo mekem ol Baebol stadi, yu save askem wan elda blong kongregesen no wan narafala Witnes we i gat gudhan blong mekem ol Baebol stadi, blong i givhan long yu. Bambae hem i save halpem yu blong folem ol advaes long Kingdom Wok Blong Yumi we oli mekem pleplei long hem long Miting Blong Kingdom Wok. Antap long samting ya, yu mas trastem Jeova, mo yu mas prea blong askem hem blong givhan long yu. (1 Jon 3:22) Yes, yu mas joen fulwan long wok blong pulum ol man oli kam disaepol, mo traem putum mak blong mekem wan Baebol stadi, antap long stadi we yu stap mekem wetem ol pikinini blong yu. Taem yu mekem ol Baebol stadi, yu kasem moa glad long wok blong prij.

LIDIM OL MAN OLI KAM LONG OGENAESESEN BLONG JEOVA

Taem yumi mekem ol Baebol stadi mo givhan long ol man blong oli kam disaepol blong Jisas Kraes, oli kasem save long Jeova God mo oli joen long kongregesen. Ol kongregesen oli folem tiokratik oda blong mekem wok blong Jeova. Sipos yumi halpem olgeta we yumi mekem stadi long olgeta blong oli luksave mo wok wetem ogenaesesen blong Jeova, bambae oli gohed gud mo kam bigman long saed blong spirit. I impoten we yumi tijim olgeta olsem wanem blong mekem olsem.

Blong tijim olgeta, yu save yusum ol vidio kaset mo buk we ogenaesesen i wokem. Sam save long japta 4 blong buk ya bambae i halpem yu tu.

Taem yu jes stat blong mekem stadi long wan man, yu save givhan long hem blong luksave se Jeova i stap yusum wan ogenaesesen blong mekem wok blong hem long wol ya. Tokbaot ol gudfala buk we ol Witnes blong Jeova oli yusum blong stadi Baebol. Eksplenem olsem wanem ol Witnes we oli givim laef blong olgeta i go long Jeova, oli wok fri nomo blong printim mo givimaot ol buk ya long ol man long olgeta ples long wol. Singaot man ya i kam wetem yu long Buk Stadi. Tekem hem i goraon long ol brata sista blong sekhan long olgeta, mo eksplenem olsem wanem ol Witnes blong Jeova oli mekem ol miting blong olgeta long Haos Kingdom. Leftemap tingting blong hem blong kam long ol miting. Long taem blong seket mo distrik asembli, givhan long hem blong save sam narafala Witnes. Long taem ya mo long sam narafala taem bakegen, givhan long ol niuwan blong luksave olsem wanem ol man blong Jeova oli soemaot lav we i makemaot ol trufala Kristin. (Jon 13:35) Taem olgeta we oli intres long trutok oli lanem blong tinghae long ogenaesesen blong Jeova, bambae oli gohed kwik moa blong save Jeova.

YUSUM OL BUK BLONG YUMI

Ol faswan Kristin oli wok strong blong talemaot Tok blong God. Oli mekem ol kopi blong Baebol blong olgeta wanwan oli save stadi long hem, mo blong oli save yusum long kongregesen. Oli pulum ol narafala blong ridim trutok blong God. Oli no gat plante kopi blong Baebol we oli raetem wetem han blong olgeta, taswe oli rili tinghae long ol kopi ya. (Kol. 4:16; 2 Tim. 2:15; 3:​14-17; 4:13; 1 Pita 1:1) Long taem blong yumi, ol Witnes blong Jeova oli yusum ol mesin blong printim plante milian Baebol long plante lanwis, wetem plante handred milian buk, magasin, mo traket we oli eksplenem Baebol.

Taem yu stap talemaot gud nius long ol man, yu mas yusumgud ol buk blong ‘slef we i stret mo waes’ blong mekem Baebol stadi long olgeta. (Mat. 24:​45, NW) Evri manis, Kingdom Wok Blong Yumi i talem wanem buk bambae yumi seremaot long wok blong prij. Mo i gat plante dei blong manis we yu save go seremaot ol magasin, olsem ol spesel dei we kongregesen i makemaot blong mekem wok ya.

Faswan wok blong ‘slef we i stret mo waes’ i blong givimaot kakae long saed blong spirit long ol man blong God long stret taem blong hem. “Slef ya” i folem fasin blong Jeova blong givim presen long gladhat blong hem, taem i givim fulap kakae long saed blong spirit blong givhan long ol man we oli hanggri from save blong God. Yu wan yu bin luk olsem wanem ol buk blong ol Witnes blong Jeova oli givhan long yu taem yu ridim mo stadi long olgeta. Taswe, bambae yu yu wantem tumas blong serem save ya wetem ol narafala. (Hib. 13:​15, 16) Nating se ol niu pablisa nomo, be taem oli yusum ol buk ya long wok blong prij, oli save mekem gudfala wok.

TEKEM EVRI JANIS BLONG PRIJ

Jisas i talem long ol man we oli harem ol tok blong hem se: “Yufala i olsem laet long ol man long wol. . . . Yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao, bambae olgeta oli save leftemap nem blong Papa blong yufala, we i stap long heven.” (Mat. 5:​14-16) Ol disaepol ya oli mas folemgud fasin blong Jeova long laef blong olgeta. Blong mekem olsem, oli mas folem fasin blong Jisas Kraes. Hem i talem se: “Mi nao, mi olsem laet blong ol man long wol.” Jisas i givim eksampol long olgeta Kristin taem hem i letem “laet blong laef” i saenaot i kasem ol man we oli glad blong lesin long tok blong hem.​—Jon 8:12.

Aposol Pol tu i givim eksampol long yumi. (1 Kor. 4:16; 11:1) Taem Pol i stap long Atens, evri dei hem i prij long ol man we oli stap long ples blong maket. (Wok 17:17) Ol Kristin long Filipae oli folem fasin blong Pol, ale Pol i talem long olgeta se ‘oli stap saenaot olsem laet long wol, long medel blong ol man we oli kruked mo krangke nomo.’ (Fil. 2:15) Long taem blong yumi tu, yumi save letem trutok blong Kingdom i saenaot olsem laet, sipos yumi tekem evri janis blong talemaot gud nius tru long ol toktok mo fasin blong yumi. Tru ya, gudfala fasin blong yumi blong no giaman mo stil mo blong mekem i stret, i save pulum ol man blong luksave se yumi defren long ol narafala man. Be sipos yumi toktok tu, mo talemaot gud nius long olgeta ya we oli luk gudfala fasin blong yumi, bambae oli kasem save from wanem yumi defren long ol narafala man.

Plante Witnes blong Jeova oli talemaot gud nius long ol man we oli luk olgeta evri dei long ples blong wok, long skul, mo long ol narafala ples we oli go long hem. Taem yumi stap wokbaot long sip no plen blong go long narafala ples, yumi save toktok long ol man we oli stap klosap long yumi. Yumi wanwan i mas lukaot janis blong jenisim storian i go long trutok, mo oltaem yumi mas rere blong talemaot gud nius long ol man.

Nomata weples no wetaem yumi prij, yumi stap presem God mo leftemap nem blong hem. Sipos yumi tingbaot samting ya, bambae yumi rere oltaem blong serem gud nius wetem ol man. Mo maet yumi save givhan long ol man we hat blong olgeta i stret, blong oli save Jeova, nao olgeta tu oli save mekem wok blong hem mo kasem janis blong laef olwe, from we oli bilif long Jisas Kraes. Olgeta wok ya oli tabu wok blong God, mo hem i glad long olgeta.​—Hib. 12:28; Rev. 7:​9, 10.

OL TERITORI BLONG PRIJ

Jeova i wantem we i gat oda long fasin blong yumi blong karem gud nius blong Kingdom i go long ol man long taon mo long bus. Taswe long evri kantri, branj ofis i makemaot teritori blong ol kongregesen wanwan mo blong ol pablisa we oli stap long ples we i no gat kongregesen. (1 Kor. 14:40) Bifo, God i talem long ol aposol se oli mas mekem sem mak. (2 Kor. 10:13; Gal. 2:9) Naoia yumi stap long ol las dei mo wok blong talemaot Kingdom i stap kam antap bigwan. Sipos yumi folem wan gudfala plan long saed blong teritori, yumi no save mestem nao yumi go prij long wan ples we sam narafala pablisa oli jes prij long hem. From we yumi no westem taem olsem, yumi save kasem plante moa man wetem gud nius.

Elda we i lukaot long wok blong prij i lukaot long ol teritori tu. Be maet wan man blong givhan i halpem hem blong givimaot ol teritori long ol pablisa mo makem long pepa. Sipos i no gat plante teritori, ol elda we oli lukaot long ol Buk Stadi oli holem teritori we ol pablisa long Buk Stadi blong olgeta i save prij long hem.

Sipos kongregesen blong yu i gat plante teritori, maet yu wantem kasem wan prapa teritori blong yu, ating wan teritori klosap long haos blong yu. Olsem nao, bambae yu no lusum plante taem blong wokbaot i go longwe long teritori, mo yu save gat moa taem blong prij. Sipos yu wantem, yu save singaot wan narafala pablisa blong i wok wetem yu long teritori ya.

Blong kasem wan teritori blong yu, yu save go luk brata we i lukaot long teritori mo askem wan teritori we i no gat narafala pablisa i stap wok long hem. Evri taem we yu wokem teritori ya, yu mas talemaot long brata ya. Sloslo bambae yu savegud ol man long teritori blong yu. Sipos yu mekem tingting blong yu i longfala, ating bambae yu kasem bigfala blesing ya blong givhan long samfala blong oli luksave rod we Jeova i stap yusum blong sevem ol man.

Yu mas traehad blong faenem evri man long teritori blong yu. Sipos wan haos i no gat man, yu mas gobak bakegen. Sipos wan man i intres long gud nius blong Kingdom, yu mas gobak bakegen blong halpem man ya blong i kasem moa save. Sam samtaem, Kingdom Wok Blong Yumi i givim advaes olsem wanem blong yusum Baebol, ol buk, ol magasin, ol traket, mo ol narafala samting we ‘slef we i stret mo waes’ i givim long yumi. Maet samfala long teritori blong yu oli stap long ol vilej no stori haos we oli blokem ol narafala man blong kam insaed. Sipos i olsem, yu save raetem wan leta long ol man long ples ya, no yu save yusum telefon blong toktok long olgeta, no yu save faenem olgeta long wan narafala ples, maet taem yu prij long rod. Elda we i lukaot long wok blong prij mo elda we i lukaot long Buk Stadi blong yu, tufala i save givim advaes long samting we yu save mekem we i laenap gud wetem ples blong yu mo ol samting long laef blong yu.

Sipos olgeta long kongregesen oli wok gud tugeta, oli save prij long olgeta ples long teritori blong kongregesen, mo oli save givim wan gudfala witnes. Mo tu, ol pablisa bambae oli no pas tu taem long wan haos, fasin ya we i save mekem tingting blong ol man i fasfas no mekem oli kros. Olsem nao, yumi soemaot se yumi tingbaot ol Kristin brata sista, mo ol man long teritori tu.

PRIJ LONG OL MAN BLONG NARAFALA LANWIS

Olgeta man oli nidim save long saed blong Jeova God, Pikinini blong hem, mo Kingdom blong hem. (Rev. 14:​6, 7) Yumi wantem halpem ol man long teritori blong yumi we oli toktok narafala lanwis, blong oli singaot long Jeova, oli yusum nem blong hem, mo oli folem Kristin fasin blong laef. (Rom 10:​12, 13; Kol 3:​10, 11) Be i gat ol problem mo traem we yumi mas winim blong talemaot gud nius long ol man ya. ?Olsem wanem yumi save winim ol problem ya long wan gudfala fasin we i soem lav?

Ol Kristin oli mas mekem long ol narafala olsem we oli wantem se ol narafala bambae oli mekem long olgeta. (Mat. 7:12) Taem yumi glad blong tekem ol man blong narafala kantri no lanwis oli kam joen wetem yumi, yumi soemaot se yumi rili kea long olgeta. (Rom 15:7) I impoten we yumi holem tingting olsemia, taem yumi talemaot gud nius long ol man we oli toktok narafala lanwis, from we samting ya i givhan long yumi blong gat sem tingting olsem God long saed blong olgeta.​—Wok 10:​34, 35; 17:26.

Taem yu mitim wan man long teritori we i toktok narafala lanwis, traem faenemaot wanem lanwis we hem i save ridim. Serem save long smol buk ya Good News for People of All Nations wetem hem. Sipos i gat wan kongregesen no wan grup klosap we i toktok lanwis ya, ating yu save mekem plan blong man ya i mitim olgeta. Maet i gat wan pablisa long kongregesen blong yu we i toktok lanwis blong man ya mo i save gobak blong luk hem. Sipos no, talem long hem se bambae yu traem kasem wan buk long lanwis blong hem. Yu save askem long brata we i lukaot long ol buk sipos i gat wan buk long lanwis blong man ya.

Sam pablisa oli lanem blong toktok smol long wan lanwis, blong oli naf blong storian smol wetem man long Baebol. Samfala oli go moa, oli lanem blong mekem stadi wetem narafala, oli yusum wan buk blong yumi we i stap long lanwis blong man ya. Sipos yumi yusum ol pija mo yumi askem long man ya blong ridim ol vas we oli stap, bambae hem i kasem ol stamba save blong Baebol. Maet i gat wan memba blong famle blong hem we i save tanem tok blong yu i go long lanwis blong hem.

From we wok blong yumi i blong pulum ol man oli kam disaepol blong Jisas, yumi mas leftemap tingting blong man ya blong kam long ol miting long lokol kongregesen, sipos i no gat miting long prapa lanwis blong hem. Fasin blong joen wanples wetem ol Kristin, hemia nomo i naf blong leftemap tingting blong hem mo givhan long hem blong gohed moa.

Taem i gat plante man lelebet long teritori blong kongregesen we oli toktok wan lanwis, ol elda oli mas traem bes blong olgeta blong mekem plan blong samfala oli prij long ol man ya. Maet sam man we oli toktok lanwis ya oli stap long teritori blong sam narafala kongregesen raonabaot tu. Sipos i olsem, seket elda bambae i givim advaes blong halpem ol kongregesen blong oli wok tugeta blong prij long ol teritori ya. Wanwan taem, maet lanwis grup ya i mekem plan blong gat wan pablik tok no Wajtaoa Stadi long lanwis blong olgeta blong luk hamas man bambae oli kam.

Kongregesen i save statem wan grup we i mekem miting long narafala lanwis sipos: (1) I gat sam pablisa no sam man we oli intres, we i isi moa long olgeta blong kasem save long gud nius long lanwis ya. (2) I gat wan elda no man blong givhan we i save lidim miting mo lukaot long miting blong grup ya evri wik. (3) I gat wan grup blong ol elda we oli glad blong gat grup blong narafala lanwis long kongregesen blong olgeta. Taem i gat trifala samting ya, ol elda oli save talemaot long branj ofis, nao Sosaeti bambae i luksave grup ya mo i givim moa advaes long saed ya.

Plante grup olsem, oli stat fastaem blong mekem Buk Stadi evri wik. Biaen, ol elda oli save agri se oli mekem sam narafala miting, olsem Pablik Tok mo Wajtaoa Stadi. Sipos i gat wan elda no man blong givhan we i toktok lanwis ya mo i naf blong givim advaes long ol studen long Tiokratik Skul, ale, taem grup ya i joen wetem kongregesen blong mekem miting ya, oli save go long wan narafala rum blong Haos Kingdom blong mekem Tok namba 2, 3, mo 4 long prapa lanwis blong olgeta. Grup ya i save mekem plan tu blong mekem ol miting blong prij tugeta. Ol grup long olgeta lanwis oli save folem rod ya.

Olgeta memba blong grup ya oli wok folem plan blong ol elda long kongregesen we grup ya i stap long hem. Ol elda ya oli mas gat fasin blong skelemgud ol samting blong oli save lidimgud grup ya, mo oli mas luksave ol nid blong grup ya. Taem seket elda i visitim kongregesen we grup ya i stap long hem, hem i save mekem plan tu blong wok wetem grup ya. Bambae hem i raetem wan sot ripot i go long branj ofis blong tokbaot olsem wanem grup ya i stap gohed mo ol spesel nid blong hem. Sipos olgeta evriwan we oli wok wetem ol grup we oli toktok narafala lanwis oli folem ol advaes blong Baebol mo ogenaesesen blong Jeova, bambae ol grup ya oli leftemap nem blong Jeova.​—1 Kor. 1:10; 3:​5, 6.

WOKEM TERITORI BLONG OL DEFREN LANWIS

Long ol bigfala taon, ol pablisa blong ol wanwan kongregesen oli mas traehad blong faenem ol man we oli toktok lanwis blong kongregesen blong olgeta, from we wanwan kongregesen i kasem teritori we i stret long lanwis blong hem. Sipos i gat plante kongregesen blong ol defdefren lanwis we oli wok long semfala teritori, ol elda we oli lukaot long wok blong prij long ol kongregesen ya oli mas mekem wan plan we evri kongregesen i agri long hem, blong wokem teritori ya mo blong lidim ol man oli kam long kongregesen we i stret long lanwis blong olgeta. Maet sam pablisa blong wan lanwis oli wok long sem teritori wetem sam pablisa blong narafala lanwis long semfala moning no aftenun. Taswe, i nidim wan gudfala plan blong oli no “mekem wan samting we i save blokem gud nius blong Kraes.”​—1 Kor. 9:12.

Taem ol pablisa blong wan kongregesen oli tekem janis blong prij no oli prij long rod, oli save serem ol buk long ol defdefren lanwis. Be taem oli prij long ol haos wanwan, oli mas yusum ol buk long lanwis blong kongregesen blong olgeta nomo. Yumi no mas fogetem se wanwan kongregesen long ol ples olsem, i gat teritori we i stret long lanwis blong hem, taswe sipos pablisa i lego wan buk wetem wan man blong narafala lanwis, hem i save talemaot long man ya ol miting blong kongregesen we i stap long lanwis blong hem. (1 Kor. 14:9) Sipos yumi prij nomo long ol man we oli toktok lanwis blong kongregesen blong yumi, yumi save givhan long plante moa man blong oli kasem laef.

JOEN OLSEM WAN GRUP BLONG PRIJ

Wok blong olgeta Kristin we oli givim laef blong olgeta i go long Jeova finis, i blong serem gud nius wetem ol narafala. I gat plante rod blong mekem olsemia. Be bighaf blong yumi i laekem moa blong joen wetem sam narafala blong go prij. (Luk 10:1) From samting ya, ol kongregesen oli mekem ol miting blong prij long ol wiken mo long ol dei blong wik. Ol pablik holide tu oli gudfala janis blong joen olsem wan grup blong prij, from we plante brata sista oli no wok long ol dei ya. Kongregesen i save mekem ol miting blong prij long wan taem mo ples we i stret long ol pablisa. Maet oli mekem ol miting ya long Haos Kingdom, long ol haos we i gat Buk Stadi evri wik, no long sam narafala ples we oli stret.

Long ol miting blong prij, oli save mekem plan blong samfala oli givhan long olgeta we oli jes stat blong prij. Mo tu, long sam ples i gat sam risen from wanem i moagud we tu pablisa no bitim tu pablisa, oli wok tugeta. Olgeta we oli stap wok tugeta oli save givgivhan long olgeta mo leftemap tingting blong olgeta. Nating se yu gat plan blong wok yu wan long teritori, be i gud blong joen long miting blong prij. Samting ya i save leftemap tingting blong yu mo ol narafala long grup tu. Taem yu save se i gat sam narafala we oli stap prij i no longwe long yu, tingting blong yu i strong moa.

!Yumi evriwan i mas folem eksampol we Jisas mo ol aposol oli soemaot! Yumi save sua se Jeova bambae i blesem yumi sipos yumi traehad fulwan blong joen long impoten wok ya blong talemaot gud nius blong Kingdom.​—Luk 9:​57-62.