Refrens Blong Kristin Wok Mo Laef Buk Blong Miting
1-7 EPREL
OL GUDGUDFALA SAMTING LONG BAEBOL | 1 KORIN 7-9
“Stap Singel—Wan Presen”
Yu Save Yusum Gud Laef Blong Yu Taem Yu No Mared
3 Plante taem, wan man we i no mared i gat moa taem i bitim man we i mared, mo hem i fri moa blong mekem samting we hem i wantem. (1 Kor. 7:32-35) Hemia ol spesel blesing we oli givim janis long hem blong mekem moa long wok blong prij, go moa blong lavem ol man, mo kam klosap moa long Jehova. From samting ya, plante Kristin we oli no mared oli lanem blong tinghae long ol blesing we oli gat. Mo oli jusum blong “holem tok ya” se bambae oli no mared, nating sipos i blong sam yia nomo. Sam narafala, maet oli no mekem plan fastaem blong stap olsem nomo we oli no mared. Be sam samting long laef blong olgeta i jenis. Ale, oli prea long Jehova mo oli tingting gud long laef blong olgeta, nao oli luksave se tingting blong olgeta tu i save stap kwaet, sipos Jehova i givhan long olgeta. Taswe, oli no letem tingting blong olgeta i trabol from ol jenis ya, be oli holem tok ya se bambae oli no mared.—1 Kor. 7:37, 38.
w08 1/7 pej 11 haf 1
Ol Bigfala Poen Long Ol Leta Long Ol Man Korin
7:33, 34—?Wanem “ol samting blong wol” we ol mared man mo woman oli stap tingbaot? Pol i stap tokbaot ol samting we ol mared Kristin oli mas tingbaot evri dei, ol samting olsem kakae, klos, mo ples blong slip. Be long ples ya Pol i no minim ol nogud samting blong wol ya we ol Kristin oli no mas laekem nating.—1 Jon 2:15-17.
w96 15/10 pej 13 haf 14
Livim Mared—Wan Rod Blong Mekem Moa Wok We i Nogat Narafala Tingting i Pulum Yumi
14 Wan Kristin we i livim mared blong ronem ol samting we hem nomo i wantem, hem i no stap mekem i “gud moa” bitim ol Kristin we oli mared finis. Hem i livim mared, i no “blong mekem ol wok blong God,” be blong mekem ol wok blong hem wan nomo. (Matiu 19:12) Man no woman we i no mared, i mas “tingbaot moa long ol samting blong Masta,” mo i mas “stap lukaot rod blong mekem Masta blong hem i glad.” Mo hem i mas ‘mekem wok blong Masta blong yumi, we i no gat narafala tingting i pulum hem.’ Samting ya i minim se hem i mas mekem wok blong Jehova mo Jisas Kraes wetem olgeta tingting blong hem. Long rod ya nomo, ol Kristin man mo woman we oli no mared oli save mekem “i gud moa” bitim ol Kristin we oli mared.
Traem Fanem Ol Gudgudfala Samting Ya
lvs pej 251
Ol not
Samtaem, sam Kristin oli tekem desisen blong seraot wetem hasban o waef blong olgeta, nating se hasban o waef blong hem i no mekem rabis fasin blong seks. (1 Korin 7:11) Hemia sam samting we i save mekem se wan Kristin i seraot long hasban o waef blong hem.
• Man i no wantem givim samting we famle blong hem i nidim: Hasban i no wantem givim samting we famle blong hem i nidim, kasem mak ya we famle i no moa gat mane mo kakae.—1 Timoti 5:8.
• Kilim nogud narawan: Wan i kilim nogud narawan nao laef blong hem i stap long denja.—Galesia 5:19-21.
• Blokem fulwan wosip blong Jehova: Wan hasban o waef i blokem fulwan wosip we narawan i mekem long Jehova.—Ol Wok 5:29.
w00 15/7 pej 31 haf 2
Yu Save Stap Klin Long Wan Wol We i Doti
Ol yangfala oli no mas hareap blong mared taem hem i fastaem blong oli gat ol strong filing long saed blong seks. Mared i wan promes blong olwe, mo blong holem promes ya wan man i mas kam bigman long saed blong tingting. (Jenesis 2:24) I moa gud blong wet kasem taem we wan “i pastru long yangtaem blong hem”—hemia taem we ol filing long saed blong seks oli strong mo oli save spolem fasin we man i gat blong skelem gud ol samting. (1 Korin 7:36) !I no waes nating, mo i wan sin, sipos wan bigman we i wantem tumas blong mared, i mekem nogud long saed blong seks wetem wan narafala jes from we hem i no faenem yet wan stret wan blong mared wetem!
KAMGUD MOA LONG WOK BLONG PRIJ
Kwestin
w12 15/11 pej 20
?Ol tok blong Jisas long Matiu 19:10-12 i soem se olgeta we ol singel oli kasem presen ya long wan spesel rod?
Traem tingbaot, taem Jisas i talem ol tok ya long saed blong fasin blong stap singel. Taem ol Farisi oli kam long hem mo oli tokbaot topik blong divos, Jisas i talemaot klia tingting blong Jehova long saet blong mared. Nating se loa i givim raet long man blong raetem wan leta blong mekem divos long waef blong hem “from we i faenem wan samting long hem we i no laekem hem from,” be hemia i no tingting blong God long stat. (Dut. 24:1, 2) Nao Jisas i talem se: “Man we i divosem waef blong hem, we waef ya i no mekem enikaen doti fasin blong seks, nao man ya i go mared long narafala woman, hem i mekem adaltri.”—Mat. 19:3-9.
Taem ol disaepol oli harem ol tok ya, oli talem se: “Sipos laef blong mared i olsem, i moa gud man i no mared.” Be Jisas i talem long olgeta se: “I no olgeta man we oli save folem tok ya. Be hemia wan presen we God i givim long olgeta ya nomo we oli naf blong folem. Sam man oli no save mared from we ol man oli mekem natamap long olgeta. Sam narafala oli no save mared from we taem oli bon, bodi blong olgeta i olsem finis. Mo sam narafala bakegen oli no mared from we oli wantem mekem ol wok blong Kingdom blong heven. Sipos wan man i no wantem mared, hemia i gud nomo.”—Mat. 19:10-12.
Samfala oli no save mared, from we oli nogat filing ya o maet oli kasem aksiden o wan man i bin spolem bodi blong olgeta. Be samfala oli no save mared from we ol man oli mekem natamap long olgeta. Mo samfala oli livim mared blong oli gat moa taem blong mekem moa long wok “blong Kingdom blong heven.” Olsem Jisas, oli jusum blong stap singel nao oli save mekem moa long wok blong Kingdom. Hemia i no wan presen we oli bon wetem. Olgeta nomo oli jusum blong stap singel. Taswe oli tingting gud bifo we oli mekem desisen ya.
Folem samting we Jisas i talem, aposol Pol i eksplenem se olgeta Kristin, nating se oli singel o oli mared, God i glad long wok we oli mekem. Be olgeta we oli singel, ‘tingting blong olgeta i kwaet’ mo oli save “mekem i gud moa.” ?Olsem wanem oli save mekem samting ya? Olgeta we oli mared oli mas tingbaot mo kea long man o woman blong olgeta. Be olgeta we oli singel, oli save mekem moa long wok blong Masta we i nogat samting i blokem olgeta. Oli luk samting ya olsem wan “presen” we i kam long God.—1 Kor. 7:7, 32-38.
Taswe Baebol i talem se, wan Kristin i no kasem presen blong stap singel long wan spesel rod. Defren olgeta, hem i jus blong stap singel from we hem i wantem mekem moa long wok blong Kingdom we i no gat samting i blokem hem. From samting ya, plante Kristin oli jusum blong stap singel mo ol narafala oli mas leftemap tingting blong olgeta.
8-14 EPREL
OL GUDGUDFALA SAMTING LONG BAEBOL | 1 KORIN 10-13
“Jehova i Stap Holem Promes Blong Hem”
Kwestin
Aposol Pol i raetem se Jehova i “no save letem wan samting i traem yumi, we i strong tumas long yumi.” (1 Korin 10:13) ?Hemia i min se Jehova i save finis wanem trabol we yumi save stanap strong long hem, ale i jusum ol trabol we bambae yumi kasem?
▪ ?Sipos tingting ya i tru, hemia i save mekem wanem long man? Traem tingbaot wan brata we boe blong hem i kilim hem wan i ded. Brata ya i harem nogud bitim mak. Hem i stap tingting se maet Jehova i save finis se hem mo waef blong hem i naf blong stanap strong long trabol ya, ale i letem trabol ya i hapen. Long wol ya, plante long yumi bambae i kasem ol trabol. ?Olsem wanem? ?Yumi mas gat tingting ya se Jehova i stap kontrolem evri samting long laef blong yumi?
Taem yumi luklukgud 1 Korin 10:13, bambae yumi luk se Baebol i no sapotem tingting ya se Jehova i save finis wanem trabol we yumi naf blong stanap strong long hem, nao i jusum trabol we bambae yumi kasem. ?From wanem yumi talem olsem? Bae yumi luk fo risen.
Faswan, Jehova i mekem ol man wetem fasin ya we oli fri blong jus, oli fri blong mekem prapa desisen blong olgeta. Hem i wantem se yumi mekem prapa desisen blong yumi. (Dutronome 30:19, 20; Josua 24:15) Taem yumi mekem desisen we i mekem Jehova i glad, yumi save dipen long hem blong i lidim yumi. (Ol Proveb 16:9) Be taem yumi mekem ol nogud desisen, bambae yumi kasem trabol we i kamaot from. (Galesia 6:7) ?Sipos Jehova i jusum ol trabol we bambae yumi kasem, hemia i min se yumi fri blong jus? Nogat.
Sekenwan, Jehova i no protektem yumi long ol trabol we oli kamaot “enitaem nomo.” (Prija 9:11, NW) Wan man i save kasem wan aksiden from we hem i stap long rong ples, long rong taem. Jisas i tokbaot wan aksiden we i hapen taem wan taoa i foldaon mo i kilim i ded 18 man. Hem i soemaot klia se i no God we i mekem ol man ya oli ded. (Luk 13:1-5) Taswe, i no stret blong gat tingting ya se bifo long wan aksiden, God i jusumaot se hu bambae i laef mo hu bambae i ded.
Namba tri, wanwan long yumi i mas holemstrong long Jehova. Setan i talem se ol man blong Jehova oli mekem wok blong hem, from we hem i stap givim samting long olgeta. Setan i talem se bambae yumi no save holemstrong long Jehova taem yumi kasem ol trabol. (Job 1:9-11; 2:4; Revelesen 12:10) Sipos Jehova i protektem yumi long ol trabol, hemia bambae i soemaot se tok blong Setan i tru.
Namba fo, Jehova i no jusum blong save evri samting we bambae oli hapen long yumi. Sipos Jehova i wantem, hem i naf blong save samting we bambae i hapen long fiuja. (Aesea 46:10) Be Baebol i soemaot se hem i no jusum blong save evri samting we bambae i hapen. (Jenesis 18:20, 21; 22:12) Jehova i gat lav mo stret fasin, taswe hem i letem we yumi fri blong mekem ol desisen blong yumi.—Dutronome 32:4; 2 Korin 3:17.
?Taswe Pol i minim wanem, taem hem i talem se Jehova i “no save letem wan samting i traem yumi, we i strong tumas long yumi”? Long ples ya, Pol i stap tokbaot samting we Jehova i mekem long taem blong trabol, be i no bifo long trabol. Sipos yumi trastem Jehova, bambae hem i givhan long yumi long eni trabol we yumi kasem. (Ol Sam 55:22) Bambae yumi luk tu risen from wanem Pol i talem samting ya.
Faswan risen se, ol samting we oli stap traem yumi, “oli sem mak nomo long ol samting we oli stap traem ol narafala man.” Taem yumi laef long wol blong Setan, bambae yumi gohed blong kasem hadtaem mo trabol tu. Be sipos yumi dipen long Jehova, bambae yumi naf blong stanap strong long ol trabol ya mo holemstrong long Jehova. (1 Pita 5:8, 9) Long ol vas bifo long vas 13, Pol i tokbaot sam trabol we ol man Isrel oli kasem long draeples. (1 Korin 10:6-11) Olgeta we oli dipen long Jehova, oli naf blong stanap strong. Be sam man Isrel oli no obei long Jehova. Oli no holemstrong long hem from we oli no dipen long hem.
Seken risen se, “God i stap holem promes blong hem.” ?Hemia i minim wanem? Taem yumi luk olsem wanem Jehova i lukaotgud long ol man blong hem long taem bifo kasem naoia, yumi luk se hem i gohed blong givhan long “ol man we oli lavem hem, mo oli stap obei long ol tok blong hem.” (Dutronome 7:9) Mo tu, yumi lanem se oltaem Jehova i holemtaet ol promes blong hem. (Josua 23:14) Yumi save sua se (1) Jehova i no save letem eni trabol i kam had tumas nao yumi no moa save stanap strong, mo (2) bambae hem i “mekem rod blong yumi.”
?Olsem wanem Jehova “bambae i mekem rod” blong olgeta we oli dipen long hem? Jehova i naf blong tekemaot trabol. Be tingbaot se, Pol i talem we Jehova ‘bambae i mekem rod blong yumi naf blong stanap strong.’ Taswe, Jehova i mekem rod blong yumi taem hem i givim paoa long yumi blong holemstrong. Bambae yumi tokbaot olsem wanem hem i mekem samting ya:
▪ Jehova “i stap givhan long yumi long olgeta trabol blong yumi.” (2 Korin 1:3, 4) Hem i save yusum Baebol, tabu spirit, mo gudfala slef we i waes blong mekem se yumi gat pis long tingting, hat, mo filing blong yumi.—Matiu 24:45; Jon 14:16; Rom 15:4.
▪ Jehova i save yusum tabu spirit blong lidim yumi. (Jon 14:26) Tabu spirit i save givhan long yumi blong tingbaot ol stori mo ol rul blong Baebol, we oli save givhan long yumi blong mekem ol waes desisen.
▪ Jehova i save yusum ol enjel blong givhan long yumi.—Hibrus 1:14.
▪ Jehova i save yusum ol brata sista blong givhan long yumi. Olgeta oli save mekem no talem sam samting blong mekem yumi strong bakegen.—Kolosi 4:11.
?Yumi lanem wanem long tok blong Pol long 1 Korin 10:13? Jehova i no jusum ol trabol we bambae yumi kasem. Be yumi save sua se sipos yumi trastem Jehova, bambae yumi save stanap strong long eni trabol. Yumi save se Jehova bambae i mekem rod blong yumi save holemstrong long hem.
Traem Faenem Ol Gudfala Samting Ya
Wan Kwestin
?From wanem 1 Korin 10:8 i talem se i gat 23,000 man Isrel we oli ded from oli mekem nogud wetem woman, be Namba 25:9 i talem se 24,000 man i ded?
Maet i gat plante defren risen from wanem namba blong ol man we oli ded, we tufala vas ya i tokbaot, oli no sem mak. Wan long ol risen ya se, maet namba blong ol man we oli ded hem i stap bitwin long 23,000 mo 24,000, taswe taem oli talem tufala namba ya i olsem medel namba nomo.
Tingbaot wan narafala samting. Aposol Pol i tokbaot samting we i hapen long ol man Isrel long Sitim blong givim woning long ol Kristin long Korin bifo. Taon ya blong Korin i fulap long ol nogud fasin. Hem i raetem se: “I nogud yumi stap mekem ol fasin nogud wetem woman, olsem we sam long olgeta ya bifo oli stap mekem nao long wan dei nomo, i gat twanti tri taosen blong olgeta oli ded.” Pol i tokbaot olgeta we Jehova i kilim olgeta i ded from we oli mekem nogud wetem woman, mo i givim namba ya 23,000.—1 Korin 10:8.
Be Namba japta 25 i talem se, ‘ol laen blong Isrel oli stap mekem wosip [“oli fasgud,” NW] long god ya Bal we i god blong ol man Peoro, nao from samting ya, Hae God i kros tumas long olgeta.’ Jehova i talem long Moses blong kilim i ded ‘olgeta lida blong ol laen blong olgeta.’ Ale, Moses i singaot ol jaj we hem i jusumaot olgeta, blong oli mekem olsem we Jehova i talem. Nao taem Finehas i tekem aksen kwiktaem blong kilim i ded wan man Isrel we i tekem wan woman Midian i go long haos tapolen blong hem, ‘hem i blokem rabis sik we i stap spolem ol man, nao sik i finis.’ Stori ya i finis wetem tok ya se: “Be sik ya i kilim twanti fo taosen man finis oli ded.”—Namba 25:1-9.
Namba blong ol man we oli ded we buk blong Namba i givim, i kaontem olgeta ‘lida blong ol laen blong ol man Isrel’ we ol jaj oli kilim i ded folem oda blong Moses, wetem olgeta narafala man ya we Jehova hem wan i kilim olgeta i ded. Maet ol jaj ya oli kilim i ded wan taosen blong ol lida ya, taswe namba ya i kasem 24,000. Maet ol lida ya oli mekem i nogud wetem ol woman, no oli joen long ol lafet, no oli letem ol man Isrel oli mekem nogud, be i sua se ol lida ya oli gat fol from we oli ‘mekem wosip [“oli fasgud,” NW] long god ya Bal we i god blong ol man Peoro.’
Wan buk we i givhan long ol man we oli stadi Baebol, i talem se tok ya “fasgud” i save minim we “man i givim ful laef blong hem i go long narafala.” Ol man Isrel oli givim laef blong olgeta long Jehova. Be taem oli ‘mekem wosip [“fasgud,” NW] long god ya Bal, we i god blong ol man Peoro,’ oli brekem kontrak we oli mekem wetem Hem. Samwe long 700 yia biaen, Jehova i tokbaot ol man Isrel ya long profet Hosea i se: “Nao oli go long hil ya Peoro, mo oli stat mekem wosip long god ya Bal. Oli stap mekem gogo, fasin blong olgeta i kam nogud we i nogud, i olsem fasin blong Bal ya we oli laekem hem tumas.” (Hosea 9:10) I stret nomo we olgeta we oli mekem ol nogud fasin ya oli kasem jajmen blong God. Moses i talem bakegen long ol man Isrel se: “Yufala i luk finis long ae blong yufala nomo ol samting ya we hem i mekem long hil ya Peoro. Olgeta ya we oli go mekem wosip long god ya Bal, hem i kilim olgeta oli ded.”—Dutronome 4:3.
w15 15/2 pej 30
Kwestin
?Wan Kristin sista i mas kavremap hed blong hem taem wan Kristin Brata i joenem hem long wan Baebol stadi?
▪ Long “Wan Kwestin” we i kamaot long Wajtaoa blong 15 Julae 2002, i talem se, taem wan sista i lidim wan Baebol stadi mo wan brata i stap, nating se hem i baptaes o nogat, sista ya i mas kavremap hed blong hem. Be taem yumi stadi gud long poen ya, yumi luk se yumi mas jenisim tingting long yumi.
Sipos wan pablisa i folem wan sista long Baebol stadi blong hem, mo hem i wan brata we i baptaes finis, sista ya i save kavremap hed blong hem. Long rod ya hem i soem se hem i respektem plan we Jehova i putumap long Kristin kongregesen, from we hem i mekem wok we wan brata nao i mas mekem. (1 Kor. 11:5, 6, 10) Sipos no, hem i save askem long brata ya blong i mekem Baebol stadi sipos hem naf blong mekem.
Be nao sipos wan man we i pablisa be i no baptaes yet i folem wan sista long Baebol stadi blong hem, mo pablisa ya i no hasban blong hem, sista ya i no nid blong kavremap hed blong hem. Nating se i olsem, maet sam sista, tingting blong olgeta i stikim olgeta, nao oli harem se oli mas kavremap hed blong olgeta.
22-28 EPREL
OL GUDGUDFALA SAMTING LONG BAEBOL | 1 KORIN 14-16
“God Bambae i Hed Long Olgeta Samting”
“Ded, Bambae i Finis Olgeta”
10 “En blong ol samting ya,” hemia en blong Rul blong Kraes Blong Wan Taosen Yia. Long taem ya, Jisas we i gat tingting daon mo i stap tru oltaem long God, bambae i givim Kingdom i gobak long God mo Papa blong hem. (Revelesen 20:4) Stamba tingting blong God ‘blong mekem olgeta samting oli kam joen long Kraes,’ bambae i kamtru finis. (Efesas 1:9, 10) Be, fastaem, Kraes bambae i spolem “olgeta gavman, olgeta haeman, mo olgeta paoa,” we oli agensem Hae Rul blong God. Hemia i no jes minim ol samting we bambae oli lus long Amagedon. (Revelesen 16:16; 19:11-21) Pol i talem se: ‘Kraes i mas stap king fastaem, gogo God i winim olgeta enemi, i putum olgeta oli stap daon, aninit long leg blong Kraes. Mo laswan blong ol enemi ya, hemia ded, bambae i finis olgeta.’ (1 Korin 15:25, 26) Yes, sin mo ded we i kamaot long Adam bambae i finis olgeta. Blong mekem olsem, God i mas mekem “beregraon” i emti, hemia se, i mas mekem ol dedman oli laef bakegen.—Jon 5:28.
Kingdom i Mekem Samting We God i Wantem Long Wol
21 ?Be olsem wanem long ded, we i frut blong sin? Ded i “laswan blong ol enemi” blong yumi, mo i no gat wan man we i save blokem. (1 Kor. 15:26) ?Be enemi ya ded i save winim Jehova? Nogat. Yu luk ol tok ya blong Aesea se: “Hae God i Masta blong yumi, mo long taem ya, hem bambae i mekem we ded bambae i go lus olgeta. Bambae hem i ravemaot wota blong ae blong yufala.” (Aes. 25:8) Yu traem mekem wan pija long tingting blong yu: !Bambae i no moa gat dedman, i no moa gat beregraon, mo ol man bambae oli no moa krae from we man i ded! !Be bambae oli krae from glad, taem Jehova i mekem ol dedman oli girap bakegen, olsem we hem i promes finis! (Ridim Aesea 26:19.) !Olgeta trabol we ded i mekem long ol man, bambae i finis!
w12 1/9 pej 17 haf 17
Pis Blong Wan Taosen Yia Mo Blong Olwe
17 Tok ya se God “i rul long olgeta samting,” i eksplenemgud se laef bambae i olsem wanem long en blong wan taosen yia. ?Tok ya i minim wanem? Yu traem tingtingbak long taem we Adam mo Iv, tufala i joen long famle blong Jehova, we i gat pis. Jehova, Hae Rula blong heven mo wol, i rul stret long olgeta samting we hem i mekem, nomata se oli stap long heven no long wol. Oli save toktok wetem Jehova, wosipim hem, mo hem i save blesem olgeta. Long taem ya, Jehova “i rul long olgeta samting.”
Traem fanem ol gudfala samting ya
w12 1/10 pej 9, bokis
?I Tru Se Aposol Pol i Blokem Ol Woman Blong Oli No Toktok?
Aposol Pol i talem se: “Insaed long ol miting bos blong jos, ol woman oli mas stap kwaet. (1 Korin 14:34) ?Pol i minim wanem? ?Hem i ting se ol woman oli no gat save? Nogat. Plante taem hem i tokbaot ol gudfala tijing blong ol woman. (2 Timoti 1:5; Taetas 2:3-5) Long leta ya we hem i raetem i go long ol Kristin long Korin, Pol i no toktok long ol woman nomo, be long olgeta man tu we oli gat presen ya blong toktok long ol narafala lanwis, mo blong talemaot tok we God i givim. Pol i talem se oli mas stap kwaet taem narafala i stap toktok. (1 Korin 14:26-30, 33) I luk olsem se sam woman we oli glad tumas from trutok we oli faenem, oli stopem man we i stap toktok, blong askem kwestin long hem. Hemia wan fasin we ol man long ples ya oli stap mekem, be samting ya i mekem se i no gat oda long ol miting. Taswe Pol i talem long ol woman se: “Sipos woman i wantem askem kwestin, hem i save askem long man blong hem, long haos blong tufala.”—1 Korin 14:35.
it-1 pej 1197-1198
Bodi we i no save roten
Taem ol aposol blong Jisas oli laef bakegen, bambae oli go joen wetem hem long heven blong kasem laef we i no save finis olsem ol spirit man. Be i no hemia nomo, oli kasem wan bodi we i no save roten. Taem oli holem strong long Jehova mo oli ded wetem bodi we i save roten, oli kasem wan spirit bodi we i no save roten olsem we Pol i tokbaot long 1 Korin 15:42-54. Bodi we i no save ded samtaem, i minim gudfala laef we bambae oli kasem we i no save finis mo i no gat samting i save spolem. Be bodi we i no save roten, i minim se God i givim wan bodi long olgeta, we i no gat wan samting i save mekem i lus o i roten. I luk olsem se God i givim paoa long olgeta we oli naf blong laef olgeta nomo mo oli no dipen long wan narafala paoa aotsaed blong oli laef, hemia i defren long ol narafala bodi olsem spirit bodi mo bodi we i gat mit mo blad. Hemia wan impoten pruf we i soem se God i trastem olgeta. Nating se oli no dipen long wan samting blong oli laef mo bodi blong olgeta i no save roten, be God i gat paoa yet long olgeta, mo olsem Jisas Kraes we i Hed long olgeta, olgeta evriwan oli gohed blong letem Papa blong olgeta i lidim olgeta.—1Ko 15:23-28; yu luk bodi we i no save ded; sol.
29 EPREL–5 MEI
OL GUDGUDFALA SAMTING LONG BAEBOL | 2 KORIN 1-3
“Jehova i ‘Leftemap Tingting’”
“Krae Wetem Olgeta” We Oli Stap Krae
4 Sam gudfala fren blong Jehova tu oli ded, olsem Ebraham, Aesak, Jekob, Moses, mo King Deved. (Namba 12:6-8; Matiu 22:31, 32; Ol Wok 13:22) Baebol i soemaot se Jehova i wantem tumas we taem ya i kam kwik, blong mekem ol gudfala man ya we hem i lavem olgeta, oli laef bakegen. (Job 14:14, 15) Bambae oli glad mo bodi blong olgeta bambae i stret gud. Fasbon pikinini blong Jehova tu i ded. Baebol i talem se Pikinini ya Jisas, i ‘stap mekem Papa blong hem i glad’ oltaem. (Ol Proveb 8:22, 30) Yu traem tingbaot olsem wanem Jehova i mas harem nogud bitim mak, blong luk pikinini blong hem i safa gogo hem i ded.—Jon 5:20; 10:17.
“Krae Wetem Olgeta” We Oli Stap Krae
14 Plante taem, i had blong faenem ol stret tok blong talem long man we i stap krae. Be Baebol i talem se: “Tok we i waes i save mekem man i harem gud.” (Ol Proveb 12:18) Buklet ya, Taem Wan We Yu Laekem Hem Tumas i Ded, i givhan long plante man blong oli faenem ol stret tok. Plante taem, i moa gud yu krae nomo wetem man we i stap krae. (Rom 12:15) Gabi, we man blong hem i ded, i talem se samtaem hem i krae from we i harem se i no gat narafala rod blong soemaot ol filing blong hem. Hem i talem tu se: “Mi harem gud moa taem ol fren oli krae wetem mi. I moa gud i bitim we mi stap krae mi wan nomo.”
Traem Fanem Ol Gudfala Samting Ya
Kwestin
?God i mekem wanem “promes” mo i putum wanem “mak” long ol wanwan tabu Kristin?—2 Kor. 1:21, 22
▪ Promes: Wan buk i talem se, Grik tok we oli tanem i kam “promes” long 2 Korin 1:22 i “wan tok blong loa mo blong tokbaot bisnes,” we i minim “faswan peimen, wan deposit, garanti, mane we man i putum fastaem blong pemaot wan samting, mo i blokem wan samting, o i mekem se kontrak i stret.” Long saed blong ol tabu Kristin, 2 Korin 5:1-5 i tokbaot ful peimen o blesing we bambae oli kasem. Hemia se bambae oli kasem wan bodi we i blong heven we i no save roten samtaem. Mo tu bambae oli kasem presen ya blong laef olwe.—1 Kor. 15:48-54.
Long Grik lanwis we ol man oli stap yusum tede, sem tok ya i joen wetem tok we oli yusum blong tokbaot wan ring we man i givim long wan woman blong promes se bambae tufala i mared. Pijatok ya i stret blong yusum blong tokbaot olgeta we bambae oli joen long waef blong Kraes.—2 Kor. 11:2; Rev. 21:2, 9.
▪ Mak: Bifo, ol man oli yusum wan mak, olsem saen blong pruvum se oli kasem ona mo oli gat raet long wan samting, o blong mekem wan agrimen. Long saed blong ol tabu Kristin, tabu spirit i putum “mak” long olgeta, blong soemaot se oli blong God. (Ef. 1:13, 14) God i no putum mak ya i stap blong olwe, be man we i holemstrong long God i save kasem mak ya blong olwe jes bifo we hem i ded, o samtaem jes bifo we bigfala trabol i stat.—Ef. 4:30; Rev. 7:2-4.
w10 1/8 pej 23
?Yu Yu Save?
?Pol i minim wanem taem hem i talem tok ya “maj”?
▪ Pol i raetem se: “!God . . . we oltaem i stap lidim yumi taem yumi maj folem Kraes! !Save blong God we yumi talemaot long evri ples, i olsem wan naesfala smel blong senta we evri man oli save smelem! Yumi we yumi stap talemaot Kraes, yumi olsem wan gudfala senta long fes blong God. Smel ya i kasem olgeta we oli blong kasem laef mo olgeta we oli lus; be long olgeta we oli blong lus, smel ya i wan smel blong ded we i lidim olgeta i go long ded. Mo long olgeta we oli laef, smel ya i smel blong laef we i lidim olgeta i go long laef.”—2 Korin 2:14-16.
Aposol Pol i tokbaot fasin we ol man Rom oli mekem blong ona long wan haeman blong olgeta taem hem i winim ol enemi blong Rom. Long taem ya, oli karem olting we oli winim long faet wetem ol presina mo oli maj wetem olgeta blong soemaot long ol man, mo oli tekem sam buluk blong mekem sakrefaes blong leftemap haeman ya wetem ami blong hem. Long en blong maj ya oli bonem ol buluk ya blong mekem sakrefaes mo maet oli kilim i ded plante long ol presina ya.
Pijatok ya se, “yumi we yumi stap talemaot Kraes, yumi olsem wan gudfala senta” i save minim laef long sam man mo ded long sam narafala. Buk ya The International Standard Bible Encyclopedia i eksplenem se hem i “fasin blong ol man Rom blong bonem insens taem oli maj. Long olgeta we oli win long faet, smel ya i mekem olgeta oli harem gud, be long ol presina, smel ya i mekem olgeta oli tingbaot ded we maet bambae oli kasem.”