Refrens Blong Kristin Wok Mo Laef Buk Blong Miting
6-12 MEI
OL GUDGUDFALA SAMTING LONG BAEBOL | 1 KORIN 4-6
“Yumi No Lego”
w04 15/8 pej 25 haf 16-17
Oli Taed, Be Oli No Kam Slak
16 Samting we i impoten moa hemia se yumi lukaot long nid blong yumi long saed blong spirit. Sipos yumi frengud wetem Jehova God bambae yumi neva taed blong wosipim hem, nating sipos samtaem bodi blong yumi bambae i taed. Jehova nao i stap ‘givim paoa long olgeta we oli taed, mo i stap mekem olgeta we oli no strong, oli strong bakegen.’ (Aesea 40:28, 29) Aposol Pol i save se tok ya i tru. Hem i raetem se: “Neva tingting blong mifala i kam nogud long ol trabol we i kasem mifala. Maet bodi blong mifala i stap kam nogud moa oltaem, be nating. Evri dei, God i stap mekem tingting blong mifala i niuwan bakegen.” —2 Korin 4:16.
17 Makemgud toktok ya “evri dei.” Hemia i min se evri dei yumi mas yusum ol samting we Jehova i stap givim long yumi. Wan sista we i mekem wok blong misinari 43 yia finis, i harem se sam taem hem i taed long bodi, mo tingting blong hem i foldaon. Be neva hem i kam slak. Hem i se: “Mi lanem blong wekap eli moning evri dei. Long rod ya mi save gat taem blong prea long Jehova mo ridim Tok blong hem bifo we mi statem wok. Fasin ya we mi stap mekem evri dei kasem naoia i givhan long mi blong stanap strong longtaem.” Tru ya, yumi save sua se bambae Jehova i givim paoa long yumi sipos “evri dei” yumi prea long hem mo tingting dip long ol nambawan fasin blong hem mo ol promes blong hem.
it-1 pej 724-725
Stanap strong
Mo tu i impoten we ol Kristin oli gat hop, blong laef olwe long wan wol we i no gat sin. Mo nating se ol man blong agens oli kilim yumi be oli no save tekemaot hop ya. (Ro 5:4, 5; 1Tes 1:3; Re 2:10) Ol samting we oli mekem yumi safa naoia oli nating nomo, taem yumi skelem wetem hop we bambae i kamtru long fiuja. (Ro 8:18-25) Taswe ol nogud samting we oli stap hapen naoia oli “blong smol taem nomo mo oli no save stap longtaem.” (2Ko 4:16-18) Wan man we i stap tingbaot se ol trabol blong naoia oli blong smol taem nomo, bambae hem i putum tingting blong hem i stap long hop ya blong fiuja mo i no lego Jehova.
Traem Faenem Ol Gudfala Samting Ya
w12 1/2 pej 28-29
“Mekem Jehova i Smael”
David Splane blong Hed Kampani i mekem wan tok we i stanap long Baebol. (2 Korin 4:7) ?Wanem gudfala samting ya? Hemia ?save o waes? hem i ansa se “Nogat. Ol gudfala samting we aposol Pol i talem ‘Hemia wok blong prij’ we ol ‘man oli stap talemaot long klia ples.’” (2 Korin 4:1, 2, 5) Brata Splane i mekem ol studen oli tingbaot se long ol faef manis we oli stadi, hemia i givhan long olgeta blong oli rere from wok blong prij. Wok ya i wan samting we i impoten.
Brata i eksplenem se “graonpot” i pija blong prapa bodi blong yumi. Hem i talem se wan graonpot we oli wokem long graon mo wan we oli wokem long gol, tufala i defren. Graonpot we oli mekem long gol oli no yusum tumas. Be graonpot we oli wokem long graon oli yusum plante taem. Sipos oli putum wan gudfala samting long graonpot we oli wokem long gol, maet bambae yumi putum tingting i stap nomo long graonpot ya, be i i no long ol gudgudfala samting we i stap insaed long hem. “Brata Splane i se, yufala ol studen yufala i no mas pulum ol man blong oli lukluk yufala. Be olsem ol misinari, yufala i mas pulum ol man blong oli lukluk i go long Jehova. Yufala i olsem ol graonpot we oli daon moa.”
w09 1/11 pej 24 haf 7
Yufala i Mas Lavlavem Yufala Moa, Olsem We Yufala i Wan Brata Nomo
7 ?Olsem wanem long yumi? ?Olsem wanem yumi save “go moa” long fasin blong yumi blong lavem ol brata mo sista olsem we yumi wan brata nomo? Maet i isi blong lavem ol brata sista we oli gat sem yia olsem yumi no we oli blong semfala laen wetem yumi. Mo tu olgeta we oli laekem semfala spot no pleplei oli spenem plante taem tugeta. Be sipos yumi joen wetem ol Kristin we oli laekem semfala samting olsem yumi, nao yumi no joen wetem ol narafala, yumi mas mekem lav blong yumi i “go moa.” I waes blong askem se: ‘?Wanwan taem nomo, mi mi joen blong mekem wok blong prij mo sam narafala samting wetem ol brata mo sista we mi no stap kampani wetem olgeta oltaem? ?Long Haos Kingdom, mi mi no storian tumas wetem ol niuwan from we mi ting se oli mas pruvum fastaem se oli stret blong kam fren blong mi? ?Mi mi stap talem halo long ol yangfala mo ol olfala tu long kongregesen?’
13-19 MEI
OL GUDGUDFALA SAMTING LONG BAEBOL | 2 KORIN 7-10
“Givhan Long Ol Brata Long Taem Blong Disasta”
‘God i Lavem Man We i Givim Presen Wetem Gladhat’
Fastaem, Pol i talem long ol Kristin long Korin se ol Kristin long Masedonia oli soemaot gudfala eksampol long fasin blong givhan long olgeta we i trabol. Pol i raetem se: “Plante trabol i kasem olgeta blong traem olgeta, be long tingting blong olgeta, oltaem oli stap harem gud tumas. Olgeta ya oli puaman tru, be long gladhat blong olgeta, oli sakem kleksin ya we i bigwan tumas.” Ol Kristin long Masedonia oli no wet long narafala blong talem long olgeta blong givim presen. Defren olgeta, Pol i talem se “oli stap askem plante taem long mifala, blong mifala i givim janis long olgeta blong oli joen blong givhan.” Yumi sapraes moa long ol man Masedonia we oli givim presen wetem gladhat, taem yumi tingbaot se olgeta tu oli “puaman tru.”—2 Korin 8:2-4.
Yumi Givhan Long Ol Brata Long Taem Blong Trabol
LONG yia 46, kakae i sot long kantri blong Judia. Smol kakae we i stap, hem i sas bitim mak. Ol disaepol blong Jisas oli no gat mane blong pem. Oli hanggri, mo bambae oli ded sipos oli no kasem kakae. Be han blong Jehova i no sot. Hem i givhan long olgeta, long fasin we neva hem i givhan long ol narafala disaepol blong Kraes bifo. ?Wanem i hapen?
Yumi Givhan Long Ol Brata Long Taem Blong Trabol
4 Pol i raetem leta blong Seken Korin i go long ol Kristin we tabu spirit i makemaot olgeta. Be ol tok blong hem i stret tu long “ol narafala sipsip” tede. (Jon 10:16) Long leta ya, hem i eksplenem se ol Kristin oli gat tu wok. Wan wok i blong prij mo tijim ol man, ‘blong pulum olgeta oli kam fren blong God.’ (2 Kor. 5:18-20; 1 Tim. 2:3-6) Narafala wok i blong givhan long ol Kristin brata mo sista we oli kasem trabol, nao oli sot long plante samting. (2 Kor. 8:4) Pol i yusum sem Grik wod (di·a·ko·niʹa) blong tokbaot tufala wok ya. ?From wanem yumi wantem save long samting ya?
5 Taem Pol i yusum sem Grik wod blong tokbaot tufala wok ya, hem i wantem soemaot se tufala wok ya tugeta, oli wok blong ol Kristin. Hem i talem bifo finis se: ‘I gat ol defdefren kaen wok we yumi stap mekem, be i gat wan Masta nomo. I gat ol defdefren kaen fasin blong mekem ol wok ya. Be sem Spirit nomo i stap mekem ol wok ya.’ (1 Kor. 12:4-6, 11) Mo Pol i soemaot se defdefren wok ya we yumi mekem long kongregesen, evriwan oli “tabu” wok we oli joen wetem wosip blong yumi. (Rom 12:1, 6-8) Taswe, Pol i luk se i stret nomo we hem i yusum taem blong hem, blong givhan long ol Kristin ya we oli trabol.—Rom 15:25, 26.
6 Pol i givhan long ol Kristin long Korin, blong oli kasem save olsem wanem wok blong givhan long ol brata we oli trabol, i joen wetem wosip blong olgeta. Hem i eksplenem olsem: Taem ol Kristin oli givim samting long ol brata blong olgeta we oli trabol, oli stap “holemstrong gud nius ya blong Kraes.” (2 Kor. 9:13) Oli wantem folem ol tijing blong Kraes, taswe oli givhan long ol brata. Taem oli kaen olsem, hemia i soemaot se ‘God i stap givhan bigwan long olgeta long gladhat blong hem.’ (2 Kor. 9:14; 1 Pita 4:10) Taswe, Wajtaoa blong namba 1 Disemba 1975, i tokbaot wok ya blong givim samting we ol brata oli sot long hem, se: “Jehova God mo Pikinini blong hem Jisas Kraes, tufala i ting se wok ya i impoten tumas. !Yumi no mas gat tu tingting long saed ya!” Yes, wok ya i wan tabu wok we yumi mas tinghevi long hem.—Rom 12:1, 7; 2 Kor. 8:7; Hib. 13:16.
?Mane i Kam Wea?
10 Faswan se, yumi lavem Jehova mo yumi wantem ‘mekem ol fasin we hem i glad long olgeta.’ (1 Jon 3:22) Jehova i glad tumas long ol man blong hem we oli givim samting long gladhat blong olgeta. Bambae yumi lukluk gud long ol tok we aposol Pol i talem. (Ridim 2 Korin 9:7.) Wan tru Kristin i no fosem hem wan blong givim presen. Hem i givim from we ‘hem i jusumaot’ finis se bambae hem i givim. Hemia i min se hem i tingbaot nid we i stap, mo i tingbaot wanem we hem i save mekem blong givhan, nao hem i givim presen. Jehova i glad long man we i mekem olsem, from we ‘God i lavem man we i givim samting long gladhat blong hem.’ Wan narafala Baebol i tanem vas ya se: “God i lavem ol man we oli laekem blong givim presen.”
Traem Faenem Ol Gudfala Samting Ya
?Presen Ya i Pulum Yu Blong Mekem Wanem?
2 Pol i save se sakrefaes blong Jisas nao bambae i mekem ol nambawan promes blong Jehova oli kamtru. (Ridim 2 Korin 1:20.) Taswe, presen ya we i “gud tumas, i bitim mak,” i minim sakrefaes blong Jisas, kaen fasin blong Jehova mo lav we hem i soemaot long yumi. I had blong eksplenem spesel presen ya long wan fasin we yumi kasemsave gud long hem. ?Presen ya i mekem yumi harem olsem wanem? Mo ?olsem wanem presen ya i pulum yumi blong rere from Memoriol blong ded blong Jisas long Wenesde 23 Maj 2016?
g99 8/7 pej 20-21
?I Rong Blong Kam Praod?
Long Grik haf blong Baebol, veb ya kau·khaʹo·mai, oli tanem i kam se “leftemap hem wan, flas, praod,” oli yusum blong tokbaot wan gudfala fasin mo wan nogud fasin. Eksampol, Pol i talem se, maet yumi save “glad from hop ya se God bambae i givim haenem long yumi.” Hem i talem tu se: “Man we i tok flas, i gud hem i tok flas from Jehova.” (Rom 5:2; 2 Korin 10:17) Hemia i minim se yumi praod from we Jehova i God blong yumi, wan filing we i lidim yumi blong leftemap nem blong hem mo ol gudgudfala fasin blong hem.
20-26 MEI
OL GUDGUDFALA SAMTING LONG BAEBOL | 2 KORIN 11-13
“‘Nil Blong Aranis We i Stap Stikim’ Pol”
w08 15/6 pej 3-4
Taem We Mi No Gat Paoa, Long Taem Ya Nao Mi Gat Paoa
Wan narafala man blong wok blong Jehova i askem long Jehova blong i tekemaot trabol ya blong hem we i olsem “nil blong aranis we i stap stikim” hem. Aposol Pol i askem tri taem long God blong i tekemaot hem long trabol ya. Nomata wanem trabol we Pol i kasem we i olsem nil blong aranis, be hemia i save mekem se hem i no moa glad blong mekem wok blong Jehova. Pol i tokbaot trabol ya se i olsem we wan man i stap gohed blong slavem hem. Be hemia ansa we Jehova i givim long hem: “Mi mi soemaot finis se mi kaen tumas long yu, mo hemia i naf, from we taem yu no gat paoa, long taem ya nao paoa blong mi i kam strong moa long yu.” Jehova i no tekemaot trabol ya we i stap stikim Pol. Defren olgeta, Pol i mas dil wetem trabol ya, hem i se: “Taem we mi no gat paoa, long taem ya nao mi mi gat paoa.” (2 Kor. 12:7-10) ?Hem i minim wanem?
Jehova i Givim “Tabu Spirit Long Ol Man We Oli Askem Long Hem”
17 Blong ansa long ol prea blong Pol, God i talem long hem se: “Mi mi save givhan long yu long gladhat blong mi, mo hemia i naf blong holem yu. Taem we yu yu no gat paoa, paoa blong mi i save kam strong moa long yu.” Pol i talem se: “From samting ya, mi mi glad moa blong tok flas from ol samting we i soemaot we mi mi no gat paoa. Long fasin ya, mi save harem we Kraes i stap lukaot long mi long paoa blong hem [“olsem wan haos tapolen we i kavremap mi,” NW].” (2 Korin 12:9; Ol Sam 147:5) Taswe, Pol i harem se tru long Kraes, God i stap protektem hem olsem wan haos tapolen we i kavremap hem. Tede, Jehova i ansarem ol prea blong yumi long sem fasin. Hem i protektem ol man blong hem, olsem we i yusum wan samting blong kavremap no blokem olgeta.
18 Wan haos tapolen i no save stopem ren blong i no foldaon, mo i no save stopem win blong i no blu. Be hem i blokem yumi long ren mo win, blong oli no spolem yumi. Long sem fasin, ‘paoa blong Kraes’ we i protektem yumi i no stopem ol traem mo trabol blong oli no kasem yumi, nogat. Be hem i protektem fasin fren blong yumi wetem Jehova, nao ol rabis fasin blong wol ya mo paoa blong rula blong hem, Setan, i no save spolem yumi. (Revelesen 7:9, 15, 16) From samting ya, sipos yu stap fesem wan traem mo Jehova i no “tekemaot” traem ya, yu save gat strong tingting se Jehova i stap luk bigfala traehad blong yu. Hem i harem yu finis taem ‘yu krae i go long hem,’ mo hem i stap ansa long yu. (Aesea 30:19; 2 Korin 1:3, 4) Pol i raetem se: “God i stap holem promes blong hem, mo hem i no save letem wan samting i traem yumi, we i strong tumas long yumi. Be stret long taem ya we samting olsem i traem yumi, hem bambae i mekem rod blong yumi, blong yumi winim samting ya.”—1 Korin 10:13; Filipae 4:6, 7.
‘Hem i Givim Paoa Long Olgeta We Oli Taed’
8 Ridim Aesea 40:30. Nating sipos yumi gat save mo gudhan blong mekem plante samting, be yumi no naf blong mekem evri samting long prapa paoa blong yumi nomo. Hemia wan lesen we yumi evriwan i mas lanem. Aposol Pol i gat save mo gudhan blong mekem plante samting, be hem i no naf blong mekem evri samting we hem i wantem mekem. Taem hem i talemaot filing blong hem, Jehova i ansa se: “Taem yu no gat paoa, long taem ya nao paoa blong mi i kam strong moa long yu.” Pol i kasem save, taswe hem i talem se: “Taem we mi no gat paoa, long taem ya nao mi mi gat paoa.” (2 Korin 12:7-10) ?Wanem mining blong tok ya?
9 Pol i luksave se hem i no naf blong mekem sam samting, mo i nidim paoa we i bigwan moa i bitim paoa blong hem. Taem hem i taed mo i slak, tabu spirit i save givim paoa long hem. Be tabu spirit i save mekem moa yet. Hem i givhan long Pol blong i mekem ol samting we oli bigwan tumas long hem. I sem mak long yumi. !Taem Jehova i givim tabu spirit long yumi, yumi strong we yumi strong!
Traem Faenem Ol Gudfala Samting Ya
Kwestin
“Namba tri heven” we 2 Korin 12:2 i tokbaot, maet hem i Kingdom blong Mesaea we Jisas Kraes i rul long hem, mo ol 144,000 oli “niufala skae.”—2 Pita 3:13.
Hem i “namba tri heven” from we rul blong Kingdom i hae moa long ol narafala rul.
“Paradaes” we Pol i luk long vison, maet i save minim (1) Paradaes we bambae i kamtru long wol ya, (2) paradaes long saed blong spirit we i bin stap long taem ya, mo we long fiuja bambae i kam moa bigwan, mo (3) “paradaes blong God” long heven we trifala evriwan bambae oli stap long niufala wol long fiuja.
it-2 pej 177
Kis
“Wan Kis We i Tabu.” Long taem blong ol faswan Kristin i gat “wan kis we i tabu” (Ro 16:16; 1Ko 16:20; 2Ko 13:12; 1Te 5:26) o ‘kis blong soemaot se oli lavlavem olgeta’ (1Pi 5: 14), maet hemia i go moa taem wan woman i kis long wan woman o man i kis long man. Fasin blong ol Kristin ya blong talem halo i sem mak long olfala fasin blong ol man Hibru bifo, we taem oli welkamem wan man oli mas kis long hem. Be Baebol i no givim plante save long saed ya, taswe “wan kis we i tabu” i soemaot se oli lavlavem olgeta mo oli joengud insaed long Kristin kongregesen.—Jon 13:34, 35.
27 MEI–2 JUN
OL GUDGUDFALA SAMTING LONG BAEBOL | GALESIA 1-3
“Mi Stanap Long Fes Blong Hem, Mi Tok Strong Long Hem”
?Yu Yu Folem Fasin Blong Jehova Blong Mekem i Stret Oltaem?
16 Ridim Galesia 2:11-14. Pita i foldaon long trap ya blong fraet long man. (Ol Proveb 29:25) Pita i save finis tingting blong Jehova long olgeta we oli no man Jiu. Nating se i olsem, hem i fraet se ol Kristin blong Jerusalem we oli man Jiu mo oli sakomsaes, bambae oli no glad long hem taem oli luk we hem i joen wetem ol Kristin blong ol narafala laen. Aposol Pol i stretem Pita, i talem se hem i gat tu fes. ?From wanem? From we Pol i stap long miting ya long Jerusalem long yia 49, taem Pita i toktok wetem strong tingting long saed blong ol man blong ol narafala laen. (Ol Wok 15:12; Galesia 2:13) ?Ol Kristin we oli harem nogud, oli mekem wanem? ?Oli lego Jehova? ?Pita i lusum wok blong hem from bigfala mastik ya we hem i mekem?
w13 15/3 pej 5 haf 12
Taem Yumi Lavem Jehova, ‘i No Gat Wan Samting i Save Mekem Yumi Foldaon’
12 Oltaem, tingting blong aposol Pita i stap strong long Jisas mo Jehova. Be hem i gat wan slak fasin, hem i fraet long man. Mo fraet ya i lidim hem blong i mekem mastik. Taswe, hem i giaman tri taem se hem i no save Jisas. (Luk 22:54-62) Long wan narafala taem, hem i mekem i moa gud long sam Kristin i bitim ol narafala Kristin. Tingting blong Pita i no stret. Mo fasin blong hem i save gat paoa long ol narafala long kongregesen. Taswe, Pol i talem ol strong tok blong stretem hem. (Gal. 2:11-14) ?Olsem wanem? ?Pita i harem nogud nao i lego resis ya blong laef? !Nogat! Hem i tingting gud long ol tok blong Pol, hem i jenisim tingting blong hem, nao hem i gohed bakegen blong resis.
Traem Faenem Ol Gudfala Samting Ya
w14 15/9 pej 14 haf 20-21
Yumi No Lego Jehova Nating Se Yumi Kasem “Plante Trabol”
20 ?Be olsem wanem long ol trabol we oli kasem yumi sloslo? Yu traem tingbaot, ?olsem wanem yumi save winim tingting we i foldaon? Wan rod we i save givhan bigwan mo i nambawan blong folem, hemia blong tingting dip long sakrefaes blong Jisas. Hemia nao samting we aposol Pol i mekem. Samtaem hem i harem nogud. Be hem i save se Jisas i ded from ol sinman olsem hem. Hem i talem se: “Laef ya we mi stap long hem naoia, mi mi gat from we mi bilif long hem, we hem i Pikinini blong God. Hem i lavem mi, nao i givim laef blong hem, i ded blong sevem mi.” (Galesia 2:20) Pol i glad long sakrefaes blong Jisas, mo i bilif se Jisas i ded blong sevem hem.
21 Sipos yu tingbaot sakrefaes blong Jisas olsem wan presen we Jehova i givim long yu, mo yu bilif long hem, yu tu yu save kasem bigfala blesing. Be hemia i no min se, bambae tingting blong yu i no moa foldaon. Nogat. Samfala bambae oli traehad yet blong winim tingting we i foldaon gogo kasem we niufala wol i kam. Be yu mas tingbaot se: Olgeta we oli no lego Jehova, bambae oli kasem blesing. Taem ol dei oli stap pas, yumi kam klosap moa long taem ya we Kingdom blong God bambae i kam. Taem samting ya i kamtru, bambae i gat pis long wol, mo olgeta man bambae oli kam stret gud olgeta. Yu mas gat strong tingting blong go insaed long Kingdom, nating sipos yu mas kasem plante trabol.
it-1 pej 880
Leta We i Go Long Kongregesen Blong Galesia
Taem Pol i talem tok ya se, “!Ol man Galesia! !Yufala i nogat hed!” hem i no stap tingbaot nomo ol man long laen blong Gallic we oli stap long not blong Galesia. (Ga 3:1) Defren olgeta, Pol i stap tokbaot sam man long ol kongregesen we oli stap folem fasin blong ol man Jiu we oli stap wetem olgeta. Hemia ol man Jiu we oli stap folem prapa tingting blong olgeta long saed blong samting we oli ting se i stret folem Loa Blong Moses, i bitim we oli folem stret fasin we i ‘kamaot folem bilif’ we i stanap long niufala kontrak. (2:15–3:14; 4:9, 10) Hem i stap tokbaot, “kongregesen blong Galesia” (1:2) we Pol i raet i go long ol ples long Galesia we i gat ol man Jiu mo long ol man Galesia, leta ya i go long ol proselaet we oli sakomsaes mo olgeta we oli no sakomsaes we oli man Jiu, mo ol narafala man we oli stap folem Loa Blong Moses. (Wok 13:14, 43; 16:1; Ga 5:2) Pol i raetem leta i go long evriwan from we ol Kristin ya oli laef long ol eria blong Galesia. Ol tok blong Pol long leta ya i soemaot se hem i save ol man long sam haf blong saot provins blong Rom from we hem i save se ol olgeta tu oli hafhaf long bilif blong olgeta, be i no go long evri man from we hem i neva visitim olgeta.