Refrens Blong Kristin Wok Mo Laef Buk Blong Miting
6-12 JULAE
OL GUDGUDFALA SAMTING LONG BAEBOL | EKSODAS 6-7
“Bambae Yu Luk Samting We Mi Mekem Long Fero”
it-2 pej 436 haf 3
Moses
Tingting blong ol man Isrel tu i jenis. Fastaem oli trastem Moses, be taem Fero i givim oda se oli mas wok had moa, oli komplen gogo tingting blong Moses i foldaon, nao hem i prea strong long Jehova. (Eks 4:29-31; 5:19-23) Ale, Hae God i mekem tingting blong Moses i strong bakegen, taem hem i talemaot se bambae i soemaot ful mining blong nem blong hem. Hemia wan promes we God i mekem bifo long Ebraham, Aesak mo Jekob. Promes ya bambae i kamtru taem God i sevem ol man Isrel, mo i mekem olgeta oli kam wan bigfala nesen we i stap long Promes Lan. (Eks 6:1-8) Nating se i olsem, ol man Isrel oli no lesin long Moses. Be afta long namba naen panis, oli folem hem mo obei long hem. Afta long namba ten panis, oli folemgud samting we hem i talem taem hem i lidim olgeta i go aot long Ijip, nao “oli stap rere oltaem blong faet.”—Eks 13:18.
it-2 pej 436 haf 1-2
Moses
Oli Go Luk Fero Blong Ijip. Naoia Moses mo Eron tufala i mas soemaot weswan god i strong moa. Fero i singaot ol kleva blong hem mo tufala lida blong olgeta, we maet nem blong tufala Janes mo Jambres (2Ti 3:8), blong oli yusum paoa blong ol god blong Ijip blong agensem paoa blong Jehova. Fas merikel we Moses mo Eron i mekem long fored blong Fero i pruvum se Jehova i strong moa long ol god blong Ijip, be Fero i gohed blong stronghed moa. (Ex 7:8-13) Biaen, taem namba tri panis i kamtru, ol kleva ya tu oli talem se, “Hemia God ya i mekem samting ya.” Mo taem ol bigbigfala boela i kasem ol man, ol kleva ya tu oli fulap long boela, nao oli no moa save go luk Fero blong agensem Moses, go kasem we panis ya i finis.—Eks 8:16-19; 9:10-12.
Ol panis oli mekem se samfala oli lesin, samfala oli stronghed moa. Moses mo Eron i talemaot ol Ten Panis fastaem, bifo we oli kasem ol man. Ol panis ya oli kamtru olsem we oli talemaot, mo hemia i pruvum se Jehova nao i sanem Moses. Plante man long Ijip oli stap talemaot mo tokbaot nem blong Jehova, mo hemia i mekem se samfala oli lesin, mo samfala oli no lesin, be oli stronghed moa. Ol man Isrel mo sam man Ijip oli stat blong lesin, be Fero, ol advaesa blong hem mo sam man we oli sapotem hem, oli stronghed moa. (Eks 9:16; 11:10; 12:29-39) Ol man Ijip oli no ting se oli mekem ol god blong olgeta i kros, be oli save se Jehova nao i jajem ol god ya. Taem naen panis i kamtru, “ol haeman blong king wetem ol narafala man Ijip oli stap tinghevi tumas long Moses, oli luk hem, se hem i wan nambawan lida tru.”—Eks 11:3.
Traem Faenem Ol Gudfala Samting Ya
it-1 pej 78 haf 3-4
God We i Gat Olgeta Paoa
Taem Jehova i mekem promes long Ebraham se Aesak bambae i bon, Hem i talem se Hem i ‘God we i gat olgeta paoa’ (ʼEl Shad·daiʹ). Hemia i mekem Ebraham i bilif strong se God i gat paoa blong mekem promes ya i kamtru. Taetol ya i kamaot bakegen long Baebol taem God i talem se bambae i blesem Aesak mo Jekob, from kontrak we hem i mekem wetem bubu blong tufala, Ebraham.—Je 17:1; 28:3; 35:11; 48:3.
Taswe plante yia afta, Jehova i talem long Moses se: “Bifo, mi kamtru long Ebraham mo long Aesak mo long Jekob, mo mi soemaot long trifala ya we mi mi gat olgeta paoa [beʼElʹ Shad·daiʹ]. Be mi no soemaot long trifala, we mi mi stap we mi stap.” (Eks 6:3) Hemia i no min se trifala i no save nem ya Jehova, from we bifo i kam ol man oli yusum nem ya plante taem. (Je 4:1, 26; 14:22; 27:27; 28:16) Long buk blong Jenesis we i tokbaot laef blong ol gudfala man bifo, taetol ya we oli tanem i kam ‘God we i gat olgeta paoa’ i stap 6 taem nomo, mo stret nem blong God, Jehova, i stap 172 taem long olfala hanraet long Hibru. Nating se i olsem, ol gudfala man ya oli no gat janis blong kasemsave long ful mining blong stret nem blong God, Jehova. Oli luksave nomo se i stret we God i karem taetol ya ‘God we i gat olgeta paoa.’ Buk ya The Illustrated Bible Dictionary (Vol. 1, pej 572) i tokbaot samting ya, i se: “Ol samting we God i mekem long ol gudfala man bifo, i soemaot long olgeta se Yawe i wan God (ʼel) we paoa blong hem i naf (wan mining blong tok ya sadday) blong mekem ol promes blong hem i kamtru. Be taem God i kamtru long Moses long tri ya, Moses i luk bigfala paoa blong God, mo hem i kam klosap moa long God i bitim ol man bifo. Samting ya i mekem Moses i kasem save se nem ya Yawe i minim tu se God i laef i stap mo bambae i stap blong olwe.”—J. D. Douglas, 1980.
it-2 pej 435 haf 5
Moses
God i yusum Moses nating se hem i sem. Moses i sem, mo hem i talem long God se hem i no save toktok gud. 40 yia i pas, Moses i ting se hem se i naf blong sevem ol man Isrel long prapa paoa blong hem, be naoia tingting blong Moses i jenis. Hem i gohed blong askem long Jehova blong i no sanem hem i go. Nating se God i kros long Moses, God i yusum hem yet, mo i sanem Eron i go wetem hem blong i toktok long bihaf blong hem. Ale God i sanem Moses, mo Moses i “olsem wan god” blong Eron, from we Eron i talemaot ol tok blong hem. Biaen, taem oli kam wanples wetem ol lida blong Isrel, mo taem oli toktok wetem Fero, i luk olsem God i talemaot ol tok blong hem long Moses, Moses i talemaot long Eron, nao Eron i toktok long Fero (hemia wan Fero we i kamaot biaen long Fero we Moses i ronwe long hem 40 yia i pas). (Eks 2:23; 4:10-17) Taswe Jehova i talem se Eron i olsem “profet” blong Moses, from we Moses i mas lidim Eron, olsem we God i lidim Moses. Mo tu, Jehova i talem se Moses i “olsem wan God” blong Fero, from we God i givim paoa mo haenem long hem we i bitim Fero, taswe hem i no nid blong fraet long king ya blong Ijip.—Eks 7:1, 2.
13-19 JULAE
OL GUDGUDFALA SAMTING LONG BAEBOL | EKSODAS 8-9
“Fero i No Luksave Se Hem i Stap Mekem Tingting Blong God i Kamtru”
it-2 pej 1040-1041
Stronghed
Plante taem, Jehova God i soemaot longfala tingting taem hem i no kilim i ded ol man mo ol nesen we oli mekem ol rabis fasin. (Je 15:16; 2Pi 3:9) Samting ya i givhan long samfala blong tanem tingting blong olgeta nao God i sore long olgeta. (Jos 2:8-14; 6:22, 23; 9:3-15) Be samfala oli stronghed, oli agensem Jehova mo ol man blong hem moa. (Du 2:30-33; Jos 11:19, 20) Jehova i letem ol man oli stronghed, taswe Baebol i talem se hem i ‘mekem olgeta oli stap mekemhed’ o hem i “mekem hat blong olgeta i strong.” Long stret taem, hem i stap panisim ol man we oli stronghed, nao hem i soemaot bigfala paoa blong hem mo i mekem se ol man oli talemaot nem blong hem.—Skelem Eks 4:21; Jon 12:40; Ro 9:14-18.
it-2 pej 1181 haf 3-5
Rabis Fasin
Mo tu, Jehova God i save yusum ol samting we oli hapen blong mekem tingting blong hem i kamtru long wan fasin we ol rabis man oli no luksave. Nating se oli agensem God, hem i save blokem olgeta blong oli no kilim i ded ol man blong hem, mo i save yusum ol samting we oli mekem blong soemaot se fasin blong hem i stret. (Ro 3:3-5, 23-26; 8:35-39; Sam 76:10)
Wan stori we i soemaot samting ya, hemia taem Jehova i yusum Moses mo Eron blong talemaot long Fero se hem i mas letem ol man Isrel oli go fri. God i no mekem se king ya blong Ijip i kam wan rabis man, be hem i letem Fero i stap laef, mo i mekem sam samting i hapen we i soemaot se Fero i wan rabis man we i mas ded. Eksodas 9:16 i talem from wanem Jehova i mekem olsem, i se: “Mi wantem soemaot long yu we mi mi gat paoa, nao mi letem yu yu stap laef kam kasem naoia, blong mekem nius blong paoa blong mi bambae i kavremap olgeta ples long wol.”
Taem ol Ten Panis i kasem Ijip, mo biaen taem Fero mo ol ami blong hem oli ded long Red Si, hemia i soemaot klia paoa blong Jehova. (Eks 7:14–12:30; Sam 78:43-51; 136:15) Plante yia afta, ol man long ol kantri raonabaot long Ijip oli stap tokbaot samting ya yet, mo oli stap talemaot nem blong God long evri ples long wol. (Jos 2:10, 11; 1Sa 4:8) Sipos Jehova i bin kilim Fero i ded long stat, bambae Jehova i no gat janis ya blong soemaot bigfala paoa blong hem blong leftemap nem blong hem mo sevem ol man blong hem.
Traem Faenem Ol Gudfala Samting Ya
it-1 pej 878
Gadflae
Baebol i tokbaot se namba fo panis hemia ol flae we oli kam fulap long Ijip, mo hemia fas panis we i no kasem ol man Isrel long Gosen. Ol man oli no sua se Hibru tok we oli yusum blong tokbaot flae ya, i minim wanem kaen flae stret. (Eks 8:21, 22, 24, 29, 31; Sam 78:45; 105:31)
Maet ol flae ya long namba fo panis oli ol kaen flae we oli save kakae ol animol mo man, mo dring blad blong olgeta. Ol maget blong ol flae ya oli save laef insaed long bodi blong ol animol, mo long ol hot ples, i gat wan kaen flae we i save laef insaed long ol man tu. Taswe, taem ol flae ya oli kam fulap long Ijip, i sua se samting ya i mas mekem ol man Ijip oli harem nogud tumas, mo ol animol blong olgeta tu, mo maet samfala oli ded.
w04 15/3 pej 25 haf 10
Ol Bigfala Poen Long Buk Blong Eksodas
8:26, 27—?From wanem Moses i talem se ol man Ijip “bambae oli harem nogud tumas” from sakrefaes we ol man Isrel bambae oli mekem? Ol man Ijip oli wosip long plante defdefren anamol. Tingting ya blong mekem sakrefaes long anamol, i olsem wan strong risen we Moses i yusum blong askem long Fero blong letem ol man Isrel oli gofri blong mekem sakrefaes long Jeova.
20-26 JULAE
OL GUDGUDFALA SAMTING LONG BAEBOL | EKSODAS 10-11
“Moses Mo Eron i Gat Strong Tingting”
w09 1/7 pej 24 haf 6
Folem Fasin Blong Jisas Mo Prij Wetem Strong Tingting
6 Tingbaot strong tingting blong Moses, taem hem i mas toktok long Fero we i king blong Ijip. Ol man oli ting se ol god oli sanem Fero, be i no hemia nomo, oli ting se Fero tu i wan god. Oli talem se hem i pikinini blong god blong san we nem blong hem Ra. Mo tu, maet Fero ya i mekem sem mak olsem sam narafala Fero, we oli wosipim olgeta wan bakegen. Taem Fero i tok, ol man oli mas obei, hem nao i stap putum ol loa we ol man oli mas folem. Hem i gat paoa, hem i flas mo i stronghed, taswe i no gat wan man we i traem talem long hem wanem we hem i mas mekem. Be traem tingbaot se Moses i go stanap fored long king ya bakegen mo bakegen. Moses i wan man blong lukaot long sipsip, hemia wan wok we i daon nomo. Antap long samting ya, king i no singaot Moses i kam, mo king i no wantem luk hem nating. ?Ale, Moses i talem wanem long Fero? Hem i talemaot ol bigfala trabol we bambae God i mekem long Ijip. ?Mo Moses i askem Fero blong mekem wanem? !Hem i askem Fero blong letem ol milian slef blong hem oli go fri! ?Yu ting se Moses i mas gat strong tingting blong mekem wok ya? !Yes i mas!—Nam. 12:3; Hib. 11:27.
it-2 pej 436 haf 4
Moses
Oli mas gat bilif mo strong tingting blong go luk Fero. Paoa blong Jehova mo tabu spirit nomo i mekem se Moses mo Eron tufala i naf blong mekem wok ya. Traem tingbaot haos blong Fero. Hem i king blong kantri ya Ijip, we long taem ya i gat moa paoa i bitim ol narafala kantri long wol. Haos ya i flas bitim mak, mo praod man ya Fero we ol man Ijip oli bilif se i wan god, i stap long ples ya wetem ol advaesa, ol komanda blong ami, ol gad mo ol slef blong hem. Mo tu i gat ol lida blong skul mo ol kleva, we oli agensem Moses moa. Ol man ya oli gat moa paoa i bitim ol narafala man, Fero nomo i hae moa long olgeta. Olgeta man ya oli stap blong sapotem Fero mo tekem saed blong ol god blong Ijip. Mo Moses mo Eron oli no go luk Fero wan taem nomo, be plante taem, mo evritaem we oli go Fero i stronghed moa. Hem i strong blong holemtaet ol man Hibru we oli ol slef blong hem. From samting ya, afta we Moses mo Eron i talemaot namba eit panis, ol man blong Fero oli ronemaot tufala. Mo afta long namba naen panis, Fero i tok long tufala se tufala i no mas kam luk hem bakegen, sipos no, bambae hem i kilim tufala i ded.—Eks 10:11, 28.
Traem Faenem Ol Gudfala Samting Ya
Ol Wetnes Agensem Ol Gyaman God
11 Taem ol man Isrel oli stap yet long Ijip, Jeova i sanem Moses i go long Fero. Hem i talem se: “Yu go luk king. Mi mi mekem finis we hem wetem ol haeman blong hem oli mekemhed, blong mi save mekem ol merikel ya long fes blong olgeta, mo blong yufala i save talemaot long ol pikinini blong yufala mo long ol smol bubu blong yufala, we mi mi mekful long ol man Ijip ya taem mi wokem ol merikel ya long fes blong olgeta. Nao from samting ya, bambae yufala evriwan i save we mi mi Hae God.” (Eksodas 10:1, 2) Ol man Isrel we oli gat fasin obei, oli storeyan long ol pikinini blong olgeta long ol bigbigfala wok we Jeova i mekem. Biaen, ol pikinini blong olgeta oli talem long ol pikinini blong olgeta bakegen, mo i gohed olsem long ol handred yia we oli kam biaen. Taswe, ol man bambae oli rimemba oltaem ol bigbigfala wok we Jeova i bin mekem. Long sem fasin tede, ol papa mama oli gat wok ya blong givim wetnes long ol pikinini blong olgeta.—Dutronome 6:4-7; Proveb 22:6.
w15 15/5 pej 18 haf 13
Oli Stap “Luk” Ol Samting We God i Promes Blong Givim
13 Moses i tingting plante long ol promes ya blong Jehova. Olsem ol narafala man blong Jehova, Moses i stap tingbaot taem ya we Jehova bambae i mekem evri man oli fri, oli no moa ded. (Job 14:14, 15; Hibrus 11:17-19) Hem i savegud se Jehova i lavem ol man tumas. Taswe hem i lavem tumas Jehova mo i bilif strong moa long hem. Hemia i givhan long hem blong i mekem wok blong Jehova long ful laef blong hem. (Dutronome 6:4, 5) Nating se King Fero i wantem kilim hem, be hem i no fraet. Hem i save se Jehova bambae i givim pei long hem long fiuja.—Eksodas 10:28, 29.
27 JULAE–2 OGIS
OL GUDGUDFALA SAMTING LONG BAEBOL | EKSODAS 12
“Samting We Ol Kristin Oli Lanem Long Pasova”
‘Yufala i Mas Glad Olwe’
4 Jisas i ded long namba 14 dei blong manis Nisan long yia 33 K.T. Long neson blong Isrel, Nisan 14 hem i wan hapi dei from we hem i lafet blong Pasova. Evri yia, long dei ya, ol famle oli joen wanples blong kakae wan smol sipsip we i no gat wan samting i rong long bodi blong hem. Hemia i mekem oli tingbaot taem ya we blad blong smol sipsip i bin sevem laef blong olgeta fasbon pikinini blong Isrel. Samting ya i hapen long Nisan 14 long yia 1513 B.K.T., taem enjel blong Jeova i kilim i ded olgeta fasbon pikinini blong ol man Ijip. (Eksodas 12:1-14) Smol sipsip blong lafet blong Pasova ya i pija blong Jisas we aposol Pol i tokbaot hem se: “Kraes i olsem smol sipsip blong yumi blong Pasova, we ol man oli kilim hem finis.” (1 Korin 5:7) Blad blong Jisas we i ron i openem rod blong plante man oli save kasem laef, olsem blad blong smol sipsip ya long lafet blong Pasova.—Jon 3:16, 36.
it-2 pej 583 haf 6
Pasova
Sam samting long Lafet blong Pasova i kamtru long laef blong Jisas. Long Ijip, oli mas putum blad long ol haos blong olgeta, blong enjel i no kilim ol fasbon pikinini blong olgeta i ded. Pol i talem se ol tabu Kristin oli kongregesen blong ol fasbon blong God (Hib 12:23), mo se blad blong Kraes i sevem olgeta. (1Te 1:10; Ef 1:7) Oli no mas brekem bun blong smol sipsip blong Pasova. Profet tok i talem se bambae i no gat wan bun nating blong Jisas i brok, mo samting ya i kamtru long taem we hem i ded. (Sam 34:20; Jon 19:36) Taswe, Lafet blong Pasova we ol man Jiu oli mekem blong plante handred yia, i wan haf blong Loa we i olsem sado blong ol samting we bambae i kam, mo i soemaot se Jisas Kraes i “Smol Sipsip Blong God.”—Hib 10:1; Jon 1:29.
w13 15/12 pej 20 haf 13-14
‘Yufala i Mas Tingbaot Ol Samting Ya Bakegen’
13 Ol papa oli mas givhan long ol pikinini blong olgeta blong oli lanem samting long Lafet blong Pasova. Wan samting we oli lanem, se Jehova i save lukaot gud long ol man blong hem. Mo tu, oli lanem se Jehova i wan God we i laef i stap, hem i tru, mo i lavem ol man blong hem mo i save protektem olgeta. Long namba ten trabol we hem i mekem long ol man Ijip, hem i soemaot samting ya taem hem i kilim i ded ol fasbon blong olgeta, be hem i lukaot gud long ol fasbon blong ol man Isrel.
14 Baebol i no talem se ol Kristin papa mo mama tede oli mas talem stori blong Pasova long ol pikinini blong olgeta evri yia. Be oli save tokbaot samting we yumi lanem from. ?Yu yu tijim pikinini blong yu se Jehova i lukaot gud long ol man blong hem? ?Ol pikinini blong yu oli luksave we yu yu bilif strong long Jehova, se hem i stap lukaot gud yet long ol man blong hem? (Sam 27:11; Aes. 12:2) ?Yu yu storian gud wetem ol pikinini blong yu blong tijim olgeta long trutok ya? Taem yu tokbaot Pasova wetem olgeta, yu mas letem olgeta tu oli talem samting we oli lanem long stori ya. Ol lesen we yufala i lanem long stori ya, bambae oli givhan long famle blong yu blong oli trastem Jehova moa.
Traem Faenem Ol Gudfala Samting Ya
it-2 pej 582 haf 2
Pasova
Ol Ten Panis we oli kasem Ijip, oli pruvum se ol god blong Ijip oli giaman, antap moa namba ten panis we i kilim i ded ol fasbon boe. (Eks 12:12) Ol man Ijip oli tinghae long man sipsip se i spesel animol blong god ya Ra, taswe taem ol man Isrel oli putum blad blong smol sipsip blong Pasova long ol pos blong doa, ol man Ijip oli luk se hemia i no soem respek long god ya. Mo tu, ol man Ijip oli luk bul se i tabu, taswe taem ol fasbon bul oli ded, hemia i soemaot se god ya Osiris i no gat paoa. Oli wosipim Fero tu from we oli bilif se hem i pikinini blong Ra. Taswe taem fasbon boe blong Fero i ded, hemia i soemaot se Ra mo Fero tugeta i no gat paoa nating.
it-1 pej 504 haf 1
Bigfala Asembli
Samting we i spesel taem ol man oli “kam wanples blong mekem wosip,” hemia se oli no mas wok. Long fas dei mo namba seven dei blong Lafet Blong Kakae Bred We i No Gat Is, oli mas “kam wanples blong mekem wosip,” mo Jehova i talem long saed blong ol dei ya se: “Yufala i no wok, yufala i save wokem ol kakae blong yufala nomo.” (Eks 12:15, 16) Taem oli mekem ol “lafet ya” ol pris oli bisi blong mekem ol sakrefaes blong givim i go long Jehova (Le 23:37, 38), mo i klia se hemia i no agensem loa ya se oli no mas wok. Ol dei ya oli no blong man i spel nomo, be oli blong man i frengud moa wetem God. Long Sabat dei long evri wik, ol man oli kam wanples blong wosip mo harem tijing blong God. Oli kasem moa save taem oli lesin long man we i ridim mo eksplenem Tok blong God long olgeta, mo biaen oli mekem olsem tu long ol sinagog. (Wok 15:21) Taswe, ol man oli no wok long Sabat dei mo ol narafala taem we oli “kam wanples blong mekem wosip,” be oli yusumgud taem blong olgeta blong prea mo tingting dip long God Ya We i Wokem Olgeta Samting, mo ol wok blong Hem.—Yu luk ASSEMBLY.