Stadi 15

Toktok Wetem Bilif

Rom 8:38, 39

?I MINIM WANEM? Yu soemaot se yu bilif strong long samting we yu talem mo se i impoten.

Rere gud fastaem. Stadi gud blong kasem save ol bigfala poen long tok blong yu mo olsem wanem ol vas blong Baebol oli soemaot olgeta. Tokbaot ol bigfala poen ya long ol sot tok we i isi. Traem tingbaot olsem wanem tok blong yu bambae i givhan long ol man. Prea blong askem tabu spirit.

Lanem tok blong yu wetem bigfala voes, blong mekem ol impoten poen oli kam klia long tingting blong yu, mo blong kam gud moa blong givim tok ya.
Ol tok blong yu i mas soemaot bilif. Yusum prapa toktok blong yu, i bitim we yu talem ol tok we i stap long buk nomo. Toktok long fasin we i soemaot se yu sua long samting we yu stap talem.
Toktok wetem fulhat blong yu. Yu no toktok kwaet tumas we ol man oli no harem, mo yu lukluk stret long ol man.

Taem yu toktok wetem bilif, hemia i no min se yu tok strong long ol man, yu flas, o yu fosem narafala blong i bilif. Nating se yu wantem tumas we man i bilivim tok blong yu, be oltaem yu mas toktok kaen.