?I Tru Se Evri Rilijen Oli Semak? ?Evriwan i Lidim Man i Go Long God?

Ansa we i Baebol i givim

Nogat, evri rilijen oli no semak. Baebol i tokbaot plante rilijen we God i no laekem. Yumi save putum olgeta long tu grup.

Fas grup: Wosipim ol giaman god

Baebol i tokbaot wosip we man i mekem long ol giaman god, se “i blong nating nomo,” mo se oli “no save givhan nating.” (Jeremaea 10:​3-5; 16:19, 20) Jehovaa God i talem strong long ol man Isrel se: “Yufala i no mas mekem wosip long ol narafala god, yufala i mas mekem wosip long mi nomo.” (Eksodas 20:​3, 23; 23:24) Taem ol man Isrel oli go mekem wosip long o narafala god, “Hae God i kros tumas.”​—Namba 25:3; Levitikas 20:2; Jajes 2:​13, 14.

Tede, tingting blong God long saed blong ol “samting ... we ol man oli singaot olgeta se god,” i no jenis nating. (1 Korin 8:​5, 6; Galesia 4:8) Hem talem strong long ol man we oli wantem wosipim hem, se oli mas stop blong joen wetem olgeta we oli stap mekem giaman wosip. Hem i se: “Yufala i mas kamaot long olgeta, yufala i mas stap yufala nomo mo olgeta oli mas stap olgeta nomo.” (2 Korin 6:​14-​17) ?From wanem God i givim wan loa olsem sipos olgeta rilijen oli semak mo oli lidim man i go long God?

Seken grup: Wosipim tru God long wan fasin we hem i no glad long hem

Samtaem, ol man Isrel oli miksimap tru wosip wetem fasin blong wosip blong ol narafala neson we oli stap mekem long ol giaman god blong olgeta. Be Jehova i agensem fasin ya. (Eksodas 32:8; Dutronome 12:​2-4) Jisas i agensem fasin blong wosipim God we ol lida blong skul oli stap folem long taem blong hem. Hem i se olgeta ya oli stap soem se oli man blong God, be yet oli gat tu fes mo oli “lego ol tok blong Loa we oli impoten moa, olsem man i mas mekem i stret, man i mas gat sore, mo man i mas gat bilif.”​—Matiu 23:23.

Tede i semak, wan rilijen we ol tijing blong hem oli stanap long trutok, i save lidim ol man oli go long God.Yumi save faenem trutok ya insaed long Baebol. (Jon 4:​24; 17:17; 2 Timoti 3:​16, 17) Rilijen we ol tijing blong hem oli no stanap long Baebol, oli lidim ol man oli gowe long God. Plante long ol tijing we ol man oli ting se i kamaot long Baebol​—olsem triniti, sol i no save ded, mo safa olwe long hel faea​—oli kamaot long ol man we oli stap wosipim ol giaman god. Wosip we man i mekem folem ol tijing ya, i “blong nating nomo,” from oli mekem ol kastom i tekem ples blong ol samting we God i wantem olgeta blong mekem.​—Mak 7:​7, 8.

God i no laekem nating ol rilijen we oli gat tu fes. (Taetas 1:​16) Blong halpem ol man blong kam klosap long God, wan rilijen i mas gat paoa long evridei laef blong ol man, mo i no mas folem nomo wanem we bighaf blong ol man oli stap mekem. Eksampol, Baebol i talem se: “Sipos man i ting se hem i man blong wosipim God, be hem i no kontrolem tang blong hem, hem i stap giaman long hem wan. Wosip blong man ya i blong nating nomo. Long fes blong God ya we i Papa blong yumi, wosip we i klin mo i no gat doti long hem, i olsem: Man i mas lukaot gud long ol pikinini we oli no gat papa mama blong olgeta mo long ol wido taem oli kasem trabol, mo hem i mas holem laef blong hem i klin, blong wol i no mekem hem i doti.” (Jemes 1:​26, 27) King James Version i yusum tok ya “klin rilijen” blong tokbaot wan rilijen we i nogat tu fes.