Kingdom i Win​—Yumi Go Long Kot Blong Pruvum Se Yumi Gat Raet Blong Prij

YU STAP prij wetem wan brata no sista. Yutufala i harem noes blong trak blong polis we i stap kam klosap, ale yutufala i wet nomo blong i pas. Be yutufala i sek we trak ya i stop stret long fored blong yutufala, mo wan polis i kamaot. Hem i talem se: “?Yutufala ya nao we i stap go long evri haos blong tokbaot Baebol? !Fulap man oli komplen!” Long kwaet fasin, yutufala i ansa se: “Mitufala i Witnes blong Jehova.” ?Wanem i hapen biaen?

Blong ansa long kwestin ya, yumi save ridim ol stori blong samting we i hapen bifo. Long ol yia we i pas, ?gavman long kantri blong yu i mekem olsem wanem long ol Witnes blong Jehova? ?Oli fri blong mekem wosip olsem oli wantem? Sipos yes, ating hemia from we ol brata mo sista bifo oli go long kot blong ‘pruvum se oli gat raet blong talemaot gud nius.’ (Fil. 1:7) Nomata se yu stap long wanem kantri, i gud yu tingbaot ol kot kes we ol Witnes blong Jehova oli winim finis. Samting ya i save mekem bilif blong yu i strong. Long haf ya, bambae yumi tokbaot sam long ol kot kes ya. !Taem yumi win, yumi no win long paoa blong yumi nomo! !Samting ya i soemaot se Kingdom i wan prapa gavman we i stap rul!