Holemtaet Glad Long Taem Blong Trabol
“Olgeta we oli sef long yu [Jeova] bambae oli harem gud. Bambae oli save sing oltaem from we oli glad tumas.”—SAM 5:11.
1, 2. (a) ?Wanem sam trabol we plante man tede oli harem nogud from? (b) ?Antap long ol trabol we olgeta man oli kasem, ol trufala Kristin oli kasem wanem trabol bakegen?
OL WITNES BLONG JEOVA oli kasem ol semfala trabol olsem ol narafala man. Plante man blong God oli kasem trabol taem narafala i kilim olgeta no i stilim olgeta, i gat faet long kantri blong olgeta, no narafala i mekem i no stret long olgeta. Ol disasta, fasin pua, sik, mo ded, oli mekem bigfala trabol long plante man. Aposol Pol i raetem tok we i stret nomo se: “Yumi save finis, we i kam kasem naoia, olgeta samting ya we God i mekem oli stap krae, from we olgeta oli stap harem nogud.” (Rom 8:22) Yumi kasem trabol tu from sin we yumi bon wetem. Yumi save talem olsem King Deved bifo se: “Ol sin blong mi i kavremap mi olsem we mi draon long dip solwota. Ol sin blong mi oli olsem wan samting we i hevi tumas, mi no moa save karem.”—Sam 38:4.
2 Antap long ol trabol we olgeta man oli kasem, ol trufala Kristin oli stap kasem ol narafala trabol we i olsem pos we man i ded long hem. (Luk 14:27, NW) Yes, ol man oli no laekem ol disaepol blong Jisas, oli mekem i nogud long olgeta, olsem oli mekem long Jisas. (Mat. 10:22, 23; Jon 15:20; 16:2) Taswe, blong folem Kraes, yumi mas traehad, wok, mo stanap strong, taem yumi wet blong ol blesing blong niufala wol oli kamtru.—Mat. 7:13, 14; Luk 13:24.
3. ?Olsem wanem yumi save se God i no wantem we ol Kristin oli harem nogud nomo long laef blong olgeta?
3 ?Hemia i min se i no gat glad long laef blong ol trufala Kristin mo oli no save harem gud? ?I stret we yumi stap harem nogud mo krae go kasem we en i kamtru? I klia se Jeova i wantem we yumi hapi taem yumi stap wet blong ol promes blong hem oli kamtru. Bakegen mo bakegen, Baebol i talem se ol man we oli wosipim trufala God oli glad. (Ridim Aesea 65:13, 14.) Ol Sam 5:11 i talem se: “Olgeta we oli sef long yu [Jeova] bambae oli harem gud. Bambae oli save sing oltaem from we oli glad tumas.” Yes, i gat rod blong yumi stap glad, mo blong yumi gat pis long tingting blong yumi, mo blong yumi harem gud, nating se yumi stap kasem plante trabol. Bambae yumi tokbaot olsem wanem Baebol i save halpem yumi blong stap glad, taem yumi fesem ol trabol.
Jeova—God Ya We “i Stap Harem Gud Oltaem”
4. ?God i harem olsem wanem taem narafala i no wantem stap aninit long rul blong hem?
4 Tingbaot Jeova. Hem i gat olgeta paoa, taswe hem i rul antap long fulwan heven mo wol. Hem i no sot long wan samting, mo hem i no nidim wan man. Nating se Jeova i gat olgeta paoa, be hem i mas harem nogud taem wan enjel we i pikinini blong hem i bin mekem stronghed nao i kam Setan. Biaen bakegen, hem i mas harem nogud taem sam narafala enjel oli joenem Setan. Tingbaot tu, olsem wanem God i mas harem nogud taem Adam mo Iv, we Hem i wokem tufala i stret gud olgeta, tufala i tanem baksaed long hem. Mo kam kasem taem blong yumi, i gat plante plante milian pikinini blong tufala we oli no wantem stap aninit long rul blong Jeova.—Rom 3:23.
5. ?Wanem samting we i mekem Jeova i harem nogud tumas?
5 Stronghed fasin ya we Setan i statem, i stap gohed strong yet. Bitim 6,000 yia nao Jeova i stap lukluk we ol man oli mekem wosip long ol aedol, mekem raf fasin, kilkilim olgeta i ded, mo mekem olkaen rabis fasin long saed blong seks. (Jen. 6:5, 6, 11, 12) Mo tu, hem i harem ol rabis giaman toktok mo ol tok nogud agensem hem. Ol man we oli wosipim hem long trufala fasin, sam long olgeta tu oli bin spolem filing blong hem. Baebol i tokbaot wan taem we ol man blong God oli mekem hem i harem nogud, i se: “Oltaem oli stap agensem hem long draeples ya, mo plante taem, oli mekem hem i sore, i harem nogud. God ya blong yumi ol laen blong Isrel hem i tabu, be oltaem, olgeta ya oli stap traem hem, oli stap mekem hem i harem nogud.” (Sam 78:40, 41) Yes, Jeova i harem nogud tumas taem wan man blong hem i tanem baksaed long hem. (Jer. 3:1-10) I tru, i gat ol nogud samting we oli stap hapen, mo Jeova i harem nogud tumas long olgeta ya.—Ridim Aesea 63:9, 10.
6. ?God i mekem wanem taem hem i fesem trabol we hem i harem nogud from?
6 Be taem Jeova i harem nogud no narafala i spolem filing blong hem, hem i no kam slak we hem i no naf blong mekem wan samting, nogat. Samtaem trabol i kamaot, nao Jeova i tekem aksen kwiktaem blong mekem se i no gat plante tumas nogud frut blong trabol ya. Mo tu, hem i mekem sam samting we oli tekem longtaem lelebet blong kamaot, be bambae oli mekem stamba tingting blong hem i kamtru. From we Jeova i mekem ol gudfala samting olsem, hem i stap wet wetem glad blong luk we rul blong hem bambae i win, mo bambae rul ya i karem blesing i kam long ol man we oli wosipim hem long trufala fasin. (Sam 104:31) Yes, nating se plante man oli stap sakem doti long nem blong Jeova, be “hem i stap harem gud” yet.—1 Tim. 1:11; Sam 16:11.
7, 8. ?Taem ol samting i gorong, olsem wanem yumi save folem fasin blong Jeova?
7 I tru, Jeova i gat moa paoa blong stretem ol problem i bitim yumi. Nating se i olsem, yumi save folem fasin blong Jeova taem yumi fesem trabol. I stret nomo we yumi harem nogud taem ol samting oli gorong, be i no nid blong yumi gohed blong harem nogud. Jeova i wokem yumi we yumi naf blong tekem fasin blong hem, taswe yumi gat tingting mo waes we i save wokgud. Yumi naf blong tingting gud long ol problem blong yumi, mo mekem sam gudfala samting blong traem stretem olgeta.
8 Wan impoten samting we i save halpem yumi blong stanap strong taem yumi kasem trabol, hemia blong luksave se i gat sam trabol we yumi no naf blong winim. Sipos yumi wari tumas long ol trabol ya, yumi save harem nogud moa, nao maet yumi no moa kasem glad from trufala wosip we yumi mekem. Sipos yumi mekem samting we yumi naf blong mekem blong stretem wan problem, i moagud we yumi no moa wari long hem, be yumi mekem ol narafala samting we oli save givim glad long yumi. Wan stori long Baebol i soemaot gud samting ya.
I Impoten We Yumi Gat Stret Tingting
9. ?Olsem wanem Hana i soemaot se hem i gat stret tingting long saed blong ol trabol blong hem?
9 Tingbaot Hana, we i kam mama blong profet Samuel. Hem i harem nogud from we hem i no save gat pikinini. Penina i jikim Hana mo i mekem hem i sem. Samtaem, tingting blong Hana i foldaon, nao hem i no moa kakae, hem i stap krae nomo. (1 Saml. 1:2-7) Wan dei, Hana ‘i stap harem nogud, i stap krae, nao i girap, i go prea long [haos blong] Hae God’ Jeova. (1 Saml. 1:10) Hana i talemaot ol filing blong hem long Jeova, nao biaen hae pris Ilae i kam toktok long hem, i se: “Prea blong mi, we God ya blong yumi bambae i givim samting ya long yu we yu yu askem. Yu go. Tingting blong yu bambae i stap kwaet.” (1 Saml. 1:17) Long taem ya, ating Hana i luksave se hem i mekem evri samting finis we hem i naf blong mekem. Hem i no naf blong mekem se hem i save karem pikinini. Yes, Hana i gat stret tingting long saed blong trabol blong hem. Ale hem i ‘go afsaed, i kakae, mo i harem gud.’—1 Saml. 1:18.
10. ?Olsem wanem Pol i holem stret tingting taem hem i kasem wan trabol we hem i no naf blong winim?
10 Aposol Pol i gat semfala fasin taem wan trabol i kasem hem. Hem i gat wan sik we i mekem hem i harem nogud. Hem i talem se sik ya i olsem ‘nil blong aranis we i stap stikim hem.’ (2 Kor. 12:7) Yumi no save stret se sik ya i olsem wanem, be Pol i mekem samting we hem i naf blong mekem blong winim sik ya. Hem i prea long Jeova blong tekemaot sik ya. ?Pol i prea hamas taem long saed ya? Tri taem. Afta long namba tri taem, God i talem long Pol se bambae Hem i no mekem wan merikel blong tekemaot “nil blong aranis” ya. Pol i no moa wari long sik ya, be hem i putum tingting blong hem i stap fulwan long wok blong Jeova.—Ridim 2 Korin 12:8-10.
11. ?Olsem wanem prea blong askem strong long Jeova blong halpem yumi, i save givhan long yumi long taem blong trabol?
11 Ol eksampol ya oli no blong talem se yumi no mas prea long Jeova long saed blong ol trabol blong yumi, nogat. (Sam 86:7) Tok blong God i talem se yumi mas prea, i se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem.” ?Taem yumi prea olsem, Jeova bambae i mekem wanem? Baebol i gohed se: “Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” (Fil. 4:6, 7) Maet Jeova i no tekemaot trabol blong yumi. Be hem i save lukaotgud long tingting blong yumi, mo long rod ya, hem i ansa long prea blong yumi. Afta we yumi prea long saed blong wan trabol nao tingting blong yumi i kam kwaet, bambae yumi naf blong luksave klia se i wan denja blong wari tumas long ol trabol blong yumi.
Faenem Bigfala Glad Long Wok Blong God
12. ?From wanem fasin ya blong harem nogud longtaem i save spolem wan Kristin?
12 Ol Proveb 24:10 (NW) i talem se: “?Yu yu letem tingting blong yu i foldaon long dei blong trabol? Paoa blong yu bambae i smol nomo.” Wan narafala proveb i talem se: ‘Sipos man i harem nogud, tingting blong hem i foldaon, mo fes blong hem tu i kam nogud.’ (Prov. 15:13) Sam Kristin, tingting blong olgeta i foldaon, nao oli no moa ridim Baebol, mo oli no moa tingting dip long Tok blong God. Oli talem sem samting oltaem long ol prea blong olgeta, mo oli no moa joen wetem ol Kristin brata sista blong olgeta. I klia se fasin ya blong harem nogud longtaem olsem, i save spolem wan Kristin.—Prov. 18:1, 14, NW.
13. ?Wanem sam samting we oli save halpem yumi blong winim tingting we i foldaon mo stap glad?
13 Sipos yumi tingting long gudfala saed blong ol samting, bambae yumi tingbaot moa ol samting we oli givim glad long yumi. Deved i raetem se: “God blong mi . . . Mi mi wantem tumas blong mekem ol samting we yu yu wantem.” (Sam 40:8) Taem ol samting i gorong long laef blong yumi, yumi neva mas lego gudfala program we yumi stap folem long saed blong wosip. Yes, wan gudfala meresin blong man we i harem nogud, i blong joen long ol wok we oli givim glad. Jeova i talem se yumi save faenem glad mo harem gud taem yumi ridim Tok blong hem mo tingting long tok ya oltaem. (Sam 1:1, 2; Jem. 1:25) Evri taem we yumi ridim Baebol mo kam long wan Kristin miting, yumi kasem ol gudfala tok we i save leftemap tingting blong yumi mo mekem yumi glad.—Prov. 12:25; 16:24.
14. ?Wanem promes blong Jeova we i givim glad long yumi naoia?
14 Yumi save glad from plante samting we God i mekem long yumi. Promes we hem i mekem blong sevem yumi, i wan bigfala samting we i save givim glad. (Sam 13:5) Yumi save se, nomata wanem samting i hapen long yumi naoia, be long fiuja bambae God i givim blesing long ol stret man. (Ridim Ol Sam 1:6.) Profet Habakuk i yusum ol naesfala tok blong soemaot tingting ya, i se: “Naoia yumi stap long trabol. Ol figtri oli no moa karem kakae, mo ol grep oli no moa karem frut blong wokem waen, mo ol tri ya olif oli no moa karem frut blong wokem oel, mo i no moa gat kakae long ol garen, mo ol sipsip mo ol buluk oli ded evriwan. Be nating we ol trabol ya i kasem yumi olsem, mi bambae mi stap harem gud yet from we Hae God i God blong mi, mo hem i stap sevem mi.”—Hab. 3:17, 18.
“!Ol Man We Jeova i God Blong Olgeta, Oli Save Harem Gud!”
15, 16. Talem sam long ol gudfala presen we God i givim long yumi, we yumi save harem gud long olgeta taem yumi stap wet long ol blesing long fiuja.
15 Taem yumi stap wet blong ol nambawan blesing oli kamtru long fiuja, Jeova i wantem we yumi harem gud long ol gudfala samting we hem i givim long yumi. Baebol i talem se: “Mi mi luksave se wan rod nomo i stap, we oltaem long laef ya blong yumi, yumi mas traehad blong stap long gudfala laef, mo blong mekem ol gudfala fasin. I gud yumi evriwan i gohed, yumi stap kakae, mo yumi stap dring, mo yumi stap glad long ol samting ya we yumi stap hadwok long hem, from we ol samting ya oli kam long God nomo.” (Pri. 3:12, 13) “Mekem ol gudfala fasin” i min se yumi mekem ol gudfala wok blong givhan long ol narafala. Jisas i talem se man we i givim presen i go i harem gud moa i winim man we i kasem presen blong hem. Taem yumi mekem samting blong soemaot kaen fasin long man no woman blong yumi, ol pikinini blong yumi, papa mama blong yumi, mo ol narafala famle blong yumi, yumi harem gud tumas. (Prov. 3:27) Long saed blong ol Kristin brata sista blong yumi, taem yumi kaen long olgeta, mo yumi tekem olgeta oli kam long haos blong yumi, mo yumi fogivim olgeta, hemia tu i save givim bigfala glad long yumi mo i save mekem Jeova i glad tu. (Gal. 6:10; Kol. 3:12-14; 1 Pita 4:8, 9) Mo taem yumi lego samting we yumi wantem blong mekem wok blong God, yumi rili harem gud.
16 Ol tok blong Prija we yumi ridim long haf fiftin oli tokbaot ol smosmol samting long laef we oli givim glad, olsem kakae mo dring. Yes, nating se yumi kasem trabol, be yumi save faenem glad long ol samting long saed blong bodi we Jeova i stap givim long yumi. Mo tu, tingbaot ol naesfala samting, olsem ol kala long skae taem san i stap godaon, ol gudfala ples we yumi save lukluk long bus, pleplei blong ol smosmol anamol, mo plante narafala samting we God i wokem. Yumi no pem blong luk ol samting ya, be oli save fulumap hat blong yumi wetem bigfala respek long Jeova mo glad. Taem yumi tingting long ol samting ya, yumi lavem Jeova moa from we hem nao i givim ol gudfala samting ya long yumi.
17. ?Wanem bambae i mekem se yumi kam fri olgeta long ol trabol blong yumi? ?Go kasem taem ya, yumi harem gud long wanem samting?
17 From we yumi lavem God, mo yumi obei long ol loa blong hem, mo yumi bilif long ransom sakrefaes blong Jisas, ale long fiuja bambae yumi kam fri olgeta long ol trabol long laef blong yumi, mo bambae yumi kasem glad we i no save finis. (1 Jon 5:3) Go kasem taem ya, yumi harem gud blong save se Jeova i savegud ol trabol we oli stap kasem yumi. Deved i raetem se: “Bambae mi mi hapi, mi glad tumas, from fasin ya blong yu we oltaem yu lavem man tumas. Taem mi mi harem nogud, be yu yu luk, mo taem mi mi stap long trabol, be yu yu save.” (Sam 31:7) Jeova i lavem yumi, from samting ya, bambae hem i tekemaot yumi long olgeta trabol ya.—Sam 34:19.
18. ?From wanem glad i mas wan bigfala fasin blong ol man blong God?
18 Taem yumi stap wet blong ol promes blong God oli kamtru, i gud yumi folem fasin blong Jeova, God ya we i harem gud oltaem. Yumi no mas letem ol nogud filing oli mekem yumi kam slak we yumi no gohed long wok blong God. Taem yumi gat wan problem, yumi mas tingting gud long problem ya mo letem waes i lidim yumi blong mekem samting we i save wokgud. Jeova bambae i givhan long yumi blong no letem ol filing blong yumi oli winim yumi, mo blong mekem samting we yumi naf blong mekem blong blokem ol nogud frut blong trabol we i kasem yumi. I gud yumi glad long ol gudfala samting we hem i givim long yumi, long saed blong bodi mo wosip. Sipos yumi stap klosap long God, yumi save glad, from we, “!ol man we Jeova i God blong olgeta, oli save harem gud!”—Sam 144:15, NW.
?Yu Yu Lanem Wanem?
• ?Taem wan trabol i kasem yumi, olsem wanem yumi save folem fasin blong Jeova?
• ?Olsem wanem stret tingting i save givhan long yumi taem yumi fesem ol trabol?
• ?Long taem blong trabol, olsem wanem yumi save faenem glad long wok blong God?
[Tok blong pija long pej 16]
Jeova i harem nogud tumas taem hem i luk ol nogud samting we oli stap hapen
[Foto]
© G.M.B. Akash/Panos Pictures
[Tok blong pija long pej 18]
Jeova i givim ol samting we oli save halpem yumi blong holemtaet glad