Yumi Pulum Yumi Blong Kam Strong Moa Long Lav Mo Gudfala Wok—?Olsem Wanem?

‘I gud yumi stap tingbaot yumi, blong yumi pulum yumi blong kam strong moa long lav mo ol gudfala wok. Oltaem yumi mas toktokgud long yumi blong leftemap tingting blong yumi. Samting ya, yufala i mas mekem moa taem yufala i luk we dei ya i kam kolosap finis.’​—HIBRUS 10:​24, 25.

1, 2. (a) ?From wanem i impoten we ol miting blong ol faswan Kristin oli mekem se oli haremgud mo oli leftemap tingting blong olgeta? (b) ?Wanem advaes blong Pol i soemaot nid blong mekem miting tugeta?

OLI mekem miting long ples haed. Oli fasfas long wan rum we oli lokemgud doa blong hem. Afsaed, i gat denja long evri ples. Lida blong olgeta, Jisas, ol man oli jes kilim hem i ded long fored blong plante man. Hem i bin givim woning long ol man blong hem se bambae oli save kasem sem trabol olsem hem. (Jon 15:20; 20:19) Be, taem oli stap toktok smosmol tugeta long saed blong Jisas we oli laekem hem tumas, ating oli harem sef lelebet from we oli joen tugeta wanples.

² Biaen, taem ol yia oli stap pas, ol Kristin oli fesem olkaen traem mo ol man oli kilim olgeta. Olsem ol faswan disaepol, ol miting we oli gat tugeta, i mekem olgeta oli haremgud mo i leftemap tingting blong olgeta. Taswe, aposol Pol i raetem long Hibrus 10:​24, 25, se: ‘I gud yumi stap tingbaot yumi, blong yumi pulum yumi blong kam strong moa long lav mo ol gudfala wok. I nogud yumi lego fasin blong joen tugeta wanples, olsem we samfala oli mekem finis. Oltaem yumi mas toktokgud long yumi blong leftemap tingting blong yumi. Samting ya, yufala i mas mekem moa, taem yufala i luk we dei ya i kam kolosap finis.’

3. ?From wanem yumi save talem se tok blong Hibrus 10:​24, 25 i no jes wan oda long ol Kristin blong mekem miting tugeta nomo?

³ Ol tok ya oli no jes wan oda nomo blong gohed blong mekem miting tugeta. Oli soemaot wan mak we God i putum we ol Kristin oli mas traehad blong kasem long ol miting blong olgeta​—mo, long olgeta taem we oli joen wanples. Yumi luk klia se dei blong Jeova i kolosap finis. Taswe, naoia bitim bifo, ol traem mo denja blong rabis wol ya, oli mekem se i impoten tumas we ol miting blong yumi oli olsem wan sefples, wan ples blong kasem paoa mo blong leftemap tingting blong yumi evriwan. ?Yumi save mekem wanem blong mekem olsem? Naoia, yumi save luklukgud long tok blong Pol, mo yumi save askem tri bigfala kwestin: ?Wanem mining blong tok ya ‘yumi stap tingbaot yumi’? ?Wanem mining blong tok ya, ‘yumi pulum yumi blong kam strong moa long lav mo gudfala wok’? Mo laswan, ?olsem wanem ‘yumi save leftemap tingting blong yumi’ long hadtaem ya?

‘Yumi Stap Tingbaot Yumi’

4. ?Tok ya ‘yumi mas tingbaot yumi,’ i minim wanem?

⁴ Taem Pol i talem long ol Kristin se ‘yumi mas stap tingbaot yumi,’ hem i yusum Grik tok ya ka·ta·no·eʹo, wan tok we i strong moa long hemia we oli yusum oltaem, “luksave.” Wan buk, nem blong hem Theological Dictionary of the New Testament, i talem se Grik tok ya i minim “blong putum olgeta tingting i stap strong long wan samting.” Man ya W. E. Vine, i talem se tok ya i save minim tu, “kasem save fulwan, tingtinggud long hem.” Taswe taem ol Kristin oli “tingbaot” olgeta, oli no jes luk ol samting we i isi blong luksave long ol narafala, be oli yusum tingting blong olgeta blong traem kasem wan save we i dip moa long saed blong ol narafala.​—Skelem Hibrus 3:1.

5. ?Wanem sam fasin blong wan man we oli save stap haed, mo from wanem yumi mas tingbaot olgeta ya?

⁵ Yumi mas rimemba se i gat moa insaed long wan man i bitim wanem we yumi stap luk afsaed, mo wanem we yumi luk long ol wok blong hem, mo long prapa fasin blong hem. (1 Samuel 16:7) Plante taem, kwaet fasin blong wan man i haedem ol dip filing blong hem, no i haedem wan gudfala fasin blong hapi. Mo tu, ol man oli gruap long ol defren ples. Samfala oli bin fesem plante nogud samting long laef blong olgeta. Sam narafala oli stap stanap strong naoia, tru long wan hadtaem we i bigwan moa bitim samting we yumi save tingbaot. Plante taem i hapen se, yumi harem i kros from wan smol fasin blong wan brata no sista, be kros ya i lus taem yumi save moa long laef blong hem bifo no naoia.​—Proveb 19:11.

6. ?Wanem sam rod we yumi save folem blong save moa ol narafala, mo wanem gudfala samting i save kamaot from?

⁶ I tru, samting ya i no minim se yumi traem save prapa bisnes blong wanwan man, sipos oli no wantem talem long yumi. (1 Tesalonaeka 4:11) Be, yumi save soem intres long laef blong ol narafala wanwan. Samting ya i minim moa bitim fasin blong talem halo long Haos Kingdom. ?From wanem yu no traem jusum wan we yu wantem save hem moa, ale traem storeyan blong sam menet nomo wetem hem bifo no afta long miting? Samting we i moa gud, singaot wan no tu fren ‘oli kam long haos’ blong yu, blong kakae smol no dring ti. (Rom 12:13) Soem intres. Lesin. Sipos yu askem hem nomo blong talem olsem wanem hem i bin kasem save long Jeova mo kam blong laekem hem, samting ya i save soemaot plante samting long saed blong man ya. Yu save lanem moa, sipos yu wok wetem hem long wok blong prij long ol haos wanwan. Fasin olsem blong tingbaot ol narafala, bambae i halpem yumi blong gat tru fasin lav, no fasin blong kasem save long filing blong narafala.​—Filipae 2:4; 1 Pita 3:8.

‘Yumi Pulum Yumi’

7. (a) ?Ol tijing blong Jisas oli mekem wanem long ol man? (b) ?Wanem samting i mekem se ol tijing blong hem oli gat paoa?

⁷ Taem yumi stap tingbaot ol narafala, yumi rere moa blong pulum ol narafala blong mekem wan samting. Ol Kristin elda oli mekem wan wok we i bigfala moa long saed ya. Wan taem, Jisas i toktok long ol man long open ples, ale yumi ridim se: “Taem Jisas i finisim ol tok ya ol man oli sapraes long tok blong hem.” (Matyu 7:28) Long wan narafala taem bakegen, sam soldia we oli kam blong holem hem, oli lego hem mo oli talem se: “I no gat man samtaem we i stap tok olsem man ya.” (Jon 7:46) ?Wanem i mekem ol tijing blong Jisas oli gat paoa? ?From we hem i krakrae no i singaot strong blong pulum filing blong ol man? No gat. Jisas i tok long wan fasin we i pulum man blong respektem hem. Be tu, oltaem hem i traem blong kasem hat blong ol man we oli stap lesin. From we hem i tingbaot ol narafala, hem i savegud wanem samting i stret blong talem blong pulum olgeta blong tekem aksin. Hem i yusum ol pijatok we oli klia mo isi, mo we oli laenap wetem evri dei laef blong ol man. (Matyu 13:34) Sem mak nao, olgeta we oli gat ol tok long ol miting, oli mas folem eksampel blong Jisas. Oli mas tok long fasin we i pulum ol man blong tekem aksin, olsem fasin we i soem se oli kea long ol man mo we oli glad blong toktok long olgeta. Olsem Jisas, yumi save faenem sam pijatok we oli stret long ol man we oli lesin, mo we oli save tajem hat blong olgeta.

8. ?Olsem wanem Jisas i pulum man tru long eksampel blong hem, mo olsem wanem yumi save folem eksampel blong hem long saed ya?

⁸ Taem yumi mekem wok blong God blong yumi, yumi evriwan i save pulum ol narafala tru long eksampel blong yumi. Jisas i rili pulum ol man we oli lesin long hem. Hem i laekem tumas wok blong prij mo hem i leftemap wok ya. Hem i talem se wok ya i olsem kakae blong hem. (Jon 4:34; Rom 11:13) Fasin ya, we man i glad long wok blong hem, i save kasem ol narafala man kwiktaem. ?Yu tu yu save soemaot long ol narafala, fasin glad we yu stap kasem long wok blong prij? Long wan fasin we yu no tokflas, serem ol gudfala ekspiryens blong yu wetem ol narafala long kongregesen. Taem yu askem sam narafala blong wok wetem yu, traem halpem olgeta blong faenem trufala fasin glad taem oli toktok long ol man long saed blong Bigfala Man we i Wokem yumi, Jeova.​—Proveb 25:25.

9. (a) ?Wanem sam rod blong pulum ol narafala we yumi no wantem folem, mo from wanem? (b) ?Wanem samting i mas pusum yumi blong mekem wok blong Jeova?

⁹ Be, lukaot blong no pulum olgeta long wan fasin we i rong. Maet yumi no wantem blong mekem olsem, be maet yumi mekem olgeta oli harem nogud from we oli no stap mekem moa. Ating yumi no save, be maet yumi mekem olgeta oli sem, taem yumi skelem wok blong olgeta wetem sam narafala we oli mekem moa wok. No maet yumi gat strong tingting long sam mak we yumi mas kasem, mo maet yumi yusum ol tok we i daonem olgeta we oli no naf blong kasem ol mak ya. Samtaem ol fasin olsem oli save pusum wan blong tekem aksin blong smoltaem. Be Pol i no raetem se, ‘Pulum olgeta blong sem mo mekem gudfala wok.’ No gat. Yumi mas pulum olgeta wetem lav, ale biaen, stret tingting we i kamaot long wan gudfala hat bambae i pusum olgeta blong mekem ol wok. Wan man i no mas mekem wan wok from we hem i ting se ol narafala long kongregesen bambae oli tingting nogud long hem sipos hem i no mekem olsem.​—Skelem 2 Korin 9:​6, 7.

10. ?From wanem yumi mas rimemba se yumi no bos long bilif blong ol narafala?

¹⁰ Blong pulum ol narafala i no minim blong kontrolem olgeta. Nating se God i givim haeples long aposol Pol, hem i soemaot tingting daon taem hem i talem long kongregesen blong Korin se: ‘Mifala i no bos long bilif blong yufala.’ (2 Korin 1:24) I gud yumi gat tingting daon olsem hem, mo yumi luksave se i no wok blong yumi blong makem hamas taem ol man oli mas givim long wok blong Jeova, no blong bos long voes blong hat blong olgeta long ol prapa disisen we oli mas mekem. Sipos yumi gat fasin olsem, bambae yumi no traem blong ‘kam stret tumas, we yumi bitim mak,’ mo we yumi no glad. Mo bambae yumi no gat fasin we i strong tumas, yumi no yusum tok we i daonem tingting blong man oltaem, mo yumi no traem putumap ol rul. (Eklesiastis 7:16) Ol fasin olsem oli no pulum man, be oli daonem man.

11. ?Wanem i pusum ol man Isrel blong givim ol samting blong sapotem wok blong bildim haos tapolen, mo olsem wanem samting ya i save tru tede tu?

¹¹ Yumi wantem mekem olgeta fasin traehad blong yumi long wok blong Jeova wetem sem tingting olsem Isrel bifo i gat, taem oli givim sam samting blong bildim haos tapolen. Eksodas 35:21 i talem se: ‘Ale oli kam, olgeta evriwan we hat blong hem i pusum hem, mo oli karem ol samting blong wok ya i kam blong givim long Jeova, olgeta evriwan we tingting blong hem i pulum hem.’ I no wan man no wan samting raonabaot long olgeta we i fosem olgeta, be paoa we i stap insaed long olgeta, long hat blong olgeta, i pusum olgeta. Long lanwis Hibru, vas ya i talem olsem se, “evriwan we hat blong hem i leftemap hem,” oli givim ol presen olsem. (Mifala i putum narafala raeting.) Ale yumi traem go moa, yumi traehad blong leftemap hat blong ol narafala, evri taem we yumi joen tugeta. Speret blong Jeova bambae i mekem ol narafala samting we i nidim blong pulum ol man.

‘Yumi Leftemap Tingting Blong Yumi’

12. (a) ?Wanem sam mining blong Grik tok we oli tanem i kam “leftemap tingting”? (b) ?Olsem wanem ol fren blong Job oli no leftemap tingting blong hem? (c) ?From wanem yumi no mas jajem ol narafala?

¹² Taem Pol i raetem se ‘yumi mas leftemap tingting blong yumi,’ hem i yusum Grik tok ya pa·ra·ka·leʹo, we i save minim tu, ‘mekem narafala i strong, mekem hem i haremgud.’ Long Grik Septuagint Baebol, oli yusum semfala tok long Job 29:​25, we i tokbaot Job olsem wan man we i stap mekem ol man we oli krae oli haremgud. Samting we i narakaen se, taem Job i kasem ol bigfala trabol we i mekem hem i harem nogud tumas, hem i no kasem wan tok we i leftemap tingting blong hem. Ol trifala man ya blong “leftemap tingting,” oli tingbaot blong jajem hem nomo mo blong tok strong long hem, taswe oli no kasem save long filing blong hem mo oli no sore long hem. Antap long hemia, long olgeta toktok we oli talem, i no gat wan taem we oli singaotem Job long nem blong hem. (Skelem Job 33:​1, 31.) I klia se oli tingbaot Job olsem wan trabol bitim we hem i wan man. From samting ya, yumi no sapraes we Job i kam kros mo i tok long olgeta se: “!Man, sipos sol blong yufala i stap long sem ples we sol blong mi i stap!” (Job 16:4) !Sem mak tede, sipos yu wantem leftemap tingting blong wan narafala, traem putum yu wan long ples blong hem! Yu no mas jajem hem. Olsem Rom 14:4 i talem, ‘?Weswe yu stap traem jajem ol man blong wok blong narafala man? Yu yu no gat raet blong mekem olsem. Masta blong olgeta nomo i save talem we olgeta oli mekem i gud no oli mekem i nogud. Be olgeta ya bambae oli save mekem i gud, from we Jeova i save givim paoa long olgeta blong oli mekem olsem.’

13, 14. (a) ?Blong mekem ol brata mo sista blong yumi oli haremgud bakegen, yumi mas mekem olgeta oli luksave wanem stampa trutok? (b) ?Olsem wanem wan enjel i mekem Daniel i strong bakegen?

¹³ Wan tok we i kolosap sem mak long pa·ra·ka·leʹo, oli tanem i kam “haremgud” long 2 Tesalonaeka 2:​16, 17: ‘God, Papa blong yumi, i laekem yumi tumas, mo i mekem yumi haremgud oltaem, mo i givhan long yumi long gladhat blong hem taem i givim hop long yumi. Hem wetem Jisas Kraes, Masta blong yumi, bambae tufala i mekem hat blong yufala i haremgud mo mekem yufala i strong long evri gudfala wok mo gudfala tok.’ Makem long ples ya we Pol i joenem tingting blong haremgud long hat wetem stampa trutok se Jeova i laekem yumi tumas. Taswe yumi save leftemap tingting blong narafala mo mekem hem i haremgud taem yumi tokbaot impoten trutok ya bakegen wetem hem.

¹⁴ Wan taem bifo, profet Daniel i bin harem nogud afta we hem i luk wan drim we i mekem hem i fraet, nao hem i talem: “Respek we mi gat long mi wan i jenis mo mi harem se mi blong lus nomo, mo mi no moa gat paoa.” Jeova i sanem wan enjel we i talem bakegen mo bakegen long Daniel se hem i “gud tumas” long ae blong God. ?Wanem risal blong samting ya? Daniel i talem long enjel ya se: “Yu yu mekem mi mi kam strong bakegen.”​—Daniel 10:​8, 11, 19.

15. ?Olsem wanem ol elda mo ol elda we oli goraon blong visitim ol kongregesen, oli save skelem fasin blong talem ol gudfala toktok long narafala wetem fasin stretem?

¹⁵ Hemia nao wan narafala rod blong leftemap tingting blong ol narafala. !Talem sam gudfala tok long olgeta! I isi nomo blong tekem wan fasin we yumi daonem no tok strong long ol narafala oltaem. I tru, samtaem i nidim ol tok blong stretem, mo wok ya i stap moa wetem ol elda mo ol elda we oli goraon blong visitim ol kongregesen. Be i moagud sipos ol man oli rimemba olgeta ya from we oli leftemap tingting blong ol narafala wetem fasin lav, i bitim we oli rimemba olgeta from fasin blong faenem rong long narafala.

16. (a) Blong leftemap tingting blong wan man we tingting blong hem i foldaon, ?from wanem i no naf blong talem nomo se hem i mas mekem moa long wok blong Jeova? (b) ?Olsem wanem Jeova i halpem Elaeja taem tingting blong hem i foldaon?

¹⁶ Olgeta we tingting blong olgeta i foldaon, oli nidim moa ol tok blong leftemap tingting. Mo Jeova i wantem se yumi olsem ol Kristin brata, yumi mas givhan long olgeta ya​—i tru moa long ol elda. (Proveb 21:13) ?Yumi save mekem wanem? Ansa i no isi, olsem we yumi go talem long olgeta blong mekem moa long wok blong Jeova. ?From wanem? From we samting ya i save mekem oli ting se tingting blong olgeta i foldaon from we oli no stap mekem inaf wok. Mo kolosap oltaem samting ya i no tru. Long wan taem bifo, tingting blong profet Elaeja i foldaon bigwan we hem i wantem ded nomo. Be samting ya i kamaot long wan taem we hem i bisi tumas long wok blong Jeova. ?Jeova i mekem wanem long hem? Hem i sanem wan enjel blong givhan long hem long fasin we i rili wokgud. Elaeja i talemaot olgeta dip filing blong hem long Jeova. Mo hem i talem se hem i harem we hem i nating nomo, olsem ol olfala blong hem bifo we oli ded finis, mo se olgeta wok we hem i bin mekem oli blong nating nomo. Mo tu, hem i harem se hem i stap hem wan nomo. Jeova i lesin, mo i leftemap tingting blong hem from sam bigfala saen we hem i mekem blong soemaot paoa blong hem. Mo hem i talem ol gudfala toktok long hem blong soem se hem i no stap hem wan nating, mo se wok ya we hem i statem bambae i gohed kasem en blong hem. Jeova i promes tu blong givim wan fren long Elaeja, we bambae hem i save trenem blong biaen i save karem ples blong Elaeja.​—1 King 19:​1-21.

17. ?Wan elda i save mekem wanem blong leftemap tingting blong wan we i stap mekem i strong tumas long hem wan?

¹⁷ !Samting ya i rili leftemap tingting blong Elaeja! I gud yumi mekem sem mak, yumi leftemap tingting blong olgeta blong yumi we oli harem nogud long filing blong olgeta. !Traem kasem save long olgeta tru long fasin blong lesin! (Jemes 1:19) Talem ol tok blong leftemap tingting we oli kamaot long Baebol mo we oli stret long nid blong olgeta wanwan. (Proveb 25:11; 1 Tesalonaeka 5:14) Blong leftemap tingting blong olgeta we oli stap mekem i strong tumas long olgeta bakegen, ol elda oli save tok long kaen fasin blong talem ol pruf blong Baebol we i soemaot se Jeova i laekem mo i tinghae long olgeta.a Fasin blong tokbaot ransom sakrifaes i gat bigfala paoa blong leftemap tingting blong olgeta we oli ting se oli nating nomo. Wan man we i stap harem nogud from wan sin we hem i bin mekem bifo, maet i nidim we wan i mekem hem i luksave se ransom sakrifaes i mekem hem i klin finis, sipos hem i rili tanraon mo sakemaot fasin ya we i bin mekem hem i sin.​—Aesea 1:18.

18. ?Olsem wanem wan i save yusum tijing blong ransom sakrifaes blong leftemap tingting blong wan man we i kasem trabol long wan narafala, olsem fasin blong repem?

¹⁸ Blong yusum tijing ya long fasin we i stret, wan elda i mas tingtinggud long problem blong wanwan man. Tingbaot wan eksampel: Folem Loa blong Moses, oli mas kilim anamol olsem sakrifaes blong kam klin long ol sin blong olgeta. Hemia i olsem pija blong ransom sakrifaes blong Kraes. (Levitikas 4:​27, 28) Be i no gat wan loa we i talem se wan woman we wan man i repem hem, i mas mekem wan sakrifaes blong sin olsem. Loa i talem se oli “no mas mekem wan samting” blong panisim hem. (Dutronome 22:​25-27) Taswe tede, sipos wan sista i kasem trabol from we wan man i kilim hem mo i repem hem, nao hem i harem se hem i doti mo hem i olsem nating nomo, ?yu ting se i stret blong tokbaot we hem i nidim ransom sakrifaes blong mekem hem i klin long sin blong hem? No gat. Hem i no mekem sin taem man ya i fosem hem. Man ya we i repem hem, hem nao i mekem sin mo i nidim blong kam klin. Taswe, maet i gud blong tokbaot lav we Jeova mo Kraes tufala i soemaot taem tufala i givim ransom sakrifaes, olsem wan pruf se hem i no doti long ae blong God from sin blong narafala man, be hem i sas long ae blong Jeova mo hem i stap aninit long lav blong hem yet.​—Skelem Mak 7:​18-23; 1 Jon 4:16.

19. ?From wanem yumi no mas ting se fasin joen wetem ol brata sista blong yumi bambae i leftemap tingting blong yumi evri taem, be wanem strong tingting yumi mas gat?

¹⁹ Yes, nomata wanem samting i hapen long laef blong wan man, mo wanem kaen nogud trabol i bin kamaot long laef blong hem bifo, hem i mas faenem fasin blong leftemap tingting insaed long kongregesen blong ol man blong Jeova. Bambae i olsem, sipos yumi wanwan i traehad blong tingbaot ol narafala, blong pulum ol narafala, mo blong leftemap tingting blong ol narafala evri taem we yumi joen tugeta. Be, i tru, from we yumi gat sin, samtaem yumi evriwan i mestem long saed ya. Sam samtaem yumi save mekem narafala i harem nogud, mo wanwan taem, yumi save mekem hat blong narafala i soa tu. Traem blong no lukluk tumas ol mastik blong narafala long saed ya. Sipos tingting blong yu i stap oltaem long ol rong blong narafala, bambae yu save kam wan man blong faenem poen blong ol narafala long kongregesen. Mo tu, yu save foldaon insaed long sem trap ya we Pol i givim woning long yumi from, hemia fasin blong lego ol miting. !Yu neva mas letem samting ya i hapen! !Taem laef long olfala wol ya i stap kam moa strong mo i gat moa denja long hem, yumi mas holem strong tingting blong mekem evri samting we yumi naf blong mekem, blong leftemap tingting blong olgeta we yumi joen wetem olgeta long ol miting​—mo yumi mas mekem samting ya moa, taem yumi luk we dei blong Jeova i kam kolosap finis!

[Futnot]

?Bambae Yu Yu Ansa Olsem Wanem?

◻ ?From wanem i impoten se ol miting mo fasin joen tugeta long ol las dei ya oli leftemap tingting blong yumi?

◻ ?Wanem minim blong fasin blong tingbaot narafala?

◻ ?Wanem mining blong fasin blong pulum ol narafala?

◻ ?Yumi mas mekem wanem blong leftemap tingting blong narafala?

◻ ?Olsem wanem yumi save leftemap tingting blong wan we i harem nogud mo we tingting blong hem i foldaon?

[Tok blong pija long pej 16]

Fasin blong tekem narafala i kam long haos i save givhan long yumi blong save moa ol narafala

[Tok blong pija long pej 18]

Taem tingting blong Elaeja i foldaon, Jeova i mekem hem i haremgud long kaen fasin