Gohed Blong Folem Ol Tok Blong Jehova

1. Tokbaot from wanem yumi mas letem Jehova i lidim yumi.

TRAEM tingbaot se yu lus insaed long wan bigfala dakbus. Ples ya i denja from i gat plante wael animol, ol plant mo bebet we oli save kakae yu, mo plante ston we yu save kasem kil long olgeta. I sua se bambae yu glad tumas sipos wan man we i save gud ples ya i lidim yu, blong yu gowe long ol ples we i denja. Wol ya i olsem dakbus. Hem i fulap long samting we i denja, we i save spolem frensip blong yumi wetem Jehova. Be yumi gat wan beswan man blong lidim yumi, hemia Jehova. Hem i save halpem yumi blong gowe long ol ples we i denja, mo lidim yumi i go kasem laef we i no save finis long niufala wol.

2. ?Olsem wanem Jehova i stap lidim yumi?

² ?Olsem wanem Jehova i stap lidim yumi? Faswan samting we hem i yusum, hemia tok blong hem Baebol. Be hem i yusum ol man tu blong lidim yumi. Eksampol, hem i yusum “gudfala slef we i waes” blong givim ol kakae long saed blong spirit blong halpem yumi blong mekem ol waes desisen. (Mat. 24:45) Mo tu, Jehova i yusum ol man we oli naf gud blong oli lidim yumi. Eksampol, hem i yusum ol eria elda mo ol elda long kongregesen blong leftemap tingting blong yumi mo givim ol gudfala advaes we i save halpem yumi blong gotru long ol hadtaem. Yumi glad tumas long ol gudfala advaes ya we i lidim yumi long ol las dei ya we i had tumas. Ol advaes ya oli halpem yumi blong yumi gohed blong mekem Jehova i glad mo stap long rod blong laef.

3. ?Bambae yumi tokbaot wanem long stadi ya?

³ Taem Jehova i yusum ol sinman blong talemaot tok blong hem long yumi, maet i had blong yumi folem. ?From wanem? Maet hemia from we yumi no laekem samting we oli talem, o yumi harem se samting ya i no waes mo ting se i no kamaot long Jehova. Long taem olsem, yumi nidim blong trastem Jehova se hem nao i stap lidim ol man blong hem, mo tingbaot se taem yumi folem ol tok blong hem, yumi save kasem blesing. Taswe stadi ya bambae i givhan long yumi blong trastem moa Jehova, from we bambae yumi luk (1) olsem wanem Jehova i lidim ol man blong hem bifo, (2) olsem wanem hem i lidim yumi tede, mo (3) wanem blesing yumi save kasem taem yumi gohed blong folem ol tok blong hem.

?OLSEM WANEM JEHOVA I LIDIM OL MAN ISREL?

4-5. ?Jehova i soemaot olsem wanem se hem nao i stap yusum Moses blong lidim ol man Isrel? (Yu luk pija.)

⁴ Jehova i putumap Moses blong lidim ol man Isrel oli aot long Ijip. Mo hem i soemaot klia long ol man Isrel se hem nao i yusum Moses blong lidim olgeta. Eksampol, long dei, hem i yusum wan bigfala klaod blong lidim olgeta, mo long naet, hem i yusum wan bigfala faea. (Eks. 13:21) Moses i folem bigfala klaod mo faea ya, we i lidim hem mo ol man Isrel i go long Red Si. Be taem ol man Isrel oli luk bigfala solwota ya long fored, mo ol ami blong Ijip biaen long olgeta, oli fraet we oli fraet. Taswe oli ting se Moses i mestem taem i tekem olgeta oli kam long Red Si. Be hemia i no wan mastik. Jehova nao i yusum Moses blong lidim olgeta oli kam long ples ya. (Eks. 14:2) Biaen, Jehova i mekem wan samting blong sapraes, blong sevem olgeta.—Eks. 14:​26-28.

⁵ Foti yia afta, Moses i gohed blong dipen long bigfala klaod ya blong lidim ol man blong God taem oli stap long draeples.a Samtaem, Jehova i putum bigfala klaod ya stret antap long tent blong Moses, blong olgeta man Isrel oli save luk. (Eks. 33:​7, 9, 10) Mo long bigfala klaod ya, Jehova i toktok long Moses blong givim tok we hem i mas talemaot long ol man Isrel. (Sam 99:7) Yes, ol man Isrel oli save luk klia se Jehova i yusum Moses blong lidim olgeta.

6. ?Ol man Isrel oli mekem wanem, taem Moses i talemaot tok blong Jehova long olgeta? (Namba 14:​2, 10, 11)

⁶ Sore tumas, bighaf blong ol man Isrel oli no wantem luksave klia pruf ya se Jehova nao i stap yusum Moses blong toktok long bihaf blong Hem. (Ridim Namba 14:​2, 10, 11.) Plante taem oli no wantem luksave samting ya. From risen ya, Jehova i no letem olgeta oli go insaed long Promes Lan.—Nam. 14:30.

7. Tokbaot eksampol blong sam man we oli folem gud ol tok blong Jehova. (Namba 14:24) (Mo tu, yu luk pija.)

⁷ Be i gat sam man Isrel we oli folem ol tok blong Jehova. Eksampol, Jehova i talem se: “Keleb . . . i gohed blong folem mi long fulhat blong hem.” (Ridim Namba 14:24.) God i blesem Kaleb, mo i letem hem i jusum ples we hem i wantem laef long hem long Promes Lan. (Jos. 14:​12-14) Ol nekiswan jeneresen blong ol man Isrel we oli go insaed long Promes Lan, olgeta tu oli soemaot wan gudfala eksampol, taem oli folem ol tok blong Jehova. Taem Josua i tekem ples blong Moses blong i lidim ol man Isrel, ’long ful laef blong olgeta, oli respektem hem bigwan.’ (Jos. 4:14) Taswe Jehova i blesem olgeta, taem i tekem olgeta i go long kantri ya we hem i promes blong givim long olgeta.—Jos. 21:​43, 44.

8. Eksplenem olsem wanem Jehova i lidim ol man blong hem long taem blong ol king. (Mo tu, yu luk pija.)

⁸ Sam yia biaen, Jehova i putumap ol jaj blong lidim ol man blong hem. Biaen, long taem blong ol king, Jehova i putum ol profet blong lidim ol man blong hem. Ol gudfala king, oli folem advaes blong ol profet. Eksampol, King Deved i gat tingting daon taem i letem profet Natan i stretem hem. (2 Saml. 12:​7, 13; 1 Kron. 17:​3, 4) King Jehosafat i folem advaes blong profet Jahasiel mo i leftemap tingting blong ol man Juda blong oli “trastem ol profet blong [God].” (2 Kron. 20:​14, 15, 20) Taem King Hesekia i stap long trabol, hem i askem profet Aesea blong i halpem hem. (Aes. 37:​1-6) Evri taem we ol king oli folem advaes blong Jehova, hem i blesem olgeta mo i protektem ol man blong hem. (2 Kron. 20:​29, 30; 32:22) Evriwan oli sud luksave klia se Jehova i stap yusum ol profet blong lidim ol man blong hem. Be bighaf blong ol king mo ol man Isrel oli no wantem lesin long ol profet blong Jehova.—Jer. 35:​12-15.

?OLSEM WANEM JEHOVA I LIDIM OL FAS KRISTIN?

9. ?Jehova i yusum hu blong lidim ol fas Kristin? (Mo tu, yu luk pija.)

⁹ Long taem blong ol fas Kristin, Jehova i stanemap Kristin kongregesen. ?Be olsem wanem hem i lidim olgeta? Hem i putumap Jisas olsem hed blong kongregesen. (Efes. 5:23) Be Jisas i no toktok stret long ol disaepol ya wanwan, blong talem samting we oli mas mekem. Hem i yusum ol aposol mo ol elda long Jerusalem blong lidim olgeta. (Wok 15:​1, 2) Mo tu, Jehova i putumap ol elda blong lidim ol kongregesen.—1 Tes. 5:12; Taetas 1:5.

10. (1) ?Ol fas Kristin oli folem ol tok we oli kasem long Jehova? (Ol Wok 15:​30, 31) (2) ?From wanem samfala oli no wantem lesin long ol man we Jehova i yusum olgeta? (Yu luk bokis ya “Sam Man Oli No Wantem Luksave Se Jehova i Yusum Ol Man Blong Lidim Ol Man Blong Hem.”)

¹⁰ ?Ol fas Kristin oli gat wanem tingting, taem oli harem ol tok blong Jehova? Bighaf blong olgeta oli glad blong folem ol tok ya. Baebol i talem se: “Oli glad tumas long ol toktok ya we i leftemap tingting blong olgeta.” (Ridim Ol Wok 15:​30, 31.) ?Be olsem wanem Jehova i stap lidim ol man blong hem tede?

?OLSEM WANEM JEHOVA I LIDIM YUMI TEDE?

11. Tokbaot wan eksampol we i soemaot se Jehova i stap givhan long ol man we oli stap lidim ol man blong hem tede.

¹¹ Jehova i gohed blong lidim ol man blong hem tede. Hem i yusum Tok blong hem Baebol mo Boe blong hem we i hed blong kongregesen. ?I gat ol klia pruf we i soemaot se Jehova i gohed blong yusum ol man tede? Yes. Eksampol, traem tingbaot samting we i hapen afta long yia 1870. Charles Taze Russell mo ol fren blong hem oli stat blong kasemsave se 1914 i wan impoten yia blong Kingdom blong God. (Dan. 4:​25, 26) Oli kasemsave samting ya taem oli mekem risej long Baebol mo trastem se bambae oli save luk profet tok ya i kamtru. ?Olsem wanem? ?Jehova i lidim olgeta long risej ya? I klia se yes. Ol samting we oli hapen long 1914 oli pruvum klia se Kingdom blong God i stat blong rul. Taem Wol Wo I i stat, long sem taem ya i gat ol strong sik, graon i seksek bigwan, mo kakae i sot. (Luk 21:​10, 11) Yes, i klia se Jehova i stap yusum ol Kristin man ya blong halpem ol man blong hem.

12-13. ?Oganaesesen i mekem wanem plan long taem blong Wol Wo II?

¹² Traem tingbaot samting we i hapen tu long taem blong Wol Wo II. Afta we ol brata long wol hedkwota oli stadi long Revelesen 17:​8, oli luksave se wo ya bambae i no gohed kasem Amagedon. Be oli luksave se afta long wo ya, bambae i gat pis we i mekem se ol Witnes blong Jehova oli save prij long plante moa man. Taswe, oganaesesen blong Jehova i stanemap Wajtaoa Baebol Kolej (Skul) blong Gilead, blong trenem ol misinari blong prij mo tijim ol man long olgeta ples long wol. Oli sanem ol misinari tu long taem we i gat wo. Antap long hemia, gudfala slef i mekem plan blong i gat Kos Blong Go Moa Long Tiokratik Wokb long ol kongregesen, blong trenem evriwan blong oli kam ol gudfala man blong prij mo tij. Long rod ya, ol skul ya oli save trenem ol man blong God from bigfala wok ya we oli mas mekem.

¹³ Tede, yumi luksave klia se Jehova i stap lidim ol man blong hem long taem ya we i had tumas. Stat long Wol Wo II, ol man blong Jehova oli glad from we long plante kantri oli fri blong talemaot gud nius. From samting ya, wok blong prij i kasem olgeta ples long wol, mo plante man oli save Jehova.

14. ?From wanem yumi save trastem ol tok we i kam long oganaesesen blong Jehova mo ol elda? (Revelesen 2:1) (Mo tu, yu luk pija.)

¹⁴ Tede, ol memba blong Hed Kampani oli gohed blong letem Kraes i lidim olgeta. Oli wantem se ol advaes we oli givim long ol brata long saed long ol samting, i mas laenap wetem tingting blong Jehova. Biaen, oli yusum ol eria elda mo ol elda blong talemaot long ol kongregesen.c Ol elda we Jehova i putumap, oli stap long “raethan” blong Kraes. (Ridim Revelesen 2:1.) Be ol elda ya oli no stret gud mo oli save mekem mastik. Samtaem Moses mo Josua tu i mekem sam mastik, sem mak olsem ol aposol. (Nam. 20:12; Jos. 9:​14, 15; Rom 3:23) Be yumi luksave klia se Kraes i stap lidim gudfala slef mo ol elda, mo bambae hem i gohed blong mekem olsem “oltaem, gogo kasem lashaf blong sistem blong wol.” (Mat. 28:20) Taswe, yumi gat evri risen blong trastem ol tok we yumi kasem tru long ol man ya we Jehova i putumap blong lidim yumi.

?YUMI KASEM WANEM TAEM YUMI GOHED BLONG FOLEM OL TOK BLONG JEHOVA?

15-16. ?Yu lanem wanem long ekspiriens blong olgeta we oli folem ol tok blong Jehova?

¹⁵ Taem yumi gohed blong folem ol tok blong Jehova, yumi save kasem plante blesing naoia. Eksampol, Andy mo Robyn i folem advaes we gudfala slef i givim blong mekem laef blong tufala i kam simpol. (Mat. 6:22) From samting ya, tufala i naf blong wok long ol tiokratik projek. Robyn i talem se: “Mitufala i laef long sam haos we i smol, mo plante taem i no gat kijin. Mo mi salemaot plante kamera blong mi, nating se mi laekem tumas blong tekem ol foto. Taem mi salemaot, mi krae. Be olsem Sera, waef blong Ebraham, mi lukluk i go nomo long fored be i no biaen.” (Hib. 11:15) ?Wanem gudfala frut i kamaot from desisen blong tufala? Robyn i talem se: “Mitufala i glad tumas from mitufala i save se mitufala i givim ol samting ya i go long Jehova. Taem mifala i mekem ol wok we Jehova i givim long mitufala, mitufala i pijarem finis se laef long niufala wol bambae i olsem wanem.” Andy i agri, mo i talem se: “Mitufala i glad tumas from we mitufala i yusum taem mo paoa blong mitufala long wok blong Jehova.”

¹⁶ ?Yumi kasem wanem moa, taem yumi gohed blong folem ol tok blong Jehova? Afta we Marcia i graduet long hae skul, hem i folem advaes ya blong putum Jehova fasples. (Mat. 6:33; Rom 12:11) Hem i talem se: “Mi gat janis blong go long yunivesiti blong skul fo yia we i fri nomo. Be mi wantem mekem moa long wok blong Jehova. Taswe, mi jusum blong go long wan trening skul blong lanem wan wok we i save sapotem mi long wok blong paenia. Hemia beswan desisen we mi mekem. Naoia mi glad long wok blong fultaem paenia mo mi naf blong jenisim program blong mi long wok, blong mi save go wok sam dei long Betel mo mekem sam narafala spel wok long wok blong Jehova.”

17. ?Yumi kasem wanem moa, taem yumi gohed blong folem ol tok blong Jehova? (Aesea 48:​17, 18)

¹⁷ Samtaem, yumi kasem sam advaes we i blokem yumi blong ronem ol sas samting, mo ol samting we i save pulum yumi blong brekem ol loa blong God. Long taem olsem, i gud blong folem ol advaes we Jehova i givim. Olsem nao, yumi save gat wan tingting we i klin mo blokem plante problem. (1 Tim. 6:​9, 10) Sipos yumi mekem olsem, yumi save wosipim Jehova long fulhat blong yumi, nao yumi save harem gud mo kasem trufala pis.—Ridim Aesea 48:​17, 18.

18. ?From wanem yu gat strong tingting blong gohed blong folem ol tok blong Jehova?

¹⁸ I sua se Jehova bambae i gohed blong yusum ol man blong lidim yumi long taem blong bigfala trabol, mo go kasem Wan Taosen Yia Rul Blong Kraes. (Sam 45:16) ?Olsem wanem? ?Bambae yumi gohed blong folem ol tok blong Jehova, nating se yumi wantem mekem wan narafala samting? Sipos yumi traehad blong folem ol tok blong Jehova naoia, bambae i isi blong mekem olsem long fiuja. Taswe, i gud we oltaem yumi folem ol tok blong Jehova, mo hemia i minim tu ol tok we hem i talem tru long ol man we hem i putumap blong lidim yumi. (Aes. 32:​1, 2; Hib. 13:17) Mo sipos yumi mekem olsem, yumi gat evri risen blong trastem Jehova, we hem nao Man ya we stap halpem yumi blong gowe long ol denja we i save spolem frensip blong yumi wetem hem, mo lidim yumi i go kasem laef we i no save finis long niufala wol.