Yumi Neva Stap Yumi Wan

1-2. (1) Taem yumi fesem ol trabol, ?from wanem yumi talem se yumi neva stap yumi wan? (2) ?Bambae yumi tokbaot wanem long stadi ya?

TAEM yumi fesem ol bigfala trabol long laef blong yumi, maet yumi harem olsem we yumi stap yumi wan nomo long wan smol bot, long medel blong solwota we i raf we i raf. Be blong talem stret, yumi neva stap yumi wan. Papa blong yumi long heven we i lavem yumi i luk ol trabol we yumi stap fesem, mo i promes blong givhan long yumi. Jehova i talem long ol man we oli holemstrong long hem se: “Bambae mi halpem yu.”—Aes. 41:10.

² Long stadi ya, bambae yumi tokbaot fo samting we Jehova i stap mekem blong givhan long yumi. (1) Hem i lidim yumi, (2) hem i givim samting we yumi nidim, (3) hem i protektem yumi, mo (4) hem i mekem yumi harem gud. Jehova i promes se nomata wanem trabol we yumi fesem long laef blong yumi, bambae hem i neva fogetem yumi mo bambae hem i neva lego yumi. Taswe yumi neva stap yumi wan.

JEHOVA I LIDIM YUMI

3-4. ?Olsem wanem Jehova i stap lidim yumi? (Ol Sam 48:14)

³ Ridim Ol Sam 48:14. Jehova i save se yumi no naf blong lidim yumi wan, mo yumi nidim hem blong lidim yumi. ?Olsem wanem hem i stap lidim ol man we oli holemstrong long hem? Wan rod hemia tru long Tok blong hem, Baebol. (Sam 119:105) Ol advaes we i stap insaed long Baebol, oli givhan long yumi blong mekem ol gudfala desisen mo gat ol gudfala fasin, we i save mekem se yumi glad naoia mo yumi laef olwe long fiuja.a Eksampol, hem i tijim yumi blong yumi no holemtaet kros, blong yumi tok tru oltaem, mo blong yumi lavem ol narafala long fulhat blong yumi. (Sam 37:8; Hib. 13:18; 1 Pita 1:22) Taem yumi mekem olsem, yumi save kam ol gudfala papa mo mama, hasban mo waef, mo ol gudfala fren.

⁴ Mo tu, Jehova i mekem se insaed long Baebol, oli raetem stori blong ol man we oli fesem ol sem kaen trabol olsem yumi, mo oli gat ol sem filing olsem yumi. (1 Kor. 10:13; Jem. 5:17) Taem yumi ridim ol stori ya mo yumi folem ol lesen we yumi lanem long olgeta, hemia i givhan long yumi long tu rod. Faswan, yumi luksave se i no yumi wan nomo we i stap fesem ol trabol, ol narafala tu oli fesem ol sem kaen trabol olsem yumi, mo oli stanap strong. (1 Pita 5:9) Mo nambatu, yumi lanem olsem wanem yumi tu yumi save stanap strong long ol trabol we yumi fesem.—Rom 15:4.

5. ?Jehova i stap yusum hu blong lidim yumi?

⁵ Jehova i stap yusum ol brata mo sista tu blong oli lidim yumi.b Eksampol, ol eria elda oli stap visitim ol kongregesen oltaem blong leftemap tingting blong yumi. Ol tok we oli givim oli mekem bilif blong yumi i strong, mo i givhan long yumi blong joen gud oltaem. (Wok 15:40–16:5) Ol elda long kongregesen tu oli stap traehad blong givhan long yumi wanwan blong stap klosap long Jehova. (1 Pita 5:​2, 3) Ol perens oli stap givhan long ol pikinini blong olgeta blong oli lavem Jehova, lanem blong yusum gud tingting blong olgeta, mo gat ol gudfala fasin. (Prov. 22:6) Mo ol sista we oli bigman long Kristin fasin oli stap givhan long ol yangfala sista, taem oli soemaot gudfala eksampol long olgeta, givim ol waes advaes long olgeta, mo leftemap tingting blong olgeta.—Taet. 2:​3-5.

6. ?Yumi mas mekem wanem blong ol advaes blong Jehova oli givhan long yumi?

⁶ Jehova i givim plante gudfala advaes long yumi blong lidim yumi. ?Be yumi mas mekem wanem blong ol advaes ya oli givhan long yumi? Ol Proveb 3:​5, 6 i talem se: “Yu mas trastem Jehova long fulhat blong yu, mo yu no mas dipen long prapa save blong yu.” Taem yumi mekem olsem, “hem bambae i mekem ol rod blong [yumi] oli stret.” Hemia i minim se ol advaes blong hem bambae oli halpem yumi blong blokem plante problem, mo glad moa long laef blong yumi. !Yumi glad tumas se Jehova i lavem yumi mo i givim ol advaes we i stret long yumi wanwan!—Sam 32:8.

JEHOVA I GIVIM SAMTING WE YUMI NIDIM

7. ?Olsem wanem Jehova i stap givim ol samting we yumi nidim? (Filipae 4:19)

⁷ Ridim Filipae 4:19. Jehova i stap givim ol advaes blong lidim yumi, be i no hemia nomo. Hem i stap givhan long yumi tu blong kasem ol samting we yumi nidim olsem kakae, klos, mo wan ples blong slip. (Mat. 6:33; 2 Tes. 3:12) I stret nomo we samtaem yumi wari from ol samting ya, be Jehova i talem se yumi no mas wari bitim mak from ol samting olsem. (Mat. 6:25) ?From wanem? From we Papa blong yumi bambae i neva lego ol man we oli holemstrong long hem. (Mat. 6:8; Hib. 13:5) Yumi save trastem promes blong hem se bambae hem i givim ol samting we yumi nidim.

8. ?Jehova i mekem wanem blong givhan long Deved?

⁸ Traem tingbaot samting we Jehova i mekem blong givhan long Deved. Taem hem i fesem hadtaem from we hem i stap ronwe long King Sol, Jehova i givim ol samting we hem mo ol man blong hem oli nidim blong stap laef. Taem Deved i tingtingbak long ol taem ya we Jehova i givhan long hem, hem i talem se: “Bifo mi mi wan yangfala mo naoia mi mi olfala, be mi neva luk wan stret man we God i lego hem, no ol pikinini blong hem oli stap lukaotem kakae.” (Sam 37:25) Olsem Deved, ating yu tu yu luk se taem yu mo ol brata mo sista i fesem hadtaem, Jehova i givim ol samting we yufala i nidim.

9. ?Olsem wanem Jehova i stap givim ol samting we ol man blong hem tede oli nidim taem i gat wan disasta? (Mo tu, yu luk ol pija.)

⁹ Jehova i stap givim ol samting we ol man blong hem oli nidim tu taem i gat wan disasta. Taem kakae i sot long Jerusalem long taem blong ol fas Kristin, ol brata mo sista long ol narafala ples oli sanem ol samting we ol Kristin ya oli nidim. (Wok 11:​27-30; Rom 15:​25, 26) Tede tu, ol man blong God oli glad blong givhan long ol brata mo sista we oli gat nid. Taem i gat wan disasta, Jehova i yusum ol narafala brata mo sista blong givim kakae, wota, klos, mo meresin long olgeta. Ol brata mo sista we oli wok long konstraksen oli fiksimap tu ol haos mo ol Haos Kingdom we disasta i spolem. Mo ol man blong Jehova oli kwik blong yusum Baebol blong leftemap tingting blong olgeta we oli lusum ol samting blong olgeta, o we oli lusum ol famle o fren blong olgeta long taem blong disasta.c

10-11. ?Yu lanem wanem long ekspiriens blong Borys?

¹⁰ Jehova i glad blong givim samting tu long olgeta we oli no wosipim hem. Taswe, yumi tu yumi wantem kaen long olgeta we oli no gat sem bilif olsem yumi. (Gal. 6:10) Taem yumi mekem olsem, hemia i save pulum olgeta blong oli wantem save Jehova mo ol man blong hem. Traem tingbaot ekspiriens blong Borys, wan prinsipol blong wan skul long Yukren. Nating se Borys i no wan Witnes blong Jehova, be oltaem hem i kaen long ol studen blong hem we oli Witnes, mo i respektem bilif blong olgeta. Taem Borys i mekem desisen blong ronwe long ples blong hem from we i gat faet, mo i go stap long wan narafala ples long kantri ya, ol brata mo sista oli givhan long hem. Biaen, Borys i go long Memoriol blong ded blong Jisas. Taem Borys i tingtingbak long ol samting we ol brata mo sista oli bin mekem blong hem, hem i talem se: “Ol Witnes oli kaen tumas long mi mo oli lukaot gud long mi. Mi talem bigfala tangkiu long ol Witnes blong Jehova.”

¹¹ Yumi tu yumi save folem fasin blong Papa blong yumi long heven taem yumi givhan long olgeta we oli gat nid, nating se oli gat sem bilif olsem yumi o nogat. (Luk 6:​31, 36) Yumi hop se taem yumi mekem olsem, hemia bambae i pulum olgeta blong oli wantem save moa Jehova mo kam ol man blong hem. (1 Pita 2:12) Be nating sipos oli no kam ol man blong hem, yumi save glad yet from we Baebol i talem se: “Man i harem gud moa taem hem i givim samting.”—Wok 20:35.

JEHOVA I PROTEKTEM YUMI

12. ?Jehova i promes blong mekem wanem blong protektem ol man blong hem olsem wan grup? (Ol Sam 91:​1, 2, 14)

¹² Ridim Ol Sam 91:​1, 2, 14. Tede, Jehova i promes blong protektem ol man blong hem long ol samting we i save mekem se oli no moa fren gud wetem hem. Bambae hem i neva letem Setan i spolem tru wosip. (Jon 17:15) Mo taem “bigfala trabol” i stat, yumi sua fulwan se Jehova bambae i holem promes blong hem, blong givhan long ol man blong hem blong oli gohed blong fren gud wetem hem, mo tu, bambae hem i sevem olgeta.—Rev. 7:​9, 14.

13. ?Olsem wanem Jehova i stap protektem yumi wanwan?

¹³ ?Olsem wanem Jehova i stap protektem yumi wanwan? Jehova i yusum Baebol blong tijim yumi blong luksave samting we i stret mo samting we i no stret. (Hib. 5:14) Taem yumi folem ol advaes blong Baebol, hemia i givhan long yumi blong blokem ol samting we oli save spolem bodi blong yumi mo mekem se yumi no moa fren gud wetem God. (Sam 91:4) Mo tu, Jehova i yusum kongregesen blong protektem yumi. (Aes. 32:​1, 2) Taem yumi joen wetem ol man we oli lavem Jehova mo oli folem ol advaes blong hem, bambae oli leftemap tingting blong yumi mo halpem yumi blong blokem ol samting we i save spolem yumi.—Prov. 13:20.

14. (1) ?From wanem God i no protektem yumi long evri trabol we yumi fesem? (2) ?Ol Sam 9:10 i mekem yumi sua long wanem? (Mo tu, yu luk futnot.)

¹⁴ Long taem bifo, samtaem Jehova i protektem ol man blong hem blong oli no kasem kil o blong narafala i no kilim olgeta i ded. Be hem i no mekem olsem evri taem. Baebol i talem se ‘ol samting we yumi no tingbaot’ i save kasem yumi evriwan. (Pri. 9:11) Mo tu, samtaem Jehova i letem ol man blong hem oli fesem fasin agens o narafala i kilim olgeta i ded, blong pruvum se Setan i wan man blong giaman. (Job 2:​4-6; Mat. 23:34) Mo sem samting i save hapen yet tede. Nating sipos Jehova i no tekemaot ol trabol we yumi fesem, be yumi save sua se bambae hem i neva lego ol man we oli lavem hem.d—Sam 9:10.

JEHOVA I MEKEM YUMI HAREM GUD

15. ?Olsem wanem prea, Baebol, mo ol brata mo sista, oli mekem yumi harem gud? (2 Korin 1:​3, 4)

¹⁵ Ridim 2 Korin 1:​3, 4. Samtaem yumi evriwan i wari, harem nogud, mo tingting blong yumi i foldaon. Maet yu stap fesem wan trabol naoia we i mekem yu harem nogud mo yu harem se yu stap yu wan. ?Olsem wanem? ?I gat wan man we i kasemsave long ol filing blong yu? Yes, Jehova i kasemsave. Be i no hemia nomo, hem i “stap givhan long yumi long olgeta trabol blong yumi, blong mekem yumi harem gud.” ?Olsem wanem hem i mekem yumi harem gud? Taem yumi krae i go long Jehova long prea, hem i stap givim “pis ya blong God we i bigwan tumas i bitim olgeta save blong yumi.” (Fil. 4:​6, 7) Mo tu, yumi harem gud taem yumi ridim ol tok blong Jehova we i stap insaed long Baebol. Baebol i soemaot se Jehova i lavem yumi, i tijim yumi blong yumi kam waes, mo i givim hop long yumi. Mo ol miting oli mekem yumi harem gud from we yumi joen wetem ol brata mo sista we oli lavem yumi, mo yumi harem ol gudfala toktok we i kamaot long Baebol.

16. ?Yu lanem wanem long ekspiriens blong Nathan mo Priscilla?

¹⁶ ?Olsem wanem Jehova i stap yusum Baebol blong leftemap tingting blong ol man blong hem mo mekem oli harem gud? Traem tingbaot ekspiriens blong Nathan mo Priscilla, we tufala i laef long Yunaeted Stet. Sam yia i pas, tufala i mekem desisen blong muv i go long wan ples we i nidim moa man blong prij. Nathan i talem se: “Mitufala i trastem Jehova se bambae hem i blesem traehad blong mitufala.” Be afta we tufala i kasem ples ya, tufala i fesem sam problem blong helt mo tufala i sot long mane. From samting ya, tufala i mas gobak long ples blong tufala, be tufala i gohed yet blong fesem ol problem blong mane. Nathan i talem se: “Mi mi stap tingting se, ?from wanem God i no blesem mitufala? ?Maet mi mekem wan samting we i no stret?” Be biaen, Nathan mo Priscilla i luksave se God i no lego tufala. Nathan i talem se: “Long ol hadtaem ya, mitufala i luk Baebol olsem wan gudfala fren we i leftemap tingting blong mitufala mo lidim mitufala. Taem mitufala i tingbaot nomo olsem wanem Jehova i givhan long mitufala blong stanap strong, be mitufala i no tingbaot ol trabol we mitufala i fesem, hemia i givhan long mitufala blong gat strong tingting se Jehova bambae i gohed blong givhan long mitufala long fiuja.”

17. ?Wanem i givhan long Helga blong i harem gud? (Mo tu, yu luk pija.)

¹⁷ Ol brata mo sista tu oli save mekem yumi harem gud. ?Olsem wanem oli mekem samting ya? Traem tingbaot ekspiriens blong wan sista we nem blong hem Helga, we i laef long Hangari. Blong plante yia, hem i fesem ol defdefren trabol we i mekem tingting blong hem i foldaon bigwan mo hem i harem se hem i nating nomo. Be taem hem i tingtingbak, hem i luksave se Jehova i yusum kongregesen blong mekem hem i harem gud. Hem i talem se: “Taem Jehova i luk se wok we mi mekem blong winim mane, blong lukaot long pikinini blong mi we i stap siksik, mo ol narafala trabol we mi fesem oli mekem se mi kam taed, oltaem hem i givhan long mi. Long ol 30 yia we i pas, evri dei hem i holem promes blong hem se bambae hem i givhan long mi taem mi harem nogud. Hem i yusum ol brata mo sista blong talem ol gudfala toktok long mi we i soemaot se oli stap tingbaot mi mo oli tinghae long mi. Plante taem mi kasem wan mesej, wan leta, o narafala i talem gudfala toktok long mi, stret long taem we mi mi nidim.”

18. ?Olsem wanem yumi save mekem ol narafala oli harem gud?

¹⁸ Yumi gat nambawan janis ya blong folem fasin blong God blong yumi, taem yumi mekem ol narafala oli harem gud. ?Olsem wanem yumi save mekem samting ya? Yumi save tekem taem blong lesin gud long olgeta, talem ol gudfala toktok blong leftemap tingting blong olgeta, mo mekem sam narafala samting blong givhan long olgeta. (Prov. 3:27) Yumi wantem givhan long eni man we i harem nogud, mo hemia i minim olgeta tu we oli no wosipim Jehova yet. Taem ol man raonabaot long yumi oli harem nogud, oli sik, o oli wari, yumi visitim olgeta, lesin gud long olgeta, mo serem ol gudfala tok blong Baebol wetem olgeta. Taem yumi folem fasin blong Jehova, “God ya we i mekem olgeta samting blong leftemap tingting blong man,” yumi save givhan long ol brata mo sista blong stanap strong long ol trabol we oli fesem, mo yumi save givhan tu long ol man we oli no wosipim Jehova, blong oli wantem save hem.—Mat. 5:16.

JEHOVA I STAP OLTAEM BLONG GIVHAN LONG YUMI

19. ?Jehova i stap mekem wanem blong givhan long yumi? ?Mo olsem wanem yumi save folem fasin blong hem?

¹⁹ Jehova i wantem tumas blong givhan long ol man we oli lavem hem. Hem i no save lego yumi taem yumi fesem ol trabol. Hem i lukaot gud long ol man blong hem, olsem wan papa we i lukaot gud long pikinini blong hem. Hem i lidim yumi, i givim samting we yumi nidim, i protektem yumi, mo i mekem yumi harem gud. Taem yumi leftemap tingting blong ol narafala mo givhan long olgeta, yumi stap folem fasin blong Papa blong yumi long heven. Nating se samtaem yumi save fesem ol trabol we oli mekem yumi harem nogud, be yumi sua se Jehova i stap oltaem blong givhan long yumi. Hem i promes long yumi se: “Yu no mas fraet, from we mi mi stap wetem yu.” (Aes. 41:10) Promes ya i mekem tingting blong yumi i strong se Jehova i stap wetem yumi. !Taswe yumi neva stap yumi wan!